Luke 9
9
Jesus kaa chihchitishahwaat kaa niishushaapuyich uchischinuhamuwaakanh
Matthew 10.5-15; Mark 6.7-13
1Jesus chii maausikw wiishaameu kaa niishushaapuyich uchischinuhamuwaakanh. Kaa miyaat suuhkaatisiiwiniyuu kaye tipeyihchichewiniyuu chechii wiiwiitishihwaayich machiahchaahkwa kaye chechii miinuwaachihaayich nanaahkuu e itaaspineyitwaauh aweyuu. 2Ekw kaa chihchitishahwaat chechii nituu kakacheskweyich Chishemanituu uchisheuchimaawiniyuu e waawiihtamiyich eyuu chechii miinuwaachihaayich aweyuuh kaa aahkusiyich.
3Chii itashumeu maak, “Uu che chistuhteyekw ekaawii chika uhchi ayaanaawaau chekwaan. Ekaawii ayaakw siskahuun, niimuutaan, miichim, shuuliyaau mechim kaye ayuwaak chichekwaanimuwaauh e chichishkamekw. 4Kaye an waaskaahiikan taanite che piihtakahiikuwekwe, ekut anit che ihtaayekw paatishkaan nakatamekwe an ihtaawin. 5Utihtamekwe maak ihtaawin ekaa wii piihtakahiikuyekwe, nakatamukw an ihtaawin. Che pahpuusiteshimuyekw, e nuukuhtaayekw e yaakwaamimekuch ekaa uhchi utinahkwaau miywaachimuwiniyuu.” 6Ekw anichii chischinuhamuwaakanich kaa chistuhtetwaau anite nanaahkuu ihtaawinihch kaa ituhtetwaau e waawiihtahkwaau miywaachimuwiniyuu kaye e miinuwaachihaatwaau kaa aahkusiyich.
Herod taan kaa ishi wawaaneyihtahk
Matthew 14.1-12; Mark 6.14-29
7Iskutak maak chisheuchimaau Herod piyehtahk taan e ihtiyich Jesus, naashch taapwe chii wawaaneyihtamihiikuu wesh chii ihtaauch iinuuch e papaamaachimutwaau e itwetwaau, John siikahaahtaacheu uu, miin kaau pimaatisiyuu. 8Chii ihtaauch miin kutakach e itwetwaau, “Eukw uu Elijah, miin kaau pimaatisiyuu.” Yaapach maak miin chii ihtaauch kutakach awenichii e itwetwaau, “Eukw uu peyakw weskach uchischiwehiichesuu miin kaau pimaatisiyuu.” 9Herod maak chii itweu, “Awen uu kaa ishi maamishkaach itaachimaakanuut. Namui wii naanituu John, nicheshtinaahun e chii chimistikwaanehwaakanuut wiya John.” Ekw naashch kaa wii waapamaat aniyuuh Jesus.
Jesus kaa ashamaat niyaayinwaau chishemitaahtumitanuu iinuuh
Matthew 14.13-21; Mark 6.30-44; John 6.1-14
10Iskutak tekushihkwaau anichii chischinuhamuwaakanich kaa chihchitishahwaakanuutwaau ekw kaa wiihtamuwaatwaau Jesus taan kaa ihtitwaau kaa ispihtanihutwaau. Ekw kaa nakataatwaau aniyuu kaa mihchetiyich iinuuh, tipaan kaa ituhtetwaau e wiichewaatwaau Jesus anite Bethsaidahch e ituhteyich. 11Iskutak maak mihchetu awenichii kaa pehtahkwaau e chii chistuhteyich ekw kaa nuusuupaistuwaatwaau. Jesus maak chii miyeyihtam e takushiniitwaauh. Chii waawiihtamuweu Chishemanituu uchisheuchimaawiniyuu e iteyihtaakuniyich kaye chii miinuwaachiheu aniyuuh aweyuuh kaa nituweyihtamiitwaau chechii miinuwaachihaakanuyich.
