Joyn 5
5
Yesò ə chʉʼ wù ə kənkwaʼkə
1A ndiʼ to ando nyʉ̀ na venə fʉ li ə chò, Yesò ə bwenə kuʼ a Jelusalèm ə zhɨ̀ kətsi kə ghoʼo kə viʼi Jus kətsen. 2Kətsèm kə tsèn kə ndiʼ a Jelusalèm boʼsə a chʉ Mbàyn Byisə, və toŋtə la Bèsaydà a gaʼa ə Hibùlù, mu və bwòm li nkaʼsə nə̀ tətotə a yi ben, tə tàyn. 3-4Yesò kuʼ dyʉ̀ ali, viʼi və kwaʼkəvə no vəghoʼo nyɨŋə a təto a ghèn, vətsevə diʼ mù və fɨfkəli, vətsevə diʼ mù və kwaʼakəli. 5Wùlɨm ə tsèn ndiʼ a vəwenə a ntìntìn mu ghə̀ kwaʼa li a ngwʉʼ njʉ̀sə̀ fwomə a məwumə ntaʼ. 6To ando Yesò, ə yen li wen ghə̀ nyəŋ tsu, ə kɨ la ghə̀ kwaʼa li fa kəghaf kədyəkə ghə̀ bèm a wen la, “Wù kòŋ ə li to?”
7Wù kwaʼa a ghèn ə gàʼ la, “Tikəbəŋ, mù na mèyn nə̀ zhusə nə̀ʼ no zhʉ̀ko, ko ma lu kiʼi wìʼ la ghə̀ we mo tsu. Ma nè sə ghàs ə dyʉ̀, to mu wìʼ ə kwen li shiʼi a mù a mò ambì.”
8Yesò ə gàʼ a wen la, “lu lyɨ̀ ghamə wù, ə jèʼ.” 9Ando ghə̀ gàʼa li, wìʼ aghèn ə nto li, ə lu lyɨ̀ ə ghamə ə wen ə sə jèʼè dyʉ̀.
Andiʼ ali a diʼ kətsi kə chʉʼ lòʼ ə viʼi Jus. 10Tʉtʉ viʼi Jus vətsevə ə nyen li, ə wen mu gàʼ a wen la, “Layn diʼ ə Chʉʼ lòʼ, Əsoʼ ə ko byɨmə la wù ə jèʼe chò nə̀ ghamə.”
11Ghə̀ bwensə gàʼ a vəwenə la, “A gàʼ wìʼ yi a ghə̀ chʉʼ mo la mà lyɨ̀ ghamə ghomə lù ə jèʼ.”
12Vəwenə bèm a wen la, “A diʼ ndò na yi a ghə̀ gàʼ la wù lyɨ̀ ghamə ə wu ə njèʼè nə̀ wenə ghə̀ a?”
13Wìʼ na yi a Yesò ə chʉʼ li ə nko kɨ la Yesò ə ndiʼ te ndò lo, mu Yesò ə nyɨŋ li kwen dyʉ̀ a ntìntìn ənòyn a ghə̀ ndiʼ tsu li.
14Yesò ə ne be yen ə wen a ngə̀ŋ Nyìngòŋ ə gàʼ a wen la, “Wù to li luwen. Kə wù bè a nè mbyɨ, a bwen ali kənyʉ̀ kə a fʉ̀ a wù, to chò kwaʼa a yi.”
15Wìʼ ghèn mu lù a zhʉ a ghèn ə dyʉ̀ ə gàʼ a viʼi Jus a vi la, à tə chʉʼ Yesò chʉʼ wen. 16Vəwenə zìtə̀ ə sə tenlə nə̀ Yesò byìʼì ando ghə̀ chʉʼ wìʼ a kətsi kə chʉʼ lòʼ. 17Yesò ə gàʼ a vəwenə la, “Tìʼ ghom ənè ə shwèʼè wen no məzhʉ̀ ntsèm, nkàyntə̀ mò diʼ be ə nshwèʼè tò alì.”
18Əgaʼa ghenə mu ne viʼi Jus mu sə kəŋ jisə ə zhwi wen byìʼì ando ghə̀ nko kwaʼa to soʼ kətsi kə tʉʼ loʼ, ali be sə toŋtə Nyìngòŋ nə̀ Tìʼ wen diʼi la ghə̀ diʼi ndə̀ŋndəŋ wenə Nyìngòŋ.
