John 11
11
Lazarus kaa puunipimaatisit
1Chii ihtaau naapeu Lazarus e ishinihkaasut, e chii mista aahkusit. Anite Bethany kaa ishinihkaateyich ihtaawiniyuu chii wiichuu. Uwiichisaaniskwem Mary ekw maak Martha chii wiichimikuu. 2Eukuu Mary kaa kutapinamuwaat wiihchimaakuhuuniyuu Utipeyihchikeu usitiihch kaye ustikwaaniyaapiih kaa aapachihtaat e kaasiihamuwaat usitiyuuh. Eukuu iskweu wiichishaanh Lazarus kaa aahkusiyich. 3Lazarus maak wiichishaaniskwem chii nituweyihtamiyuuh chechii nituu wiihtamwaakanuyich Jesus e aahkusiyich aniyuu uwiichewaakan kaa saachihaat.
4Iskutak maak Jesus piyehtahk uyuu chii iteu, “Aat aniyuu naashch e aahkusit namui kata uhchi puunipimaatisiyuu. Ispayuu uu chechii nuukuniyich Chishemanituu uchisteyihtaakusuwin, kaye maak ekut che uhchi chisteyihtaakuhaakanuyich Chishemanituu Ukusisa.”
5Jesus chii saachiheu aniyuu Martha kaye aniyuu wiichishaaniskwemiyuu kaye aniyuuh wiichishaaniyuu Lazarus. 6Iskutak maak kaa wiihtamuwaakanuut e aahkusiyich Lazarus yaapach miin niishu chiishikaau chii ihtaau anit aniyuu ihtaawiniyuu kaa ihtaat. 7Ekw kaa itaat uchischinuhamuwaakanh, “Ituhtetaau miin nete Judea aschiihch.”
8Chii itikuu maak aniyuuh uchischinuhamuwaakanh, “Chiskutamaachesuu, namui weskach kaa wii nipahiiskwaau e paahpimusinaatahuuskwaau anichii Jewa iinuuch yaapach maak miin kaau chii wii ituhten anite.”
9Ekw Jesus kaa nishkweushihaat e itaat, “Niishushaap tipahiikanh ihtakun peyakwaau e chiishikaach. Awen pimuhtete e chiishikaayich namui chika uhchi pahchishinuu wesh waapahtam aniyuu waashtewiniyuu utah aschiihch kaa ihtakuniyich. 10Pimuhtete awen e tipiskaayich chika pahchishinuu wesh namui ihtakuniyuu waashtewiniyuu anit e ihtaat.” 11Eukw uyuu kaa itwet Jesus ekw miin kaa ati itwet, “Shaash nipaau chiwiichewaakanuu Lazarus. Nika nituu pekunaau.”
12Chii itikuu maak uchischinuhamuwaakanh, “Utipeyihchikeu, nepaakwe, miin wesin chika miyu pimaatisiyuu.”
13Jesus maak shaash chii chischeyihtam Lazarus e chii puunipimaatisiyich mikw maak uchischinuhamuwaakanh namui uhchi chischeyihtamiyuuh uyuu ekw kaa iteyimaatwaau Jesus nipaau e iteyimaayich aniyuu Lazarus. 14Ekw Jesus kuiskw kaa wiihtamwaat e itaat, “Shaash namui pimaatisiyuu Lazarus. 15Nimiyeyihten ekaa uhchi ihtaayaan mekwaach ekaa kaa miyupayit Lazarus ekw maak che nihiipayihch chechii taapweyimiyekw. Maachiitaau nituwaapamaataau.”
16Thomas, peyakw an kaa niishitwaau wiichishaanh kaa ishinihkaataakanuut, chii iteu aniyuu wiich chischinuhamuwaakanh, “Misiwe ekush e tashiihkw wiichewaataau Jesus kaye chiyaanuu chechii nipahiikuyihkw nipahaakanuute.”
Jesus eukw wanishkaanuweu nipuwinihch uhchi kaye wiya eukw upimaachihiiweu
17Iskutak maak Jesus tekushinit anite chii wiihtamuwaakanuu shaash neu chiishikaau e chii ishpish chiskahaakanuyich Lazarus. 18An maak ihtaawin Bethany kaa ishinihkaatech peshuch Jerusalemihch chii ihtakun, wiyesh niishu aschiiyuu tipahiikan chii ishpishinaakun anite Jerusalemihch uhchi. 19Mihchetu maak Jewa iinuuch chii pechi nituwaapameuch Martha ekw maak Mary e pechi nituu kaachiichihaatwaau aniyuu wiichishaaniyuu e chii puunipimaatisiyich.
