Matìyò 12
12
Və Falàsi vətsenvə bèm kənyʉ̀ kùmə̀ kətsi kəzhʉtəkə Vəjew
(Mak 2.23-28; Luk 6.1-5)
1Tʉʼ layn a kətsi kəzhʉtəkə kətsenkə, Yesò wenə̀ ndzɨ̀mtə̀sə bàm wen sə nchò fa sɨm ə asaŋ dyə tsenghə jɨ̀ŋ sə zafə ndzɨ̀mtə̀sə bàm wen, vəwenə sə kwàʼtə̀ tʉ asaŋ vi pfiʼi ashɨ yi. 2Və Falàsi vətsenvə nè yen sə gàʼà à Yesò la, “Yen kənyʉ̀ a ndzɨ̀mtə̀sə bàm wù sə nè a kətsi kəzhʉtəkə a, soʼo yes ə ko byɨmə a lì.”
3Yesò bèm à vəwenə la, “Ghə̀ŋ ko təmə̀ dzàŋ əzhʉ kənyʉ̀ kì a fòyn Devìt ə ne ando jɨ̀ŋ nzafə wen wenə viʼi wenə? 4Ghə̀ ndyʉ̀ kwèn a ngə̀ŋ Nyìngòŋ wenə̀ viʼi wen vi ə̀ lyɨ̀ kəbayn a və moʼò Nyìngòŋ tsu ə̀ zhɨ, à diʼ mu soʼ ndìʼ la à zhɨ tò vəpfèm və ngə̀ŋ Nyìngòŋ. 5Ghə̀ŋ ko dzàŋ əzhʉ ando soʼ Mosìs bè gàʼà la no kətsi kəzhʉtəkə kə kò a kə mvì, vəpfèm və ngə̀ŋ Nyìngòŋ sə shyèʼè kwaʼa soʼ yi a ghə̀ kùmə̀ kətsi akì, alì kò kə ndiʼ la vəwenə ne li kənyʉ̀ kə byɨkə kətsenkə. 6Mà gàʼà à ghə̀ŋ la, kənyʉ̀ kə diʼ a shèn a kə ghoʼo chò kənyʉ̀ kə ngə̀ŋ Nyìngòŋ ghoʼo. 7Ghə̀ŋ tu kɨ kənyʉ̀ a kəshi kə ŋwàʼlə̀ Nyìngòŋ kènkə gàʼà la, Mà kòŋ la ghə̀ŋ nkusə nshinsə à viʼi chò nyamsə a ghə̀ŋ shələ̀ à mò. Mu ghə̀ŋ ko gàʼà la viʼi ne li kənyʉ̀ kə byɨkə ko ndiʼ la vəwenə ne li. 8Wàyn wìʼ kìʼ àdyoʼ əgàʼ kənyʉ̀ a və zì və ne a kətsi kəzhʉtəkə.”
Yesò chʉʼ kwoŋ wìʼ a ghə̀ mpfʉ
(Mak 3.1-6; Luk 6.6-11)
9Yesò nè gàʼ mwètə̀ a lì ə̀ lù fa kəshi ayì ə̀ dyʉ̀ kwèn a ngə̀ŋ ntsèntə̀ vəwenə tsen, 10wutsen diʼ tsu mu kwoŋ wen tsenghə pfʉ li. Viʼi vətsenvə sə kəŋ jì ə ghàm Yesò mù bèm à wen la, “Soʼ lè byɨmə la və chʉʼ wìʼ a kətsi kəzhʉtəkə mu ghə̀ ko byɨmə lo?”
11Yesò bwènsə̀ bèm à vəwenə la, “Wìʼ fa ghə̀ŋ lè yi nkiʼ byi wen, ghə̀ fəŋ a nkwòŋ a kətsi kəzhʉtəkə ghə̀ à faŋ ke shìsə̀ fa tsu a?. 12Wìʼ chò byi. Kə lə dìʼì la soʼ vəghəŋ byɨmə la wìʼ ne njùŋ a kətsi kəzhʉtəkə.” 13Yesò mù gàʼ à wìʼ ayì la,“Nàʼsə kwoŋ wu.”
Wìʼ ayì nàʼtə̀, no a zhʉ̀ kò, kwoŋ ayi to bè sə diʼ to nə̀ tsenghə yi. 14Və Falàsi vi lù fʉ̀kə̀ mù dyʉ̀ sə baʼtə̀ jisə əzhwi Yesò.
