Shwèʼ 8
8
1Və nsə nyàblə̀ nə̀ Stifèn a lì, Saul ndiʼ tsu gàʼà tò la və zhwi wen.
Saul sə tsuʼu aghʉ viʼi vəbyɨməvə
A bè sə ndiʼ tò a kətsi akì, viʼi vəbyɨməvə vi a və ndìʼ a Jelusalèm zɨ̀tə̀ sə yenə ngəʼ no nànto. Ando və nku ngəʼ à vəwenə a lì, vəwenə nyɨŋkə no vətsèm ə̀ dyʉ̀ a təshyə tə loʼ Judiyà bènə̀ Samalìyà, à faŋ tò viʼi ntɨm Yesò tsu. 2Viʼi vi a və ngumlə̀ Nyìngòŋ bvɨ̀mə̀ Stifèn ə dì pfʉ wen no nànto.
3Saul bòŋsə̀ zìtə̀ sə kəŋə la viʼi vəbyɨməvə me, ə̀ sə kwenə tò a ngə̀ŋ a ngə̀ŋ, ghaʼtə̀ lʉmə nə̀ ki, we vəwenə a mfɨŋ.
Filib shə̀ʼtə̀ Ntɨ̀m Jùŋ à Samalìyà
4Viʼi vəbyɨməvə vi a və nsàykə̀ lì sə shə̀ʼtə̀ dyʉ̀ tò nə̀ ntɨm jùŋ no fe a vəwenə ndyʉ̀. 5Filib ndyʉ̀ a ntə̀ʼ ghoʼo tsen a Samalìyà sə shə̀ʼtə̀ nyʉ̀ tsu byìʼì Wìʼ yì a Nyìngòŋ ntsuʼ li ə̀ ghʉ. 6Tənòyn tə viʼi vyi a və ndìʼ tsu yen nyʉ̀ kàynə və vi a Filib ə̀ nè sə tùʼù zhʉtə̀ nyʉ̀ tsèm a ghə̀ ngàʼà. 7Andìʼ a lì, viʼi vəghoʼo və tsu kiʼi zhwì byɨvə. Filib dzɨ̀m ə̀ shìsə̀ zhwì byɨvə a vyi, no tə kəkò kə sə fʉ̀ dì no a gɨ to. Viʼi kənkwaʼkə bènə̀ vənlaʼfwen bè tokə. 8Viʼi ntə̀ʼ a vyi sə saŋlə̀ no nànto.
9A nsə ndiʼ a lì wutsen diʼ a ntə̀ʼ ayì, a zhiʼ wen ndìʼ Simon, adiʼ wù shəŋə fənyoʼ, viʼi loʼ a vyi diʼ nə̀ kanə, byìʼì ənyʉ̀ a ghə̀ nè a lì, kuʼsə̀ wenə wen la yì dìʼ no wu ghoʼo. 10Viʼi vətovə, nə̀ vəbwaʼvə a ntə̀ʼ ayì no vətsèm sə zhʉ tò fà wen be, gàʼà la, “Nyìngòŋ yì a və dzàŋə̀ nə̀ Nyìngòŋ Kədyòʼ kə ghoʼokə vi li nchò fa Simon.” 11Vəwenə sə zhʉ tò fa wen byìʼàndo tʉʼ bwen a ghə̀ nzi shəŋə fənyoʼ be nè nyʉ̀ kanəvə à vəwenə a ntìntìn. 12A sə ndiʼ ando vəwenə mbyɨmə̀ li ntɨm jùŋ yì a Filib nshə̀ʼtə̀ byìʼì soʼo fòyn Nyìngòŋ, bènə̀ la Yesò dìʼ wìʼ yì a Nyìngòŋ ntsuʼ li ghʉ, və ku mu à vəwenə, lʉmə nə̀ ki no vətsèm. 13No tè Simon fà wen a ngeŋ be byɨmə ntɨm jùŋ ayì, ə̀ shì mu ə̀ faŋ sə diʼ tò wenə̀ Filib, be diʼ nə̀ kaynə byìʼì chwitə vi a Filib ndìʼì bènə̀ nyʉ̀ kaynəvə vi a ghə̀ ə̀ nè.
