Čơdơ̆ng Phŭn 35
35
Yakôp Wơ̆t Glaĭ Pơ Plei Bêthel
1Ơi Adai laĭ kơ Yakôp: “Brơi đĭ nao bĕ pơ plei Bêthel tañ mơtam laih anŭn dŏ hĭ pơ anŭn. Pơdơ̆ng bĕ sa boh kơƀang ngă yang ƀơi anih anŭn brơi kơ Ơi Adai, jing Pô hmâo pơrơđah rai laih kơ ih hlăk ih đuaĭ kơdŏp mơ̆ng Êsâo, ayŏng ih.”#Čơd 28:11-17. 2Tui anŭn Yakôp laĭ kơ ƀing mơnuih amăng sang ñu laih anŭn kơ abih bang ƀing mơnuih nao hrŏm hơbĭt hăng ñu: “Mă lui hĭ bĕ khul rup yang ƀing tuai mơ̆ng tơ̆ng krah ƀing gih. Pơrơgoh bĕ ƀing gih pô, laih anŭn pơblih sum ao ƀing gih. 3Brơi ƀing ta prăp rơmet đĭ nao pơ plei Bêthel. Ƀing ta či pơdơ̆ng ƀơi anih anŭn sa boh kơƀang ngă yang brơi kơ Ơi Adai, jing Pô hmâo laĭ glaĭ laih kơ tơlơi kâo iâu laĭ amăng hrơi kâo tơnap tap, hmâo dŏ hrŏm laih hăng kâo amăng abih jơlan kâo rơbat.” 4Tañ mơtam gơñu jao brơi kơ Yakôp abih bang rup yang ƀing tuai gơñu hlăk dŏ djă pioh, laih anŭn buai gơñu hlăk čŭt ƀơi tơngia. Yakôp dơr hĭ khul gơnam anŭn gah yŭ kơ phŭn kơyâo hơngo jĕ plei Sičem.
5Tơdang sang anŏ Yakôp rơbat nao, Ơi Adai brơi tơlơi hwĭ truh kơ ƀing dŏ amăng abih bang plei jum dar gơñu, yua kơ anŭn ƀing mơnuih anŭn ƀu khĭn kiaŏ ôh ƀing ană Yakôp. 6Yakôp hrŏm hơbĭt hăng ƀing đuaĭ tui ñu nao truh pơ plei Lus (jing plei Bêthel) amăng čar Kanaan. 7Ñu pơdơ̆ng sa boh kơƀang ngă yang ƀơi anih anŭn, laih anŭn pơanăn anih anŭn jing Êl Bêthel,#35:7 Êl Bêthel: kiăng pia jing “Ơi Adai kơ Bêthel”. yua kơ ƀơi anih anŭn Ơi Adai hmâo pơrơđah rai laih kơ ñu tơdang ñu đuaĭ kơdŏp mơ̆ng ayŏng ñu.
8Hlăk anŭn HʼDêbôra, ding kơna đah kơmơi pô pơmĕm brơi HʼRêbêka, djai laih anŭn arăng dơr ñu gah yŭ kơ phŭn kơyâo hơngo amăng plei Bêthel. Yua kơ anŭn yơh, arăng pia phŭn kơyâo anŭn jing Alôn Bakut.#35:8 Alôn Bakut: kiăng pia jing “kơyâo hơngo čŏk hia”.
9Tơdang Yakôp wơ̆t glaĭ mơ̆ng čar Padan Aram, Ơi Adai pơrơđah rai dơ̆ng brơi kơ Yakôp laih anŭn pha brơi tơlơi mơyun hiam kơ ñu. 10Ơi Adai laĭ kơ ñu: “Anăn ih jing Yakôp, samơ̆ arăng ƀu či iâu ih jing Yakôp dơ̆ng tah, anăn ih či jing Israel.” Tui anŭn Ơi Adai pơanăn ñu jing Israel.#Čơd 32:28. 11Ơi Adai laĭ dơ̆ng hăng ñu: “Kâo jing Ơi Adai Dưi Kơtang. Brơi ih đĭ kơyar laih anŭn hrôh lar bĕ. Sa kơnŭng djuai laih anŭn lu ƀing kơnŭng djuai či tơbiă rai mơ̆ng ih, laih anŭn mơ̆ng kian pruăi ih yơh či tơbiă rai ƀing pơtao.#Čơd 17:4-8. 12Lŏn Kâo hmâo pha brơi laih kơ Abraham laih anŭn Isak, Kâo ăt či pha brơi mơ̆n kơ ih laih anŭn kơnŭng djuai ih tơdơi kơ ih.”
