Kufuma 5

Mozesi na Aroni panthazi pa Faro

1Pamanyuma pa ivi Mozesi na Aroni ŵakaruta kwa Faro ndipo ŵakati, “Fumu, Chiuta wa ŵaIsraele wakuti, ‘Zomerezga ŵanthu ŵane kuti ŵarute mwakuti ŵakandichitire chiphikiro ku mapopa.’ ”

2Kweni Faro wakati, “Kasi Fumu ndi njani kuti ndiyipulikire na kuzomerezga kuti ŵaIsraele ŵarute? Fumu nkhuyimanya chara ndiposo nditi ndizomerezgenge chara kuti ŵaIsraele ŵarute.”

3Ntheura wakati, “Chiuta wa ŵaHebere wakumana nase. Tikumuŵeyani, zomerani kuti tirute mu mapopa ulendo wa mazuŵa ghatatu mwakuti tikapereke sembe kwa Fumu, Chiuta withu, mzire watikome na vilengo panji na lupanga.”

4Kweni karonga wa charu cha Eguputo wakati kwa Mozesi na Aroni, “Imwe nchifukwa uli mukuŵawuskapo ŵanthu pa milimo yawo? Wererani ku milimo yinu yinonono. 5Faro wakatiso, ‘Ŵanthu aŵa sono mbanandi mu charu kuruska ŵaEguputo ndipo imwe mukukhumba kuŵapumuzga ku milimo yawo yinonono.’ ”

6Zuŵa lenelira Faro wakalangula ŵarara ŵakuŵalaŵirira pa mlimo na ŵarongozgi ŵawo ŵaIsraele kuti, 7“Mungaŵapangaso ŵanthu aŵa utheka wa njerwa nga mphakudanga chara. Ŵarekani ŵarutenge kuya kajiphera utheka. 8Kweni unandi wa njerwa uŵe wenewura wa pakudanga, mureke kuchepeska na pachoko pose. Ŵanthu aŵa mbakata, ndicho chifukwa ŵakutilira kuti, ‘Tizomerezgani kuti tirute tikapereke sembe kwa Chiuta withu.’ 9Musazgireko nchito ya ŵanthu aŵa kuti yiŵe yinonono kwakuruska mwakuti warutilirenge kuteŵeta mlimo ndipo ŵareke kutegherezga ku mazgu gha utesi.”

10Ntheura ŵarara ŵakuŵalaŵirira pa mlimo na ŵarongozgi ŵawo ŵakaruta ndipo wakaŵaphalira ŵanthu kuti, Faro wakuti, “Nditi ndimupaninge utheka chara. 11Rutani mukiphe mwekha utheka kose uko mungakawusanga. Kweni mlimo winu kuti uti uchepeskekenge na pachoko pose chara.” 12Ntheura ŵanthu ŵakambininika mu charu chose cha Eguputo kuya katora lusakati mu malo mwa utheka. 13Ŵarara ŵakuŵalaŵirira pa mlimo wakaŵakoserezga pakuyowoya kuti, “Marizgani mlimo winu wa zuŵa na zuŵa nga ndi umo kukaŵiranga para ŵakamupaninge utheka.” 14Ŵarongozgi ŵawo ŵa ŵaIsraele awo ŵarara ŵakuŵalaŵirira ŵa Faro ŵakimika ŵakatimbikanga na kufumbika kuti, “Kasi mwarekerachi kufiska mlimo winu wakawumba njerwa muhanya uno nga ndi umo mukachitiranga pakudanga.”

15Ntheura ŵalaŵiliri ŵa ŵaIsraele ŵakaruta kuya kadandaula kwa Faro, ŵakati, “Kasi mwachitirachi ntheura na ŵateŵeti ŵinu? 16Utheka kuti ukupika ku ŵateŵeti ŵinu chara ndipo wakuti, ‘Wumbani njerwa.’ Ŵateŵeti ŵakutimbika apo kupuvya kuli ku ŵanthu ŵinu.”

17Faro wakati, “Ŵakata imwe! Muli ŵakata nadi. Ndicho chifukwa mukuyowoya kuti, ‘Tizomerezgani kuti tirute kuya kapereka sembe kwa Fumu. 18Rutani sono, ndipo mukachitenge mlimo winu pakuti utheka kuti upikenge kwa imwe chara, ndipouli mukwenera kufiska njerwa izo muli kupimikira.’ ” 19Ŵalaŵiliri ŵa ŵaIsraele ŵakawona kuti ŵali mu suzgo para ŵakaphalirika kuti, “Unandi wa njerwa uwo mukwenera kuwumba zuŵa na zuŵa mungachepeskanga chara.”

20Ŵakati ŵafumako kwa Faro, ŵakakumana na Mozesi na Aroni ŵeneawo ŵakimilira pa nthowa kuti ŵakumane nawo. 21Ndipo ŵakati kwa Mozesi na Aroni, “Fumu yimulaŵiskani na kumweruzgani, chifukwa mwatitinkhiska kwa Faro na ŵateŵeti ŵakhe. Imwe ndimwe mwaŵika lupanga mu mawoko ghawo kuti ŵatikome ise.”

Mozesi wakudandaula kwa Fumu

22Ntheura Mozesi wakawerera kwa Fumu ndipo wakati, “Mwe Fumu, kasi nchifukwa uli mwaŵachitira chiheni ŵanthu aŵa? Nchifukwa uli mukandituma? 23Ndipo umo nkharutira kwa Faro kuti nkhayowoye nayo mu zina linu waŵa wakuŵachitira chiheni ŵanthu aŵa. Kweni imwe kuti mwachitapo kanthu chara kuti muŵathaske.”

Currently Selected:

Kufuma 5: Tumbuka

Highlight

Copy