Matthew 21
21
Jesus kaa piihchet Jerusalemihch
Mark 11.1-11; Luke 19.28-40; John 12.12-19
1Jesus ekw maak aniyuu uchischinuhamuwaakan anite Jerusalemihch chii wii ituhteuch. Iskutak e ati peshuwaapahtahkwaau chii utihtamuch aniyuu ihtaawiniyuu Bethphage kaa ishinihkaateyich. Anite wachii Olives kaa ishinihkaatech ekute kaa ihtakuhch uu ihtaawin. Ekut maak utah Jesus kaa niikaanitishihwaat niishu uchischinuhamuwaakanh e itaat, 2“Ituhtekw anite ane ihtaawin, iskutak maak utihtamekwe chika waapamaawaau uhkaan muyaam e apishiishit kaapalakaskweu kaa ishinaakusit, ukusisa e wiichikaapuushtaakut. Aapihkunaahkw ekw maak che peshuwekuch taapishkun anichii awesiisach. 3Ekw kakwechimikuyekwe awen chekwaayuu wehchi aapihkunekuch anichii, che itekw, ‘Utipeyihchikeu nituweyimeu.’ Tiiwehch maak chika pachishtinikuwaau chechii utinekuch.”
4Wesh an peyakw uchischiwehiichesuu kaa itwekupane uyuu che ispayiyich, chii taapwekupane uyuu kaa itwet,
5Wiihtamuwaahkuch anichii iinuuch anite Zionihch kaa uhchiitwaau, kanawaapamaahkw maa chichisheuchimaamuwaau. Chipechi nituwaapamikuwaau e tipihteyimisut uhkaan muyaam kaa apishiishit kaapalakaskweu kaa ishinaakusiyich e tehtapit. Eukw uyuu kaa itwekupane aniyaa peyakw uchischiwehiichesuu.
6Ekw maak anichii niishu chischinuhamuwaakanich kaa ituhtetwaau anite ihtaawinihch, kaa ihtuutahkwaau aniyuu kaa itashumikutwaau Jesus. 7Chii peshuweuch aniyuu uhkaan muyaam kaapalakaskweu kaa apishiishiyich kaa ishinaakusiyich kaye aniyuu ukusiyuu, kaa akunuwepuhwaatwaau utakuhpuwaau anite uspiskuniihch, ekut maak kaa tehtapit Jesus. 8Mihchetu maak anichii iinuuch chii tashwekashtaauch utakuhpuwaau anit che pimuhtahiikuyich aniyuu awesiisa kaye kutakach nipisiyaahtikw chii naatwaanamuch kaa pimaaskustaatwaau anite meskaanaahch ekut maak kaa ati pimuhteyich aniyuu awesiisa. 9Anichii maak iinuuch anite niikaanaanihch kaa pimuhtetwaau aniyuu Jesus e ihtaayich kaye anichii anite utaahch kaa pimuhtewaatwaau chii chihchi maamihchimeuch Chishemanituu e chishewetwaau e itwetwaau, “Chisteyihtaakuhaahkw an kaa ukusitutaakuut David, shaweyihtaakusuu uu kaa pechi itishahukut Utipeyihchikeuh. Maamihchimaataau Chishemanituu wiya maauch e chisteyihtaakusit.”
10Iskutak maak Jesus tekushihk anite Jerusalemihch misiwe anichii iinuuch anit ihtaawinihch kaa ihtaatwaau chii kushkupayuch e itwetwaau, “Awen uu kaa takushihk.”
11Ekw kaa itikutwaau aniyuu iinuuh kaa wiichewaayich Jesus, “Jesus an. Eukun uu uchischiwehiichesuu anite Nazareth, Galilee aschiihch, kaa uhchiit.”
Jesus kaa wiiwiitishihwaat aniyuuh kaa ataaweyich awesiisa chisheayimiheukamikuhch
Mark 11.15-19; Luke 19.45-48; John 2.13-22
12Ekw Jesus kaa piihchet chisheayimiheukamikuyuu. Chii waapameu maak aniyuu kaa ataaweyitwaau kaye aniyuu kaa utinaasuyitwaau anite piihtakamihch, ekw kaa wiiwiitishihwaat. Chii kwetapuwepinamuweu maak umiichisuunaahtikuyuu aniyuu kaa miiskutuunaayich shuuliyaanaapiskwa kaye utehtapuuniyuuh chii kwetapuwepinamuweu aniyuu kaa aataaweyitwaauh piyeshiisha. 13Ekw Jesus kaa itaat, “Itashteu Chishemanituu utayimuwinihch, ‘Ayimiheukamikw kata ishinihkaateu niwaaskaahiikanim.’ Mikw maak chiyawaau chimutiskach uwaaskaahiikanamuwaau ekun e taapachihtaayekw uu chisheayimiheukamikw.” Ekun maak uyuu kaa ishi wiihtamuwaat Jesus aniyuu kaa ataaweyitwaau anite chisheayimiheukamikuhch.