12Shaash maak chii ati utaakushiyuu ekw anichii niishushaap chischinuhamuwaakanich kaa itaatwaau Jesus, “Chihchitishahuuch maa ekw anichii iinuuch che nituu naanituweyihtahkwaau chekwaayuu che miichitwaau kaye taanite che miyeyimutwaau che tipiskaayich. Taapaa ihtakun chekwaan utah wii.” 13Ekw Jesus kaa itaat, “Chiyawaau miyaahkuch chekwaayuu che miichitwaau.” Chischinuhamuwaakanich maak chii iteuch, “Mikw niyaayin aaihkunaauch niishu maak namesach ekun e ishpish ihtakuhch chekwaan. Mikw kiipaa niyaan nituu utinamaahche miichim chechii tepahukutwaau uchii e tashitwaau awenichii.” 14Wiyesh niyaayinwaau chishemitaahtumitanuu chii tashiichenich naapeuch anit e itashinaanuuhch. Jesus kaa itaat aniyuu chischinuhamuwaakanh, “Itaahkuch anichii iinuuch, naaniyaayinumitanuu chechii tahtupitwaau peyakw aniyuu e minepitwaau.”
15Chischinuhamuwaakanich maak chii ihtuutamuch aniyuu kaa itashumaakanuutwaau ekw misiwe awen kaa waweyapit. 16Ekw Jesus kaa utinaat aniyuu niyaayin aaihkunaauh kaye aniyuu niishu namesa, ishpimihch kaa iitaapit e nanaaskumaat Chishemanituu. Kaa papahkwenaat aniyuuh aaihkunaauh ekw kaa miyaat aniyuu uchischinuhamuwaakanh chechii maatinamuwaayich aniyuu iinuuh. 17Misiwe maak awen chii miichisuu kaye chii tepimiichisuu, ekw aniyuuh uchischinuhamuwaakanh kaa maamuushtinamiyich aniyuu iskushtawaaniyuu. Niishushaap maak utipiiwath chii saakashchinihtaauch.
Peter kaa nisituunawaat Jesus e aawiyich Christ
Matthew 16.13-19; Mark 8.27-29
18Peyakwaau, Jesus chii ayimihaau mikw e peyakushit, uchischinuhamuwaakanh maak peschiish chii ihtaayuuh ekw kaa nituu kakwechimaat e itaat, “Awen niya e iteyimitwaau awenichii.” 19Kaa itikut, “Kutakach awenichii John siikahaahtaacheu chititeyimikuch ekw kutakach aniyaanaa peyakw uchischiwehiichesuu Elijah kaa ishinihkaasut chititeyimikuch, ekw miin kutakach e ihtaatwaau weskach uchischiwehiichesuu miin kaau e pimaatisiit e iteyimiskwaau.” 20Ekw Jesus miin kaa kakwechimaat, “Chiyawaau maak wii, awen niya e iteyimiyekw.” Peter chii ishi nishkweushiheu, “Christ chii, eukw chiya Chishemanituu kaa itwet che pechi itishahwaat.”
Jesus kaa aayimuutahk che ishi wiisacheyihtahk kaye che nipit
Matthew 16.20-28; Mark 8.30–9.1
21Ekw Jesus kaa itashumaat uchischinuhamuwaakanh ekaa chechii wiihtamuwaayich kutak aweyuu aniyuu. 22Ekw kaa itaat, “Iinuu Ukusisa iteyihtaakuniyuu chechii mistawaawiisacheyihtamiyich kaye chechii aatuweyimikuyich aniyuuh kaa niikaanapiitwaauh ayimiheuchimaauh, kaye aniyuuh kaa niikaanishkuwaayich iinuuh, kaye maak aniyuuh kaa chiskutamaacheyitwaauh wiishuwewiniyuu. Kata nipahaakanuu kaye, mikw maak nishtu chiishikaau ishpish kaau kata pimaatisiyuu.”