19Yesò ə mu bwensə gàʼ a vəwenə la, “Ma gaʼa a ghə̀ŋ to no nəmwèʼè la, Wàyn zizi ko ghə̀ lu nè kənyʉ̀ fa wen a ngeŋ, ghə̀ zizi ghə̀ nè to kənyʉ̀ kì a ghə̀ yen nə̀ to ando Tìʼ ə wen ə nè. Byìʼàndo no gho a Tìʼ ə nè, Wàyn be diʼ ə nè to kəwenkə. 20Fa mbwo Tìʼ ə kòŋə wàyn wen, ghə̀ diʼ li no nyʉ̀ tsèm a ghə̀ nè a wen. Ghə̀ ə diʼi nyʉ̀ kaynəvə a wen a və chò na kenkə. 21Ndə̀ŋndəŋ to ando Bobo ə lùsə viʼi fa pfʉ, be ku ə bwòŋ a vəwenə, a be diʼ ndə̀ŋndəŋ to ando wàyn ə ku ə bwoŋ a no ndò a ghə̀ koŋə. 22Tìʼ ko soʼo tebe wìʼ no fa mpfen, ghə̀ ku li kədyòʼ no kətsèm a wàyn wen la ghə̀ nsoʼo, 23ndi no viʼi vətsèm ə̀ gumlə Wàyn to ndə̀ŋndəŋ ando və gumlə Tìʼ. No ndo yì a ghə̀ faŋ ke gumlə wàyn, mu ghə̀ ko gumlə Tìʼ wen a ghə̀ tɨm ə wen.
24“Ma gaʼa a ghə̀ŋ to no nəmwèʼè la no ndò yi a ghə̀ zhʉ kənyʉ̀ ki a ma gaʼa, ə byɨmə a wìʼ yi a ghə̀ tɨmə mo, ne kiʼi bwoŋ yi a ghə̀ faŋ to ghayn ə mùʼ. Və zizi ko və lu be soʼo wìʼ na ghèn. Kə diʼi la ghə̀ chò li fʉ fa pfʉ sə kiʼi ə ntsìnə̀ yi a ghə̀ ko be lu mè. 25Ma gaʼa a ghə̀ŋ tò no nəmwèʼè la kətsi kə sə boʼsə vi, ma gàʼ alì mu kə diʼ mu boʼsə li, viʼi vyi a və diʼi to nə̀ viʼi və pfʉkəvə zhʉ gɨ wàyn Nyìngòŋ, alì no ndò yi a ghə̀ ne zhʉ gɨ wen ghə̀ ne tsi. 26Nyìngòŋ diʼ wìʼ yì a ghə̀ ku ə ntsìnə̀, ndə̀ŋndəŋ a ghə̀ be ne la wàyn wen be ndiʼ wìʼ yì a ntsìnə̀ ə lu fa wen. 27Nyìngòŋ diʼ mu ghə̀ ku li kədyòʼ a wàyn wen la ghə̀ nsoʼo byìʼàndo ghə̀ diʼ Wàyn Wìʼ. 28Kə ghə̀ŋ ne ndiʼ nə̀ əkaynə ə kumə kənyʉ̀ na kèn byiʼàndo zhʉ̀ sə boʼsə vi a no viʼi və tsèm a və diʼi a təsè ne zhʉ gɨ Wàyn Wìʼ, 29ə lu fa pfʉ, viʼi a və tə nè njùŋ, kiʼi bwoŋ yi a ghə̀ ko lu mè, viʼi a və tə ne nyʉ̀ byɨvə diʼ və lu soʼ byɨbsə vəwenə.
Viʼi vi a və tɨmə nchwò nsòʼ ə Yesò
30“Kənyʉ̀ kə tsenkə ko diʼ a mà zizi a mà nè a mo kədyòʼ. Ma soʼo to ji yì a Nyìngòŋ ə gàʼ la mà ə soʼo fa tsù. Kə diʼi la ma soʼo to no fwu byìʼàndo ma ko kəŋ ə nè kənyʉ̀ kì a ma kòŋ, ali nè to kì a wìʼ yi a ghə̀ tɨmə mo kəŋ la ma nè.