14Chii pechi nituwaapamikuu maak aniyuu ekaa kaa waapahtamiyich kaye aniyuu kaa maaschinihtaauchiyich aweyuuh anite chisheayimiheukamikuhch mekwaach e ihtaat, chii miinuwaachiheu maak. 15Anichii maak kaa niikaanapitwaau ayimiheuchimaauch kaye anichii kaa chiskutamaachetwaau wiishuwewiniyuu chii chishuwaahiikuuch aniyuu Jesus e waapamaatwaau misiwe aniyuu maamishkaach chekwaayuu e ihtuutamiyich. Kaye maak chii uhkaamikuch aniyuu awaasha e ishi tepweyich anit piihtakamihch aniyuu chisheayimiheukamikuyuu, “Maamihchimaataau Jesus David ukusisa,” e itweyich. 16Ekw kaa itaatwaau aniyuu Jesus, “Chipehtawaauch aa taan e itwetwaau.”
Jesus kaa itaat, “Nipehtuwaauch, namui aa wiiskaat chuuhchi ayimihtaanaawaau Chishemanituu utayimuwinihch anit kaa itashtech,
Chishemanituu chii ihtuutaweu awaasha kaye apishtawaasha chechii miyu maamihchimikut.”
17Ekw Jesus kaa nakataat, kaa chistuhtet anit aniyuu ihtaawiniyuu ekw anite Bethanyihch ihtaawinihch kaa ituhtet, ekute anite kaa ihtaat peyakw tipiskaau.
Waapaminaahtikw kaa nipit
Mark 11.12-14, 20-24
18Wiipach maak chiyechishepaayaayich Jesus miin kaau chii chiiweu anite Jerusalemihch, chii siiweyuu maak. 19Ekw kaa waapamaat misishuuminaahtikw anite yaaiskanuu, kaa nituwaapamaat, namui maak chekwaayuu uhchi miskam chechii miichit anit mistikuhch mikw niipisii chii nihtaauchiniyuu anit. Ekw kaa itaat aniyuu mistikw, “Namui miin wiiskaat chika uhchi nihtaauchuuch waapaminich anit e ihtaayin.” Tiiwehch maak chii nipiiyuu aniyuu misishuuminaahtikw.
20Anichii maak chischinuhamuwaakanich chii waapahtamuch uyuu kaa ispayiyich, chii miskaateyihtamuch maak e itwetwaau, “Taanite naashch wiipach wehchi nipit an misishuuminaahtikw.”
21Ekw Jesus kaa itaat, “Chiwiihtamaatinaawaau, ekaa mitun che uhchi aanuwehtamuwekwe mitun che taapwehtamuwekwe, chika chii ihtuutawaawaau kaye chiyawaau taan kaa ihtuutuuk uu misishuuminaahtikw. Namayeu mikw an chekwaan chechii ihtuutamekw kaye chika chii itashuwaaten wachii, ‘Ishiwepinisuh anite chihchikamiihch.’ Chika pishichihiikuun maak. 22Mikw taan che ishi nitutamaawekwe e ayimihaayekw, taapwehtamukw shaash e ayaayekw ekw maak che miikuyekw an kaa ishi nitutamaayekw.”
Jesus kaa kakwechimaakanuut aweyuuh kaa miikut chechii ihtuutahk aniyuuh chekwaayuu kaa ihtuutahk
Mark 11.27-33; Luke 20.1-8
23Iskutak maak Jesus kaa piihchet aniyuu Jewa chisheayimiheukamikuyuu, mekwaach maak e Chiskutamaachet, aniyuuh kaa niikaanapiyich ayimiheuchimaauh ekw maak aniyuu iinuu kaa niikaanishkuwaayich chii itikuu, “Awen kaa miisk chechii ihtuutaman uu. Awen kaa itashumisk uyuu chechii ihtuutamut.”