13Giơ̆ng anŭn Ơi Adai đuaĭ hĭ mơ̆ng anih Ñu hmâo pơhiăp laih hăng Yakôp. 14Yakôp pơdơ̆ng đĭ sa ƀĕ tơmeh boh pơtâo ƀơi anih Ơi Adai hmâo pơhiăp laih hăng ñu, ñu ngă tơlơi pơyơr tuh ia tơpai laih anŭn tuh ia ƀâu hiam ƀơi hăng ngŏ kơ tơmeh anŭn.#Čơd 28:18-19. 15Hnŭn yơh Yakôp pia anih Ơi Adai hmâo pơhiăp laih hăng ñu jing Bêthel.#35:15 Bêthel: kiăng pia jing “sang Ơi Adai”.
HʼRačel Tơkeng Benjamin laih anŭn Djai
16Sang anŏ Yakôp tơbiă đuaĭ mơ̆ng plei Bêthel. Tơdang ƀing gơñu ăt dŏ ataih mơ̆ng plei Êphrata, HʼRačel čơdơ̆ng đih apui tơnap biă mă. 17Tơdang ñu dŏ ruă kơtang, đah kơmơi ƀuai laĭ kơ ñu: “Anăm hwĭ ôh, yua kơ ih či hmâo dơ̆ng sa čô ană đah rơkơi.” 18Hlăk ñu či djai laih, ƀơi mông ñu jĕ tơĭ pran, ñu pơanăn čơđai anŭn jing Ben Ôni;#35:18 Benôni: Amăng tơlơi Hêbrơ anăn anai kiăng pia jing “Ană đah rơkơi kơ tơlơi ruă nuă kâo”. samơ̆ ama gơ̆ pơanăn jing Benjamin.#35:18 Benjamin: kiăng pia jing “Ană đah rơkơi kơ tơngan gah hơnuă kâo”. 19HʼRačel djai, laih anŭn arăng dơr ñu ƀơi jơlan nao pơ plei Êphrata (jing plei Betlêhem).#35:19 Betlêhem: kiăng pia jing “sang ƀañ”. 20Yakôp pơdơ̆ng đĭ mơnơ̆ng pơkơnăl ƀơi ngŏ pơsat ñu. Anŭn jing mơnơ̆ng pơkơnăl kơ pơsat HʼRačel ăt dŏ truh pơ hrơi anai. 21Israel đuaĭ nao dơ̆ng laih anŭn pơdơ̆ng sang khăn ñu gah adih kơ sang gak Êder.
22Tơdang Israel dŏ amăng čar anŭn, Ruben nao đih hĭ hăng HʼBilha, bơnai hơjŭng ama ñu. Israel thâo tơlơi anŭn.#35:22 Hmâo đơđa hră pơblang so đưm hmâo thim: laih anŭn hil biă mă.#Čơd 49:4.
Pluh Dua Čô Ană Đah Rơkơi Yakôp
23Yakôp hmâo pluh dua čô ană đah rơkơi. Ƀing ană đah rơkơi HʼLêa: Ruben jing ană kơčoa Yakôp, tŏ tui jing Simêôn, Lêwi, Yuđa, Isakar, laih anŭn Sabulôn. 24Ƀing ană đah rơkơi HʼRačel: Yôsep laih anŭn Benjamin. 25Ƀing ană đah rơkơi HʼBilha, ding kơna đah kơmơi HʼRačel: Đan laih anŭn Naptali. 26Ƀing ană đah rơkơi HʼSilpa, ding kơna đah kơmơi HʼLêa: Gat laih anŭn Aser. Anai jing ƀing ană đah rơkơi arăng tơkeng brơi kơ Yakôp pơ čar Padan Aram.
Isak Djai Pơ Mamrê
27Yakôp glaĭ truh pơ Isak, ama ñu, pơ Mamrê, plei Kiriat Arba, jing plei Hêbron. Anai jing anih Abraham hăng Isak hmâo jưh laih hlâo adih.#Čơd 13:18. 28Isak hơdip truh kơ sa rơtuh sapăn pluh thŭn. 29Isak tơĭ pran. Ñu djai, wơ̆t glaĭ pơ ƀing ơi adon ñu hlăk thŭn ñu tha laih, ñu hrăp mơak amăng abih tơlơi hơdip ñu. Ƀing ană đah rơkơi ñu Êsâo laih anŭn Yakôp dơr hĭ ñu.