Ntsìnə̀ wù shyèʼ a Nyìngòŋ ntsuʼù
15Yesò nè kɨ̀ kənyʉ̀ a viʼi Falàsi mbaʼtə̀ ənè nə̀ wen, ə̀ lù fa kəshi ayì. Ngwàʼà wìʼ boʼsə wen, ghə̀ chʉʼ viʼi a və nkwaʼkə̀ fà vəwenə a ntìntìn no vətsèm, 16ə̀ tènsə a vəwenə la kə vəwenə à shə̀ʼtə̀ kənyʉ̀ byìʼì yì a wìʼ. 17Ghə̀ ə̀ nè a lì ndi nè la kənyʉ̀ a Nyìngòŋ ngaʼà chòsə̀ fà nshə̀ʼtə̀ Azayà ndiʼ nəmwèʼè la, 18“Ghèn dìʼ wìʼ yì a mà tsuʼ li la ghə̀ shyèʼ à mò. Mà kòŋ wen, ghə̀ nè mà saŋlə̀. Mà a ku kəzhwì kom à wen ə ghə̀ nshə̀ʼtə̀ à viʼi tɨm ando mà a soʼ viʼi a ji tɨmə. 19Ghə̀ ko lə soʼtə̀ kənyʉ̀ wenə̀ wìʼ ko kəŋkə̀ wìʼ, wìʼ ko lə zhʉ gɨ̀ wen a nfò jì. 20Ghə̀ lu nlutə̀ nə̀ viʼi a və bwaʼa kò a ndiʼ la ghə̀ lu ə nyàblə̀ nə̀ viʼi a və ko kiʼ ngyàmtə̀. Ghə̀ a ə nè tò a lì əzaʼa fa zhʉ a ghə̀ a temə ghoŋ wenə̀ mbi ə zhɨ ə mu ghʉ soʼ tɨməghə. 21Viʼi təloʼ tə mbi no tətsèm lu nki tò wen la ghə̀ bwòŋsə vəwenə.”
Viʼi Falàsi sə̀ gàʼà la Yesò shi kədyòʼ fà fòyn zhwì byɨvə
(Mak 3.20-30; Luk 11.14-23)
22Viʼi vətsenvə mù vì nə̀ wìʼ à Yesò mu kəzhwì kə byɨkə ne li kò ghə̀ lù ə nyenə shi kènla ghə̀ gàʼà. Yesò chʉʼ wìʼ ayì ghə̀ sə̀ bwènsə̀ yenə shi be gàʼà. 23No viʼi vətsèm a və ndiʼì tsu sə diʼ nə̀ kaynə ə̀ bèm la, “Wù lè gaʼa ghèn ko diʼ wàyn fòyn Devìt a vəghəŋ tə nkə̀ʼtə̀ lì a?.”
24Viʼi Falàsi zhʉ kənyʉ̀ akì mù sə gàʼà la, “A ku fòyn zhwì byɨvə a dìʼì Belzibùl ku kədyòʼ à wen la ghə̀ ndzɨ̀mə̀ shìsə̀ zhwi byɨvə avenə.”
25Yesò kɨ kwoʼtə vəwenə mù gàʼ à vəwenə la, “No loʼ kò a viʼi vi kiʼ kəngə̀sə̀ à vəwenə a ntìntìn be soynə təwen tə vəwenə mu loʼ ayi a fəŋ. A be ndiʼ viʼi ntə̀ʼ ko kò viʼi ngwaʼa ngə̀ŋ ko a vəwenə kiʼ kəngə̀sə̀ à vəwenə a ntìntìn be soynə təwen tə vəwenə mu ntə̀ʼ ayì ko ngwaʼa ngə̀ŋ ayi ne fəŋ. 26Satan lè mù sətsèn ndzɨ̀mə̀ shìsə̀ tò wù wen mu kə lì dìʼ la ghə̀ soynə tò wenə wen, soʼo fòn wen ke à tɨ̀mə ale?. 27La mà lè sətsèn ndzɨ̀mə̀ shìsə̀ zhwì byɨvə nə̀ kədyòʼ mu à kù Belzibùl à mò, viʼi vəŋə sə dzɨ̀mə̀ shìsə̀ mu à kù ndo ku àdyoʼ à vəwenə a? A ne dìʼ tò viʼi vəŋə avenə la ghə̀ŋ ə le li kənyʉ̀. 28A bòŋsə̀ ku kəzhwì kə Nyìngòŋ ku kədyòʼ la mà ndzɨ̀mə̀ shìsə̀ zhwì byɨvə avenə. Kə lì dìʼì la soʼo Nyìngòŋ vi li à ghə̀ŋ.
