Luuk 23

Baŋ kpogli Yeesu ba Pailɔt be wia

(Mat 27:1-2, 11-14; Maak 15:1-5; Jɔɔn 18:28-38)

1Denii nɛra la maa n wa chaalɛɛ la, izi kpogluu ba ba hɛri nabɔma Pailɔt be 2di ŋɔ wia ra chuguu, dí, “Baal naa ra du dɔmnɛ. U kaa ŋɔ lugɔ ya gilɛɛ turgi lampoo ra tɛɛ Koorizeŋ Siiza di ŋɔ lugɔ waabuu ɛɛ koorii, dí, waabuu Kristo.”

3Pailɔt pɛɛzuu, “Hinuu Jus hina koori laa?”

Yeesu ŋɔ, “Gunla hiŋ ŋɔwɛɛ naa, gunnɛ.”

4Pailɔt ŋɔ Kɔraawiizi Kizeehina Nabɔnzi ni nɛkpila la be, “Miŋwaa waa chɔgri maa nawɛɛ baal naa ni.”#1Pit 2:22

5Ba ra ŋɔ u be siaahmu ni, dí, u ra bagli nɛraa Juda hɛri maa di lii Galilii maa haŋ ba bɔnnaa di ra du dɔm.

Baŋ kpogli Yeesu di la Hɛrɔd be wia

6Pailɔt n wa nuu guŋ, u pɛɛzi baa lugɔ a baal ɛɛ Galilii hinuurɛa? 7Ba ŋɔ dí u lii Galilii bɔr la Hɛrɔd n ɛɛ koori labuu. Awia, Pailɔt ŋɔ bá kpogluu la Hɛrɔd be, dikuubɛɛwiai, Jɛrusalɛmnɛ Hɛrɔd faa du a saŋa.

8Ba kpogluu la u be. Hɛrɔd n wa na Yeesu, u bɔra sɔɔnuu werge, dikuubɛɛwiai, ɔɔ ra nuu u wiarɛ, di ra nyiŋŋi u vii ɛɛ wizeŋ bɛl ú na.#Luuk 9:9 9U pɛɛzuu wia guŋŋ, ka Yeesu waa wiimaa ŋɔwɛɛ. 10Di Kɔraawiizi Kizeehina Nabɔnzi ni Kɔraawiizi Hɔnzunna la ge chigɔ de, ŋɔ wia ra chuguu werge maa. 11Hɛrɔd ni u soojazi ge ra gbɛlluu di ra ɛɛu chɛɛtɛ, di kpa tagtajannanii bɛl laaluu, ka jaa gil ba bir kpogluu la Pailɔt be. 12A Hɛrɔd ni Pailɔt faa ɛɛ dɔmaa, ka bir wa ɛɛ dammuzi a hɔl hiŋ.

Ban di Yeesu kpui seriya wia

(Mat 27:15-26; Maak 15:6-15; Jɔɔn 18:39—19:16)

13Pailɔt chaali Kɔraawiizi Kizeehina Nabɔnzi, bol nabɔnzi ani nɛra, 14di ŋɔ ba be, “Ii faa kpogli baal naabuu ba n be, di ŋɔ u ra du dɔmnɛ. N pɛɛzuubuu nɛnnɛ, di binni a wia maa ii see, ka wia naa maa iiŋ kpawɛɛ sag u ni naa, maa a bɛl maa nawɛɛ u ni. 15Hɛrɔd gba waa wette na wiimaa u ni, ka gil u bir ba yaa be ɛŋ. Waa wiimaa ɛɛwɛ dɛg kpui. 16Awia, n daŋ tɛr u digni, ka pilluu ha.”

17Ba Gillikaali Hɔpizeŋ la biini, nɛra la ɔɔ weruu suŋŋi Pailɔt, ú pilli nɛra tɔi dia lizi nɛkpaŋkpaŋ tɛɛ baa. Awiarɛ u ŋɔ guŋ.

18Ka ba maa kpau ŋɔ, “Kpu baal naa ka pilli Barabas tɛɛ yaa.” 19Unla baŋ yir Barabas naa, faa du dɔm bɛllɛ a bol biini di kpu nɛra, ba lawuu tɔ dia.