E nuushuushkuwaakanuut Jesus
23Ekw misiwe kaa itaat, “Awen waa nuushuushkuukwe ekush chipaa pachishtinam aniyuu wii taan waa ishi naniheyihtamihiisut, eshikum chiishikaauh chipaa utineu utaashiteyaahtikum ekw maak nipaa pechi nuushuushkaakw. 24Wesh awen kaa wii kanuweyihtamaasut upimaatisiiwin kata wanihtaau. An maak awen kaa wii pachishtinahk misiwe chekwaayuu taan kaa wii ihtuutahk mechim kaye upimaatisiiwin e wii pechi nuushuushkuut eukun an che miyaakanuut pimaatisiiwiniyuu. 25Ekw maak an awen kaa wii kanuweyihtahk upimaatisiiwin, nipite maak taanite chechii uhchi wiichihiikut aat chii wiihkuchihtamaasute misiwe chekwaayuu utah aschiihch wiya taan kaa ishi nituweyihtahk chechii ishi ayaat. 26Awen maak pimaameyimute niya uhchi kaye nitayimuwiniyuu uhchi eukuu che pimaameyimuhaat Iinuu Ukusisa iskutak miin takushiniyichen uchisteyihtaakusuwiniihch. Ekut che chischeyihtahkwaau awenichii e ishpish chisteyihtaakusiyich Iinuu Ukusisa wesh kata waapahtiiweuch Uhtaawiimaau ekw maak kaa payehchisiitwaau enchilich e ishpish chisteyihtaakusiyich. 27Chihchiwe chititinaawaau, taapwe e ihtaatwaau utah awenichii che waapahtahkwaau Chishemanituu uchisheuchimaawiniyuu mekwaach eshkw e pimaatisiitwaau utah aschiihch.”
Jesus kaa kweschinaakusit
Matthew 17.1-8; Mark 9.2-8
28Wiyesh yaanaaneu chiishikaau Jesus uyeyuu kaa ishpish ayimitutahk chii chistuhtaheu Peter, John ekw maak James e chii wiichewaat wachiihch anite chechii nituu ayimihaatwaau. 29Mekwaach maak aniyuu e aayimihaat utaashtamuhkw chii kweschinaakuniyuu kaye uchekwaanim naashch taapwe chii piyekasch waapaayuuh mitun e chii waasikushteyikwaau. 30Sischikuuch maak chii uhchi niishiyuu naapeu e ayimihiikut Jesus. Eukunich aniyehkaanaanich Moses ekw maak Elijah. 31Ekw kaa aayimuutamuwaatwaau Jesus shaash e peshunaakuniyich che nipit anite Jerusalemihch, aniyuu Chishemanituu kaa ishi wiishtaayich che ispayiyich. Naashch maak e miywaashteyich kihchikiishikw waashtewiniyuu chii waashteyuu anit waaskaa e ihtaatwaau.
32Peter ekw maak anichii kutakach awenichii Jesus kaa chii wiichewaatwaau chii kuuhkushiwaakupanenich. Chii pekupayuuch iskutak maak wespaaweyihtahkwaau chii waapahtamuch waashtewiniyuu waaskaa Jesus e ihtaayich kaye chii waapameuch aniyuu niishu naapeu e wiichikaapuushtaakuyich. 33Iskutak maak anichii naapeuch waa nakataatwaau Jesus, Peter chii iteu, “Chischinuhamaachesuu nuwach miyeyihtaakun utah chechii ihtaawaauhchipane. Pachishtinaanh maa chechii ushihtaayaahch nishtu tipinuushimunh, paahpeyakw che ayaayekw, chiya, Moses ekw maak Elijah.” Peter maak namui tekash uhchi nisituhtam chekwaayuu wehchi itwet uyeyuu. 34Mekwaach maak eshkw e ayimit, kaskawanishkwa chii uhchi nuukusiyuu mitun tekash e ukaashteshkaakutwaau. Anichii maak chischinuhamuwaakanich naashch taapwe chii sechisuuch iskutak mitun e akunahukutwaau aniyuu kaskawanishkwa. 35Anit maak kaskawanishkuhch chii uhchi pehtamuch pehtaakusuwiniyuu, aweyuu e itweyich, “Eukw uu Nikus kaa saachihahk. Nituhtawaahkw.” 36Iskutak maak kaa chiish ayimit an awen, chii waapameuch Jesus e peyakukaapuyich. Ekw anichii chischinuhamuwaakanich namui uhchi papaamaachimuuch uyeyuu taan kaa ishi waapahtahkwaau e ispayiyich mekwaach anit.
