Luke 12
12
Jesus kaa yaakwaamimaat uchischinuhamuwaakanh Phariseeh utayimihehkaasuwiniyuu
Matthew 10.26, 27
1Mekwaach maak an e ihtinaanuuhch, mihchetwaau chishemitaahtumitanuu iinuuch chii waaskaaniipuuch e nituhtawaatwaau Jesus. Aniyuu e ishpish mihchetitwaau mitun chii katahkusiteskaatituuch. Niishtam maak Jesus chii iteu uchischinuhamuwaakan, “Yaakwaamiishtuwaahkuch Phariseech aniyuu e iteyihtaakusitwaau wesh ayimihehkaasuuch. Mwehch palet uhpisikan kaa iteyihtaakuhch ekun e iteyihtaakuniyich aniyuu e ihtitwaau. 2Wesh an chekwaan ekaa kaa nuukuhch chika nuukuhtaakanuu anite e waashtech. Misiwe chekwaan chiimuut kaa ihtuutaakanuuhch chika chischeyihtaakun. 3An taan kaa ishi chiimuut ayimihiitwaau awenichii e tipiskaach eshkw chika pehtaakun e chiishikaach. An taan kaa ishi chiimuut ayimiyin eshkw misiwe kata wiihtaakun misiwe awen chechii chischeyihtahk.”
An awen chipaa kushtaanuu
Matthew 10.28-31
4“Chiwiihtamaatinaawaau niwiichewaakanitikw, ekaawii kushtaahkw awen kaa nipahaat aweyuu wesh taapaa wiyesh chika chii ihtuutaweu ahchaahkw. 5Chipechi wiihtamaatinaawaau awen an eukw chipaa kushtaawaau. Chishemanituu eukw e iteyihtaakusit chechii kushtekw wesh wii ayaau tipeyihchichewiniyuu chechii ishiwepinitaakw machishkutehch iskutak nipiyekwe. Ehe, nituhtuukw eukw uu taapwe Chishemanituu chipaa kushtaawaau.”
Chishemanituu chinaanaakatuweyimikunuu
6Ekw Jesus kaa itwet, “Namuii naashch aapateyihtaakusuuch e ayaapishiishitwaau piyeshiishach, mikw niishu shumaachiish itachihtaakusuuch niyaayin e utinaakanuutwaau, yaapach maak namui waach peyakw wanichischisiituutaakuuch Chishemanituu. 7Chiyawaau maak uste chititeyimikuwaau Chishemanituu ishpishaat aniyuu piyeshiisha e iteyimaat, waawaach chistikwaaniyaapiiwaauh chii achihtaakanuu e tahtwaapekahkwaau. Ekaawii maak kushtaachikw wesh yaapach chiyawaau uste chititeyihtaakusinaawaau e kanawaapamitakw Chishemanituu ishpishaat e mihchetitwaau piyeshiishach.”
E waawiihtamekw e chischeyimekw Jesus Christ
Matthew 10.32, 33; 12.32; 10.19, 20
8“Awen wiihtamuwaate kutak aweyuu e taapweyimit, Iinuu Ukusisa kaye kata itweyuuh e utiiniimitutaakut anite Chishemanituu utenchilamh e ihtaayich. 9Ekw maak ihtaate awen e itaat aweyuu ekaa taapweyimit, nika itaayuuh kaye Chishemanituu utenchilam, ‘Namayeu an nitiiniim.’ 10Misiwe awen kaa machaayimuumaat Iinuu Ukusisa katachii wepeyihtamuwaakanuu. Ekw maak an awen kaa paashtaamaat Kaa payehchisiyich Ahchaahkwa namui kata uhchi wepeyihtamuwakanuu.” 11Ekw Jesus kaa itwet, “Chiishpin wiyaaskunicheukamikuhch ituhtahiikuyine maak Jewa ayimiheukamikuhch maak Chisheuchimaau e ihtaayich chechii wiyaaskunikuyin ekaawii mukushkaateyihta taan che itweyin kaye taan che ishi nishkweushihtwaayin chechii uhchi wiichihiisuyin. 12Wesh Kaa payehchisiit Ahchaahkw chika chiskutamaakw taan nihaau chipaa itwen an mekwaach ishi nachishkamane.”
Kaa miisitisiit naapeu
13Ekw peyakw anit naapeu kaa nituhtawaat Jesus, chii iteu, “Chiskutamaachesuu, ayimihii maa niichishaan chechii tetaaunamuut an kaa ishi nakatamaakuyaahch aniyaa nuuhtaawiinaan.” 14Ekw Jesus kaa itaat, “Taapaa namayeu niya kaa wiyeyihtahk taanite che ishi tetaaunikanuyikwaau awen uchekwaanim maak kaa paahpachishtinamuwaat aweyuu uchekwaanimiyuu.” 15Ekw Jesus misiwe kaa itaat uyuu, “Yaakwaamiikw, ekaa chechii mushteneyihtamaacheyekw e ishpish wii ayaayekw chekwaan. Wesh taapaa aniyuu e ishi weyuutisiit awen maak naashch e miisitisiikwe, namiyeyuu aniyuu che ihtuutaakut chechii uhchi ayaat kaachiche pimaatisiiwiniyuu.”
