Luka 23
23
Bɛtsini Yesu ní Pilato Klɔ
1Lɛ ɔnɔha lɔ pɔ́ ɛyɔ ɔ, xe ɛgbani Yesu itsini Pilato klɔ ɛ. 2Niklɔ bekpese eboe la kukɔ ní yɛ su si, “Kwivu onyime liɛ ya gi ɛɛfuɛ ɛkpɛ blɔ akɔanɛ ma mɛ si bayɔ kedu u, xe ɛɛsi ba si bakítsa ɔgyɔ lɔ akí Roma banɛ ma okusi ʋidi ye e, lɛ apani si yɛ yenu Kristo ye gi onu okusi i.”
3Lɛ Pilato eʋi ye si, “Wɔ́ wonu Yudanɛ ma okusi ye na a?”
Yesu ebu le onu si, “Nite wɔ ɛpani.”
4Lɛ Pilato asi Kusumu yo baka ba ni linɔkpi le si, “Mámɔ kesetata tɔtɔ gi maakɔ obu onyime liɛ ya lipɔ ɔ.”
5Pɔ̀ bɛzɛtù le ekpɛ gagla sanɔ si, “Gani yɛ bidɔ basɛbasɛ ʋɛ mɛ ɛ, ɛɛkpɛ ɔpisáse ní banima mɛ ní Yudea kesea petee me. Ekpese le adɔ ni Galilea lɛ eku ní ya abla ɛ.”
Bɛtsini Yesu ní Herodes klɔ
6Agi Pilato enu liboe lɛ ya ɛ, eʋi si, Onyime liɛ ya ɛ, Galilea ɔnɛ onu na a. 7Agi enu si Yesu ádɔ ní kesea lia aʋa gi Herodes ɛɛŋa ɛ, akɔ yɛ atsisi Herodes gi eze ní Yerusalem ní lipoe lɛ klɔ mɛ ɛ.
8Liku Herodes isami gi amɔ Yesu i, lɛ ese linu si enu yɛ onu lɛ azaapɛ si yimɔ yɛ lipoe gblamadzaɛtɔ lɛ ya a. Azeedi kudeonu si yimɔ Yesu gi ɛɛbitɛ enugutseboatɔ ɛ. 9Lɛ loso ɛ, Herodes eʋi Yesu eboe glegle, pɔ̀ Yesu óbu litɔtɔ onu u. 10Kusumu yo baka ba nì Ɔsã nɔ badɔbasɛ ba ɛ, bedoeba ɔtɔ nɔ, lɛ bɛkɔ eboe ní yɛ su gagla a. 11Herodes nì yɛ baguta ba kyɛ bɛkpɛ Yesu kakpaa, lɛ kede e, bɛkɔ liwu gbã etɔ kpɛ kí yɛ, lɛ bedzini ye tsisi Pilato e. 12Dɔni liwe lɛ klɔ aʋa ɛ, Herodes ni Pilato bedzi baʋia; kpɛ ɔtɔ ɛ, ofu eze ní ba kusi.
Pilato atsa Kutsépia akí Yesu
13Pilato axwa kusumu yo baka ba, ni baʋaŋa ba ani banima akpɛ likpɔ. 14lɛ asi ba si, “Mlɛgbani onyime liɛ ya ɛmani mɛ si yɛ ɛɛfuɛ ɛkpɛ banima mɛ tɔ bayɔ kedu u. Abla ɛ, agi mapani nì yɛ ní mlɔ aŋu mɛ ɛ, mámɔ yɛ kesetataa tɔ́tɔ ní eboa la gi mlɛkɔ ní yɛ su mɛ ɛ. 15Nite ke Herodes fɛ ɔ́mɔ kesetataa tɔ́tɔ ɔ, lɛ loso edzini ye atsisi blɔ. Onyime liɛ ya ɛ, ɔ́bitɛ kididɔ ɔ, gi biakɔtsà kutsépia kí yɛ ɛ. 16Lɛ loso e, maaki tɔ bafiaʋi yɛ litam tɔ maayurɔ yɛ.” 17Lize si Pilato ɔyurɔ ɔnɔ tole gi bɛkpɛ ligba aki ba ní Kutseolidɔzawe kakaa aʋa a.
18Lɛ ba petee bɛkpɛ ozi si, “Ye ye! tɔ yurɔ Baraba kí blɔ ɔ!” 19Bɛkpɛ Baraba ligba kɔkpɛ keduyɔyɔ katɔ ni kunɔye kutɔ gi biba ɔma ʋidi no me loso o.