Jesus kaa miinuwaachihaat naapesha machiahchaahkwa e chii piihchishkaakuyich
Matthew 17.14-18; Mark 9.14-27
37Miin maak wiyaapaniyich chii niihchichuweuch aniyuu wachiyuu, chii mihchetiyuu maak aweyuu e pechi nachihiikut Jesus. 38Anit maak mekwesiinuu e mihchetinaanuuhch chii tepweu peyakw naapeu e itaat aniyuu Jesus, “Chischinuhamaachesuu, chipukuseyimitin chechii wiichihiit nikus, wesh eukw mikw uu e peyakushit nitawaashiim. 39Maashihiikuu niyaanikutehch machiahchaahkwa e ihtuutaakut sischikuuch chechii nuuhtaakusit. Ekw maak kaye e uchipitikut maan mitun wesh kata piishteutaahtam. Naashch nanehkaateyihtamihiikuu uyuu machiahchaahkwa ekaa maak wii nakatikut. 40Aat maak nichii kakwechimaauch chichischinuhamuwaakanich chechii wiiwiitishihwaatwaau uyuu machiahchaahkwa, namui maak uhchii ihtuutamuch.”
41Jesus maak chii iteu aniyuu iinuu anit kaa ihtaayich, “Chiyawaau anuhchiish kaa pimaatisiyekw ekaa kaa ayaayekw taapwehtamuwin kaye ekaa kaa kweskaatisiyekw, namui kaye kuiskw chit ishi pimaatisiinaawaau. Taan che ishpish ihtaayaan utah e ihtaayekw yaakw chechii nisituhtamekw. Taan che ishpish ashuwaapamitakuch ekw chechii ayaayekw taapwehtamuwin. Peshuwaahkw an naapesh.” 42Mekwaach maak e pechi naataat aniyuu Jesus an naapesh, machiahchaahkwa mitun chii kawepinikuu ekw kaa ihtuutaakut chechii uchipitikut. Jesus maak chii chistahamuweu aniyuu machiahchaahkwa kaa itaat chechii nakataayich aniyuu naapesha. Ekut maak kaa ati miinuwaatisiit an naapesh. Ekw Jesus kaa chiiwemiyaat aniyuu naapeu aniyeyuu ukusiyuu. 43Misiwe maak anichii iinuuch chii maamishkaateyihtamihiikuuch Chishemanituu usuuhkaatisiiwiniyuu.
Jesus miin kaa aayimuutahk che nipahaakanuut
Matthew 17.22-23; Mark 9.30-32
Mekwaach maak e maamishkaateyihtamihiikutwaau taan kaa ishi ihtuutamiyich Jesus, Jesus chii ayimiheu uchischinuhamuwaakanh e itaat, 44“Chischisikw yaaitei taan che ititakuch. Chika pachishtinaakanuuch iinuuch chechii ihtuutawaatwaau taan waa ihtuutuwaatwaau Iinuu Ukusisaan.” 45Ekw anichii chischinuhamuwaakanich namui uhchi nisituhtamuch. Namui uhchi chischeyihtamuch taan kaa wii ishi wiihtamaakutwaau Jesus, wesh eshkw namui uhchi miyaakanuuch chechii nisituhtahkwaau. Chii sechisuuch maak chechii kakwechihcheyimutwaau chekwaayuu uyuu kaa itweyich.
An awen maauch che chisteyihtaakusit anit e tashiyekw
Matthew 18.1-5; Mark 9.33-37
46Chischinuhamuwaakanich maak chii machipayuuch e aashitemitutwaau awen anit e tashitwaau maauch che chesteyihtaakusit. 47Jesus maak chii chischeyimeu taan e ishi maamituneyihtamiitwaau, ekw kaa utinaat awaasha e apishiishiyich ekw kaa niipuuhaat anit uhpime e ihtaat. Kaa itaat aniyuuh uchischinuhamuwaakanh, 48“Awen e utinaat peyakw uyuu awaasha nitishinihkaasuwinihch uhchi, mwehch kaye niya e utinit ekun e ishinaakuniyich. An maak awen kaa utinit namayeu niya kaa utinit, aniyuuh kaa pechi itishahuyich eukw aniyuu wetinaat. Wesh an awen maauch nuuhtaash kaa iteyihtaakusit anit e tashiyekw eukun an maauch chesteyihtaakusit.”