14Andìʼ ando viʼi ntɨm Yesò nzhʉ fa Jelusalèm la viʼi Samalìyà byɨmə li ntɨmə Nyìngòŋ, vəwenə tɨm Bità wenə̀ Joyn à vəwenə. 15Bità wenə̀ Joyn nè dyʉ̀ zaʼa tsu, ə̀ jɨ̀m à viʼi vəbyɨməvə a vyi ndi Kəzhwì kə ŋwòʼəkə vi à vəwenə, 16byìʼàndo Kəzhwì kə ŋwòʼəkə nko ntɨmə̀ vì à vəwenə; vəwenə ndìʼ mu vəwenə nshì tò mu a zhiʼ nə̀ Bobo Yesò. 17Bità wenə̀ Joyn ghʉ avu à vəwenə a tʉ, Kəzhwì kə ŋwòʼəkə mù vì à vəwenə.
18Adìʼ a zhʉ a Simon nyenə la viʼi ntɨm Yesò ghʉ li avu a tʉ viʼi vəbyɨməvə, Nyìngòŋ nku Kəzhwì kə ŋwòʼəkə à vəwenə, ghə̀ mù sə ku ko à Bità wenə̀ Joyn gàʼà la, 19“Ghə̀ŋ be kù kədyòʼ kènkə a ghə̀ŋ kiʼì lə̀ à mò ndi mà nghʉ avu a kətʉ no ndò, Kəzhwì kə ŋwòʼəkə be vì à wen.”
20Bità bwènsə̀ gàʼ à wen la, “Məntùŋ myə̀, wenə̀ ko wu ayi, byìʼàndo wù kwòʼtə la wù zì wù zen kəfo a, à kù Nyìngòŋ nə̀ ko! 21Wù ko kiʼ no kəshi, ko kənyʉ̀ kətsenkə ənè à yès a tì shwèʼ byìʼàndo Nyìngòŋ lye li tyɨm wu, nyen la wu ko dìʼ wù kənyʉ̀ kə tɨməkə à wen a shɨ̀. 22Kwitə lì kwòʼtə̀ byɨghə wù a ghenə ə̀ jɨ̀m à Bobo la ghə̀ lyèsə kù wù a kənyʉ̀ kə byɨkə ken a wu kwòʼtə a wù a tyɨm, 23byìʼàndo ma yen li la wù dìʼ wù kəmbàŋ mbàŋ, be diʼ kəkòs a nyʉ̀ byɨvə.”
24Simon ayì gàʼ à Bità wenə̀ Joyn la, “Mà lonə la ghə̀ŋ jɨm à Bobo byìʼì mo, ndi kə no kənyʉ̀ kə mùʼ fa ntìntìn nyʉ̀ venə a ghə̀ŋ gàʼà lə̀ fʉ à mo.”
25Bità wenə̀ Joyn nè shə̀ʼtə̀ nyʉ̀ vyi a vəwenə nkɨ byìʼì Bobo nə̀ ziʼi wen ə̀ mwètə̀, ə̀ bwènə̀ pfwo a Jelusalèm, sə mpfwo dyʉ̀ be sə shə̀ʼtə̀ dyʉ̀ nə̀ ntɨm jùŋ a ntə̀ʼsə Samalìyà no səghoʼo.
Filib shə̀ʼtə̀ Ntɨm Jùŋ à wuto tsen mu ghə̀ lù fa Etopiyà
26Ntsɨ̀ŋ ngə̀ŋ Bobo gàʼ à Filib la, “Lù shìʼi dyʉ̀ jì fa shyə tèn, a jì yì a ghə̀ lu fa Jelusalèm sə shiʼì a ntə̀ʼ Gaza lì.” Və ko bè chò fa ji aghèn. 27Filib lù ə̀ sə ndyʉ̀, ə yèn wù Etopiyà tsen, andiʼ no wuto, a ghə̀ ntùʼmə̀ nə̀ nyʉ̀ ko wùwì yì a ghə̀ nsoʼo Etopiyà. Ghə̀ nkuʼù ə̀ kuʼsə Nyìngòŋ a Jelusalèm, 28mù sə bwènə̀ pfwo. Ghə̀ nyɨŋ a kwi fənkwenkwen a gùfə̀ nyamsə,ə dzò pfwo nə̀ ŋwàʼlə̀ nshə̀ʼtə̀ Azayà no a gɨ̀ to. 29Kəzhwì kə ŋwòʼəkə gàʼ à Filib la ghə̀ dyʉ̀ ə̀ boʼsə a mbyɨ̀ fənkwenkwen ayì ndi wenə̀ wìʼ ayì njèʼè dyʉ̀ a muʼu. 30Filib nyɨŋ ə̀ dyʉ̀ boʼsə ə̀ zhʉ ando ghə̀ dzò nyʉ̀ fa tì ŋwàʼlə̀ nshə̀ʼtə̀ Azayà. Filib bèm à wen la, “Wu lè zhʉ kɨ kənyʉ̀ kì a wù dzò a?”