16Ekw Jesus kaa wiihtamuwaat uyuu chischinuhamaacheu tipaachimuwiniyuu e itaat, “Peyakwaau chii ihtaau e miisitisiit naapeu, e chii ayaat nihtaauchihchikan aschiiyuu naashch e miyu nihtaauchiniyikwaau unihtaauchihchikanh. 17Ekw kaa iteyihtahk, ‘Shaash namui nitepishchinitaan taanite misiwe che chiskashtaayaan uyuu kaa nihtaauchihtaayaan nihtaauchihchikan. Ekw kaa maamituneyihtamihiikut taan che ihtit. 18Uu maak nika ihtin chii itweu, nika piikuhen aniyuu misiwe nitashtaasunikamikw ekw che ushihtaayaan etituu e mishaakwaau chechii chiskashtaayaan misiwe kaa ishi nihtaauchihtaayaan kaye maak misiwe nichekwaanim. 19Ekw maak che itisuyaan, nuwach niweyuuchihtaan chekwaayuu anite nitashtaasunikamikuhch mihchetu pipun chechii uhchi ispayaan. Ekw maak namui nika uhchi aapatisin. Shaash nika weyuuchihtaan miichim kaye e minihkweyaan chekwaan ekw maak che muuchikahtaayaan.’ 20Ekw Chishemanituu kaa itikut, ‘Taapwe chiwiyeshimitisun, anuhchiish uu che tipiskaach chipimaatisiiwin chika utinikanuu. Awen maak che ayaat misiwe aniyuu kaa chiskashtamaasuyin chekwaayuu.’ ”
21Jesus kaa itwet, “Ekun maak mwehch e ishinaakuhch awen wiya kaa maauchihtamaasut chekwaayuu. Namui miisitisiyuu iteyimikuu Chishemanituu e kanawaapamikut.”
E ispeyimutuuhkw Chishemanituu
Matthew 6.25-34
22Ekw Jesus kaa itaat uchischinuhamuwaakan, “Eukw maak uu wehchi ititakuch ekaa chechii mukushkaateyihtamekw miichim taan netuweyihtamekw chechii uhchi pimaatisiyekw maak kaye chekwaan che chichishkamekw. 23Wesh pimaatisiiwin uste chisteyihtaakun ishpishaat miichim, ekw maak miiyuu uste chisteyihtaakun ishpishaat e chichishkaman chekwaan. 24Maamituneyimach maa kaahkaachuuch, namui nihtauchihtaauch chekwaayuu kaye namui maauchihtaauch miichimiyuu, namui ushihtaauch ashtaasunikamikw maak teshipitaakan anit che ashtaatwaau umiichimuwaau yaapach maak Chishemanituu ashamikuuch. Chiyawaau maak etituu mistahii chititeyihtaakusinaawaau ishpishaat anichii piyeshiishach. 25Chekwaan wehchi naashch aayimeyihtamihiikuyekw chekwaan ekaa maak etituu chii chinuhtaayekw chipimaatisiiwinawaau. 26Ekaa chii ihtuutamekwe etituu chineushiish chechii pimaatisiyekw e mukushkaateyihtamekw uhchi, chekwaan maak che uhchi mukushkaateyihtamihiikuyekw uyuu chekwaayuu. 27Maamituneyihtamukw maa waapukunisha taanite wehchi nihtaauchihkwaau, namui aapatisiimakan, yaapach maak naashch miywaashuu e kanawaapahtaakanuuhkwaau. Chiwiihtamaatinaawaau, aat aniyuu e chii ishpish miisitisiit aniyaa chisheuchimaau Solomon namui yaapach uhchi ishpish miywaashiyuu uchekwaanim e ishinaakuniyikwaauh waapukun. 28Wesh Chishemanituu nihtaauchihtaau mashkushuu che miyunaakuhch aschii. An mashkushuu e miyunaakuhch anuhchiish kaa chiishikaach, waapahche shaash kata chii pashteuh. Ekw maak taapwe Chishemanituu nehtaauchihtaakwe mashkushuu chechii uhchi miywaashich aschii cheshtinaash chika chii ihtuutamaakuwaau chechii miitaakw chekwaayuu che chichishkamuwekw. Taapwe kaa apishaashich chitaapwehtamuwinawaau.”