Currently Selected:
Čơdơ̆ng Phŭn 35: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.
Čơdơ̆ng Phŭn 35
35
Yakôp Wơ̆t Glaĭ Pơ Plei Bêthel
1Ơi Adai laĭ kơ Yakôp: “Brơi đĭ nao bĕ pơ plei Bêthel tañ mơtam laih anŭn dŏ hĭ pơ anŭn. Pơdơ̆ng bĕ sa boh kơƀang ngă yang ƀơi anih anŭn brơi kơ Ơi Adai, jing Pô hmâo pơrơđah rai laih kơ ih hlăk ih đuaĭ kơdŏp mơ̆ng Êsâo, ayŏng ih.”#Čơd 28:11-17. 2Tui anŭn Yakôp laĭ kơ ƀing mơnuih amăng sang ñu laih anŭn kơ abih bang ƀing mơnuih nao hrŏm hơbĭt hăng ñu: “Mă lui hĭ bĕ khul rup yang ƀing tuai mơ̆ng tơ̆ng krah ƀing gih. Pơrơgoh bĕ ƀing gih pô, laih anŭn pơblih sum ao ƀing gih. 3Brơi ƀing ta prăp rơmet đĭ nao pơ plei Bêthel. Ƀing ta či pơdơ̆ng ƀơi anih anŭn sa boh kơƀang ngă yang brơi kơ Ơi Adai, jing Pô hmâo laĭ glaĭ laih kơ tơlơi kâo iâu laĭ amăng hrơi kâo tơnap tap, hmâo dŏ hrŏm laih hăng kâo amăng abih jơlan kâo rơbat.” 4Tañ mơtam gơñu jao brơi kơ Yakôp abih bang rup yang ƀing tuai gơñu hlăk dŏ djă pioh, laih anŭn buai gơñu hlăk čŭt ƀơi tơngia. Yakôp dơr hĭ khul gơnam anŭn gah yŭ kơ phŭn kơyâo hơngo jĕ plei Sičem.
5Tơdang sang anŏ Yakôp rơbat nao, Ơi Adai brơi tơlơi hwĭ truh kơ ƀing dŏ amăng abih bang plei jum dar gơñu, yua kơ anŭn ƀing mơnuih anŭn ƀu khĭn kiaŏ ôh ƀing ană Yakôp. 6Yakôp hrŏm hơbĭt hăng ƀing đuaĭ tui ñu nao truh pơ plei Lus (jing plei Bêthel) amăng čar Kanaan. 7Ñu pơdơ̆ng sa boh kơƀang ngă yang ƀơi anih anŭn, laih anŭn pơanăn anih anŭn jing Êl Bêthel,#35:7 Êl Bêthel: kiăng pia jing “Ơi Adai kơ Bêthel”. yua kơ ƀơi anih anŭn Ơi Adai hmâo pơrơđah rai laih kơ ñu tơdang ñu đuaĭ kơdŏp mơ̆ng ayŏng ñu.
8Hlăk anŭn HʼDêbôra, ding kơna đah kơmơi pô pơmĕm brơi HʼRêbêka, djai laih anŭn arăng dơr ñu gah yŭ kơ phŭn kơyâo hơngo amăng plei Bêthel. Yua kơ anŭn yơh, arăng pia phŭn kơyâo anŭn jing Alôn Bakut.#35:8 Alôn Bakut: kiăng pia jing “kơyâo hơngo čŏk hia”.
9Tơdang Yakôp wơ̆t glaĭ mơ̆ng čar Padan Aram, Ơi Adai pơrơđah rai dơ̆ng brơi kơ Yakôp laih anŭn pha brơi tơlơi mơyun hiam kơ ñu. 10Ơi Adai laĭ kơ ñu: “Anăn ih jing Yakôp, samơ̆ arăng ƀu či iâu ih jing Yakôp dơ̆ng tah, anăn ih či jing Israel.” Tui anŭn Ơi Adai pơanăn ñu jing Israel.#Čơd 32:28. 11Ơi Adai laĭ dơ̆ng hăng ñu: “Kâo jing Ơi Adai Dưi Kơtang. Brơi ih đĭ kơyar laih anŭn hrôh lar bĕ. Sa kơnŭng djuai laih anŭn lu ƀing kơnŭng djuai či tơbiă rai mơ̆ng ih, laih anŭn mơ̆ng kian pruăi ih yơh či tơbiă rai ƀing pơtao.#Čơd 17:4-8. 12Lŏn Kâo hmâo pha brơi laih kơ Abraham laih anŭn Isak, Kâo ăt či pha brơi mơ̆n kơ ih laih anŭn kơnŭng djuai ih tơdơi kơ ih.”
