Shwèʼ 1
1
1Tì kəbəŋ Tiyophilus, andìʼ à mo a mbì ŋwàʼlə̀ à wù, mà nyòʼ no nyʉ̀ tsèm a Yesò nzìtə̀ sə̀ nè be ziʼì, 2əzaʼa fà zhʉ a Nyìngòŋ nlyɨ wen ə̀ kùʼsə a kàŋ. Mibu və sə lyɨ wen əkuʼsə a kàŋ mu kəzhwì kə ŋwoʼəkə ku li kədyòʼ, ghə̀ ziʼi nyʉ̀ vyi a viʼi ntɨm wen vi a ghə̀ ntsuʼù lì ndiʼi ne nè. 3Andìʼ ando Yesò yènə ngəʼ ghoʼo ə̀ pfʉ bè bwènsə̀ lù fa pfʉ, ghə̀ dìʼ wenə wen à viʼi ntɨm wen la yì lu li fa pfʉ nəmwèʼè. Ghə̀ ne a lì tò a jisə a jisə no aghayn à ghoʼoghə a tì mətsi məwum nkàʼ bè gàʼ à vəwenə kùmə soʼ fòyn Nyìngòŋ. 4Ando Yesò mbu wenə̀ vəwenə, kətsi kətsenkə vəwenə sə nzhɨ, ghə̀ chòsə̀ soʼ a vəwenə la, “Kə ghə̀ŋ à lù fa Jelusalèm luwèn. Ghə̀ŋ nkəʼtə̀ kəku kì a mà nshə̀ʼtə̀ à ghə̀ŋ la Tìʼ ghom nghʉ li la ghə̀ a ku à ghə̀ŋ. 5Joyn tə nku mu à viʼi tò nə̀ nkàntə̀ à mù alì luwèn à sə̀ diʼ mu, à fàŋ tò mətsì nshə̀ʼ alə̀ və nku mu à ghə̀ŋ nə̀ kəzhwì kə ŋwoʼəkə.”
Və lyɨ̀ Yesò ə̀ kùʼsə a kàŋ
6Kətsi kətsenkə vəwenə be ŋwʉʼʉ a ntsèntə̀, viʼi ntɨm wen mù sə̀ bèmə̀ à wen la, “Bobo, zhʉ kwʉʼʉ̀ li ə wù bwensə̀ kù soʼ fòyn à viʼi Islel mu?”
7Yesò bwènsə̀ gàʼ à vəwenə la, “A ko diʼ kəshi kəŋkə̀ ə ghə̀ŋ kɨ kətsi kì ko zhʉ yi a Tìʼ ghom tə ghʉ̀ nə̀ kədyòʼ kə wen kə. 8Ghə̀ŋ kɨ tò la, ghə̀ŋ na kiʼi kədyòʼ a zhʉ a kəzhwì kə ŋwoʼəkə vi li à ghə̀ŋ ə nshə̀ʼtə̀ dyʉ̀ nə̀ ntɨm jùŋ ghòm a Jelusalèm nə̀ a Judiyà no tsèm nə̀ Samalìyà bènə̀ a təshyə tə mbi tèn no tətsèm.” 9Ando ghə̀ ngaʼà nyʉ̀ a venə ə mwètə̀, Nyìngòŋ lyɨ̀ wen ə̀ kuʼsə a kàŋ vəwenə yenə ando ghə̀ kuʼu. Ghə̀ kuʼ alə̀ ə̀ lè a tì mbòʼsə.
10Ando vəwenə mbu ki ando ghə̀ kuʼu dyʉ̀, à sətsèn lyʉmə vətsenvə tɨmə à vəwenə a mbyɨ̀ la vəbò mu və mòʼò ndisə sə fəfə la bʉ, 11ə̀ bèm à viʼi ntɨm Yesò vi la, “viʼi Galìlì, byìʼì ghò a ghə̀ŋ tɨmə̀ sə ki kuʼsə̀ nə̀ kaŋə alə̀ a? Yesò ghèn a və lyɨ̀ fà ghə̀ŋ a ntìntìn ghə̀ nkuʼ a kàŋ lə̀ lu be bwènə̀ vì tò a ji a ghə̀ŋ yì yen ghə̀ ndyʉ̀ fa tsu.”