29“Ekaawii maak muush chika uhchi maamituneyihtamihiikunaawaau chekwaan che miichiyekw kaye chekwaan che minihkweyekw. 30Misiwe awen e itiskaanesit utah aschiihch ekaa kaa taapweyimaat Chishemanituu muush maamituneyihtamihiikuu uyuu chekwaayuu. Kuuhtaawaau maak chischeyihtam misiwe taan e ishi nituweyihtamekw. 31Uste iteyihtaakun niishtam chechii naanituu chischeyihtamuwekw Chishemanituu uchisheuchimaawin ekw maak che ihtuutamekw taan e ishi nituweyihtahk Chishemanituu ekw maak mikw che ishi miitaakw aniyuu chekwaayuuh kaa nuuhtepayekw.”
Miisitisiiwin kihchikiishikuhch kaa ihtakuhch
Matthew 6.19-21
32“Ekaawii sechisikw, e chikawaashishiyekw, wesh Kuuhtaawaau kihchikiishikuhch kaa ihtaat naashch taapwe naheyihtamihiikuu chechii miitaakw uchisheuchimaawin. 33Ataawekw aniyuu chekwaayuu e ishi tipiyeusiyekw ekw che miyekuch kaa chistimaatisiitwaau aniyuu shuuliyaayuu. Wesh uu ishi ihtuutamekwe Chishemanituu chika tipahamaakuwaau nete kihchikiishikuhch. Wesh taan che ishi tipahamaataakw Chishemanituu namui nihtaa chika uhchi iskwaapayuu wesh namui nihtaa chika chii kachemutamaakunaawaau kaye manichuushach namui chika chii wanaachihtaauch. 34Taanite kenuweyihtaakuhch chimiisitisiiwinawaauh ekute muush che ishi maamituneyihtamekw.”
Jesus kaa aayimuutahk Chishemanituu uchisheuchimaawiniyuu
35“Ayeskuwiikw e ashuwaapamekw Utipeyihchikeu, mitun tekash chipaa itaaspisunaawaau kaye chiwaashtenamaakanawaau chipaa saskahenaawaau. 36Muyaam aapachihaakanich chipaa ishinaakusinaawaau e ashuwaapamaatwaau uchimaamuwaauh chechii pechi chiiweyich e chii naachimakusheyich e niipuunaanuyich. Takushiniyichen tiiwehch chika aapahamuweuch. 37Kata shaweyihtaakusuuch maak anichii aapachihaakanich miskaakutwaawenich aniyuu uchimaamuwaauh e chii ayeskuwiishtawaatwaau. Chiwiihtamaatinaawaau maak, an uchimaau kata ayeskuwiyuu wiya kweschiipan chechii ihtuutamuwaat taan kaa ishi ihtuutamaakut ekw maak che wiishaamaat chechii miichisuyich, mechim wiya chika wiishtuweu. 38Kata shaweyihtaakusuuch anichii aapachihaakanich ayeskuwiitwaawenich iskutak takushiniyichen uchimaamuwaauh aat aapihtaatipiskaayiche maak kaye pwaashtuu takushiniyichen. 39Wii nisituhtamukw uu. Muyaam awen wiichihch e ihtaat chischeyimaat maak chimutiska che pechi takushiniyich, chipaa ayeskuwiishtuweu. Aatuchiwii chipaa uhchi pachishtineu mikw chechii ishi kachemutiyich anit uwaaskaahiikanimihch. 40Eukw maak uu wehchi ishinaakuhch kaye chiyawaau muush chechii ayeskuwiyekw. Wesh Iinuu Ukusisa kata takushin taanit anit ekaa mitun peshuweyimekwe chechii takushinit.”
Aapachihaakan kaa iipwaahkaat ekw maak an aapachihaakan ekaa kaa iipwaahkaat
Matthew 24.45-51
41Peter chii itweu, “Utipeyihchikeu niyaan aa mikw chitayimihiinaan uu tipaachimuwin kaa wiihtaman maak misiwe awen e ayimihaaute.” 42Utipeyihchikeu chii itweu, “Aapachihaakan kuiskw kaa ihtuutahk utaapatisuwin kaye kaa iipwaahkaat eukuu che wiyaapamikut uchimaam wiya chechii uchimaahkahtuwaat misiwe aniyuu kutak aapachihaakan kaye chechii naanaakachihtaawaat nihaau chechii ishi ashamaakanuyich iskutak utihchipayihche che ashamaakanuyich. 43Kata shaweyimaakanuu an aapachihaakan miskuwaakanuute kuiskw e ihtuutahk aniyuu utaapatisuwin iskutak takushiniyichen uchimaam. 44Chihchiwe chititinaawaau, chika miikuu aniyuu uchimaam misiwe chechii naanaakachihtaawaat taan e ishi tipiyeusiyich. 45Mikw maak ishi maamituneyihtahke an aapachihaakan, eshkw chineush che ishpish takushihk miin nuuchimaam, iteyihtahke. Ekw maak naashch nanehkaachihaate aniyuu wiichaapachihaakanh kaa uchimaahkahtuwaat e utataamahwaat kaye mikw miichisute maak chiishkwepete, 46iskutak uchimaam takushiniyichen ekaa peshuweyimaat kaye ekaa chischeyihtahk, ekw che waweshihaakanuut mitun chechii wawiisacheyihtahk. Ekw maak anite che itishahwaakanuut ekaa kaa taapwehtamiyich e ihtaayich chechii ishi nanehkaateyimut.”
