Roukos 19

19 Ik.

1Orowa, Shinuma Yeriko kotan otta ahun, aige, 2nei kotan kush korʼan nisa ruwe me. Awa, Zakkeos ani an reihei koro, yaku-etaye utara esapane guru an; shinuma oteknu guru ne ruwe ne. 3Nei guru Yesu nekon a an guru ne ya eraman kuni hunara gusu Shinuma nukan rusui ruwe ne; koroka, inne utara okai gusu nukara eaikap, ikkewe ram guru ne ruwe ne gusu ne na. 4Orowa, nei guru hoshiki no hoyupu hine Shinuma nukara kuni ne kuwa-no-ki chikuni nimu nisa ruwe ne; Shinuma nei rukari kush kusu ne gusu ne na. 5Orowa, Yesu nei ushike un ek chiki hepuni ingara hine shinuma otta ene itak-hi :— Zakkeos, tunashi no ran; tanto e kot chisei ta Ku reushi kusu ne na, ari itak. 6Tata otta shinuma tunashi no ran hine yaikopuntek wa Yesu tura nisa ruwe ne. 7Orowa, utara anak ne nei ambe nukara chiki obitta oromam wa ene itak-hi :— Shinuma chikokatpak guru kot chisei ta reushi gusu oman ruwe ne. 8Orowa, Zakkeos ash wa Utarapa otta ene itak-hi :— Utarapa, ingarʼan, ku korobe nimara pak no otek-sak utara otta ku eungerai; samata, oheuge sak no inan guru orowa no ku sangere yak anak ne ine shui pakno ku hoshipire ruwe ne, ari itak. 9Orowa, orota Yesu ene itak-hi :— Tanto kashiobiuki ambe anak ne tan chisei orun ek an, nei guru Abraham koro poho ne ruwe ne gusu ne na. 10Inambe gusu ne yakun, Ainu Poho anak ne aturainu wa okai utara hunara wa kashiobiuki kuni gusu ek nisa ruwe ne gusu ne na.

11Orowa, utara anak ne tap okaibe nu korʼan ita Shinuma naa itak omare wa itak-maukushte-itak ani ye, inambe gusu ne yakun, Yerusarem kotan ta ebange, orowa, okai utara Kamui moshiri nani ek kusu ne kunak ramu nisa ruwe ne gusu ne na. 12Tambe gusu, nei utara otta Shinuma ene itak-hi :— Shine ottena ne guru an, shinuma yaikota gusu moshiri uk wa orowa no hoshipi kuni ehangeko no an moshiri orun arapa nisa ruwe ne. 13Orowa, koro wa niu ne usshiune utara hotuyepukara wa orota ichen wanbe koropare hine, ku hoshipi pakno iraugetupa yan, ari itak. 14Koroka, koro kotan un utara nei nishpa etuune gusu nei oshi utara teshkara hine :— Tan guru anak ne iteki un esapane kuni chi emaka ruwe ne, ani an itak ani itakte nisa ruwe ne. 15Orowa, nei nishpa uk kuni moshiri uina wa hoshipi chiki, ichen akore usshiune utara iraugetupa wa nei pakno eyaiepirikare orushpe nu kuni gusu orota araki kuni ikashpaotte nisa ruwe ne. 16Orowa, hoshiki no an guru shinuma kotchake un ek wa :— Utarapa, E koro shine ichen auak ne naa wan ichen epirikare nisa ruwe ne, ari itak. 17Orota, shinuma ene itak-hi :— pirika, iki pirika usshiune guru e ne ruwe ne! shiri ponbe gusu eani ikipniutesh ari anukara gusu, wan machiya esapane yan. 18Orowa, tutanu an guru ek, aige, Utarapa, e koro shine ichen anak ne ashikne ichen epirikare nisa ruwe ne, ari itak. 19Orota shinuma ene itak-hi :— Eani ne yakka ashikne machiya esapane yan, ani itak. 20Orowa, moshima an guru ek wa :— Utarapa, ingaraʼn, senkaki otta kokarakari wa an ku shikkashima e koro ichen teda an: 21kuani anak ne e ko-ishitoma ash, aokai anak keutum niwen guru e ne ruwe ne gusu ne na: shomo ande ambe e uk, shomo e etoitap aokai nange ruwe ne na. 22Orota shinuma ene itak-hi :— Wen usshiune guru, e koro paro wano san itak ani ku e koipishi ash kusu ne. Kuani anak ne keutum niwen guru ku ne wa, ku ande shomoki okaibe ku uk, shomo ku etoitap ku nange shiri eani eramʼan; 23tambe gusu, ku ek ita nei ambe risoko tura no ku uk easkkai kuni ne nep gusu ginko otta ku goro ichen e ande shomoki ya? 24Orowa, samaketa roshki wa okai utara otta ene itak-hi :— Nei guru orowa no koro shine ichen uk wa, wan ichen koro guru otta kore yan, ari itak. 25Utarapa, shinuma wan ichen kon ruwe ne otta nei utara ye nisa ruwe ne. 26Echi otta Ku ye :— Nen ne yakka koro guru otta akore kusu ne; koroka, koro shomoki guru orowa no koro wa an okaibe ne yakka auk kusu ne na. 27Samata, en epokba wa ku esapane kuni kopan utara eteun tura wa en kotchaketa ronnu yan, ari itak.

