Yohan 5

Yesu ayɔni ɔnyanya ní Betesda limu ne kutu

1Lɛ ya kede e, Yesu atrɛ Yerusalem kí Yudanɛ ma liwe ŋaŋa ɛtɔ. 2Kevunu katɔ kalɛ ní Yerusalem gi bizɛxwa si Iʋesi kevunu u. Kuni limu itɔ gi bizɛxwa si Betesda ní si Hebri se me e, litipɔni kevunu ya lia klɔ, lɛ bɛwa akatsa tetsu i klani limu ne e. 3Akatsa la klɔ mɛ banyanya likpi ʋidi itɔ lizɛfɛ, kuŋupo, bafa ba, ni banyanya gi ba kapɛ tiele ketse e, bezeepe kuni yo si kupisa 4lɛ ese linu si Aya yɛ ɔxwɛdzɛ ɔtɔ izepleeba ɛpisa limu ne lipoe me ni lipoe me; kɔ ɔniliɛ gi yɛ etu ɔtɔ ɔ, xe eple eku limu ne me e, izɛɛmɔ kuyɔyɔ dɔni kunya kakaa gi ɛɛnya mɛ ɛ. 5Onyime ɔtɔ eze níklɔ gi azɛɛnya agɔ avitata ni ɔgɔtaʋa ɛ. 6Gi Yesu amɔ yɛ gi ɔfini klɔ ɛ, xe bɛsi yɛ si onyimee ɔfini níklɔ lipoe gblamadza lɛ ya ɛ; eʋi ye si, “Wɔpɛ si wuyɔ na a?”

7Ɔnyanyaɛ ebu le onu si, “Ɔka, ɔnɔnɔ ɔ́ma gi aapɔni mɛ xe maapleku ní limu ne me e, xe bɛpisa kuni yo o; lipoe lɛ klɔ gi meekeni idi si miple eku i, kɔ ɔnutɔ atsã mɛ onu i.”

8Lɛ Yesu asi yɛ si, “Yɔ, Kɔ wɔ ɔtɔsi lɔ tɔ ga!” 9Onyimee ayɔ kyɔŋ, akɔ yɛ ɔtɔsi lɔ lɛ ekpese kuga ɛ.

“Liwe lɛ gi kibitɛ liɛ ya kiba kɛ mɛ ɛ, lize Lizemɔniwe. 10Lɛ Yudanɛ baka ba bɛsi onyimee gi bɛyɔnɔ ɛ si, Omono onu Lizemɔniwe, lɛ liyɔ kedu ní blɔ Ɔsã nɔ su si tu wɔ ɔtɔsi lɔ.”

11Ebu le onu si, “Ɔniliɛ gi ayɔni mɛ ɛ, yɛ asi mɛ si, ‘Kɔ wɔ ɔtɔsi lɔ tɔ ga.’ ”

12Lɛ beʋi ye si, “Nyaŋwɛ onu onyimee gi yɛ asi wɔ si, kɔ lɔ tɔ ga a?”

13Pɔ̀ onyimee gi bɛyɔnɔ ɛ, óte ɔniliɛ gi yɛ ayɔni yɛ ɛ, lɛ ese linu si, Yesu alila eku linɔkpi le gi lize niklɔ mɛ ɛ.

14Lɛ kede e, Yesu amɔ yɛ ní Lisɔligba lɛ mɛ lɛ asi yɛ si, “Dike, wɔyɔ abla, lɛ loso dzini wɔ eboe zimizi na kumɔni i, xe aní te e, liboe nyani nyani sanɔ liaba wɔ aʋa.” 15Lɛ onyimee asɛ ɛ xe azɛɛsi Yudanɛ baka ba si, Yesu yɛ ayɔni yɛ ɛ.

Obi ye yɛ izɛki ligbã́

16Lɛ bekpese kedu kuyɔ ní Yesu su i, lɛ ese linu si ayɔni ɔnɔ ní Lizemɔniwe le aʋa a. 17Yesu ebu le onu aki ba si, “Mɔka ɛɛwa axwɛ na lipoe kakaa, lɛ loso mɛfɛ mɛɛwa axwɛ na a.” 18Liboe lɛ ya loso e, Yudanɛ baka ba bɛtrɔ lɛ si biaye ye kikakaa elu e; aní si ezizi Lizemɔniwe le ɔsã nɔ tete e, pɔ̀ apani si Aya onu yɛ ɔtutɔ Yɛka a, lɛ ɛɛkɔ isu i srɔni Aya si ba ni yɛ bɛsɔ.