47Jesus miin kaa ati wiihtamuwaat, “Aapachihaakan kaa chischeyihtahk taan e ishi nituweyihtamiyich uchimaam chechii ihtuutahk ekaa maak ayeskuwiihiitisute chechii ihtuutahk aniyuu kaa itashumaakanuut kata mista papasistehwaakanuu e waweshihaakanuut. 48Ekw an aapachihaakan ekaa kaa chischeyihtahk taan nihaau kaa ishi nituweyimikut uchimaam chechii ishi ihtuutahk ekw maak e ishi ihtuutahk chekwaayuu aniyuu ekaa chipaa ishi ihtuutamukupane kata waweshihaakanuu kaye wiya, mikw maak apishiish mikw kata pishishtehwaakanuu. Wesh chii wanipayuu ekaa uhchi chischeyihtahk e chii wanipayit. An awen mistahii kaa miyaakanuut, mistahii chika nituweyihtamaakuu Chishemanituu ekw maak an etituu mistahii kaa miyaakanuut etituu mistahii chika nituweyihtamaakuu Chishemanituu chechii ihtuutahk.”
Jesus uhchi eukw che uhchi pahkaanipayinaanuuhch
Matthew 10.34-36
49Jesus chii itweu, “Eukw uu wehchi takushiniyaan muyaam e pechi ishkwaasamaan uu aschii chechii ishinaakusiyaan. Kamaa maak shaash chii wiihtekupane. 50Wesh naashch taapwe kata aayiman chekwaan che ishi nachishkamaan nuwach maak nimukushkaateyihten kamaa shaash miyaaupayihch e iteyihtamaan. 51Chititeyihten aa e chii takushiniyaan utah aschiihch chiyaameyihtamuwin chechii ihtakuhch. Namui, chiwiihtamaatinaawaau nichii pechi takushin chechii pahkaanipayinaanuuhch. 52Ekw maak maau che ispayihch niya uhchi, muyaam peyakw utenaau e niyaayinuutwaau iinuuch namui kata uhchi nihiishkaatuuch. Nishtu anichii namui kata uhchi nanihiihtaweuch aniyuu niishu taan e itweyich. Kaye anichii niishu namui kata uhchi naheyihtamuweuch aniyuu nishtu taan e itweyich. 53Uhtaawiimaau namui kata uhchi nihiishkaatuuch ukusisa, kaye ukaawiimaau namui kata uhchi nihiishkaatuuch utaanisa. Kaye usikusimaau, aniyuu maak unihaakaniskwem namui kata uhchi nihiishkaatuuch.”
Wii chischeyihtamukw taan e ishi tuutahk Chishemanituu anuhchiish kaa chiishikaayich
Matthew 16.2, 3
54Jesus eyuu kaa ati itaat aniyuu iinuuh, “E waapamekw kaskawanishkw anite piisim e pahchishihk itehche tiiwehch chititwenaawaau che chimuuhch taapwe maak chimuun. 55Kaye e muushihtaayekw e shaawinihahch chititwenaawaau che chishitech, chishiteu maak. 56Chiyawaau kaa ayimihehkaasuyekw chichischeyihtenaawaau taan che ispayihch mikw e kanawaapahtamekw aschii kaye chiishikw. Taanite maak wehchi ekaa chii nisituunamekw taan nihaau e ishi ihtuutahk Chishemanituu anuhchiish kaa chiishikaayich.”
Ayimihii an kaa ataameyimisk chechii uhchi miyupayekw
Matthew 5.25, 26
57“Chekwaan wehchi ekaa chii wiyeyihtamaasuyekw taan an kuiskw chekwaan chechii ishi ihtuutamuwekupane. 58Naapeu maak mamishimisk chekwaan e chii ishi wanituutaman, ihtuutaaske maak chechii ituhtahiisk wiyaaskunicheukamikuhch, chipaa kuchihihaau pitamaa niishtam chechii miyu ayimihiit ekaa chechii ituhtahiisk anite. Ekut maak chechii uhchi nakaawiyit anite e wii ituhtahiisk. Ekaa maak ihtuutamane uu ekw an kaa wiyaaskunichet che pachishtinisk anite ishi kaamaakunuwesuu e ihtaayich. Che chipahuuskwaau anichii kaamaakunuwesitwaau. 59Uu maak ispayihche chiwiihtamaatin taapaa chikaa chii wiiwiyin anit chipahutuukamikuhch paatish mitun tekash chii chiishiihkamane taan an chipaa ishi chiishiihkaasun.”