20Pailɔt n na nyiŋŋi u pilli Yeesu ha wia, u kaa kuari suŋŋi a nɛra lugɔ ú pilli Yeesu ha. 21Ka ba ra pogzi, di ra ŋɔ, “Gil ba kpuu daakaŋlii ni! Gil ba kpuu daakaŋlii ni!”

22U kaa pɛɛzi baa buhorohiŋ, “Ka ɛrɛɛ? Bɛɛ wichɔgiirɛ u ɛɛi? Miŋwaa waa wiimaa nawɛɛ min niŋ kuu guŋ wia kpuu. Awia, n daŋ tɛr u digni, ka pilluu ha.”

23Ka nɛra la n suŋŋuu siaahmu ni, di ra pogzi werge ra ŋɔ ú gil ba kpuu daakaŋlii ni la, u jaa sɛɛ ba nua, 24di ŋɔ bá ɛɛ gunla banna nyiŋŋi. 25Ka baal la n faa du dɔm, di kpu nɛra ba tɔu dia ka nɛra jaa ba di waa suŋŋi Pailɔt lugɔ u pilluu la, ba pilli waabuu ka kpa Yeesu ge du ba nonee biini, bá ɛɛu ba kipar.

Baŋ kpaahzi Yeesu daakaŋlii ni wia

(Mat 27:32-44; Maak 15:21-32; Jɔɔn 19:17-27)

26Ba kpogluu kaali. Banna la la, ba ga chem Sairini hinuu Saimɔn ni, di u lii pir ra ba. Ba gil u kpa Yeesu daakaŋlii la sag u baŋaa di hiŋ Yeesu harbɔɔ ra la. 27Nɛkpila werge maa hiŋ baa. Haana baŋhina ge hiŋuu ra wii. 28Yeesu bir ŋɔ ba be, “Jɛrusalɛm biihaana, ií gilɛɛ kuu n wia ra wii guŋ. Ií ra wii dikuu iihinaa ni ii biizi wia, 29dikuubɛɛwiai, saŋa bɛl daŋ wa hel, bá ŋɔ, ‘Bɔsɔna hinaa banla n waa wette kpogli hizi, banla n waa biizi lullɛ ani banla biizi n waa ɔzɛɛ la.’ 30Denii bá ŋɔ bizenaa be,

‘Ií chogli yaa ni,’

di ŋɔ giŋgimee be,

‘Ií tɔ yaa ni.’#Hozi 10:8

31Di daalɛɛri waa fuuh, daahilaa waa nyaŋŋia?”

32Ba lau nɛchɔgaa banɛɛ ge jaa Yeesu ni di ra la bá ga kpu. 33Baŋ ga hel bɔr la banna yir Nyuhog Bɔr la, ba jaa kpaahzi Yeesu mari daakaŋlii ni, di kpaahzi a nɛchɔgaa la bɛl daakaŋlii ni, ú nodig keŋkere, di kaa kpaahzi bɛl ge ú nomɛɛl keŋkere. 34Yeesu suŋŋi wiizi ŋɔ, “N Mɛ, gil ba wichɔgaa naa tɛɛ baa, dikuubɛɛwiai, ba waa wii la banna ɛɛ naa zummɛ.” Baŋ ɛɛ guŋ tuŋ, ba ra ta kuna lugɔ bee, bá zum gunla ban niŋ bɔnni u laala.

35Nɛra baŋhina chi de ra binni. Jus hina nabɔnzi ge du de ra ɛɛu mɔmɔsia, di ra ŋɔ, “Baal naa faa ra lɛɛ nɛraa ra ha. Di u ɛɛ Kristo la Kɔraawiizi n lizɛɛ ú hum tɛɛ yaa labuu, amɔ, ú lɛɛ u hiŋ ya na.”

36Soojazi la ge ra ɛɛu chɛɛtɛ, di kpa sinnyɛg ba ŋɔ ú nyɔɔ, 37di ra ŋɔ, “Di Jus hina koorii hiŋ, lɛɛ i hiŋ.”

