Joyn 2
2
Yesò ə dyʉ̀ a kəshi kə làm a Kanà
1Məntsi ə chò li ə mbò, ətʉʼ ə layn, làm ə tsenə ghə̀ sə diʼ a ntə̀ʼ Kanà a Galìlì, lì Yesò ndiʼ tsu. 2Andìʼ ali, mu və be boŋ ə laʼa lam a ghenə a Yesò wenə ndzɨ̀mtə̀sə bàm ə wen. 3Məlyʉ̀ʼ ne mè, lì Yesò ə vi gàʼ a wen la, “Məlyʉ̀ʼ mè li fa akəshi kə làm ashə.”
4Yesò ə gàʼ la, “luwàyn, wù sə shə̀ʼtə̀ la mà ne ghò? Əzhʉ̀ ghomə ko təmə kwʉ̀ʼ.”
5Li Yesò ə be gàʼ a viʼi vyi a və shwèʼè a kəshi kə làm ayì la, “Ghə̀ŋ nè no ghò a ghə̀ ne gàʼ.”
6A ndiʼ ali, viʼi Jus tsɨfə nguʼsə, shɨtə vəntòyn tsu, ndiʼ ə shʉ̀ əwen tsu ndi ndiʼ nə̀ laynə a ashɨ Nyìngòŋ, ando soʼ ə vəwenə ə gaʼa. A ndiʼ akəshi kə làm na ghèn mu və tomtəli vəntòyn vəghoʼkəvə a venə la ntʉfə. Ghə̀ mùʼ ndiʼ mu və zizi və kaʼsə əchom a mù ə zìtə̀ fa məwumə mbò dyʉ̀ zaʼa məwumə ntaʼ mibu ghə̀ lwin. 7Yesò ə mu gàʼ a viʼi ə shyèʼè a vyi la, “Ghə̀ŋ lwinsə mu a vəntòyn ashə̀.” Vəwenə chʉ̀ mu ə wè a vəntòyn a venə və lwinkə. 8Ghə̀ be mu gàʼ a vəwenə la, “Ghə̀ŋ ŋwaʼtə mətsenə ə dyʉ̀ ku a wìʼ yi a ghə̀ tisə nyʉ̀ a làm a shèn.” Vəwenə ŋwaʼtə ə dyʉ̀ ku. 9Ghə̀ sə mwom mu mə kaʼkə li a məlyʉ̀ʼ, ghə̀ nko kɨ la mə lù fa fe lo. Alì, viʼi ə shyèʼ vyi a və ə chʉ̀ mu a mì ə nkɨ li. Ghə̀ mu dzàŋtə lɨmə wùwì, 10ə gàʼ a wen la, “Viʼi nə̀ diʼ la wù boŋsə ku məlyʉ̀ʼ mì a mə bòŋ la və nyʉ̀ ambì, viʼi nyʉ̀ sə dyuʼlə, və mu vi nə̀ myimə a mə ko tuʼ ə bòŋ, wù jeʼ ale ə ghʉ̀ məlyʉ̀ʼ mə jùŋə mèn ə sə vi nə̀ məwenə luwen a?”
11Wokenkə ndiʼ mbì kənyʉ̀ kəkaynəkə a Yesò ə ne a ntə̀ʼ Kanà a loʼ Galìlì, ə diʼ kədyòʼ kə wen. Ndzɨ̀mtə̀sə bàm ə wen sə mu byɨmə ə wen.
12To ando ə lam na ghenə ə cho li, Yesò lù wenə lì wen nə̀ vəlemə və wen benə ndzɨ̀mtə̀sə bàm ə wensə ə shiʼi a ntə̀ʼ Kàbanùm ə tsitə tsu to mətsi ə nshəʼ alə̀.