Currently Selected:
Luke 12: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
Luke 12
12
Jesus kaa yaakwaamimaat uchischinuhamuwaakanh Phariseeh utayimihehkaasuwiniyuu
Matthew 10.26, 27
1Mekwaach maak an e ihtinaanuuhch, mihchetwaau chishemitaahtumitanuu iinuuch chii waaskaaniipuuch e nituhtawaatwaau Jesus. Aniyuu e ishpish mihchetitwaau mitun chii katahkusiteskaatituuch. Niishtam maak Jesus chii iteu uchischinuhamuwaakan, “Yaakwaamiishtuwaahkuch Phariseech aniyuu e iteyihtaakusitwaau wesh ayimihehkaasuuch. Mwehch palet uhpisikan kaa iteyihtaakuhch ekun e iteyihtaakuniyich aniyuu e ihtitwaau. 2Wesh an chekwaan ekaa kaa nuukuhch chika nuukuhtaakanuu anite e waashtech. Misiwe chekwaan chiimuut kaa ihtuutaakanuuhch chika chischeyihtaakun. 3An taan kaa ishi chiimuut ayimihiitwaau awenichii e tipiskaach eshkw chika pehtaakun e chiishikaach. An taan kaa ishi chiimuut ayimiyin eshkw misiwe kata wiihtaakun misiwe awen chechii chischeyihtahk.”
An awen chipaa kushtaanuu
Matthew 10.28-31
4“Chiwiihtamaatinaawaau niwiichewaakanitikw, ekaawii kushtaahkw awen kaa nipahaat aweyuu wesh taapaa wiyesh chika chii ihtuutaweu ahchaahkw. 5Chipechi wiihtamaatinaawaau awen an eukw chipaa kushtaawaau. Chishemanituu eukw e iteyihtaakusit chechii kushtekw wesh wii ayaau tipeyihchichewiniyuu chechii ishiwepinitaakw machishkutehch iskutak nipiyekwe. Ehe, nituhtuukw eukw uu taapwe Chishemanituu chipaa kushtaawaau.”
Chishemanituu chinaanaakatuweyimikunuu
6Ekw Jesus kaa itwet, “Namuii naashch aapateyihtaakusuuch e ayaapishiishitwaau piyeshiishach, mikw niishu shumaachiish itachihtaakusuuch niyaayin e utinaakanuutwaau, yaapach maak namui waach peyakw wanichischisiituutaakuuch Chishemanituu. 7Chiyawaau maak uste chititeyimikuwaau Chishemanituu ishpishaat aniyuu piyeshiisha e iteyimaat, waawaach chistikwaaniyaapiiwaauh chii achihtaakanuu e tahtwaapekahkwaau. Ekaawii maak kushtaachikw wesh yaapach chiyawaau uste chititeyihtaakusinaawaau e kanawaapamitakw Chishemanituu ishpishaat e mihchetitwaau piyeshiishach.”
E waawiihtamekw e chischeyimekw Jesus Christ
Matthew 10.32, 33; 12.32; 10.19, 20
8“Awen wiihtamuwaate kutak aweyuu e taapweyimit, Iinuu Ukusisa kaye kata itweyuuh e utiiniimitutaakut anite Chishemanituu utenchilamh e ihtaayich. 9Ekw maak ihtaate awen e itaat aweyuu ekaa taapweyimit, nika itaayuuh kaye Chishemanituu utenchilam, ‘Namayeu an nitiiniim.’ 10Misiwe awen kaa machaayimuumaat Iinuu Ukusisa katachii wepeyihtamuwaakanuu. Ekw maak an awen kaa paashtaamaat Kaa payehchisiyich Ahchaahkwa namui kata uhchi wepeyihtamuwakanuu.” 11Ekw Jesus kaa itwet, “Chiishpin wiyaaskunicheukamikuhch ituhtahiikuyine maak Jewa ayimiheukamikuhch maak Chisheuchimaau e ihtaayich chechii wiyaaskunikuyin ekaawii mukushkaateyihta taan che itweyin kaye taan che ishi nishkweushihtwaayin chechii uhchi wiichihiisuyin. 12Wesh Kaa payehchisiit Ahchaahkw chika chiskutamaakw taan nihaau chipaa itwen an mekwaach ishi nachishkamane.”
Kaa miisitisiit naapeu
13Ekw peyakw anit naapeu kaa nituhtawaat Jesus, chii iteu, “Chiskutamaachesuu, ayimihii maa niichishaan chechii tetaaunamuut an kaa ishi nakatamaakuyaahch aniyaa nuuhtaawiinaan.” 14Ekw Jesus kaa itaat, “Taapaa namayeu niya kaa wiyeyihtahk taanite che ishi tetaaunikanuyikwaau awen uchekwaanim maak kaa paahpachishtinamuwaat aweyuu uchekwaanimiyuu.” 15Ekw Jesus misiwe kaa itaat uyuu, “Yaakwaamiikw, ekaa chechii mushteneyihtamaacheyekw e ishpish wii ayaayekw chekwaan. Wesh taapaa aniyuu e ishi weyuutisiit awen maak naashch e miisitisiikwe, namiyeyuu aniyuu che ihtuutaakut chechii uhchi ayaat kaachiche pimaatisiiwiniyuu.”