29“Ghə̀ŋ diʼi kwòʼtə̀ la, wìʼ zì ghə̀ kwen a ngə̀ŋ wù kədyòʼ ə̀ ghaʼa shi fo wen, à bwen la ghə̀ ghaʼ li wù kədyòʼ ayì ə nkwiʼ a mbì mi lo? Ghə̀ diʼi nè a lì, ə mu tsòŋ ngə̀ŋ wen.
30“Ghə̀ŋ kɨ la, wìʼ a ghə̀ ko diʼ à mò a bàm, ə lì soynə mò. Wìʼ a ghə̀ fàŋ ke ngyàmtə̀ mò ə tsèntə̀ mu ghə̀ lì sàsə̀ sàsə̀. 31A dìʼ byìʼì alə̀ a ma gàʼà à ghə̀ŋ la, Nyìngòŋ zì ghə̀ maʼa no tè mbyɨ kò a wìʼ ne à wutsen kò a ghə̀ ne à Nyìngòŋ, alì mu no ndò sətsèn nè mbyɨ à kəzhwì kəŋwoʼəkə, kò Nyìngòŋ lù màʼà mbyɨ wen ayì. 32No ndò a ghə̀ gàʼà kənyʉ̀ kə byɨkə byìʼì Wàyn Wìʼ, mu Nyìngòŋ zì ghə̀ maʼa mbyɨ wen ayì alì mu wìʼ sətsèn gàʼ kənyʉ̀ kə byɨkə byìʼì kəzhwì kəŋwoʼəkə, kò Nyìngòŋ lù bè màʼà mbyɨ wen no tè a kəlyɨŋ kèn kò a kəlyɨŋ a kə lu vì.”
Və nə̀ kɨ nki fəkòʼ tò fà yì ashɨ
(Luk 6.42-45)
33Yesò bè ziʼì la, “Wù sətsèn lyɨ̀ la ashɨ fəkòʼ diʼ à jùŋə ghə̀ mu wù diʼi be lyɨ̀ la fəkòʼ a fìfə diʼ fə jùŋfə, ə̀ lyɨ̀ la ashɨ fəkòʼ diʼ à byɨghə mu wù diʼi be lyɨ̀ la fəkòʼ a fìfə diʼ fə byɨfə, byìʼàndo və nə̀ nkɨ fəkòʼ tò fà yì ashɨ. 34Ghə̀ŋ zhusə byɨsə sènsə, kənyʉ̀ kə jùŋkə ko zì kə fʉ̀ fà ghə̀ŋ a chʉ̀ byìʼàndo ghə̀ŋ dìʼ viʼi və byɨvə. Gɨ̀ chʉ̀ dìʼ alə̀ gàʼà tò kənyʉ̀ a kə fʉ̀ fa tyɨm mu ghə̀ lwin li nə̀ nki nyʉ̀ a vyi. 35Wu jùŋ ə̀ fʉ̀sə̀ tò njùŋ fa tì nyʉ̀ jùŋ və vi a ghə̀ baʼtə̀ ə̀ ghʉ à wen a tyɨm. Wu byɨ fʉ̀sə̀ tò mbyɨ fa tì mbyɨsə shì a sə diʼ mu ghə̀ baʼtə li ə ghʉ à wen a tyɨm.
36“Mà gàʼà à ghə̀ŋ la, à lu ndiʼ a kətsi kə nsoʼ Nyìngòŋ, no ndò lu shə̀ʼtə̀ chʉ wen byìʼì no məghò a ghə̀ ntɨmə li gàʼ a ghə̀ nko diʼ gàʼ. 37Ghə̀ŋ lu zhɨ nsoʼ ko bvʉ̀ nsoʼ tò fa kənyʉ̀ a ghə̀ŋ lu gàʼ.”
Və sə̀ bèmə̀ əyen kənyʉ̀ kə kaynəkə
(Mak 8.11-12; Luk 11.29-32)
38Ndìʼsə̀sə təsoʼ sətsensə bènə̀ viʼi Falàsi vətsenvə gàʼ à Yesò la, “Ndìʼsə̀, dìʼi nchwi à yès ədìʼ la wù lù fà Nyìngòŋ.”