31“Mà sətsèn kaʼsə ə ngàʼa kumə wenə ghomə ko ghə̀ŋ lu byɨmə la kənyʉ̀ kì a ma gàʼà diʼ nəmwèʼè. 32Ma kɨli la wù kədyàŋ diʼ a ghə̀ gàʼà to nə̀ nchwò nsòʼ ə mò, no ghò yi a ghə̀ gàʼà kumə mò, a diʼ to nəmwèʼè. 33Ghə̀ŋ tə ə tɨmə viʼi a Joyn, ali Joyn gàʼa to nəmwèʼè kumə mò. 34Ma ko gaʼa tebè la ma kəŋ la Wùmə̀nsòŋ ə ndiʼ nchwò nsòʼ a mò. Mà gàʼa li ndiʼ ghə̀ŋ byɨmə ə bwòŋ. 35Joyn tə ndiʼ to nə̀ baynə a ghə̀ŋ. A tə ndiʼ a mətsi mə tsen nə̀, ghə̀ŋ ku ə zhʉtə nyʉ̀ vyi a ghə̀ ngàʼà, və diʼ to nə̀ baynə, nè la ghə̀ŋ ə saŋlə. 36Ma kiʼi nchwò nsòʼ, ghə̀ chò Joyn. Nchwò nsòʼ na ghèn diʼi nyʉ̀ vyi a Tìʼ ku li la mà ə nè. A diʼ kəwenkə a kə diʼi làynsə la à tɨm Tìʼ ntɨm mo. 37Nò tèbe Tìʼ yì a ghə̀ tɨmə mo gàʼà li to nə̀ nchwò nsòʼ kumə mò. Ghə̀ŋ ko tɨmə zhʉ̀ gɨ wen, ghə̀ŋ ə ko tɨmə yèn to ando ghə̀ kə̀ʼə̀. 38Ghə̀ŋ ko ghʉ̀ no tèbe kənyʉ̀ kə wen a ghə̀ŋ a tətyɨm byìʼàndo ghə̀ŋ ə ko byɨmə wìʼ a ghə̀ tə tɨmə. 39Ghə̀ŋ ziʼi Ŋwàʼlə̀ Nyìngòŋ byìʼàndo ghə̀ŋ kwòʼtə la ghə̀ŋ na yen ji a ghə̀ŋ ne kiʼi bwoŋ yi a ghə̀ ko lu mè. A diʼ to ŋwàʼlə̀ Nyìngòŋ na ghèn a ghə̀ gaʼa kumə mò. 40Alì, ko ghə̀ŋ byɨmə ə vì a mò ə kiʼi ə ntsìnə̀ a ghèn.
41“Ma ko kəŋ la viʼi ntemə təpfem a mò. 42Ma kɨli tənkì tə viʼi vi a ghə̀ŋ diʼ vəwenə, kɨ la ghə̀ŋ ko kiʼi kòŋ Nyìngòŋ a ghə̀ŋ a tətyɨm. 43Mà vi à zhiʼ Tìʼ ghom, ko ghə̀ŋ lu byɨmə mo. Alì, mu wìʼ ə tsen sətsen vi no to fa wen a ngeŋ, a ghə̀ŋ a shisə wen. 44Ghə̀ŋ kòŋ ə ntemə təpfem a ghə̀ŋ tə wen, ko ghə̀ŋ mwomsə ə kiʼi kùʼsə yi a ghə̀ vi fa Nyìngòŋ yì a ghə̀ diʼ to əmùʼ. Ghə̀ŋ lə zi ghə̀ŋ byɨmə ale? 45Kə ghə̀ŋ ne kwoʼtə la a ne ghàm mò ghàm ghə̀ŋ a shɨ Tìʼ ə ghom, a ne ghàm to Mosìs yi a ghə̀ŋ ə ghʉ̀ kwòʼtə̀ ə ghəŋə a wen. 46Ghə̀ŋ tu tə byɨmə a Mosìs mu ghə̀ŋ ə byɨmə li a mò byìʼàndo ghə̀ nyoʼo li nyʉ̀ kumə mò. 47To ando ghə̀ŋ ko əbyɨmə kənyʉ̀ a Mosìs ə nyoʼo, ghə̀ŋ lə̀ zì ghə̀ŋ byɨmə kənyʉ̀ a ma gaʼa a?”
Currently Selected:
Joyn 5: bbkDBLnt
Highlight
Share
Copy
Want to have your highlights saved across all your devices? Sign up or sign in