19Lɛ Yesu ebu le onu aki ba si, “Mɛɛsi mlɔ anukwarɛɛ; Obi ye ɔ́tratani kididɔ kubitɛ ní yɛ isuwla mɛ ɛ; izɛɛbitɛ kidiliɛ gi amɔ si Yɛka ɛɛbitɛ ɛ. Kidiliɛ gi Ɔka abitɛ ɛ, kɛ Obi ye fɛ izɛɛbitɛ. 20Lɛ ese linu si Ɔka yɛ adimɛ ni Obi ye lɛ abasi yɛ kidɔ kakaa gi yɛ ɔtutɔ ɛɛbitɛ ɛ. Aabasɛ yɛ eboe gi ekeme sani lɛ ya, lɛ mlɔ pɔ́ mlɔ inugu aatse e. 21Kiliɛ gi Ɔka yɛ izɛɛyɔni bekpo ʋa a xe izɛɛki ʋa ligbã́ nɛ ɛ, nite ke Obi ye fɛ izɛɛki banama gi apɛ ɛ ligbã́ nɛ. 22Kɔpɔnɔ ɛ Ɔka yɛ ɔ́ʋixwa litsi nì ɔnɔnɔ ɔ. Akɔ kigaglaɛ akí Yebi ye tɔ ɔxwa litsi nì banima. 23Atɔ ɔnɔ kakaa ɔkpɛ kubùbù ní Obi ye su ŋwisi kiliɛ gi bizɛɛkpɛ kubùbù ní Ɔka yɛ su kinɛ ɛ. Ɔniliɛ gi ɔ́ʋikpɛ kubùbù ní Obi ye su i, ɔ́ʋikpɛ kubùbù ní Ɔka yɛ gi yɛ akpɛ Obi ye su u.

24“Mɛɛsi mlɔ anukwarɛɛ; ɔniliɛ gi enu mɛ eboe la a, xe azɛ ɔniliɛ gi akpɛ mɛ aʋa ŋa ɛ, aamɔ ligbã́ moblo le, lɛ batrábu ye lipɔ; pɔ̀ yɛ kɔɔ edo kutse me aba ligbã́ mɛ ɛ. 25Mɛɛsi mlɔ anukwarɛɛ: lipoe le litrába lɛ liba koko gi bekpo ʋa bianu Aya Yebinyime ole lo o, lɛ ba klɔ gi benu lo e, biadzi ligbã́. 26Kiliɛ ɖii gi Ɔka yɛ ɔtutɔ onu ligbã́ nɛ linitɔ lɛ ɛ, nite ke abitɛ Yebinyime si oze ligbã́ nɛ linitɔ lɛ. 27Lɛ aki Yebinyime kigaglaɛ tɔ ɔxwa litsi lɛ ese linu si yɛ onu Ɔnɔɛ Yebi ye.

28“Lɛ ya likítu mlo kugyɔ ɔ; lɛ ese linu si lipoe le litraba gi bekpo ʋa petee e, gi bali ni ba idrɔ lɛ mɛ ɛ, bianu yɛ ole lo 29lɛ biado o, ba klɔ gi bɛbitɛ eboe Gbã ɛ, biayɔ lɛ biadzi ligbã́ a, lɛ ba klɔ gi bɛbitɛ eboe zimizi i, biayɔ lɛ biabu ba lipɔ ɔ. 30“Mátratani kididɔ kubitɛ ní mɛ ɔtutɔ isu wla mɛ; Mizɛɛxwa litsi kiliɛ gi Aya asi mɛ ɛ, lɛ mɛ litsixwaxwa lɛ ligyɔ ɔ, lɛ ese linu si mátrakeni idi si mibitɛ mɛ kupɛpɛɔ aʋa a, pɔ̀ ní ɔniliɛ gi akpɛ mɛ yɛ kupɛpɛɔ aʋa a.

