Kufuma 29

Marango gha kupatula Aroni na ŵana ŵakhe

(Lev 8.1-36)

1“Icho wamkuchita pakupatuliska Aroni na ŵana ŵakhe ku mlimo wa usofi ndi ichi: Utore kankhambako kamoza na mberere zanarume ziŵiri zambula kalema. 2Utoreso chingwa chambula chirungo, vingwa vipapati vyambula chirungo vyakusazgako mafuta, ndiposo na tuvingwa tupepefu twambula chirungo twakuphakako mafuta. Vyose ivi uvipange na ufu wakunyiririka wa tirigu. 3Ndipo uviŵike mu chidunga chimoza na kwiza navyo kwa ine pamoza na nkhambako na mberere zanarume ziŵiri zira.

4“Wize na Aroni na ŵana ŵakhe ku muryango wa Chihema Chakukumaniranamo ndipo wose uŵageziske na maji. 5Penepapo utore vyakuvwara vya usofi vira na kumuvwarika Aroni, munjilira wa mukati, efodi, chakuvwara cha pa chifuŵa na lamba wakusoneka mwa unkhwantha. 6Ndipo umuvwarike chilemba pa mutu wakhe na kuŵika mphumphu yakupatulika pa kambale kara. 7Ntheura utore mafuta ghakuphakazgira na kughapungulira pa mutu wakhe na kumuphakazga.

8“Utore ŵana ŵakhe na kuŵavwarika malaya ghawo. 9Uŵavwarikeso ŵalamba mu viwuno vyawo. Ndipo uvwarike wose Aroni na ŵana ŵakhe visoti. Umo ndimo iwo na mphapu yawo ŵati ŵaŵirenge ŵasofi ŵane pakurondezga dango ilo nkhimika kuti likhalirire kwa muyirayira.

10“Ntheura ukize na nkhambako panthazi pa Chihema Chakukumaniranamo, ndipo Aroni na ŵana ŵakhe ŵaŵike mawoko ghawo pa mutu wa nkhambako yira. 11Ndipo nkhambako yira uyikome panthazi pa Fumu, pa muryango wa Chihema Chakukumaniranamo. 12Utorepo ndopa zinyakhe za nkhambako yira uziphake na munwe wako pa masengwe ghaŵiri gha jochero. Ndipo izo zakharapo, ukazithire pasi musi mwa jochero. 13Utore mafuta ghose agho ghali mu vya mukati, mafuta gha pachanya pa chiŵindi, ziso ziŵiri pamoza na mafuta agho ghali mwenemumo ndipo woche pa jochero. 14Kweni nyama ya nkhambako, chikumba chakhe, na matumbo ghakhe woche pa moto kuwaro kwa msasa. Pakuti ndi sembe yakuphepiskira kwananga.

15“Utore yimoza mwa mberere zanarume ziŵiri zira, ndipo Aroni na ŵana ŵakhe ŵanarume ŵaŵike mawoko ghawo pa mberere yira. 16Ukome mberere yanarume yira na kutora ndopa zakhe ndipo uzimije kuzingirizga jochero. 17Mberere yanarume uyichekete tuchokotuchoko, ndipo usuke vya mukati na malundi ghakhe na kuyiŵika pamoza na mutu wakhe. 18Ndipo woche mberere yanarume yose pa jochero. Iyi ndi sembe yakocha yakupereka kwa Fumu. Iyi ndi sembe ya sungu liweme yakuperekeka na moto kwa Fumu.#Efe 5.2; Fil 4.18

19“Utore mberere yanarume yinyakhe yira ndipo Aroni na ŵana ŵakhe ŵaŵike mawoko ghawo pa mutu wa mberere yanarume yira. 20Ukome mberere yanarume yira ndipo utorepo ndopa zinyakhe na kuphaka ku songo kwa khutu la laya la Aroni ku maryero na pa malaya gha ŵana ŵakhe ku maryero, pa vigunwe vya mawoko ghawo ghakumaryero na pa vigunwe vya malundi ghawo ghakumaryero. Ndipo zakukharapo uzimije kuzingirizga jochero. 21Ndipo utorepo ndopa izo zili pa jochero na mafuta ghakuphakazgira na kumijira pa Aroni na malaya ghakhe ndiposo pa ŵana ŵakhe na malaya ghawo. Ntheura iyo na ŵana ŵakhe ŵati ŵaŵenge ŵakupatulika pamoza na vyakuvwara vyawo.

22“Utoreso mafuta ya mberere yanarume yira, mafuta gha muchira, mafuta ya vya mukati, mafuta ya pa chiŵindi, ziso ziŵiri pamoza na mafuta agho ghali mwenemumo, ndiposo na chigha cha ku maryero. Pakuti ndi mberere yakupatuliskira ŵasofi. 23Kufuma mu chidunga cha vingwa vyambula chirungo chakuperekeka kwa Fumu, utorepo chingwa chimoza, chingwa chipapati chakusazgako mafuta chimoza na kachingwa kapepefu. 24Uŵike vyose ivi mu mawoko gha Aroni na ŵana ŵakhe kuti ŵavipatuliskire kuŵa sembe ya pa dera pakuyizungunyira kwa ine Fumu. 25Uvitoreso kufuma mu mawoko ghawo ndipo woche pa jochero pamoza na sembe yakocha, kupereka sungu liweme panthazi pa Fumu. Iyi ndi sembe iyo yikuperekeka kwa Fumu pa kocha na moto. 26Utore nganga ya mberere yanarume iyo wakoma pakuphakazga Aroni na kuyipatuliskira ine kuŵa sembe ya pa dera pakuyizungunyira kwa Fumu. Ndipo yeneiyi ndiyo yiŵenge phande yako.