20Iskutak maak Martha piyeyihtahk Jesus e takushiniyich chii wiiwiyuu che nituu nachishkawaat, ekw wii Mary ekut anit e ihtaatwaau kaa ihtaat. 21Ekw Martha kaa itaat aniyuu Jesus, “Utipeyihchikeu, shaash utah chii ihtaauhpane namui chipaa uhchi puunipimaatisiyuu niichishaan. 22Mikw maak nichischeyihten Chishemanituu che ihtuutamaask mikw taan che ishi nitutamuwaaute.” 23Jesus maak chii iteu aniyuu Martha, “Miin chika pimaatisiyuu chiichishaan.”
24“Nichischeyihten taapwe miin che wanishkaat maahchishtai chiishikaayiche,” chii iteu Martha.
25Jesus kaa itaat, “Eukw niya kaa wanishkaanaat aweyuu e chii nipiyich kaye kaa miiwet pimaatisiiwiniyuu. Awen che pechi taapweyimukwe chika pimaatisiyuu aat e chii nipit. 26An awen kaa pimaatisiit e pechi taapweyimit namui wiiskaat chika puunipimaatisiyuu. Chitaapwehten aa uu kaa ititaan.”
27“Ehe, Utipeyihchikeu,” chii iteu Martha. “Nitaapwehten chiya e aawiyin aniyuu Chishemanituu kaa pechi itishahwaat, kaye chiya e aawiyin Chishemanituu Ukusisa, aniyuu kaa itwet cheshtinaash che takushiniyich utah aschiihch.”
Jesus kaa maatut
28Iskutak Martha kaa itwet uyuu chii nituwaapameu wiichishaaniskwem Mary ekw kaa itaat pehkaach e ayimit, “Chischinuhamaacheu ihtaau utah. Chiwiishaamukw” 29Iskutak piyehtahk Mary uyuu chii pisikushipihtaau ekw kaa wiiwiit che nituu nachishkawaat Jesus. 30Mikw maak eshkw namui uhchi takushinuu Jesus anit aniyuu ihtaawiniyuu, anit kaa nachihiikut Martha eshkw ekut kaa pechi ihtaat Jesus. 31Anichii maak Jewa iinuuch kaa wiitapimaatwaau Mary e wii kaachiichihaatwaau chii nuusuupaistuweuch iskutak wiyaapamaatwaau naashch e yaaschipayihuyich e ati wiiwiiyich wesh chii iteyihtamuch anite aniyuu kaa chiskahaakanuyich wiichishaaniyuuh ekute e ituhteyich chechii nituu maatuyich.
32Iskutak maak Mary tekushihk anit Jesus kaa ihtaayich wiyaapamaat maak chii uchihchiihkunapayihuu anite usitiihch, e itaat, “Utipeyihchikeu, shaash chii ihtaauhpane namui chipaa uhchi puunipimaatisiyuu niichishaan.”
33Iskutak Jesus wiyaapamaat Mary e maatuyich kaye aniyuu Jewa iinuuh kaa pechi wiicheukuyich e maatuuyitwaau naashch chii taahtinikuu eyuu maak naashch chii misimiteheu. 34Ekw kaa itwet, “Taanite kaa chiskahaakanuut.” “Aashtam Utipeyihchikeu pechi waapahtaa,” chii itikuu.
35Chii maatuu Jesus. 36Ekw anichii Jewa iinuuch kaa itwetwaau, “Taapwe chii saachihekupane aniyuu Lazarus.”
37Chii ihtaauch maak paashch e itwetwaau, “Chii ihtuutuweu aniyuu ekaa kaa waapahtamiyich naapeu chechii waapahtamiyich. Taanite wehchi ekaa uhchii ihtuutuwaat Lazarus ekaa chechii nipiyich.”
Jesus kaa wanishkaanaat Lazarus nipuwinihch uhchi
38Jesus maak miin chii muushihtaau naashch e misimitehet. Ekw kaa ituhtet anite aniyuu kaa waatakwaapiskahiikanuyich anite kaa chiskahaakanuyich Lazarus, chii chipikaapuuhaakanuyikupanenh e misichihtiyich asinii anite e uhchi piihchaanuyich. 39Chii itweu Jesus, “Iichetihtipinaahkw an asinii.” Ekw kaa itwet Martha aniyaa Lazarus wiichishaaniskwem, “Utipeyihchikeu, shaash chika miyaakun, wesh shaash neu chiishikaau kaa ishpish nipit.”