16Ekw Jesus kaa wiihtamuwaat uyuu chischinuhamaacheu tipaachimuwiniyuu e itaat, “Peyakwaau chii ihtaau e miisitisiit naapeu, e chii ayaat nihtaauchihchikan aschiiyuu naashch e miyu nihtaauchiniyikwaau unihtaauchihchikanh. 17Ekw kaa iteyihtahk, ‘Shaash namui nitepishchinitaan taanite misiwe che chiskashtaayaan uyuu kaa nihtaauchihtaayaan nihtaauchihchikan. Ekw kaa maamituneyihtamihiikut taan che ihtit. 18Uu maak nika ihtin chii itweu, nika piikuhen aniyuu misiwe nitashtaasunikamikw ekw che ushihtaayaan etituu e mishaakwaau chechii chiskashtaayaan misiwe kaa ishi nihtaauchihtaayaan kaye maak misiwe nichekwaanim. 19Ekw maak che itisuyaan, nuwach niweyuuchihtaan chekwaayuu anite nitashtaasunikamikuhch mihchetu pipun chechii uhchi ispayaan. Ekw maak namui nika uhchi aapatisin. Shaash nika weyuuchihtaan miichim kaye e minihkweyaan chekwaan ekw maak che muuchikahtaayaan.’ 20Ekw Chishemanituu kaa itikut, ‘Taapwe chiwiyeshimitisun, anuhchiish uu che tipiskaach chipimaatisiiwin chika utinikanuu. Awen maak che ayaat misiwe aniyuu kaa chiskashtamaasuyin chekwaayuu.’ ”
21Jesus kaa itwet, “Ekun maak mwehch e ishinaakuhch awen wiya kaa maauchihtamaasut chekwaayuu. Namui miisitisiyuu iteyimikuu Chishemanituu e kanawaapamikut.”
E ispeyimutuuhkw Chishemanituu
Matthew 6.25-34
22Ekw Jesus kaa itaat uchischinuhamuwaakan, “Eukw maak uu wehchi ititakuch ekaa chechii mukushkaateyihtamekw miichim taan netuweyihtamekw chechii uhchi pimaatisiyekw maak kaye chekwaan che chichishkamekw. 23Wesh pimaatisiiwin uste chisteyihtaakun ishpishaat miichim, ekw maak miiyuu uste chisteyihtaakun ishpishaat e chichishkaman chekwaan. 24Maamituneyimach maa kaahkaachuuch, namui nihtauchihtaauch chekwaayuu kaye namui maauchihtaauch miichimiyuu, namui ushihtaauch ashtaasunikamikw maak teshipitaakan anit che ashtaatwaau umiichimuwaau yaapach maak Chishemanituu ashamikuuch. Chiyawaau maak etituu mistahii chititeyihtaakusinaawaau ishpishaat anichii piyeshiishach. 25Chekwaan wehchi naashch aayimeyihtamihiikuyekw chekwaan ekaa maak etituu chii chinuhtaayekw chipimaatisiiwinawaau. 26Ekaa chii ihtuutamekwe etituu chineushiish chechii pimaatisiyekw e mukushkaateyihtamekw uhchi, chekwaan maak che uhchi mukushkaateyihtamihiikuyekw uyuu chekwaayuu. 27Maamituneyihtamukw maa waapukunisha taanite wehchi nihtaauchihkwaau, namui aapatisiimakan, yaapach maak naashch miywaashuu e kanawaapahtaakanuuhkwaau. Chiwiihtamaatinaawaau, aat aniyuu e chii ishpish miisitisiit aniyaa chisheuchimaau Solomon namui yaapach uhchi ishpish miywaashiyuu uchekwaanim e ishinaakuniyikwaauh waapukun. 28Wesh Chishemanituu nihtaauchihtaau mashkushuu che miyunaakuhch aschii. An mashkushuu e miyunaakuhch anuhchiish kaa chiishikaach, waapahche shaash kata chii pashteuh. Ekw maak taapwe Chishemanituu nehtaauchihtaakwe mashkushuu chechii uhchi miywaashich aschii cheshtinaash chika chii ihtuutamaakuwaau chechii miitaakw chekwaayuu che chichishkamuwekw. Taapwe kaa apishaashich chitaapwehtamuwinawaau.”