39Yesò bwènsə̀ gàʼ la, “viʼi mbyi layn ə nè nyʉ̀ byɨvə kò və lə̀ nghʉ tətyɨm tə vəwenə à Nyìngòŋ mù sə bèmə̀ nchwi. Ghə̀ŋ ko a yen ə nchwi tsen a bwen tò nchwi nshə̀ʼtə̀ ə Jonà. 40Ando Jonà ntsi mətsi ntaʼ a bèmə̀ shʉ̀, a dìʼi ndə̀ŋndəŋ ando Wàyn Wìʼ ne pfʉ ə tsi mətsi ntaʼ a tì nse mibu lù. 41A lu ndiʼ a kətsi kə nsoʼ, viʼi Nenivè tɨmə a kəshi kə nsoʼ Nyìngòŋ nghàmə̀ viʼi kəlyɨŋ kènkə byìʼàndo vəwenə nzhʉ li ziʼi Jonà ə̀ kaʼsə tətyɨm tə vəwenə fà vəwenə a mbyɨsə. Kəlyɨŋ kènkə sə kiʼ wù luwèn, ghə̀ chò Jonà alì kò ghə̀ŋ lù nkaʼsə̀ tətyɨm təŋtə fà ghə̀ŋ a mbyɨsə. 42A lu ndiʼ a kətsi kə nsoʼ Nyìngòŋ, fòn ə wùwì a ghə̀ nsoʼ li shə təloʼ tèn, lu tɨmə ə ghàm viʼi kəlyɨŋ kə luwèn byìʼàndo ghə̀ nlu fà wen a loʼ ə̀ jèʼ kəghaf kə mbi əvì zhʉtə ziʼi tof fòyn Sòlomùyn, alì wìʼ dìʼ a shə̀ luwèn a ghə̀ chò fòyn Sòlomùyn, kò ghə̀ŋ lù zhʉtə ziʼi wen.”
Məbwènə̀ vì kəzhwì kə byɨkə
(Luk 11.24-26)
43“A nə̀ ndiʼ a zhʉ a kəzhwì kə byɨkə fʉ fà wìʼ a wèn, kə dyʉ̀ sə jèʼè fa nse zɨm no tsèm kəŋ kəshi əzhʉ̀tə̀ tsu ə sətsèn kə faŋ ke yen, 44kə bwènə̀ gàʼ à wen a wèn la, ‘Mà a bwènə̀ dyʉ̀ tò a mo a ngə̀ŋ yì a mà tə̀ fʉ̀ fa tsu lì.’ A sətsèn kə nè gàʼ a lì sə bwènə̀ dyʉ̀ ə̀ yen ngə̀ŋ ayì ghə̀ ndiʼ tò zɨm mu və zhèsə̀ li ə̀ nshɨtə, 45kə bwènə̀ dyʉ̀ lyɨ̀ zhwì byɨvə tsenəvə sòmbo, və fàynsə̀ chò kəwenkə, və tsèntə̀ vì sə tsi a wèn wìʼ ayì. Kə nè lyɨ̀ kəshi a lì, wìʼ ayì sə fàynsə̀ chò ando ghə̀ tə ndiʼ fa mbì. A dìʼ tò alə̀ a kə lə ndiʼ à viʼi və byɨvə kəlyɨŋ kə luwèn.”
Yesò shə̀ʼtə̀ lì wen bènə̀ vəlèmə̀ və wen
(Mak 3.31-35; Luk 8.19-21)
46Yesò mbu gàʼà à tənòyn tə viʼi a vyi a tə njèʼè fa wen a bàm, lì wen bènə̀ vəlèmə̀ və wen vì ə̀ tɨmə a kəbəŋ sə kəŋ jì əgàʼ à wen. 47Wutsen fa ntìntìn nòyn ayì gàʼ à wen la, “Lì wù wenə̀ vəlèmə̀ vyə ti a kəbəŋ kəŋ gàʼ à wù.”
48Yesò bèm à wen la, “Lì ghom dìʼ ndò, vəlèmə̀ vwomə diʼ vəndo?” 49Ghə̀ bèm a lì ə sùʼ ndzɨ̀mtə̀sə bàm wen ə̀ gàʼ la, “Lì ghom bènə̀ vəlèmə̀ vwomə diʼ viʼi venə. 50No ndò a ghə̀ nè kənyʉ̀ kì a Tìʼ ghom a kàŋ kəŋə mu ghə̀ dìʼ lèmə̀ ghom wùlɨm, diʼ lèmə̀ ghom wùwì be diʼ lì ghom.”