40Ekw Jesus kaa itaat aniyuu Martha, “Namui aa shaash chuuhchii wiihtamaatin, taapwehtamane che waapahtamuwat Chishemanituu uchisteyihtaakusuwin.” 41Ekw kaa iichehtahaatwaau aniyuu asinii. Jesus maak e tastasaapit chii iteu, “Nuuhtaawii chinanaaskumitin e pechi nituhtuyin. 42Nichischeyihten muush e pechi nituhtuyin, mikw maak nititwen uu chechii taapwehtahkwaau uchii iinuuch chii e chii pechi itishahuyin.” 43Iskutak maak uyuu kaa itwet Jesus chii chisheweu e itwet, “Lazarus, pechi wiiwiih.” 44Chii pechi wiiwiyuu an naapeu kaa nipit, utihchi kaye usit e wiishkweyaapahkaateyikwaau machunishiyuu kaye e maahkupiteyich utaashtamuhkw. Ekw Jesus kaa itaat, “Aapihkunaahkw, che pachishtinekw.”
Jewa iinuuh kaa niikaanishkuwaatwaau kaa aayimuutahkwaau chechii nipahaakanuyich Jesus
Matthew 26.1-5; Mark 14.1, 2; Luke 22.1, 2
45Mihchetu maak Jewa iinuuch kaa pechi chiiutamaatwaau Mary chii waapahtamuch taan kaa ihtiyich Jesus kaye chii taapweyimeuch. 46Yaapach maak pasch chii nituwaapameuch aniyuuh Phariseeh e wiihtamuwaatwaau taan kaa ihtiyich Jesus. 47Ekw anichii Phariseech kaye kaa niikaanapitwaau ayimiheuchimaauch chii nishtuuneuch kaa uchimaawiitwaau kaa niikaanishkuwaayich iinuu e itaatwaau, “Taan che ihtiihkw. Naashch mihchetu maamishkaach chekwaayuu e ishi ihtuutahk uu naapeu. 48Pachishtinihkwe chechii ihtit uyuu taan e ihtit misiwe aweyuu chek chika taapweyimikuu kaye maak anichii Rome tipeyihchichesuuch chika wanaachihtaauch anite aniyuu maauch kaa payehkaniyich chichisheayimiheukamikunaanaayuu kaye misiwe chiyaanuu Jewa kaa itiskaanesuuhkw chika wanaachihiikunuuch.”
49Peyakw maak an ayimiheuchimaau Caiaphas kaa ishinihkaasut mekwaach kaa chisheayimiheuchimaaut aniyuu kaa pipuniyich chii iteu, “Taapwe namui chichischeyihtenaawaau chekwaan. 50Namui aa chichii nisituhtenaawaau uste che miyupayekw peyakw naapeu chechii nipistamuwaat iinuuh ishpish wii misiwe chiyaanuu Jewa kaa itiskaanesiihkw chechii wanaachihiikuyihkw.” 51Wiya mekwaach Caiaphas e chii chisheayimiheuchimaaut aniyuu kaa pipuniyich eukw uyuu wehchi miikut Chishemanituu uyuu chechii itwet e chischiwehiichet, chii iteu Jesus che nipuushtamuwaayich Jewa kaa itiskaanesiyich iinuuh. 52Mikw maak namui mikw Jewa iinuuh che nipuushtamuwaayich, misiwe kaye aniyuuh Chishemanituu utiiniimiyuuh paahpiiwe kaa ihtaayitwaauh che maamuunaayich, peyakutenuu chechii ishinaakusiyich.
53Aniyuu maak kaa chiishikaayich ekut kaa uhchi chihchipayihtaatwaau e naanituu chischeyihtahkwaau taan che ihtitwaau chechii nipahaatwaau Jesus. 54Eukw maak uyuu wehchi ekaa uhchi ihtaat Jesus anite e mihchetinaanuyich anite Judea aschiihch, chii chistuhteu ekw anite pakwaatiskamikaahch peschiish kaa ihtakuniyich ihtaawiniyuu Ephraim kaa ishinihkaateyich ekut anit kaa ihtaat kaye uchischinuhamuwaakan ekute kaa ihtaayich.
55Chii peshunaakun maak an Jewa miyaaskaacheu makushewin. Mihchetu awenich chii pechi ituhteuch Jerusalemihch nanaahkuu ihtaawinihch e uhtuhtetwaau e pechi takushihkwaau chechii ihtuutahkwaau taan kaa ishi wiishteyich ayimihewin wiishuwewinihch chipaa ihtuuch chechii payehchisiitwaau. 56Mihchetu maak uchii iinuuch chii naanituwaapameuch Jesus anit chisheayimiheukamikuhch e maausukuutwaau e ishi kakwechimitutwaau, “Taan e iteyihtaman chiya, chika pechi naachi makusheu aa chititeyimaau.” 57Anichii maak kaa niikaanapitwaau ayimiheuchimaauch kaye anichii Phariseech chii itashuweuch yaaitei che wiihtamiyich aweyuuh chischeyimaayichen taanite e ihtaayich Jesus chechii nituu maakunaakanuyich.
Currently Selected:
John 11: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