29“Ekaawii maak muush chika uhchi maamituneyihtamihiikunaawaau chekwaan che miichiyekw kaye chekwaan che minihkweyekw. 30Misiwe awen e itiskaanesit utah aschiihch ekaa kaa taapweyimaat Chishemanituu muush maamituneyihtamihiikuu uyuu chekwaayuu. Kuuhtaawaau maak chischeyihtam misiwe taan e ishi nituweyihtamekw. 31Uste iteyihtaakun niishtam chechii naanituu chischeyihtamuwekw Chishemanituu uchisheuchimaawin ekw maak che ihtuutamekw taan e ishi nituweyihtahk Chishemanituu ekw maak mikw che ishi miitaakw aniyuu chekwaayuuh kaa nuuhtepayekw.”
Miisitisiiwin kihchikiishikuhch kaa ihtakuhch
Matthew 6.19-21
32“Ekaawii sechisikw, e chikawaashishiyekw, wesh Kuuhtaawaau kihchikiishikuhch kaa ihtaat naashch taapwe naheyihtamihiikuu chechii miitaakw uchisheuchimaawin. 33Ataawekw aniyuu chekwaayuu e ishi tipiyeusiyekw ekw che miyekuch kaa chistimaatisiitwaau aniyuu shuuliyaayuu. Wesh uu ishi ihtuutamekwe Chishemanituu chika tipahamaakuwaau nete kihchikiishikuhch. Wesh taan che ishi tipahamaataakw Chishemanituu namui nihtaa chika uhchi iskwaapayuu wesh namui nihtaa chika chii kachemutamaakunaawaau kaye manichuushach namui chika chii wanaachihtaauch. 34Taanite kenuweyihtaakuhch chimiisitisiiwinawaauh ekute muush che ishi maamituneyihtamekw.”
Jesus kaa aayimuutahk Chishemanituu uchisheuchimaawiniyuu
35“Ayeskuwiikw e ashuwaapamekw Utipeyihchikeu, mitun tekash chipaa itaaspisunaawaau kaye chiwaashtenamaakanawaau chipaa saskahenaawaau. 36Muyaam aapachihaakanich chipaa ishinaakusinaawaau e ashuwaapamaatwaau uchimaamuwaauh chechii pechi chiiweyich e chii naachimakusheyich e niipuunaanuyich. Takushiniyichen tiiwehch chika aapahamuweuch. 37Kata shaweyihtaakusuuch maak anichii aapachihaakanich miskaakutwaawenich aniyuu uchimaamuwaauh e chii ayeskuwiishtawaatwaau. Chiwiihtamaatinaawaau maak, an uchimaau kata ayeskuwiyuu wiya kweschiipan chechii ihtuutamuwaat taan kaa ishi ihtuutamaakut ekw maak che wiishaamaat chechii miichisuyich, mechim wiya chika wiishtuweu. 38Kata shaweyihtaakusuuch anichii aapachihaakanich ayeskuwiitwaawenich iskutak takushiniyichen uchimaamuwaauh aat aapihtaatipiskaayiche maak kaye pwaashtuu takushiniyichen. 39Wii nisituhtamukw uu. Muyaam awen wiichihch e ihtaat chischeyimaat maak chimutiska che pechi takushiniyich, chipaa ayeskuwiishtuweu. Aatuchiwii chipaa uhchi pachishtineu mikw chechii ishi kachemutiyich anit uwaaskaahiikanimihch. 40Eukw maak uu wehchi ishinaakuhch kaye chiyawaau muush chechii ayeskuwiyekw. Wesh Iinuu Ukusisa kata takushin taanit anit ekaa mitun peshuweyimekwe chechii takushinit.”
Aapachihaakan kaa iipwaahkaat ekw maak an aapachihaakan ekaa kaa iipwaahkaat
Matthew 24.45-51
41Peter chii itweu, “Utipeyihchikeu niyaan aa mikw chitayimihiinaan uu tipaachimuwin kaa wiihtaman maak misiwe awen e ayimihaaute.” 42Utipeyihchikeu chii itweu, “Aapachihaakan kuiskw kaa ihtuutahk utaapatisuwin kaye kaa iipwaahkaat eukuu che wiyaapamikut uchimaam wiya chechii uchimaahkahtuwaat misiwe aniyuu kutak aapachihaakan kaye chechii naanaakachihtaawaat nihaau chechii ishi ashamaakanuyich iskutak utihchipayihche che ashamaakanuyich. 43Kata shaweyimaakanuu an aapachihaakan miskuwaakanuute kuiskw e ihtuutahk aniyuu utaapatisuwin iskutak takushiniyichen uchimaam. 44Chihchiwe chititinaawaau, chika miikuu aniyuu uchimaam misiwe chechii naanaakachihtaawaat taan e ishi tipiyeusiyich. 45Mikw maak ishi maamituneyihtahke an aapachihaakan, eshkw chineush che ishpish takushihk miin nuuchimaam, iteyihtahke. Ekw maak naashch nanehkaachihaate aniyuu wiichaapachihaakanh kaa uchimaahkahtuwaat e utataamahwaat kaye mikw miichisute maak chiishkwepete, 46iskutak uchimaam takushiniyichen ekaa peshuweyimaat kaye ekaa chischeyihtahk, ekw che waweshihaakanuut mitun chechii wawiisacheyihtahk. Ekw maak anite che itishahwaakanuut ekaa kaa taapwehtamiyich e ihtaayich chechii ishi nanehkaateyimut.”