13Giơ̆ng anŭn Ơi Adai đuaĭ hĭ mơ̆ng anih Ñu hmâo pơhiăp laih hăng Yakôp. 14Yakôp pơdơ̆ng đĭ sa ƀĕ tơmeh boh pơtâo ƀơi anih Ơi Adai hmâo pơhiăp laih hăng ñu, ñu ngă tơlơi pơyơr tuh ia tơpai laih anŭn tuh ia ƀâu hiam ƀơi hăng ngŏ kơ tơmeh anŭn.#Čơd 28:18-19. 15Hnŭn yơh Yakôp pia anih Ơi Adai hmâo pơhiăp laih hăng ñu jing Bêthel.#35:15 Bêthel: kiăng pia jing “sang Ơi Adai”.
HʼRačel Tơkeng Benjamin laih anŭn Djai
16Sang anŏ Yakôp tơbiă đuaĭ mơ̆ng plei Bêthel. Tơdang ƀing gơñu ăt dŏ ataih mơ̆ng plei Êphrata, HʼRačel čơdơ̆ng đih apui tơnap biă mă. 17Tơdang ñu dŏ ruă kơtang, đah kơmơi ƀuai laĭ kơ ñu: “Anăm hwĭ ôh, yua kơ ih či hmâo dơ̆ng sa čô ană đah rơkơi.” 18Hlăk ñu či djai laih, ƀơi mông ñu jĕ tơĭ pran, ñu pơanăn čơđai anŭn jing Ben Ôni;#35:18 Benôni: Amăng tơlơi Hêbrơ anăn anai kiăng pia jing “Ană đah rơkơi kơ tơlơi ruă nuă kâo”. samơ̆ ama gơ̆ pơanăn jing Benjamin.#35:18 Benjamin: kiăng pia jing “Ană đah rơkơi kơ tơngan gah hơnuă kâo”. 19HʼRačel djai, laih anŭn arăng dơr ñu ƀơi jơlan nao pơ plei Êphrata (jing plei Betlêhem).#35:19 Betlêhem: kiăng pia jing “sang ƀañ”. 20Yakôp pơdơ̆ng đĭ mơnơ̆ng pơkơnăl ƀơi ngŏ pơsat ñu. Anŭn jing mơnơ̆ng pơkơnăl kơ pơsat HʼRačel ăt dŏ truh pơ hrơi anai. 21Israel đuaĭ nao dơ̆ng laih anŭn pơdơ̆ng sang khăn ñu gah adih kơ sang gak Êder.
22Tơdang Israel dŏ amăng čar anŭn, Ruben nao đih hĭ hăng HʼBilha, bơnai hơjŭng ama ñu. Israel thâo tơlơi anŭn.#35:22 Hmâo đơđa hră pơblang so đưm hmâo thim: laih anŭn hil biă mă.#Čơd 49:4.
Pluh Dua Čô Ană Đah Rơkơi Yakôp
23Yakôp hmâo pluh dua čô ană đah rơkơi. Ƀing ană đah rơkơi HʼLêa: Ruben jing ană kơčoa Yakôp, tŏ tui jing Simêôn, Lêwi, Yuđa, Isakar, laih anŭn Sabulôn. 24Ƀing ană đah rơkơi HʼRačel: Yôsep laih anŭn Benjamin. 25Ƀing ană đah rơkơi HʼBilha, ding kơna đah kơmơi HʼRačel: Đan laih anŭn Naptali. 26Ƀing ană đah rơkơi HʼSilpa, ding kơna đah kơmơi HʼLêa: Gat laih anŭn Aser. Anai jing ƀing ană đah rơkơi arăng tơkeng brơi kơ Yakôp pơ čar Padan Aram.
Isak Djai Pơ Mamrê
27Yakôp glaĭ truh pơ Isak, ama ñu, pơ Mamrê, plei Kiriat Arba, jing plei Hêbron. Anai jing anih Abraham hăng Isak hmâo jưh laih hlâo adih.#Čơd 13:18. 28Isak hơdip truh kơ sa rơtuh sapăn pluh thŭn. 29Isak tơĭ pran. Ñu djai, wơ̆t glaĭ pơ ƀing ơi adon ñu hlăk thŭn ñu tha laih, ñu hrăp mơak amăng abih tơlơi hơdip ñu. Ƀing ană đah rơkơi ñu Êsâo laih anŭn Yakôp dơr hĭ ñu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.