Mutendeko 34

Kukazuzgika kwa Dayina

1Sono Dayina mwana mwanakazi wa Yakhobe, wakubabika kwa Leya, wakaruta kuya kachezga na ŵanakazi ŵenecharu. 2Shekemu mwana wa Hamoro muHivi, karonga wa charu chira, wakamuwona ndipo wakamukora na kugona nayo mwakuchichizga. 3Kweni mtima wakhe ukaguzikira pa Dayina mwana wa Yakhobe. Iyo wakamutemwa nadi mwali uyu, ndipo wakayowoyanga nayo makora. 4Ntheura Shekemu wakamuphalira wiske Hamoro wakati, “Nditorerani mwali uyu kuti waŵe muwoli wane.”

5Sono Yakhobe wakapulika kuti Shekemu wamukazuzga mwana wakhe Dayina. Kweni pakuti mwana wakhe mwanarume wakaŵa na vyakuŵeta vyakhe ku thengere, iyo wakakhara waka chete ŵakasuka ŵakiza ŵana ŵakhe. 6Hamoro wiske wa Shekemu wakaruta kwa Yakhobe, kuya kayowoyeskana nayo. 7Pa nyengo iyi ŵana ŵa Yakhobe ŵakawera kufuma ku thengere para ŵakapulika ichi. Ŵana ŵara ŵakakwiya ndipo ŵakakaripa chomene, chifukwa wakachita cha kupusa mukati mwa Israele pakuleŵana na mwana wa Yakhobe. Chinthu cha ntheura chikenera chara kuchitika. 8Kweni Hamoro wakayowoyeskana nawo, wakati, “Mwana wane Shekemu wamutemwa mwana winu. Nkhumuŵeyani, mumupe kuti waŵenge muwoli wakhe. 9Mutoreranenge nase. Mutipenge ŵana ŵinu ŵanakazi, namwe mutorenge ŵithu. 10Muti mukharenge nase, ndiposo muti muŵenge na malo mu charu ichi. Mukhare na kuchitiramo malonda, kuti musange usambazi mwenemumo.”

11Shekemu wakatiso ku ŵawiske ŵa Dayina na ku ŵadumbu ŵakhe, “Ndizomerezgani kuti ndisange uchizi pa maso pinu, ndipo chose icho muti muyowoye kwa ine nditi ndipereke. 12Muphare mtengo uliwose wa malowolo ndipo mundiphalire chawanangwa icho mukukhumba. Ine nditi ndimupeninge icho mwandiphalira. Kweni mundipe ndipera mwali uyu kuti waŵe muwoli wane.”

13Ŵana ŵa Yakhobe ŵakamuzgora Shekemu na wiske Hamoro mu upusikizgi, chifukwa Shekemu wakamukazuzga mudumbu wawo Dayina. 14Iwo ŵakaŵaphalira ŵakati, “Tingachita chinthu ichi chara, kuti tipereke mudumbu withu kwa uyo ngwambula kukotoreka, pakuti ichi nchakukhozga soni kwa ise. 15Tingamanya kuzomera usange imwe mungaŵa nga ndi umo tiliri ise, kuti mwanarume yose wa mwa imwe wakotorekenge. 16Penepapo ndipo titi tiperekenge mwana withu kwa imwe. Naseso titi titorenge ŵana ŵinu, ndiposo titi tikharenge namwe, na kuzgoka mtundu umoza. 17Kweni usange murekenge kuzomera ivyo tikuyowoya, kuti mukotoreke, ipo mwana withu mwanakazi timutorenge na kuruta.”

18Mazgu ghawo ghakakondweska Hamoro, na Shekemu mwana wakhe. 19Munyamata uyu kuti wakaziurika chara kuchita chinthu ichi, chifukwa wakamutemwa mwana wa Yakhobe. Shekemu wakaŵa wakuchindikika kuruska wose ŵa mbumba yakhe.

20Ntheura Hamoro na mwana wakhe Shekemu ŵakiza ku chipata cha msumba wawo, ndipo ŵakayowoyeskana na ŵanthu mu msumba wawo ŵakati, 21“Ŵanthu aŵa mbabwezi ŵithu. Ntheura rekani ŵakhare mu charu, na kuchita malonda mwenemumo, pakuti charu ichi nchisani ndipo chingakwana nawo. Titorenge ŵana ŵawo kuti ŵaŵenge ŵawoli ŵithu, ndipo ise nase tiŵapenge ŵana ŵithu ŵanakazi. 22Pali chinthu chimoza pera kuti Ŵanthu ŵara ŵangamanya kuzomera na kukhara nase kuti tiŵe mtundu umoza usange mwanarume waliyose mukati mwithu waŵenge wakukotoreka nga ndiwo. 23Ng'ombe zawo, na vyuma vyawo, na vyakuŵeta vyawo vyose, vitiŵenge vyithu. Tizomerezgane nawo waka ndipo ŵati ŵakharenge nase.” 24Ŵanthu wose ŵa mu msumba ŵakazomerezgana na Hamoro na Shekemu mwana wakhe, ndipo ŵanarume wose ŵa mu msumba ura ŵakakotoreka.

25Pa zuŵa la chitatu, apo ŵakaŵa ŵachali kupulika vyakuŵinya, ŵana ŵa Yakhobe ŵaŵiri, Simiyoni na Levi, ŵadumbu ŵa Dayina, ŵakatora malupanga ghawo. Iwo ŵakiza mu msumba mwa mabuchibuchi ndipo ŵakakoma ŵanarume wose. 26Ŵakakoma na lupanga Hamoro na Shekemu. Ŵakamufumyamo Dayina mu nyumba ya Shekemu na kuruta. 27Ŵana ŵa Yakhobe ŵanyakhe ŵakiza pa awo ŵakakomeka ndipo wakaskogha msumba, chifukwa ŵakamukazuzga mudumbu wawo. 28Ŵakatora mberere na mbuzi zawo, ng'ombe, mbunda ndiposo na vyose ivyo vikaŵa mu msumba na mu minda. 29Ŵakatora vyuma vyose na kukora ŵana ŵawo na ŵawoli ŵawo ndiposo ŵakatora vyose ivyo vikaŵa mu zinyumba.

30Yakhobe wakati kwa Simiyoni na Levi, “Mwanditorera visuzgo, pakundizgora munthu wakutinkhika na ŵenecharu, ŵaKanani na ŵaPerezi. Ŵanthu awo ine ndili nawo mbachoko, ndipo usange ŵenecharu aŵa ŵangawungana pamoza na kurwa nane, nditi ndimarenge ine na ŵa mu nyumba yane.”

31Kweni iwo ŵakati, “Kasi iyo wangamuzgora ntheura mudumbu withu kuŵa nga ndi muleŵe?”

Currently Selected:

Mutendeko 34: Tumbuka

Highlight

Copy