Eboe gi ɛdra Yesu su

31“Xe mapani ní mɛ ɔtutɔ isu ya su i, liboe lɛ gi mapani i, lítraŋa kutu u. 32Pɔ̀ ɔnutɔ ɔlɛ gi izɛɛpani ní mɛ su i, lɛ mete si liboe lɛ gi izɛɛpani ní mɛsu i, lilɛ lɛ mɛ.

33“Yohanes yɛ onu ɔniliɛ gi yɛ kɔ́ mlɛkpɛ mlɔ baxwɛdzɛ ba a, lɛ apani ní anukwarɛ su u. 34Aní si mizɛ ɔnɔ gbagbe yɛ katsalia kuŋaŋa a; boŋu i, mapani liboe lɛ tɔ mlamɔ kubúbú. 35Yohanes eze ŋwisi kani kinɛ ɛ, gi asɔ̀ ɔ, xe aki kuklekle e, lɛ lize mlɔ kupɛpɛ ki lipoetɔ si mlanu yɛ eboe la gi eze ŋwisi kuklekle e, gi kwikpɛ mlɔ isami kinɛ ɛ.

36“Pɔ́ katsalia kalɛ mɛ awla gi kalɛ zegbezegbe sani eboa la gi Yohanes apani ní mɛ su i. Ka kenu kidiliɛ gi mizɛɛbitɛ ɛ, gi kinu axwɛ ana gi Mɔka aki mɛ si miblono o, la ɛtrɔ likla lɛ aʋa si Kaka yɛ akpɛ mɛ. 37Lɛ Kakaa gi yɛ akpɛ mɛ ɛ, yɛ ɔtutɔ aŋa katsalia aki mɛ. Mlaʋínu yɛ ole loo mɔ yɛ ʋídi i. 38Lɛ mlákpɛ yɛ liboe le ní mlɔ ina nɛ mɛ ɛ, lɛ ese linu si mlázi ɔniliɛ gi yɛ akpɛ ɛ, aʋa ɛɛŋa. 39Mlɛkpasi kuŋwlimi dradraa, lɛ ese linu si mlegyo edi si gani kɔ mɛ ɛ, mlaamɔ ligbã́ moblo le. Lɛ kuŋwlimi dradraa kɔ tututu kwipani ní mɛ su u! 40Pɔ̀ kyɛ ɛ, mlápɛ si mlɛba mɔkɔ tɔ mlamɔ ligbã́ nɛ ɛ.

41“Mápɛ kukpɔ̀kpɔ̀ dɔni banima kɔ ɔ, 42pɔ̀ mete banɔaklɔ elu gi mlenu i, lɛ mete si mládimɛ ni Aya ní mlɔ ina nɛ mɛ ɛ. 43Maba ní Mɔka yɛ kigaglaɛ mɛ, pɔ̀ mlázi mɛ ɛ; pɔ̀ xe ɔnutɔ aba ní yɛ ɔtutɔ yɛ kigaglaɛ mɛ ɛ, mlaazi yɛ. 44Kitɛ mlatani mɛ aʋa kuziŋa gi mlɛdimɛ ni kukpɔ̀kpɔ̀ dɔni mlɔ ahanuglɔ ba kɔ ɔ? Pɔ̀ mlékeni idi si mlɛzi kukpɔ̀kpɔ̀ gi kwidɔ ní ɔniliɛ gi yɛ tete onu Aya kɔ ɔ.

45“Mlakígyo edi si, mɛ matratsà mlɔ onu ki Mɔka a. Mose gi yɛ mɛ mlɔ kudeonu didi yo kulɛ ɛ, yɛ ɖii onu ɔniliɛ gi atrátsà mlɔ onu u. 46Xe nya mlɛzi Mose aʋa ɛɛŋa ɛ; mlazi mɛ aʋa ŋa, lɛ ese linu si yɛ aŋwlimi bidɔ ní mɛ su u. 47Pɔ̀ gi mlázi kidiliɛ ɛ gi aŋwlimi aʋa aŋa ɛ, kitɛ mlatani liboe lɛ gi mapani aʋa kuzi ŋa a?”

Currently Selected:

Yohan 5: avn

Highlight

Copy