Currently Selected:
Matìyò 12: bbkDBLnt
Highlight
Share
Copy
Want to have your highlights saved across all your devices? Sign up or sign in
Matìyò 12
12
Və Falàsi vətsenvə bèm kənyʉ̀ kùmə̀ kətsi kəzhʉtəkə Vəjew
(Mak 2.23-28; Luk 6.1-5)
1Tʉʼ layn a kətsi kəzhʉtəkə kətsenkə, Yesò wenə̀ ndzɨ̀mtə̀sə bàm wen sə nchò fa sɨm ə asaŋ dyə tsenghə jɨ̀ŋ sə zafə ndzɨ̀mtə̀sə bàm wen, vəwenə sə kwàʼtə̀ tʉ asaŋ vi pfiʼi ashɨ yi. 2Və Falàsi vətsenvə nè yen sə gàʼà à Yesò la, “Yen kənyʉ̀ a ndzɨ̀mtə̀sə bàm wù sə nè a kətsi kəzhʉtəkə a, soʼo yes ə ko byɨmə a lì.”
3Yesò bèm à vəwenə la, “Ghə̀ŋ ko təmə̀ dzàŋ əzhʉ kənyʉ̀ kì a fòyn Devìt ə ne ando jɨ̀ŋ nzafə wen wenə viʼi wenə? 4Ghə̀ ndyʉ̀ kwèn a ngə̀ŋ Nyìngòŋ wenə̀ viʼi wen vi ə̀ lyɨ̀ kəbayn a və moʼò Nyìngòŋ tsu ə̀ zhɨ, à diʼ mu soʼ ndìʼ la à zhɨ tò vəpfèm və ngə̀ŋ Nyìngòŋ. 5Ghə̀ŋ ko dzàŋ əzhʉ ando soʼ Mosìs bè gàʼà la no kətsi kəzhʉtəkə kə kò a kə mvì, vəpfèm və ngə̀ŋ Nyìngòŋ sə shyèʼè kwaʼa soʼ yi a ghə̀ kùmə̀ kətsi akì, alì kò kə ndiʼ la vəwenə ne li kənyʉ̀ kə byɨkə kətsenkə. 6Mà gàʼà à ghə̀ŋ la, kənyʉ̀ kə diʼ a shèn a kə ghoʼo chò kənyʉ̀ kə ngə̀ŋ Nyìngòŋ ghoʼo. 7Ghə̀ŋ tu kɨ kənyʉ̀ a kəshi kə ŋwàʼlə̀ Nyìngòŋ kènkə gàʼà la, Mà kòŋ la ghə̀ŋ nkusə nshinsə à viʼi chò nyamsə a ghə̀ŋ shələ̀ à mò. Mu ghə̀ŋ ko gàʼà la viʼi ne li kənyʉ̀ kə byɨkə ko ndiʼ la vəwenə ne li. 8Wàyn wìʼ kìʼ àdyoʼ əgàʼ kənyʉ̀ a və zì və ne a kətsi kəzhʉtəkə.”
Yesò chʉʼ kwoŋ wìʼ a ghə̀ mpfʉ
(Mak 3.1-6; Luk 6.6-11)
9Yesò nè gàʼ mwètə̀ a lì ə̀ lù fa kəshi ayì ə̀ dyʉ̀ kwèn a ngə̀ŋ ntsèntə̀ vəwenə tsen, 10wutsen diʼ tsu mu kwoŋ wen tsenghə pfʉ li. Viʼi vətsenvə sə kəŋ jì ə ghàm Yesò mù bèm à wen la, “Soʼ lè byɨmə la və chʉʼ wìʼ a kətsi kəzhʉtəkə mu ghə̀ ko byɨmə lo?”
11Yesò bwènsə̀ bèm à vəwenə la, “Wìʼ fa ghə̀ŋ lè yi nkiʼ byi wen, ghə̀ fəŋ a nkwòŋ a kətsi kəzhʉtəkə ghə̀ à faŋ ke shìsə̀ fa tsu a?. 12Wìʼ chò byi. Kə lə dìʼì la soʼ vəghəŋ byɨmə la wìʼ ne njùŋ a kətsi kəzhʉtəkə.” 13Yesò mù gàʼ à wìʼ ayì la,“Nàʼsə kwoŋ wu.”
Wìʼ ayì nàʼtə̀, no a zhʉ̀ kò, kwoŋ ayi to bè sə diʼ to nə̀ tsenghə yi. 14Və Falàsi vi lù fʉ̀kə̀ mù dyʉ̀ sə baʼtə̀ jisə əzhwi Yesò.
