Yohan 3

Yesu abasi Nikodemo bidɔ

1Ɔka ɔtɔ eze gi yɛ linyí linu Nikodemo o, ádɔ Farisianɛ ma lihakpɔ lɛ mɛ lɛ eze Yudanɛ ɔka tole. 2Ní elesi atɔ mɛ ɛ, Nikodemo atrɛ ní Yesu klɔ lɛ asi yɛ sì, “Rabi, kwite si wonu ɔdɔbasɛ gi ádɔ ní Aya kɔ ɛ. Ɔnɔnɔ ɔ́ma enugutseboe ala gi wɔɛbitɛ ɛ, kubitɛ mɛ xe Aya ɔ́ma ni yɛ kude e.”

3Yesu ebu le onu si, “Mɛɛsi wɔ anukwarɛɛ: ɔnɔnɔ ɔ́tratani Aya yɛ Kaʋaŋaa mɛ kuze sani si bedzini ye kupɔ ɔ.”

4Lɛ Nikodemo eʋi Yesu si, “Kitɛ mɛ biadzini ɔnɔtsitsi kupɔ na a? Ɔ́tratani kudzi iku yene lipo le me kuʋla a, xe biadzini ye kupɔ ɔ!”

5Yesu ebu le onu si, “Mɛɛsi wɔ anukwarɛɛ, Ɔnɔnɔ ɔ́tratani kutiku Aya yɛ Kaʋaŋaa mɛ ɛ, xe bápɔ yɛ gani kuni ni Ɔfuɛfuɛ nɔ mɛ ɛ. 6Bapɔnɛ ba bizɛpɔ ɔnɔ ní kisugya mɛ, pɔ̀ Ɔfuɛfuɛ nɔ izɛpɔ ɔnɔ ní Ɔfuɛfuɛ nɔ mɛ ɛ. 7Likítu wo kugyɔ gi masi wɔ si lilɛ si bedzini wɔ apɔ ɔ. 8Liwɔ lɛ lizeefu itrɛ niklɔ gi lipɛ ɛ; wɔanu le onu pɔ̀ wɔtrate lɛ ɔdɔ kɔ loo lɛ ɔtrɛ kɔ ɔ. Nite ke lilɛ kí ɔnɔ kakaa gi bɛpɔ ní Ɔfuɛfuɛ nɔ mɛ ɛ.”

9Lɛ Nikodemo eʋi Yesu si, “Kitɛ liaba lɛ mɛ nite e?”

10Yesu ebu le onu si, “Wònu ɔdɔbasɛ ʋidi ní Israel lɛ wónu la ya ese a?” 11Mɛɛsi wɔ anukwarɛɛ; kuzɛɛpani ní kidiliɛ gi kwite su u, lɛ kuzɛɛpani ní kidiliɛ gi kwimɔ su u, pɔ̀ mlɔ mɛ ɔ́tɔtɔ ɔ́pɛ si yizi blɔ liboe me dradra lɛ ɛ. 12Mlázi mɛ aʋa ŋa a, gi mɛɛsi mlɔ kelea lia mɛ eboe la a; kitɛ mlaazi mɛ aʋa ŋa a, xe masi mlɔ eboe la gi ɛɛtrɛ la aʋa ní lifunu ne e? 13Lɛ ɔnɔnɔ ómu ɔ́trɛ ní lifunu ne oʋídi i, sani Ɔnɔɛ Yebi ye gi yɛ ádɔ lifunu ne aba ɛ. 14Lɛ ŋwisi kiliɛ gi Mose emuni ɔlaɛ ɔgblaga yɛ, gi bɛxla ní ose lo aʋa ní ɔyaya klɔ kinɛ ɛ, nite ké lilɛ si bemuni Ɔnɔɛ Yebi ye, 15tɔ ɔnɔ kakaa gi aazi yɛ aʋa ŋa ɛ, aamɔ ligbã́ moblo le.

16Lɛ ese linu si Aya alɔ ɔnɔ gbagbe ní kesea aʋa gbɛgbɛ nite si akɔ yebinyime tolee akɔ si ɔnɔ kakaa gi aazi yɛ aʋa ŋa ɛ, ɔ́tratse e, pɔ̀ aamɔ ligbã́ moblo le e. 17Lɛ Aya ɔ́tsisi yebinyime ní kelea mɛ banima kɔ si obu ba lipɔ ɔ, pɔ̀ tɔ yibu ba gani yɛ aʋa a. 18Banɔaklɔ gi bɛzi Obi ye aʋa ɛɛŋa ɛ, Aya ɔ́traxwa litsi ni ba a, xe aabu ba lipɔ ɔ, pɔ̀ banama gi bázɛ ŋa ɛ, Aya ebu ba lipɔ koko lɛ ese linu si bázɛ Aya yebinyime tolee linyi ne aʋa ɛɛŋa a. 19Lɛ Aya yɛ litsixwaxwa lɛ lɛ ya: kuklekleo kwiba kelea mɛ dɔni lifunu ne, pɔ̀ banima bɛdimɛ ni litumu ne sani kuklekleo, lɛ ese linu si ba kiboebitɛɛ kinu kuzimizi i. 20Banama petee gi bizɛɛbitɛ eboe zimizi na ɛ, baʋídimɛ ni kuklekle lɛ bátraba kuklekleo onu u, lɛ ese linu si bátrapɛ si ba eboe zimizi na edo oŋwe e. 21Pɔ̀ banama gi bizɛɛga ní anukwarɛɛ aʋa ɛ, bizɛba kuklekleo onu tɔ kuklekleo kubasɛ si kidiliɛ gi bɛbitɛ ɛ, bɛbitɛ kɛ ní Aya yɛ kupɛpɛɔ onu.