An awen ekaa kaa nishkuushtaakuyihkw chiwiichihiikunuu
Mark 9.38-40
49Ekw John kaa itaat, “Chiskutamaachesuu, nichii waapamaanaan naapeu e wiiwiitishihwaat machiahchaahkwa chitishinihkaasuwiniyuu e aapachihtaat, ekw kaa chistahamuwachiht, wesin taapaa ute chiyaanuu e ihtaayihkw ishi wiichihiiweu.” 50Jesus kaa itaat, “Ekaawii chistahamuwaahkw. Wesh an awen ekaa kaa nishkuushtaakuyihkw chiwiichihiikunuu.”
Jesus kaa ituhtet Jerusalemihch
51Wetaach maak chii ati peshunaakuniyuu Jesus kihchikiishikuhch che ishi utinaakanuut ekw naashch kaa iteyihtamihiikut yaaitei chechii ituhtet Jerusalemihch. Ekw maak kaa chistuhtet. 52Mekwaach maak aniyuu e ati pimuhtet chii niikaanitishihweu aweyuuh anite aniyuu ihtaawiniyuu Samaritan iinuuh kaa ihtaayitwaauh, chechii nituu ayeskuushtaayich taanite chechii ihtaakupane aniyuu che tipiskaayich. 53Mikw maak aniyuuh iinuuh anit kaa ihtaayitwaauh namui uhchi wii piihtakahiikuu wesh chii chischeyimikuu Jerusalemihch e wii ituhtet. 54Iskutak maak anichii chischinuhamuwaakanich James ekw maak John kaa pehtahkwaau uyuu chii iteuch aniyuu Jesus, “Tipeyihchikeu, chinituweyiminaan aa chechii nituweyihtamaahch ishkuteu kihchikiishikuhch chechii uhchipayihch chechii wanaachihiikutwaau anichii iinuuch muyaam aniyaa Elijah kaa ihtuutahk.” 55Jesus maak chii kweschikaapuushtaweu kaa chistahamuwaat uyuu e ishi ayimiyich. Chii iteu, “Uu e iteyihtamekw namui Chishemanituu e ihtaat uhchipayuu, 56wesh Iinuu Ukusisa namui uhchi takushin chechii nishuuwanaachihtaawaat aweyuu upimaatisiiwiniyuu, chii takushin chechii pimaachihiiwet.” Ekw anite kutachiyuu ihtaawiniyuu kaa ituhtetwaau.
Taan e iteyihtaakuhch e nuushuushkuwaakanuut Jesus
Matthew 8.19-22
57Mekwaach maak aniyuu e pimuhtetwaau chii nachishkaakuuch naapeu. Ekw an naapeu kaa itaat aniyuu Jesus, “Chika papaawiicheutin taanite che ituhtewane.” 58Ekw Jesus kaa itaat, “Mahcheshuuch ihtakuniyuu uwaatakuwaauh, piyeshiishach kaye ihtakuniyuu uwachishtunawaauh, mikw maak Iinuu Ukusisa, namui ayaayuuh taanit chechii waweyishiniyiyich chechii ayuwepiyich.”
59Ekw Jesus kaa itaat kutak naapeu, “Pechi wiicheuh.” Ekw an naapeu kaa itaat Jesus, “Utipeyihchikeu, pachishtinh pitamaa chechii nahiihkuuk nuuhtaawii puunipimaatisiite ekw maak yaakw che wiicheutaan.” 60Ekw Jesus kaa itikut, “Anichii mwehch kaa nipitwaau kaa iteyihtaakusitwaau iinuuch ekush kata nahiihkuweuch aniyuu utiiniimuwaau kaa nipiyich. Chiya maak, maachiih che papaamaachimuut Chishemanituu chisheuchimaawin.” 61Miin kutak naapeu chii iteu aniyuu Jesus, “Utipeyihchikeu, chika papaawiicheutin, mikw maak niishtam nika chiiwen ekw che nituu waachiyemakwaau niichihiikuch kaye niichishaanich.” 62Ekw Jesus kaa itaat, “Awen shaash e chihchipayihtaat e atushkuwaat Chishemanituu, muush maak e chiiwemaamituneyihtahk weskach utitaatisiiwin namui tepicheyihtaakusuu chechii atushchehkahtamuwaat Chishemanituu uchisheuchimaawiniyuu.”
Currently Selected:
Luke 9: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
