Kufuma 19

ŴaIsraele pa Phiri la Sinayi

1Pa zuŵa lakudanga la mwezi wa chitatu, ŵaIsraele ŵakati ŵafuma mu charu cha Eguputo, pa zuŵa leneilo ŵakiza mu mapopa gha Sinayi. 2Ŵakenda kufuma ku Refidimu na kwiza mu mapopa gha Sinayi, ndipo ŵakazenga misasa yawo kwenekura pafupi na Phiri la Sinayi. 3Penepapo Mozesi wakakwera phiri kuya kakumana na Chiuta.

Ndipo Fumu yikamuchema kufuma pa phiri yikati, “Ntheura ndimo ukwenera kuyowoyera ku ŵaIsraele, mbumba ya Yakhobe: 4Imwe mwekha muli kuwona icho nkhachita ku ŵaEguputo na umo nkhamuyegherani pa mapapindo nga ndi nombo na kwiza namwe kwa ine ndamwene. 5Ntheura sono, usange mundipulikirenge ine na kusunga phangano lane, muti muŵenge ŵanthu ŵane mukati mu ŵamitundu wose. Nangauli charu chose nchane,#Mar 4.20, 7.6, 14.2, 26.18; Tit 2.14#1 Pet 2.9 6ndipo kwa ine imwe muti muŵenge ufumu wa ŵasofi na fuko lakupatulika. Agha ndi mazgu agho ukwenera kuyowoya ku ŵaIsraele.”#Uvu 1.6, 5.10 7Ntheura Mozesi wakawerako ndipo wakachema ŵarara ŵa ŵanthu na kuŵaphalira mazgu ghose agho Fumu yikamulayizga. 8Ndipo ŵanthu wose wakazgora pamoza ŵakati, “Vyose ivyo Fumu yayowoya titi tichitenge.” Penepapo Mozesi wakaya kaphara zgoro la ŵanthu kwa Fumu.

9 Fumu yikati kwa Mozesi, “Ine nditi ndizeso kwa imwe mu bingu lakuti waka bii mwakuti ŵanthu ŵapulike na kukugomezga para nkhuyowoya nawe kwa muyirayira.”

Penepapo Mozesi wakaphara mazgu gha ŵanthu kwa Fumu. 10Ndipo Fumu yikati kwa Mozesi, “Ruta ku ŵanthu ndipo uŵapatule muhanya uno na na machero. Ŵachape vyakuvwara vyawo, 11kuti ŵaŵe ŵakunozgeka pa zuŵa la chitatu, pakuti pa zuŵa ilo, ine Fumu namukhira pa Phiri la Sinayi kuti ŵanthu wose ŵandiwone. 12Ndipo ukaŵaŵikire mphaka kuzingirizga phiri na kuti kwa iwo, ‘Chenjerani, mureke kukwera phiri nesi kukhwaska umo likuperera. Yose uyo wamkukhwaska phiri wamkukomeka nadi.#Heb 12.18-20 13Ŵangamukhwaskanga chara kweni ŵakamudine na mawe panji ŵakamulase na mivwi. Pakaŵavye chakuŵa na umoyo manyi ndi chakuŵeta panji munthu, chose chikakomeke. Para mbata yamkulira chomene kwa nyengo yitali, ndipo ŵakakwerenge phiri.’ ”

14Ntheura Mozesi wakakhira kufuma ku phiri na kuruta ku ŵanthu, wakaŵapatula ŵanthu ŵara ndipo iwo ŵakachapa vyakuvwara vyawo. 15Penepapo wakati ku ŵanthu, “Nozgekerani zuŵa la chitatu ndipo mungagonananga na mwanakazi chara.”

16Na mulenje pa zuŵa la chitatu kukaŵa vikhayokhayo na ŵaleza, na chibingu chakuti waka bii pa phiri ndipo na kulira kukuru kwa mbata. Penepapo ŵanthu wose awo ŵakaŵa pa misasa ŵakatenthema.#Uvu 4.5#Mar 4.11-12 17Mozesi wakarongozgera ŵanthu kufuma mu misasa kuti ŵakakumane na Fumu, ndipo wose ŵakiza kimilira musi mu phiri. 18Ndipo Phiri lose la Sinayi likabenekerereka na josi pakuti Fumu yikakhilira pa ilo mu moto. Josi likakwera kuchanya nga ndi ilo likufuma mu ng'anjo. Ndipo phiri lose lukasunkhunyika chomene. 19Ndipo apo mazgu gha mbata ghakakulirangakuliranga kulira, Mozesi wakayowoyanga, ndipo Chiuta wakamuzgoranga mu vikhayokhayo. 20Fumu yikakhilira pachanya pa Phiri la Sinayi, ndipo yikamuchema Mozesi kuti wakwere pachanya pa phiri. Penepapo Mozesi wakwera. 21Ndipo Fumu yikati kwa iyo, “Khira ndipo ukaŵachenjezge ŵanthu mzire ŵajumphe mphaka kuti ŵize kwa ine kwiza kandiwona ndipo ŵanandi ŵafwe. 22Ŵasofi nawoso awo ŵakusenderera kufupi na Fumu, wajipatule mzire Fumu yiŵavundumukire.”

23Ndipo Mozesi wakati kwa Fumu, “Ŵanthu kuti ŵangakwerera ku Phiri la Sinayi chara, pakuti imwe mwekha ndimwe mukatichenjezga kuti, ‘Ŵikani mphaka kuzingirizga phiri ndipo mulizgore kuŵa lakupatulika.’ ”

24 Fumu yikati kwa Mozesi, “Khira kuti ukamutore Aroni na kwizaso kwa ine. Kweni ŵasofi na ŵanthu ŵangajumphanga mphaka chara nanga nkhukwerera kwa ine mzire ndiŵavundumukire.” 25Ntheura Mozesi wakakhira ku phiri ndipo wakaŵaphalira ŵanthu.

Currently Selected:

Kufuma 19: Tumbuka

Highlight

Copy