24Ekw Jesus kaa itaat, “Chika kakwechimitinaawaau chekwaan, che pechi nishkweushihiyekw ekw maak che wiihtamaatakuch taanite wehchipayihch uu tipeyihchichewin kaa ayaayaan chechii ihtuutamaan uyuuh chekwaayuuh. 25Pechi wiihtamuukw, aweyuu kaa itashumikut John chechii siikahaahtuwaat aweyuu. Chishemanituu aa maak naapeu.”
Chii machipayuuch maak anit wiyawaau e itwetwaau, “Itweyihkwe, ‘Chishemanituu chii itikuu,’ chika itikunuu, ‘Chekwaan maak wehchi ekaa uhchi taapwehtawekw.’ 26Maak itweyihkwe ‘Naapeu chii itikuu,’ chika wii yaakwaamiishtuwaanuuch taan che ihtuutaatahkwaau anichii iinuuch. Wesh misiwe taapwehtamuch John e chii uchischiwehiichesuyich.” 27Ekw maak kaa itaatwaau Jesus, “Namui nichischeyimaanaan aweyuu kaa itashumikut John chechii siikahaahtuwaat aweyuuh.” Jesus kaa itaat, “Kaye niya namui chika uhchi wiihtamaatinaawaau awen kaa pechi itashumit uu chechii ihtuutamaan.”
Naapeu e niishiyich ukusisa kaa tipaachimaakaanut
28“Chika tipaachimushtaatinaawaau che maamituneyihtamekw maak. Chii ihtaau peyakwaau naapeu e chii niishiyich ukusisa. Ekw kaa nituwaapamaat aniyuu westesimaawiyich ekw kaa itaat, ‘Nikus nituu aapatisih maa anite nishuuminaahtikw nihtaauchihchikan aschiihch anuhchiish.’ 29Ekw kaa itikut aniyuu ukusisa, ‘Namui nikaa uhchi nituu aapatisin.’ Paatimaa maak chii nituu aapatisiyuuh. 30Ekw an uhtaawiimaau kaa nituwaapamaat aniyuu kutak ukusisa, miin ekun kaa itaat chechii nituu aapatisiyich anite. Ekw kaa itikut aniyuu ukusisa, ‘Eh, nika ituhten.’ Namui maak uhchi ituhteyuuh. 31Taan maak yaakw anichii e niishitwaau naapeshach kaa nanihiihtuwaat uhtaawii.” Ekw Jesus kaa itikut aniyuu kaa kakwechimaat, “An ustesimaau.” Ekw Jesus kaa itaat, “Chiwiihtamaatinaawaau, anichii nitamukw kaa ihtitwaau chisheuchimaau e aapachihiikutwaau chechii maamuushtinamuwaatwaau ushuuliyaamiyuu ekw maak anichii pisikwaatisiiskweuch eukunich niishtam che piihchetwaau Chishemanituu uchisheuchimaawiniihch eshkw ekaa chiyawaau piihcheyekw. 32Wesh John kaa siikahiitaachet chichii pechi nituwaapamikuwaau e chii wii waapahtiitaakw kuiskutaatisiiwiniyuu, namui maak chuuhchi taapwehtawaawaau. Mikw maak anichii chisheuchimaau kaa aapachihiikuutwaau e maamuushtinamuwaatwaau ushuuliyaamiyuu kaye anichii pisikwaatisiiskweuch chii taapwehtaweuch taan kaa ishi aayimuutamaakutwaau kuiskutaatisiiwiniyuu. Aat iskutak wiyaapamekuch e taapwehtahkwaau uchii, namui yaapach chuuhchi kweskaatisiinaawaau namui yaapach chuuhchi taapwehtenaawaau.”