Ntsìnə̀ wù shyèʼ a Nyìngòŋ ntsuʼù
15Yesò nè kɨ̀ kənyʉ̀ a viʼi Falàsi mbaʼtə̀ ənè nə̀ wen, ə̀ lù fa kəshi ayì. Ngwàʼà wìʼ boʼsə wen, ghə̀ chʉʼ viʼi a və nkwaʼkə̀ fà vəwenə a ntìntìn no vətsèm, 16ə̀ tènsə a vəwenə la kə vəwenə à shə̀ʼtə̀ kənyʉ̀ byìʼì yì a wìʼ. 17Ghə̀ ə̀ nè a lì ndi nè la kənyʉ̀ a Nyìngòŋ ngaʼà chòsə̀ fà nshə̀ʼtə̀ Azayà ndiʼ nəmwèʼè la, 18“Ghèn dìʼ wìʼ yì a mà tsuʼ li la ghə̀ shyèʼ à mò. Mà kòŋ wen, ghə̀ nè mà saŋlə̀. Mà a ku kəzhwì kom à wen ə ghə̀ nshə̀ʼtə̀ à viʼi tɨm ando mà a soʼ viʼi a ji tɨmə. 19Ghə̀ ko lə soʼtə̀ kənyʉ̀ wenə̀ wìʼ ko kəŋkə̀ wìʼ, wìʼ ko lə zhʉ gɨ̀ wen a nfò jì. 20Ghə̀ lu nlutə̀ nə̀ viʼi a və bwaʼa kò a ndiʼ la ghə̀ lu ə nyàblə̀ nə̀ viʼi a və ko kiʼ ngyàmtə̀. Ghə̀ a ə nè tò a lì əzaʼa fa zhʉ a ghə̀ a temə ghoŋ wenə̀ mbi ə zhɨ ə mu ghʉ soʼ tɨməghə. 21Viʼi təloʼ tə mbi no tətsèm lu nki tò wen la ghə̀ bwòŋsə vəwenə.”
Viʼi Falàsi sə̀ gàʼà la Yesò shi kədyòʼ fà fòyn zhwì byɨvə
(Mak 3.20-30; Luk 11.14-23)
22Viʼi vətsenvə mù vì nə̀ wìʼ à Yesò mu kəzhwì kə byɨkə ne li kò ghə̀ lù ə nyenə shi kènla ghə̀ gàʼà. Yesò chʉʼ wìʼ ayì ghə̀ sə̀ bwènsə̀ yenə shi be gàʼà. 23No viʼi vətsèm a və ndiʼì tsu sə diʼ nə̀ kaynə ə̀ bèm la, “Wù lè gaʼa ghèn ko diʼ wàyn fòyn Devìt a vəghəŋ tə nkə̀ʼtə̀ lì a?.”
24Viʼi Falàsi zhʉ kənyʉ̀ akì mù sə gàʼà la, “A ku fòyn zhwì byɨvə a dìʼì Belzibùl ku kədyòʼ à wen la ghə̀ ndzɨ̀mə̀ shìsə̀ zhwi byɨvə avenə.”
25Yesò kɨ kwoʼtə vəwenə mù gàʼ à vəwenə la, “No loʼ kò a viʼi vi kiʼ kəngə̀sə̀ à vəwenə a ntìntìn be soynə təwen tə vəwenə mu loʼ ayi a fəŋ. A be ndiʼ viʼi ntə̀ʼ ko kò viʼi ngwaʼa ngə̀ŋ ko a vəwenə kiʼ kəngə̀sə̀ à vəwenə a ntìntìn be soynə təwen tə vəwenə mu ntə̀ʼ ayì ko ngwaʼa ngə̀ŋ ayi ne fəŋ. 26Satan lè mù sətsèn ndzɨ̀mə̀ shìsə̀ tò wù wen mu kə lì dìʼ la ghə̀ soynə tò wenə wen, soʼo fòn wen ke à tɨ̀mə ale?. 27La mà lè sətsèn ndzɨ̀mə̀ shìsə̀ zhwì byɨvə nə̀ kədyòʼ mu à kù Belzibùl à mò, viʼi vəŋə sə dzɨ̀mə̀ shìsə̀ mu à kù ndo ku àdyoʼ à vəwenə a? A ne dìʼ tò viʼi vəŋə avenə la ghə̀ŋ ə le li kənyʉ̀. 28A bòŋsə̀ ku kəzhwì kə Nyìngòŋ ku kədyòʼ la mà ndzɨ̀mə̀ shìsə̀ zhwì byɨvə avenə. Kə lì dìʼì la soʼo Nyìngòŋ vi li à ghə̀ŋ.