Və tsuʼ wìʼ la ghə̀ lyɨ kəshi kə Judàs
12Viʼi ntɨm Yesò vi lù fa pfen Olìf ə̀ bwènə̀ shiʼi a Jelusalèm a kəghaf ki ndiʼ tò kətemə kə mal. 13Vəwenə nè kwèn a Jelusalèm ə kwen ə̀ kuʼu dyʉ̀ a tì lùmə ngə̀ŋ kàŋ yì a vəwenə ntsi tsu. A ndiʼ Bità, nè Joyn nə̀ Jems nə̀ Andɨ̀lò, a diʼ Filib nə̀ Tomòs, à diʼ Bàtòlòmiyà nə̀ Matìyò nə̀ Jems wàyn Alphùyùs, nə̀ Simon ə wù kənsɨ̀mtə̀, à be diʼ Judàs wàyn Jems. 14A ndìʼ a lì, vəwenə nghoʼo zhùŋtə̀ əjɨ̀m a ntsèntə̀ wenə̀ ki vətsenvə nə̀ Mèli ə lì Yesò bènə̀ vəlèmə̀ və wen.
15Mətsi chò tò nshə̀ʼ alə̀, viʼi və byɨməvə ə zaʼa ghɨ nə̀ məwum mbò be sə ŋwʉʼ tò kəshi kə mùʼ, Bità lù tɨmə əgàʼ à vəwenə ə̀ gàʼ la, 16“Vəlèmə̀ vwomə, nyʉ̀ venə a və chò kùmə̀ Judàs tə ndiʼ chò ndi lwinsə kənyʉ̀ kì a kəzhwì kə ŋwoʼəkə ə̀ nè Foyn Devìt gàʼ və bè nyòʼ a ŋwàʼlə̀ Nyìngòŋ byìʼì Judàs a ghə̀ tə sùʼ Yesò la ntsɨ̀ŋsə ngə̀ŋ Nyìngòŋ sə ghaʼ. 17Judàs tə ndiʼ wù nòyn yès byìʼàndo Bobo tə ndiʼ mu ghə̀ tsuʼ li wen la yo vəwenə ntsèntə̀ shyèʼè a muʼu.”
18Andìʼ a lì mu Judàs lyɨ li ko yi a və nlòʼò wen tsu byìʼì kənyʉ̀ kə fansə kə kì a ghə̀ ne lì ə̀ zèn kəshi kə nse tsu. Ghə̀ nè a lì ə̀ fə̀ŋ tsu ə̀ pfʉ, bèm ə wen tuʼmə, məntu mə̀ wen fʉ̀ a bàm no ntsèm. 19Viʼi Jelusalèm no vətsèm zhʉ kənyʉ̀ akì mù sə̀ dzàŋə̀ kəshi kə nse akì à vəwenə a gaʼa loʼ la, “Akeldama” à diʼ la, “Sɨm ə mənlyuŋ.”
20“Byìʼè və nyoʼo li a ŋwàʼlə̀ Salms la, ‘Ngə̀ŋ wen faŋ tò zɨm, kə wìʼ lu ntsi tsu,’ bè nyòʼ la, ‘Wù kədyàŋ lyɨ kəshi kə wen nshwèʼè.’”
21-22Bità shə̀ʼtə̀ a lì mù bè gàʼ la, “Kə lì dìʼì la yès diʼ tsuʼ wìʼ muʼ ghə̀ tsèntə̀ nòyn yes ə nshə̀ʼtə̀ dyʉ̀ a viʼi la Yesò lu li fa pfʉ. A diʼ ndiʼ wì fa ntìntìn viʼi vi a yo vəwenə tə njèʼè kuʼu shiʼì fa bàm Yesò a muʼu əlù fa tʉʼ a Joyn nzìtə̀ sə̀ ku mu à viʼi əkuʼ əzaʼa a kətsi a Nyìngòŋ nlyɨ Yesò fà yès a ntìntìn ə̀ kùʼsə a kàŋ.”
23Vəwenə kwòʼtə̀ təzhiʼ tə viʼi vəbò, andiʼ Josèf, a təzhiʼ tə wen tətsentə ndìʼ Balabas nə̀ Justus bènə̀ Matiyàs. 24Vəwenə nè a lì mù jɨ̀m gàʼà la, “Bobo, wù kɨ tətyɨm tə viʼi no vətsèm. Diʼi wìʼ yì a wù tsuʼu fa ntìntìn viʼi venə vəbò, 25ndi ghə̀ lyɨ kəshi kə wù ntɨm wù ə nè shwèʼ yi a Judàs tə mòʼtə̀ ə̀ dyʉ̀ à wen a kəshi kə ngə̀ŋ.” 26Vəwenə gàʼ a lì mù nyòʼ təzhiʼ tə viʼi a venə a bàŋə fo ə̀ mòʼ a tì ntòyn sə̀ nə̀ʼə̀, zhiʼi Matiyàs fʉ̀ kùʼ a mbì. Və mù boʼsə wen a nòyn viʼi ntɨm vi njʉ̀mùʼ.
Currently Selected:
Shwèʼ 1: bbkDBLnt
Highlight
Share
Copy
Want to have your highlights saved across all your devices? Sign up or sign in