Yesò ə dyʉ̀ a ngə̀ŋ Nyìngòŋ ə ghoʼo a Jelusalèm
(Mat 21.12-13; Mak 11.15-17; Luk 19.45-46)
13A sə boʼsə dyʉ̀ a mətsi yì a viʼi Jus ə nzhɨ kəzhɨ kə məzaʼsə, Yesò ə nlu li ə kuʼ a Jelusalèm, 14ə dyʉ̀ kwen a kəbəŋ kə ngə̀ŋ Nyìngòŋ ə yen viʼi və nyʉ̀ʼ tsu, baʼlə nyamsə mbuluʼ nə̀ byisə vənjɨ̀ nə̀ lato, vətsevə nyʉ̀ʼ a kəchiʼ kwitə tə ko. 15Ghə̀ bo ngwàyn nə̀ pfʉsə ə ghòm ə dzɨ̀m shisə vəwenə, nə̀ nyamsə no sə tsèm fa ngə̀ŋ Nyìngòŋ ayì, ə sàs əko yi a viʼi ə nkwitə ə be tenlə kəchiʼ kì a vəwenə ə nkwitə ko tsu li, 16ə dyʉ̀ a viʼi a və ə mbaʼlə̀ lato ə kàyn a vəwenə la, “Ghə̀ŋ lyɨ̀ fʉ̀ nə̀ məwenə fa ashə̀. Kə Ghə̀ŋ kaʼsə ngə̀ŋ Tìʼ ghom a wòŋ.” 17Ando ghə̀ ngaʼa lì, ndzɨ̀mtə̀sə bàm ə wensə mù kwòʼtə to ando və nyòʼo li a Ŋwàʼlə̀ Nyìngòŋ la, “Ma kòŋ ngə̀ŋ wù, no nànto.”
18Viʼi Jus ə na bwènə̀ vì ə bèm a Yesò la, “Wù zizi wù ne no kənyʉ̀ kəkaynəkə kə kò ə diʼ la à ku Nyìngòŋ ə ku kədyòʼ la wù ə nè nyʉ̀ venə a?”
19Yesò ə bwènsə̀ a vəwenə la, “Ghə̀ŋ bɨtə ngə̀ŋ Nyìngòŋ ghèn, ma zizi mà bwènsə̀ bwòm to a mətsi ə ntàʼ.”
20Vəwenə be bèm a wen la, “A wù zizi wù bwènsə̀ bwòm ngə̀ŋ na ghèn to a mətsi ə ntàʼ mu və lyɨ ngʉ̀ʼ məwumə ə nkàʼ a njʉ̀sə̀ ntʉfə mi bu ə bwòm a?”
21A ndiʼ ali, Yesò ə gàʼ ngə̀ŋ Nyìngòŋ ghèn a diʼ to no wèn ə wen. 22To ando ghə̀ lu li fa pfʉ̀, ə ndzɨ̀mtə̀sə bàm ə wen mu bwensə kwòʼtə la ghə̀ ngaʼa li alə̀ ə mu byɨmə kənyʉ̀ kì a Ŋwàʼlə̀ Nyìngòŋ ə gàʼ, nə̀ nyʉ̀ vyi a Yesò ə ngàʼà.
Yesò ə kɨ no tèbe əkwoʼtə ndò
23A ndiʼ to ando Yesò ə ndiʼ a Jelusalèm a mətsi mə kəzhɨ kə məzaʼsə, viʼi no və ghoʼo byɨmə la ghə̀ diʼ wìʼ yi a və ntsuʼ li byìʼì nyʉ̀ ə kaynəvə vyi a vəwenə yenə to ando ghə̀ nè. 24Alì, Yesò ko moʼo wenə əwen a vəwenə byìʼì ando ghə̀ ə̀ kɨli ə ntsìnə̀sə viʼi no sətsèm. 25Wìʼ ə ko ə be diʼ ə shə̀ʼtə̀ kəfo shə̀ʼtə̀ a Wùmə̀nsòŋ diʼ kəwenkə a wen byìʼì ando ghə̀ nkɨ təkwòʼtə̀ tə viʼi.
Currently Selected:
Joyn 2: bbkDBLnt
Highlight
Share
Copy
Want to have your highlights saved across all your devices? Sign up or sign in