20Nya Pilato apɛ si yiyurɔ awla ní Yesu su, lɛ loso alìɔʋi linɔkpi le onu dzɛ ɛ. 21Pɔ̀ bɛtrɛ lɛ aʋa ni ozi lo si i, “Kú ye ní ose lo su! Kú ye ní ose lo su!”
22Pilato eʋi ba kutánɛ si, “Kese woli ata a? Mámɔ kidiliɛ gi abitɛ ɛ, gi kizia yɛ kutse e! Maaki tɔ bafiaʋi yɛ litam tɔ maayurɔ yɛ.”
23Pɔ̀ bɛtrɛ ní ozi lo kukpɛkpɛɔ aʋa nì ile gagla si bekú Yesu ní ose lo su u. Gɔgɔɛ ba ozi lo ɛki si adimɛ ní lɛ aʋa a. 24Lɛ Pilato atsa litsi le aki Yesu ŋwisi kiliɛ gi beʋi kinɛ ɛ. 25Ayurɔ onyime liɛ klɔ gi bɛzɛpɛ́ ɛ, ɔniliɛ klɔ gi bɛkpɛ ligba kɔkpɛ keduyɔyɔ ni kunɔye e, lɛ akɔ Yesu akpɛ ní ba awla tɔ babitɛ yɛ kiliɛ gi bɛpɛ ɛ.
Baguta ba Bekú Yesu ní Ose lo Su
26Lɛ baguta ba bɛgbani Yesu sɛnɔ ɛ, lɛ gi bɛzɛtrɛ ɛ, bɛtsani Simon, Kirene ɔnɛɛ gi ádɔ ní kamamiatɔ mɛ ɛ, xe atrába ní ɔma ʋidi no me e. Bemi ye aʋa, lɛ bɛkɔ osetsase lo ɛtrɔ yɛ si otu tɔ oze ni Yesu kude e. 27Linɔkpi ʋidi itɔ lize nì yɛ kude; badzɛ batɔ gi bɛzɛtaní i, xe beze bemi kí yɛ kyɛ ɛ, beze ní ba kusi. 28Yesu ekyi edi ba lɛ asi ba si, “Yerusalem badzɛ ba a! Mlakíbemi aki mɛ ɛ, pɔ̀ mlebemi akí isu ya ni mlɔ bebi ba a. 29Mɛɛtrɔ likla ní lɛ aʋa ɛki mlɔ si ewe la ɛtraba gi banima biapani si, ‘Lipɛ kí badzɛa ba awla gi banuvɔ báma ɛ, gi bápɔ bebi i, xe bakí bebi limwa ɛ!’ 30Lipoe lɛ klɔ mɛ ɛ, banima biasi eto la si, ‘mlakpa adɔ ní blɔ aʋa!’ ani kutokpaa si, ‘mlewe blo!’ 31Lɛ xegi bɛbitɛ la ya elu ɛyurɔ mɛ gi ma lɛ ŋwisi ose wɔwɔ kinɛ ɛ, kitɛ liaze ki mlɔ gi mlalɛ ŋwisi ose kpakpa kinɛ ɛ?”
32Bɛgbani benyime tiaʋa dzedze gi beze banɔ zimizi fɛ evu u, gi bɛtreye pɔni Yesu i. 33Agi bɛzɛna niklɔ gi bizɛxwa si “Litukpoxwa lɛ ɛ,” bekú Yesu ní ose lo su. Lɛ bekú banɔ zimizi tiaʋa ba kyɛ, tole ní yɛ kaŋaa mɛ ni ɔʋlaɛ ní yɛ kabaa mɛ. 34Yesu apani si, “Ɔka! kɔkyɛ ba lɛ ese linu si, béte kidiliɛ gi bɛɛbitɛ ɛ.” Bɛlɛ yɛ ewu la kpɛ ba kusi gani exoeʋi la kutata mɛ.
35Banima bɛlɛɛ gi bezeedi i, pɔ̀ Yudanɛ ma baka ba kɔ ɛ, bezeebu onugu me tsini yɛ su si, “Ebú banima; kitɔ obu isu ya xe yɛ onu Kristo ye e gi Aya akya ɛ!”
36Baguta ba fɛ bɛkpɛ yɛ kakpaa; beti apɔnɔ yɛ lɛ bɛki yɛ kuda nyagba nyagba a, 37lɛ bɛpani si, “Bú isu ya xe wɔ wonu Yudanɛ ma okusi ye e!”
38Ní yɛ etukpo la onu i, bɛŋwlimi eboa la ya si, “Yɛ onu Yudanɛ ma Okusi ye.”