Kaa nihtaauchihchetwaau kaa tipaachimaakanuutwaau
Mark 12.1-12; Luke 20.9-19
33Ekw Jesus kaa itaat, “Nituhtamukw miin uu kutach Chiskutamaacheu tipaachimuwin. Chii ihtaau peyakwaau uchimaau e nihtaauchihtaat miinishah anit chechii uhchi ushihtaat shuuminaapuuyuu. Chii chipaham maak misiwe waaskaa aniyuu unihtaauchihchikan aschii. Kaye chii muunaauhkaham taanite che pichishchishkaakanuyikwaau aniyuu miinisha. Chii ushihtaau kaye chiimuushaapiiukamikuyuu anite che uhchi naanaakachihtaakanuyikwaau aniyuu unihtaauchihchikanh. Iskutak maak kaa chiishkwaa aihtit chii naanituwaapameu aweyuu chechii naanaakachihtaayich uyuu utaschii ekw kaa chistuhtet, waahiyuu e ihtakuniyich aschiiyuu kaa ituhtet. 34Iskutak maak wetihchipayiyich che maamuushtinikanuuyikwaau aniyuuh miinisha anit mistikuhch kaa nihtaauchihkwaau chii itishahweu utaapachihaakanh chechii nituwaapamaatwaau aniyuuh kaa naanaakachihtaayitwaau aniyuu utaschii chechii miikut wiya taan chipaa ishi ayaau. 35Ekw anichii kaa naanaakachihtaatwaau aniyuuh nihtaauchihchikan chii kuusiihkuweuch peyakw aniyuu aapachihaakanh kaa pechi itishahwaakanuyich ekw miin kutak kaa nipahaatwaau ekw miin aniyuuh kutak chii nipaheuch e chii paahpimusinaatahwaatwaau. 36Ekw maak an uchimaau miin chii itishahweu kutak aapachihaakanh, etituu e mihchetiyich. Mikw maak anichii kaa naanaakachihtaatwaau aniyuu nihtaauchihchikan yaapach ekun kaa ihtuutuwaatwaau aniyuu aapachihaakan. 37Ekw chek aniyuu ukusisa kaa itishahwaat an uchimaau e itwet, ‘Chika chisteyimeuch uyuu nikusa.’ 38Mikw maak anichii kaa naanaakachihtaatwaau aniyuuh nihtaauchihchikan iskutak wiyaapamaatwaau aniyuu uchimaamuwaauh ukusiyuuh chii itituuch, ‘Eukw uyuu an kuuchimaaminuu tipiyeu ukusisa. Wiya chika aashuu miyaakanuu uyuu nihtaauchihchikan aschiiyuu. Nipahaataau. Ekw maak uyuu utaschii chiyaanuu che tipiyeusiyuuhkw.’ 39Ekw kaa maakunaatwaau, kaa wiiwiitishinaatwaau anit uhchi aniyuu nihtaauchihchikan aschiiyuu ekw kaa nipahaatwaau.”
40Ekw Jesus kaa itaat aniyuu kaa niikaanishkuwaayich ayimiheuchimaau kaye aniyuu Phariseeh kaa tipaachimushtuwaat, “Taan maak e iteyimekw che ihtuutuwaat an uchimaau aniyuu kaa naanaakachihtaayich unihtaauchihchikanh iskutak takushihke.”
41Ekw kaa itikut aniyuu kaa tipaachimushtuwaat iinuu, “Takushihke an uchimaau chika nipaheu aniyuuh machi aapachihaakanh ekw che miyaat kutak aweyuu chechii naanaakachihtaayich aniyuu unihtaauchihchikan aschii, eukw maak uyuuh che miikut wiya taan e ishi tipiyeusiit iskutak chiishi nihtaauchiniikwaawenh aniyuu unihtaauchihchikan.”
42Ekw Jesus kaa itaat, “Namui aa kuuhchi ayimihtaanaawaau kaa itashtech anite Chishemanituu utayimuwinihch,
Chii aataweyimeuch kaa waaskaahiikanihchetwaau aniyuu asinii chihchiwe e aapatisiyich e chiihcheyaayich. Eukw uyuu Utipeyihchikeu utaihtuwin, nuwach miskaasinaakuniyuu e kanawaapahtaakanuyich.”
43Ekw Jesus kaa ati itaat, “Uu maak chii wii ishi wiihtamaatinaawaau, Chishemanituu uchisheuchimaawin kata iichenikanuu anit chiyawaau e ihtaayekw, ekw che aashuumiyaakanuutwaau anichii taapwe che nuukuhtaawaatwaau upimaatiisiwiniwaahch Chishemanituuh uchisheuchimaawiniyuu. 44Wesh itashteu anite Chishemanituu utayimuwinihch, ‘Awen e pisusimikut aniyuu asinii mitun chika piikushin, ekw maak maahtakuhukute aniyuu asinii mitun tekash kata pichischishkaakuu.’ ”
45Anichii maak kaa niikaanapitwaau ayimiheuchimaauch kaye anichii Phariseech chii pehtaweuch Jesus e wiihtamiyich uyuu tipaachimuwin chiskutamaachewiniyuu, chii chischeyihtamuch maak wiyawaau e aayimuumikutwaau. 46Chii wii maakuneuch maak aniyuu Jesus, mikw chii kushteuch aniyuu iinuu taan che ihtiyich wesh anichii iinuuch mitun chii cheshtinaateyihtamuch Jesus e uchischiwehiichesuyich.
Currently Selected:
Matthew 21: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