29“Ghə̀ŋ diʼi kwòʼtə̀ la, wìʼ zì ghə̀ kwen a ngə̀ŋ wù kədyòʼ ə̀ ghaʼa shi fo wen, à bwen la ghə̀ ghaʼ li wù kədyòʼ ayì ə nkwiʼ a mbì mi lo? Ghə̀ diʼi nè a lì, ə mu tsòŋ ngə̀ŋ wen.
30“Ghə̀ŋ kɨ la, wìʼ a ghə̀ ko diʼ à mò a bàm, ə lì soynə mò. Wìʼ a ghə̀ fàŋ ke ngyàmtə̀ mò ə tsèntə̀ mu ghə̀ lì sàsə̀ sàsə̀. 31A dìʼ byìʼì alə̀ a ma gàʼà à ghə̀ŋ la, Nyìngòŋ zì ghə̀ maʼa no tè mbyɨ kò a wìʼ ne à wutsen kò a ghə̀ ne à Nyìngòŋ, alì mu no ndò sətsèn nè mbyɨ à kəzhwì kəŋwoʼəkə, kò Nyìngòŋ lù màʼà mbyɨ wen ayì. 32No ndò a ghə̀ gàʼà kənyʉ̀ kə byɨkə byìʼì Wàyn Wìʼ, mu Nyìngòŋ zì ghə̀ maʼa mbyɨ wen ayì alì mu wìʼ sətsèn gàʼ kənyʉ̀ kə byɨkə byìʼì kəzhwì kəŋwoʼəkə, kò Nyìngòŋ lù bè màʼà mbyɨ wen no tè a kəlyɨŋ kèn kò a kəlyɨŋ a kə lu vì.”
Və nə̀ kɨ nki fəkòʼ tò fà yì ashɨ
(Luk 6.42-45)
33Yesò bè ziʼì la, “Wù sətsèn lyɨ̀ la ashɨ fəkòʼ diʼ à jùŋə ghə̀ mu wù diʼi be lyɨ̀ la fəkòʼ a fìfə diʼ fə jùŋfə, ə̀ lyɨ̀ la ashɨ fəkòʼ diʼ à byɨghə mu wù diʼi be lyɨ̀ la fəkòʼ a fìfə diʼ fə byɨfə, byìʼàndo və nə̀ nkɨ fəkòʼ tò fà yì ashɨ. 34Ghə̀ŋ zhusə byɨsə sènsə, kənyʉ̀ kə jùŋkə ko zì kə fʉ̀ fà ghə̀ŋ a chʉ̀ byìʼàndo ghə̀ŋ dìʼ viʼi və byɨvə. Gɨ̀ chʉ̀ dìʼ alə̀ gàʼà tò kənyʉ̀ a kə fʉ̀ fa tyɨm mu ghə̀ lwin li nə̀ nki nyʉ̀ a vyi. 35Wu jùŋ ə̀ fʉ̀sə̀ tò njùŋ fa tì nyʉ̀ jùŋ və vi a ghə̀ baʼtə̀ ə̀ ghʉ à wen a tyɨm. Wu byɨ fʉ̀sə̀ tò mbyɨ fa tì mbyɨsə shì a sə diʼ mu ghə̀ baʼtə li ə ghʉ à wen a tyɨm.
36“Mà gàʼà à ghə̀ŋ la, à lu ndiʼ a kətsi kə nsoʼ Nyìngòŋ, no ndò lu shə̀ʼtə̀ chʉ wen byìʼì no məghò a ghə̀ ntɨmə li gàʼ a ghə̀ nko diʼ gàʼ. 37Ghə̀ŋ lu zhɨ nsoʼ ko bvʉ̀ nsoʼ tò fa kənyʉ̀ a ghə̀ŋ lu gàʼ.”
Və sə̀ bèmə̀ əyen kənyʉ̀ kə kaynəkə
(Mak 8.11-12; Luk 11.29-32)
38Ndìʼsə̀sə təsoʼ sətsensə bènə̀ viʼi Falàsi vətsenvə gàʼ à Yesò la, “Ndìʼsə̀, dìʼi nchwi à yès ədìʼ la wù lù fà Nyìngòŋ.”