Yohanes Kuni yo Ɔkpɛkpɛɛ adra Yesu su

22Lɛ ya kede e, Yesu ni yɛ badɔkpasi ba bɛtrɛ ní Yudea kesea mɛ, eze ní basu niklɔ lipoetɔ onu lɛ akpɛ kuni aki banima ɛ. 23Yohanes fɛ azɛɛkpɛ kuni aki banima ní Aenon gi ódze ní Salem su u, lɛ ese linu si kuni yo kwisrɛ níklɔ. Lɛ banima bɛzɛɛdzɛ Yohanes klɔ gi azaakpɛ kuni aki ba a. 24Lɛ ya liba lɛ mɛ kpɛ ɔtɔ xe ableke bɛkpɛ Yohanes ní ligba a.

25Lɛ kuboeŋwlɛ kwiku ní Yohanes yɛ badɔkpasi batɔ ni Yudanɛ ɔtɔ kusi ní kusuplo ligoʋi le su u. 26Lɛ loso bɛtrɛ ní Yohanes klɔ lɛ bɛsi yɛ si, “Rabi, dani wɔplɛ aŋu ní onyime liɛ klɔ gi eze ní wɔ su ní Yordan kedea aʋa ɛ, iliɛ klɔ su gi wɔpani i? Ɛɛkpɛ kuni iiki banima abla, lɛ banima pɔ́ bɛɛtrɛ ní yɛ klɔ ɔ!”

27Lɛ Yohanes ebu le onu si, “Kididɔ kítratani ɔnɔ awla kuze e, xe aní Aya aki yɛ kɛ ɛ. 28Mlɔ ɔtutɔ mlɔ aŋu mɛ mapani si, ‘Aní mɛ menu Kristo ye e, pɔ̀ kikpɛ Aya akpɛ mɛ ɔtɔ aki yɛ ɛ.’ 29Ɔdzɛɛ onu ɔdzɛgbanɔɛ yɛ ɔnɛ; pɔ̀ ɔdzɛgbanɔɛ yɛʋiɛ gi izeepe ye e, xe izɛɛta yɛ kutu i, isami izeku ye xe enu ɔdzɛgbanɔɛ yɛ ole lo e. Isami nɛ klɔ inu mɛ inɛ, lɛ abla ɛ, iflɔ. 30Li lɛ si yɛ omu ɔsani mɛ tɔ mɛ pɔ̀ ɛ, miple.”

Yesu onu ɔniliɛ klɔ gi ádɔ lifunu ne

31Ɔniliɛ klɔ gi ádɔ lifunu ne e, ekeme asani ɔnɔ kakaa. Lɛ ɔniliɛ klɔ gi ádɔ kesea ɛ, yɛ onu kesea ɔnɛ ɛ, lɛ izeegu kunugu yo ní kesea eboe la su u, pɔ̀ ɔniliɛ klɔ gi ádɔ lifunu ne e, asani ɔnɔ kakaa. 32Izɛɛpani ní kidiliɛ gi amɔ ɔ, xe enu su u, pɔ̀ ɔnɔnɔ ɔ́ʋizi yɛ liboe le e. 33Pɔ̀ ɔniliɛ klɔ gi azɛ yɛ liboe le e, atrɔ likla lɛ aʋa si Aya onu anukwarɛɛ onete. 34Lɛ ɔniliɛ klɔ gi Aya akpɛ ɛ, izɛɛpani Aya eboe la, lɛ ese linu si Aya akɔ yɛ Ɔfuɛfuɛ zizi nɔ aki yɛ. 35Kakaa alɔ Obi ye lɛ akɔ kidɔ kakaa akpɛ ní yɛ awla a. 36Ɔniliɛ klɔ gi azɛ Obi ye aʋa aŋa ɛ, aamɔ ligbã́ moblo le; ɔniliɛ klɔ gi ɔ́tranu kutu iiki Obi ye e, ɔ́tramɔ ligbã́ a; pɔ̀ aaze ní Aya kutuheheo ese e.

Currently Selected:

Yohan 3: avn

Highlight

Copy