39Banɔ zimizi ba mɛ tole gi bekú ose lo su ipɔni yɛ ɛ ekpini ye si, “Aní wɔ wonu Kristo ye e? Bú isu ya tɔ bú blɔ fɛ!”
40Ɔnɔ ʋlaɛ, kɔ, atɛni ɔtɔpu yɛ si, “Woʋíse Aya lo o? Wɔzi kutuheheo kiliɛ gi yɛ fɛ azɛ ɛ. 41Blɔ kɔ kwimɔ blɔ liʋɛ tsatsa lɛ, lɛ ese linu si kwimɔ kutuhehe uliɔ gi kwisrɔni kidiliɛ ɛ, gi kwibitɛ ɛ. Pɔ̀ yɛ kɔ ɛ, ɔ́ta kesea tɔtɔ ɔ.”
42Lɛ asi Yesu si, “Plɛ aŋu ní mɛ aʋa Yesu, xe wɔba ŋwisi Okusi kinɛ ɛ!”
43Yesu asi yɛ si, “Mɛɛsi wɔ si, omono e, wɔaze ní Paradiso ye me nì mɛ.”
Yesu yɛ Kutseo
44Liaze ŋwisi kemize inyɔ liɔfɔ ni tiʋa kinɛ ɛ, lɛ litumu ne lizɛ kesea aʋa petee kɔzɛna ni inyɔ tita a: 45lɛ ese linu si liwo le limɔni kuyi i, lɛ Yerusalem Lisɔligba lɛ mɛ kusaa gi kusunu i, kwilɛ ní kupɛ tuʋa ɛ. 46Yesu akpɛ ozi lo ni ole gagla si, “Ɔka! wɔ iwla lɛ mɛ makɔ mɛ Ɔfuɛfuɛ nɔ akpɛ!” Agi apani nite ko e, lɛ ada onugu i.
47Baguta ba ɔkaɛ amɔ kidiliɛ gi kiba kɛ mɛ ɛ, lɛ akpɔ̀ Aya si, “Sugba ɛ, ɔniliɛ ya onu ɔnɔ gbã!” 48Agi banama gi bɛlɛɛ ní niklɔ ɔ, xe bezeedi bidɔ mɛ ɛ, bɛmɔ liboe lɛ klɔ gi liba lɛ mɛ ɛ, ba pɔ́ bɛtàni lɛ bedzitrɛ ní ba kupeo me ní asigaga mɛ ɛ. 49Banama petee gi bete Yesu mɔmɔmɔ ɛ, kɔpɔni badzɛa ba ya gi bekuni yɛ kude dɔni Galilea ɛ, bɛlɛɛ ní ɔdzage no gi bezeedi bidɔ mɛ ɛ.
Yesu Kuviveo
50Onyime ɔtɔ eze gi bɛzɛxwa si Yosef i, ádɔ ní Arimatia gi onu Yuda ɔma ɔtɔ mɛ ɛ. Eze ɔnɔ gbã gi kubùbù kwize ní yɛ su u. Eze ní Yudanɛ ma betsixwa ba kusi xunyɔ, 51pɔ̀ ɔ́trɔ ní ba begyodi ʋa ni ba kiboebitɛ aʋa a, lɛ azeepe Aya yɛ kaʋaŋaa kubaba a. 52Yɛ atrɛ ní Pilato klɔ, lɛ eʋi si bakɔ Yesu okpo ye aki yɛ ɛ. 53Lɛ azeepleni okpo ye ní ose lo su u, xe axla yɛ akpɛ ní kusa pititi kutɔ mɛ ɛ, lɛ akɔ yɛ akpɛ ní ɔdrɔ vuvu u, gi bebu ikpɛ ní liklakpɔ ɛtɔ mɛ ɛ, gi ɔnɔnɔ ɔfɛ ní lɔ mɛ odi me e. 54Lize Lisɔpa, liblawe le gi Sabat yɛ ihakpese e.
55Badzɛa ba gi bezeni Yesu kude dɔni Galilea ɛ, bekuni Yosef kude lɛ bɛzɛmɔ ɔdrɔ lɔ ni kiliɛ gi bɛplɛ Yesu ní lɔ mɛ ɛ. 56Gi bedzitrɛ ní kepea mɛ ɛ, xe bɛzɛbla ní kumu nì bidɔ flafla bɛ su ki okpo ye e, beze emɔni ní sabat yɛ aʋa ní ɔsã nɔ onu u.
Currently Selected:
Luka 23: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
