Kufuma 15

Sumu ya Mozesi

1Penepapo Mozesi na ŵaIsraele ŵakayimbira Fumu sumu iyi:

“Nditi ndimbire Fumu,

pakuti yili kuthuwuskika chomene.

Yaponya mu nyanja

mahachi na awo ŵakwerapo.#Uvu 15.3

2 Fumu ndi nkhongono yane na sumu yane,

yazgoka kuŵa chiponosko chane.

Ndi Chiuta wane, ndipo ine nditi ndimurumbe iyo,

Chiuta wa ŵadada, ndipo ine nditi ndithuwuske iyo.#Mas 118.14; Yes 12.2

3 Fumu ndi chinkhara mu nkhondo,

Fumu ndilo zina lakhe.

4“Yikaponya mu nyanja magareta gha Faro na ŵasilikari ŵakhe.

Yikaŵabizga mu nyanja ya matete

ŵarongozgi ŵakhe ŵakuzirwa ŵa nkhondo,

5Ndimba za maji zaŵabenekerera,

ŵadodomera pasi pa maji nga ndi libwe.

6“Mwe Fumu, woko linu la maryero,

nda uchindami mu nkhongono.

Mwe Fumu, woko linu la maryero,

likuphwanya ŵarwani.

7Mu ukuru wa ufumunkhuru winu,

mukuŵamara ŵarwani ŵinu,

mukureka ukari winu ukugolera na kuŵamyangura,

nga ndi moto pa lusakati.

8Na muvuchi kufuma ku mphuno zinu,

maji ghakawunjikika pamoza.

Maji ghakupoma ghakimilira nga ndi chiliŵa,

ndimba ya maji yikakhoma mukati mu nyanja.

9Murwani wakati,

‘Nditi ndiŵarondezge na kuŵasanga.

Nditi ndigaŵe vyakuskogha,

ndipo nditi nditore ivyo ndakhumba.

Nditi ndisorore lupanga lwane,

ndipo woko lane liti liŵamarenge petu.’

10Kweni imwe mukaputiska muvuchi winu,

ndipo nyanja yikaŵabenekerera.

Ŵakabira nga ndi muthovu,

mu maji gha nkhongono.

11“Ndi njani wakukozgana na imwe, mwe Fumu,

mukati mu ŵachiuta?

Ndi njani wakukozgana na imwe,

wa uchindami mu kupatulika,

wakopeka mu milimo yankhongono,

na wakuchita minthondwe.

12Ndimwe mukanyoroska woko linu la maryero,

ndipo charu chikaŵamira.

13Mu chisungusungu chinu mukaŵadangirira,

ŵanthu awo mukaŵawombola.

Mu nkhongono zinu, mukaŵarongozgera,

ku chikhazi chinu chakupatulika.

14Ŵamitundu ŵapulika ndipo ŵatenthema,

urwirwi waŵakora awo ŵakukhara mu charu cha Filisitiya.

15Mafumu gha mu Edomu nkhongono zamara,

ŵarongozgi ŵa mu Mowabu ŵakoreka na wofi,

ŵanthu ŵakukhara mu Kanani, matumbo ghasongonoka.

16Wofi na chitenthe vyaŵawira.

Na nkhongono ya woko linu,

ŵali chete nga ndi libwe,

ŵasuke ŵambuke ŵanthu ŵinu, Mwe Fumu,

ŵanthu awo muli kuŵawombola.

17Muti muŵanjizge na kuŵapanda mu phiri linu na linu,

malo agho muli kujinozgera kuti mukharengemo, Mwe Fumu,

malo ghakupatulika, Mwe Fumu, agho woko linu likimika.

18 Fumu yiti yiwuse muyirayira swii.”

Sumu ya Miriyamu

19Para mahachi gha Faro, magareta na ŵakukwera mahachi, ŵakanjira mu nyanja, Fumu yikawezgera maji ya nyanja pa iwo. Kweni ŵaIsraele ŵakenda mu charu chomizo mukati mu nyanja.

20Penepapo nchimi yanakazi Miriyamu, uyo wakaŵa mudumbu wa Aroni wakatora mutyangara, ndipo ŵanakazi wose ŵakamurondezga uku ŵakwimba mityangara na kuvina. 21Ndipo Miriyamu wakaŵayimbira sumu, wakati,

“Yimbirani Fumu,

pakuti yaruska mu uchindami.

Mahachi na ŵakukwera ŵakhe,

yaŵaponya mu nyanja.”

Maji ghakuŵaŵa ku Mara na Elimu

22Ndipo Mozesi wakarongozgera ŵaIsraele kufuma ku Nyanja ya Matete kuya kanjira mu mapopa gha Shuru. Ŵakenda mazuŵa ghatatu mu mapopa kwambula kusanga maji. 23Para ŵakafika pa malo ghakuchemeka Mara,#15.23 Mara: Mazgu ghakuti “Mara” ghakung'anamula kuti, “kuŵaŵa”. kuti ŵakamwa maji ghara chara chifukwa ghakaŵa ghakuŵaŵa. Ntheura malo ghara ghakachemeka Mara. 24Ŵanthu ŵakadinginyikira Mozesi ŵakati, “Kasi timwengechi?”

25Penepapo Mozesi wakaromba kwa Fumu ndipo iyo yikamurongora kakhuni. Kakhuni kara wakakaponya mu maji, ndipo maji ghakazgoka ghaweme.

Penepapo Fumu yikaŵalayizga na kuŵapa dango, ndipo yikaŵayezga yikati, 26“Usange mupulikirenge na phamphu mazgu gha Fumu, Chiuta winu na kuchita icho nchakunyoroka panthazi pakhe, usange mukupulikira marango ghakhe, na kusunga vilayizgo vyakhe vyose, kuti nditi ndize na nthenda kwa yumoza wa imwe chara nga ndi iyo nkhiza nayo ku ŵaEguputo. Pakuti ine ndine Fumu iyo yikuchizga imwe.”

27Penepapo ŵakafika ku Elimu apo pakaŵa visimi vya maji 12, na mikama 70. Ndipo ŵakazenga misasa yawo penepapo pa maji.

Currently Selected:

Kufuma 15: Tumbuka

Highlight

Copy