31Wù shwèʼ ayì bwènsə̀ la, “Mà lè zì mà zhʉ ə̀ kɨ̀ ale, a bwèn tò la wìʼ shɨtə ə̀ shə̀ʼtə̀ à mò a?” Ghə̀ gàʼ a lì mù gàʼ à Filib la, ghə̀ kuʼ ə̀ vì ŋwʉʼʉ a wen a kwi fənkwenkwen fi ndi wenə̀ wen njèʼè dyʉ̀ a muʼu. 32Kəshi kə ŋwàʼlə̀ kì a ghə̀ ndzò ndìʼ kènkə la;
“Ghə̀ nko kiʼ no tò kənyʉ̀ kə tyetəkə əgàʼ.
Ghə̀ ndìʼ to nə̀ byi njɨ̀, a və gùftə̀ ədyʉ̀ shyə,
ko to nə̀ we byi njɨ̀ a zhʉ a və komə nyɨŋsə fà wen a wèn.
33Və nlù nyàblə̀ nə̀ wen, kènla wìʼ fʉ̀ li ətomsə wen.
Wìʼ ko lu shə̀ʼtə̀ kənyʉ̀ byìʼì vunə wen
byìʼàndo ghə̀ nsə diʼ mu ghə̀ pfʉ li, kènə̀ wàyn.”
34Wù shyèʼ ayì mù gàʼ à Filib la, “Ma lonə wù, shə̀ʼtə̀ à mò la, ghə̀ nlu gàʼ nyʉ̀ venə byìʼì ngə̀ŋ kətʉ wen mu, ghə̀ nlù gàʼ byìʼì wu ə kədyàŋ lo?” 35Filib zìtə̀ fa kəshi kə ŋwàʼlə̀ a kèn sə shə̀ʼtə̀ kuʼu nə̀ ntɨm jùŋ byìʼì Yesò à wen. 36Vəwenə sə jèʼè dyʉ̀ ə dyʉ̀ zaʼa a kəshi kətsenkə, ə̀ yèn mu, wù shwèʼ yì gàʼ à Filib la, “Yen mu a shèn a, ale zì à taʼsə no gho luwèn la kə mà shi mu a?” 37Filib bwènsə̀ à wen la, “Və zì və ku mu à wù a zhʉ a wù byɨmə nə̀ tyɨmə wu no tsèm.” Wù shyèʼ ayì byɨmə ə̀ gàʼ la, “Mà byɨmə la Yesò Klistò dìʼ wè Nyìngòŋ.”
38Wù shwèʼ ayì gàʼ, à wìʼ yì a ghə̀ ngùfə̀ fənkwenkwen fì la ghə̀ tɨmə. Filib wenə̀ wù shwèʼ aghèn shiʼi fà yì a kətʉ, ə̀ kwèn ə̀ dyʉ̀ a tì à mù ayì. Filib ku mu à wen. 39Andìʼ ando vəwenə mfʉ̀ vi fà tsu, Kəzhwì kə Nyìngòŋ kə bvʉ̀tə̀ lyɨ̀ Filib ə̀ lù nə̀ wen. Wù shwèʼ ayì mù lù sə pfwo dyʉ̀, saŋlə no nànto. 40Ando Kəzhwì kə Bobo kə nlyɨ Filib lì, ghə̀ bvʉ̀tə̀ yèn wen ə wen a kəshi kətsenkə, a və dzò nə̀ Azotus mù sə jèʼè chòmə̀ no fa ntə̀ʼsə sətsèm tsu, shə̀ʼtə̀ ntɨm jùŋ, ə̀ kaʼ ə̀ jèʼ vì zaʼa a Sisalìyà, andiʼì ntə̀ʼ ghoʼo a ghə̀ ndiʼì tsu.
Currently Selected:
Shwèʼ 8: bbkDBLnt
Highlight
Share
Copy
Want to have your highlights saved across all your devices? Sign up or sign in