28Orowa, Shinuma tap okai itak ye okere chiki, nei utara kotchaketa oman wa Yerusarem kotan orun hemesu nisa ruwe ne na.

29Orowa, Shinuma Betpage newa Betania kotan un Kanran-ush ani aye nupuri otta karange no ek chiki, koro koikara utara tu niu payere wa ene itak-hi :— 30Ikushta an kotan oruu paye: nei kotan orun echi ahup korʼan ita ainu naa shomo o ashirikote wa an pon roba echi nukara kusu ne; nei ambe pita hine nimba wa araki yan. 31Orowa no, nen ka nep gusu nei ambe echi pita ya? ari an itak ani ye guru an yak anak ne, Utarapa kon rusui, ani ye yan. 32Orowa, aomande utara paye wa orota Shinuma ye korachi nukara. 33Awa, pon roba pita korʼan ita koro utara nei utara otta :— 34Nep gusu pon roba echi pita ya? ani itak. Orota nei utara anak ne :— Utarapa nei ambe kon rusui, ani ese-hi. 35Orowa no, Yesu otta nimba wa araki: aige, pon roba kashiketa koro chi mip ande wa Yesu ore nisa ruwe ne. 36Samata, oman aine utara ru otta koro amip piraspa nisa ruwe ne. 37Orowa, karange no ek wa Kanran-ush nupuri ran orogeta an ita, obitta no okai inne topaha un koikara utara anak ne nukara okere obitta no okai kiroro an ikip gusu yaikopuntek hine rui hau ani Kamui iramye heashi wa ene itak-hi :— Utarapa reihei ankushkerai ek Moshiri shikkashima gurʼanak ne anunuke ne: 38Kando oshiketa itomo an, iyotta rik un ushiketa aeoripak ambe an na, ari itak. 39Orowa, topaha utara tumugeta okai Parisee un utara anak ne Shinuma otta ene itak-hi :— Epakashnu guru, E koro koikara utara kopao wa un kore, ari itak. 40Orowa, Shinuma ese wa ene itak-hi :— Tan okai utara mo no okai chiki, shuma anak hawe ashte kusu ne na.

41Orowa, shinuma ehange no ek wa nei machiya nukara chiki, gusu chish hine ene itak-hi :— 42Eani ka, eani, tan toho ta e gusu an itomo irenga e eramʼan yakun humi! Koroka, tane e shiki otta anuina ruwe ne. 43E epokba utara anak ne e okari no sakma roshki hine neita ne yakka iteki e soine kuni ne e nikkotama kusu ne, 44samata, eani newa otta okai poho utara newa shiri pakno hokushte kusu ne toho eani gusu ek kusu ne; nei utara shine shuma ne yakta shuma ukata moshima no ande shomoki kusu ne; eani anak ne ahotanukara paki i erampeutek nisa ruwe ne gusu ne na, sekoro itak.

45Orowa, Shinuma Kamui kora kenru orun ahun hine eiyok utara soyumbare heashi, aige, nei utara 46otta ene itak-hi :— Ku kora kenru anak ne inonno-itak ki gusu an chisei ne kusu ne, sekorʼambe chieshinnuye wa an: koroka, echi utara ikka utara kot chisei ne echi kan nisa ruwe ne na, sekoro itak.

47Orowa, Shinuma kesto Kamui kora kenru ta epakashnu korʼan nisa ruwe ne. Koroka, Kamui kora kenru esapane utara hemhem, kambi-nuye utara hemhem, utara koro pase utara hemhem, 48Shinuma raige kuni hunara ruwe ne: awa, hemanda ki kuni i, nei utara esanniyo eaikap: inambe gusu ne yakun, obitta no okai utara Shinuma nu gusu ko-okai shiriki an nisa ruwe ne gusu ne na.

Currently Selected:

Roukos 19: AINU

Highlight

Copy