38Sɛbaa bɛl ge sag u nyuu, dí, JUS HINA KOORII KEŊ.#Jɔɔn 19:19-22

39Nɛchɔgaa la baŋ kpaahzɛɛ mari de la bɛl ge ra chagzi Yeesu, di ra ŋɔ, “Hiŋ lɛi Kristo laa? Lɛɛ i hiŋ, di kaa lɛɛ yaa jaa.”

40Ka unla hiŋ ŋɔ u be, “Gilɛɛ ra ŋɔ wia guŋ. Haa Kɔraawiizi ra ɔmaa? Yaa maanii ba ŋɔ ya siuzi la. 41Yaawaa kpui naa deŋloore, dikuubɛɛwiai, yaa wichɔgaa tɔnaa yaa ra di la. Ka baal naawaa, waa wichɔgii maa ɛɛwɛ.”

42Denii u ŋɔ Yeesu be, “Yeesu, di i wa di i kora ba, gilɛɛ waa suuh n wia.”

43Yeesu ŋɔ u be, “Gil n ŋɔ wibii maa tɛi. Zinaa, n nii maa daŋ zuu Kɔraawiizi bɔnanii la.”

Yeesu siu wia

(Mat 27:45-56; Maak 15:33-41; Jɔɔn 19:28-30)

44Wiizi n wa baŋŋɛ, bɔr bir biri, di tɔ ba hɛri maa guŋŋ wa hel duana saŋa ka haa chaani. 45Wiizi n waa kaa ra chaani la, patiisazenzeŋ la baŋ faa kpawɛɛ teŋ Kɔraawiizi Dia baambaaŋ la ge piili bɔra anɛɛ.

46Denii Yeesu lɔ wile werge, di ŋɔ, “N Mɛ, n kpa n dumaa ra du i nonee biini.”#Yira 31:5 Uŋ wa ŋɔ guŋ tuŋ, u siu.

47Soojazi kalfa nabɔma bɛl n chigɛ de, di na wia la maa n ɛɛwɛ la, denii u ra chɔli Kɔraawiizi, di ŋɔ, “Baal naa waa wichɔgii maa ɛɛwɛ ɛnɛ maa.” 48Nɛkpila la ge n faa chaalɛɛ bá binni wia la, baŋ wa na annii maa n ɛɛwɛ la, a zuu ba nyuuni werge maa. Ba kaali ba diini. 49Yeesu zunna ni haana la n hiŋuu lii Galilii hɛri la ge chi bɔɔnɛɛ, ka ra na wia naa maa.

Yeesu hugaa wia

(Mat 27:57-61; Maak 15:14-47; Jɔɔn 19:38-42)

50Baal bɛl ge faa du de, u sɔnnɛ faa Joosɛf. U bol ge ɛɛ Jus hina bol bɛl banna yir Arimatia. A baal ɛɛ nɛnaniirɛ. U wia maa deŋli. U faa ɛɛ nabɔnzi la n di Yeesu seriya la bɛllɛ, 51ka u faa waa sɛɛwɛ tɛɛ ba jina ni ba wiɛɛlaa la. U faa ra kpaŋ Kɔraawiizi Kora balaarɛ. 52A baal la Pailɔt be ga suŋŋuu ú wer lizi Yeesu daakaŋlii la ni. Pailɔt tɛu ŋmɛnɛɛ. 53U ga lizuu, di kpa pɛɛŋhuŋŋunanii vɔɔzuu, ka kpau la yembɛl baŋ tug bii bá hug nɛr de, ka ba haa waa nɛr maa hukke de, di ga hug de. 54A hɔl hiŋ ɛɛ Alajima duanaa, baŋ ɔɔ ɛɛ wiimaa sirya ka hɔpizi ba Heezaa Hɔpizii la wa zuu, duana la ni.

55Haana la n faa hiŋuu lii Galilii hɛri la, hiŋ baa kaali bɔr la baŋ huguu la ga na de ani gunla baŋ dawuu la, 56ka la bol ga ɛɛ kunsɔɔhrisuma ni nuu aŋhina sirya. Ka ba heezi ba Heezaa Hɔpizii la, gunla ba gbɔg n baglɛɛ la.

Currently Selected:

Luuk 23: vag

Highlight

Copy