47Jesus miin kaa ati wiihtamuwaat, “Aapachihaakan kaa chischeyihtahk taan e ishi nituweyihtamiyich uchimaam chechii ihtuutahk ekaa maak ayeskuwiihiitisute chechii ihtuutahk aniyuu kaa itashumaakanuut kata mista papasistehwaakanuu e waweshihaakanuut. 48Ekw an aapachihaakan ekaa kaa chischeyihtahk taan nihaau kaa ishi nituweyimikut uchimaam chechii ishi ihtuutahk ekw maak e ishi ihtuutahk chekwaayuu aniyuu ekaa chipaa ishi ihtuutamukupane kata waweshihaakanuu kaye wiya, mikw maak apishiish mikw kata pishishtehwaakanuu. Wesh chii wanipayuu ekaa uhchi chischeyihtahk e chii wanipayit. An awen mistahii kaa miyaakanuut, mistahii chika nituweyihtamaakuu Chishemanituu ekw maak an etituu mistahii kaa miyaakanuut etituu mistahii chika nituweyihtamaakuu Chishemanituu chechii ihtuutahk.”
Jesus uhchi eukw che uhchi pahkaanipayinaanuuhch
Matthew 10.34-36
49Jesus chii itweu, “Eukw uu wehchi takushiniyaan muyaam e pechi ishkwaasamaan uu aschii chechii ishinaakusiyaan. Kamaa maak shaash chii wiihtekupane. 50Wesh naashch taapwe kata aayiman chekwaan che ishi nachishkamaan nuwach maak nimukushkaateyihten kamaa shaash miyaaupayihch e iteyihtamaan. 51Chititeyihten aa e chii takushiniyaan utah aschiihch chiyaameyihtamuwin chechii ihtakuhch. Namui, chiwiihtamaatinaawaau nichii pechi takushin chechii pahkaanipayinaanuuhch. 52Ekw maak maau che ispayihch niya uhchi, muyaam peyakw utenaau e niyaayinuutwaau iinuuch namui kata uhchi nihiishkaatuuch. Nishtu anichii namui kata uhchi nanihiihtaweuch aniyuu niishu taan e itweyich. Kaye anichii niishu namui kata uhchi naheyihtamuweuch aniyuu nishtu taan e itweyich. 53Uhtaawiimaau namui kata uhchi nihiishkaatuuch ukusisa, kaye ukaawiimaau namui kata uhchi nihiishkaatuuch utaanisa. Kaye usikusimaau, aniyuu maak unihaakaniskwem namui kata uhchi nihiishkaatuuch.”
Wii chischeyihtamukw taan e ishi tuutahk Chishemanituu anuhchiish kaa chiishikaayich
Matthew 16.2, 3
54Jesus eyuu kaa ati itaat aniyuu iinuuh, “E waapamekw kaskawanishkw anite piisim e pahchishihk itehche tiiwehch chititwenaawaau che chimuuhch taapwe maak chimuun. 55Kaye e muushihtaayekw e shaawinihahch chititwenaawaau che chishitech, chishiteu maak. 56Chiyawaau kaa ayimihehkaasuyekw chichischeyihtenaawaau taan che ispayihch mikw e kanawaapahtamekw aschii kaye chiishikw. Taanite maak wehchi ekaa chii nisituunamekw taan nihaau e ishi ihtuutahk Chishemanituu anuhchiish kaa chiishikaayich.”
Ayimihii an kaa ataameyimisk chechii uhchi miyupayekw
Matthew 5.25, 26
57“Chekwaan wehchi ekaa chii wiyeyihtamaasuyekw taan an kuiskw chekwaan chechii ishi ihtuutamuwekupane. 58Naapeu maak mamishimisk chekwaan e chii ishi wanituutaman, ihtuutaaske maak chechii ituhtahiisk wiyaaskunicheukamikuhch, chipaa kuchihihaau pitamaa niishtam chechii miyu ayimihiit ekaa chechii ituhtahiisk anite. Ekut maak chechii uhchi nakaawiyit anite e wii ituhtahiisk. Ekaa maak ihtuutamane uu ekw an kaa wiyaaskunichet che pachishtinisk anite ishi kaamaakunuwesuu e ihtaayich. Che chipahuuskwaau anichii kaamaakunuwesitwaau. 59Uu maak ispayihche chiwiihtamaatin taapaa chikaa chii wiiwiyin anit chipahutuukamikuhch paatish mitun tekash chii chiishiihkamane taan an chipaa ishi chiishiihkaasun.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.