27“Nganga na chigha cha mberere yanarume iyo yakomekera pakuphakazga ŵasofi zipatuliskikire ine pakuzungunya kuŵa sembe ya pa dera. Nyama yose iyi nja Aroni na ŵana ŵakhe. 28Ivi ndivyo ŵaIsraele ŵamkusangulira Aroni na ŵana ŵakhe nyengo yose. Pakuti ndi phande la ŵasofi lakuperekeka na ŵaIsraele kufumira mu sembe zawo za wenenawene. Yeneiyi ndi sembe yawo kwa Fumu.

29“Vyakuvwara vyakupatulika vya Aroni viti viŵenge vya ŵana ŵakhe para iyo wafwa mwakuti ŵaphakazgikirengemo na kupatuliskikira mu vyeneivi. 30Mwana uyo ndi musofi mu malo ghakhe, para wakwiza kuti wateŵete mu Malo Ghakupatulika gha mu Chihema Chakukumaniranamo, wamkuvwara vyakuvwara ivi mazuŵa ghankhonde na ghaŵiri.

31“Utore mberere yanarume yakupatuliskira, ndipo uphike nyama yakhe mu malo ghakupatulika. 32Aroni na ŵana ŵakhe waryere nyama ya mberere yanarume yira na vingwa vya mu chisero chira pa muryango wa Chihema Chakukumaniranamo. 33Ŵarye vyawanangwa ivi vyeneivyo wakaphepiskira pakuŵapatula kuŵaphotora, kweni munthu munyakhe waliyose wareke kuryako chifukwa ndi vyakupatulika. 34Usange nyama panji vingwa vyakupatuliskira vyakukharako kufika na mulenje, woche pa moto kuti vireke kuryeka pakuti ndi vyakupatulika.

35“Vyose ivyo ndakulangula umuchitire Aroni na ŵana ŵakhe. Pakaŵe mazuŵa ghankhonde na ghaŵiri pakuŵapatuliska. 36Zuŵa lirilose ukapereke nkhambako kuŵa sembe yakuphepiskira zakwananga. Ukaperekeso ya zakwananga pa jochero para ukuliphepiskira na kuliphaka mafuta kuti liŵe lakupatulika. 37Pa mazuŵa ghankhonde na ghaŵiri upereke sembe yakuphepiskira jochero na kulipatula. Mwa ntheura jochero liti liŵenge lakupatulika nkhanira. Chose icho chikhwaskenge jochero, chiti chiŵenge chakupatulika.

Vyakupereka vya zuŵa na zuŵa

(Kup 28.1-8)

38“Ivyo ukwenera kupereka pa jochero kurutilira zuŵa na zuŵa ndi ivi: ŵana-mberere ŵanarume ŵaŵiri ŵa chirimika chimoza. 39Ukapereke mwana-mberere yumoza na mulenje ndipo mwana-mberere munyakhe ukapereke na mise. 40Pamoza na mwana-mberere wakudanga, ukapereke kilogiramu limoza la ufu wakunyiririka wa tirigu wakusazgikana na lita limoza la mafuta ghakwengeka makora gha maolive, ndiposo lita limoza la vinyo nga nchakupereka cha chakumwa. 41Ukapereke mwana-mberere wa chiŵiri na mise pamoza na sembe ya ufu na sembe yakhe ya vyakumwa nga ndi umo wanguchitira na mulenje kuti vipereke sungu liweme, kuŵa sembe yakocha kwa Fumu. 42Sembe yakocha iyi yikaperekekenge kaŵirikaŵiri mu miwiro yose pa muryango wa Chihema Chakukumaniranamo, panthazi pa Fumu apo ndamkukumana na kuyowoya namwe. 43Penepapo ndipo ndamkukumana na ŵaIsraele ndipo malo agho ghati ghapatulika chifukwa cha uchindami wane. 44Chihema Chakukumaniranamo na jochero nditi ndivipatule, ndipo Aroni na ŵana ŵakhe nawo nditi ndiŵapatule kuti ŵanditeŵeterenge nga mbasofi. 45Nditi ndikhare mukati mu ŵaIsraele, na kuŵa Chiuta wawo. 46Ndipo ŵamkumanya kuti ine, ndine Fumu, Chiuta wawo, ndamweneine nkhaŵafumiska mu charu cha Eguputo kuti ndiŵe mukati mwawo. Ine ndine Fumu, Chiuta wawo.

Currently Selected:

Kufuma 29: Tumbuka

Highlight

Copy