39Yesò bwènsə̀ gàʼ la, “viʼi mbyi layn ə nè nyʉ̀ byɨvə kò və lə̀ nghʉ tətyɨm tə vəwenə à Nyìngòŋ mù sə bèmə̀ nchwi. Ghə̀ŋ ko a yen ə nchwi tsen a bwen tò nchwi nshə̀ʼtə̀ ə Jonà. 40Ando Jonà ntsi mətsi ntaʼ a bèmə̀ shʉ̀, a dìʼi ndə̀ŋndəŋ ando Wàyn Wìʼ ne pfʉ ə tsi mətsi ntaʼ a tì nse mibu lù. 41A lu ndiʼ a kətsi kə nsoʼ, viʼi Nenivè tɨmə a kəshi kə nsoʼ Nyìngòŋ nghàmə̀ viʼi kəlyɨŋ kènkə byìʼàndo vəwenə nzhʉ li ziʼi Jonà ə̀ kaʼsə tətyɨm tə vəwenə fà vəwenə a mbyɨsə. Kəlyɨŋ kènkə sə kiʼ wù luwèn, ghə̀ chò Jonà alì kò ghə̀ŋ lù nkaʼsə̀ tətyɨm təŋtə fà ghə̀ŋ a mbyɨsə. 42A lu ndiʼ a kətsi kə nsoʼ Nyìngòŋ, fòn ə wùwì a ghə̀ nsoʼ li shə təloʼ tèn, lu tɨmə ə ghàm viʼi kəlyɨŋ kə luwèn byìʼàndo ghə̀ nlu fà wen a loʼ ə̀ jèʼ kəghaf kə mbi əvì zhʉtə ziʼi tof fòyn Sòlomùyn, alì wìʼ dìʼ a shə̀ luwèn a ghə̀ chò fòyn Sòlomùyn, kò ghə̀ŋ lù zhʉtə ziʼi wen.”
Məbwènə̀ vì kəzhwì kə byɨkə
(Luk 11.24-26)
43“A nə̀ ndiʼ a zhʉ a kəzhwì kə byɨkə fʉ fà wìʼ a wèn, kə dyʉ̀ sə jèʼè fa nse zɨm no tsèm kəŋ kəshi əzhʉ̀tə̀ tsu ə sətsèn kə faŋ ke yen, 44kə bwènə̀ gàʼ à wen a wèn la, ‘Mà a bwènə̀ dyʉ̀ tò a mo a ngə̀ŋ yì a mà tə̀ fʉ̀ fa tsu lì.’ A sətsèn kə nè gàʼ a lì sə bwènə̀ dyʉ̀ ə̀ yen ngə̀ŋ ayì ghə̀ ndiʼ tò zɨm mu və zhèsə̀ li ə̀ nshɨtə, 45kə bwènə̀ dyʉ̀ lyɨ̀ zhwì byɨvə tsenəvə sòmbo, və fàynsə̀ chò kəwenkə, və tsèntə̀ vì sə tsi a wèn wìʼ ayì. Kə nè lyɨ̀ kəshi a lì, wìʼ ayì sə fàynsə̀ chò ando ghə̀ tə ndiʼ fa mbì. A dìʼ tò alə̀ a kə lə ndiʼ à viʼi və byɨvə kəlyɨŋ kə luwèn.”
Yesò shə̀ʼtə̀ lì wen bènə̀ vəlèmə̀ və wen
(Mak 3.31-35; Luk 8.19-21)
46Yesò mbu gàʼà à tənòyn tə viʼi a vyi a tə njèʼè fa wen a bàm, lì wen bènə̀ vəlèmə̀ və wen vì ə̀ tɨmə a kəbəŋ sə kəŋ jì əgàʼ à wen. 47Wutsen fa ntìntìn nòyn ayì gàʼ à wen la, “Lì wù wenə̀ vəlèmə̀ vyə ti a kəbəŋ kəŋ gàʼ à wù.”
48Yesò bèm à wen la, “Lì ghom dìʼ ndò, vəlèmə̀ vwomə diʼ vəndo?” 49Ghə̀ bèm a lì ə sùʼ ndzɨ̀mtə̀sə bàm wen ə̀ gàʼ la, “Lì ghom bènə̀ vəlèmə̀ vwomə diʼ viʼi venə. 50No ndò a ghə̀ nè kənyʉ̀ kì a Tìʼ ghom a kàŋ kəŋə mu ghə̀ dìʼ lèmə̀ ghom wùlɨm, diʼ lèmə̀ ghom wùwì be diʼ lì ghom.”
Currently Selected:
:
Highlight
Share
Copy
Want to have your highlights saved across all your devices? Sign up or sign in