Matìyò 13
13
Yesò mò ngàyn kùmə̀ tì sɨ̀m
(Mak 4.1-9; Luk 8.4-8)
1Tò a kətsi ayì Yesò fʉ̀ fa ngə̀ŋ dyʉ̀ ŋwʉʼʉ a mbyɨ̀ mo sə ziʼi viʼi. 2Viʼi no vəghoʼo vì tɨ̀mə kaʼa wen. Ghə̀ yen a lì ə̀ kwen dyʉ̀ ə̀ ŋwʉʼʉ ati nkànuʼ viʼi a vyi tɨmə a mbyɨ̀ à mù. 3Ghə̀ shə̀ʼtə̀ nyʉ̀ no ghoʼo à vəwenə tò a ngàynsə. Ghə̀ zìtə̀ nə̀ ghèn la,
“Wutsen nlù fʉ̀ əmoʼ ngwàʼ wen. 4Ghə̀ sə mòʼò ashɨ tsenghə fəŋkə a kəghʉ̀ kə ji mənyin vì tsɨ̀ftə ə̀ pfiʼ no a tsèm. 5Ashɨ à tsenghə fəŋkə a təwu a nse nko ghoʼtə tsu ə̀ zàŋsə̀ fʉ̀. 6Chwìchwì bayn nyùʼ ngwàʼsə fo a shìsə byìʼàndo aghaŋ a yi nko təmə̀ dyʉ̀ a nse. Ngwàʼ a shìsə mù zɨm. 7Ashɨ à tsenghə fəŋkə a moʼsə ndzoŋsə. Ne kùʼ tsu ndzoŋsə a shìsə kuʼ wenə̀ ngwàʼsə a shìsə a muʼu ə̀ tàʼsə̀ ko sə lə̀ kwi. 8Ashɨ à tsenghə fəŋkə a nse jùŋ ə̀ kwi fosə no a nkàyn ə̀ bi, zaŋsə tsenəvə nkiʼi asaŋ tsu wum, tsenəvə kiʼ asaŋ ntʉfə, tsenəvə kiʼ asaŋ à taʼ”.
9Yesò mwètə̀ mò ngàyn a ghèn mù gàʼ la, “No ndò a ghə̀ kiʼi tiʼitiʼi ghə̀ tùʼù zhʉtə.”
Yesò shə̀ʼtə̀ kənyʉ̀ a ghə̀ ngàʼà a ngàynsə byìʼì kəwenkə
(Mak 4.10-12; Luk 8.9-10)
10Ndzɨ̀mtə̀sə bàm Yesò sə kwentə dyʉ̀ boʼsə wen ə̀ bèm la, “Byìʼì ghò a wu gàʼà a viʼi a ngàynsə a?”
11Yesò bwènsə̀ gàʼ à vəwenə la, Nyìngòŋ ku li tof à ghə̀ŋ la ghə̀ŋ nzhʉ kɨ nyʉ̀ lyomtəvə vi a və diʼì byìʼì soʼo fòyn wen alì kò a ndiʼ la ghə̀ ku li à vəwenə. 12Ghə̀ŋ kɨ la no ndò a ghə̀ sə kiʼì kəfo və a ku kwʉ̀ʼsə̀ à wen ndi ghə̀ ntùʼtə̀ kiʼ alì no ndò a ghə̀ ko kiʼì kəfo və a shì tè kətyetə kì a ghə̀ kiʼì lì. 13Mà gàʼà à vəwenə a ngàynsə alə̀ byìʼàndo vəwenə ki shi kò vəwenə lu nyenə, zhʉ nyʉ̀ a lì kò vəwenə lu nkɨ la və gàʼà la ghò lo. 14Ntɨm ə Nyìngòŋ yì a nshə̀ʼtə̀ Azayà nlù shə̀ʼtə̀ kwʉʼ li a vəwenə la ghə̀ŋ lu nzhʉ nyʉ̀ tò zhʉ alì kò ghə̀ŋ lu nkɨ, ki shi tò ki alì kò ghə̀ŋ lù nyenə kəfo. 15Viʼi venə dìʼ mu tətof tə vəwenə tə bwaʼli. Vəwenə shwintə li tiʼitiʼi vəwenə be nchiʼtə ashɨ vəwenə, à bwen a lì mu tiʼitiʼi vəwenə zhʉ kɨ nyʉ̀ ashɨ vəwenə be yenə shi a zhʉ ayì vəwenə bwenə vì à mò mà chʉʼ vəwenə.
16Yesò gàʼ a lì mù gàʼ à ndzɨ̀mtə̀sə bàm wen la, “Njùŋ dìʼ a ghə̀ŋ byìʼàndo ghə̀ŋ kìʼ ashɨ əyen shi be kìʼ tiʼitiʼi əzhʉ kɨ nyʉ̀ vyi a və gàʼà lì. 17Mà gàʼà à ghə̀ŋ nəmwèʼè la nshə̀ʼtə̀sə sə ghoʼkəsə bènə̀ viʼi nyʉ̀ tɨməvə diʼ no vəghoʼo a və nlu li sə kòŋ əyen nyʉ̀ vyi a ghə̀ŋ yenə be kòŋ əzhʉ nyʉ̀ vyi a ghə̀ŋ zhʉ alì kò vəwenə lù yen ko zhʉ.”
Yesò shə̀ʼtə̀ kənyʉ̀ a ngàyn Tì sɨ̀m dìʼì
(Mak 4.13-20; Luk 8.11-15)
18Yesò bè gàʼ la, “Ghə̀ŋ zhʉtə lì kənyʉ̀ kì a ngàyn Tì sɨ̀m ziʼì à ghə̀ŋ. 19Viʼi vi a və zhʉ ntɨm kùmə̀ soʼ Fòyn Nyìngòŋ kò və lù nkɨ dìʼ to nə̀ ashɨ ngwàʼ yi a ghə̀ fəŋkə a kəghʉ̀ kə ji lì vəwenə zhʉ Deblə̀ vì soʼ lu nə̀ kəwenkə fà vəwenə a tətyɨm. 20Wìʼ yì a ghə̀ zhʉ kənyʉ̀ kə Nyìngòŋ ghə̀ zàŋsə byɨmə tò byɨmə nə̀ saŋlə ghə̀ dìʼ to nə̀ ngwàʼ yì a ghə̀ fəŋkə a təwu lì. 21Wìʼ yì a ghə̀ zhʉ kənyʉ̀ kə Nyìngòŋ, kò kə lə kiʼi aghaŋ, ghə̀ byɨmə to fəntemnə̀ fə zhʉ. Ngəʼ nè vì ko və tsuʼ aghʉ wen byìʼì gaʼa Nyìngòŋ no a zhʉ̀ kò ghə̀ fəŋ fa wen a byɨmə. 22Ngwaʼa tsen yì a ghə̀ mfəŋkə a tì ndzoŋsə lì dìʼ to nə̀ wìʼ yì a ghə̀ zhʉ kənyʉ̀ kə Nyìngòŋ, ngəʼsə kwi nse a shə̀ bè nə̀ kòŋə əkiʼi ə ghoʼ tàʼsə kənyʉ̀ akì la kə kə kumə ashɨ a wen a ntsìnə̀. 23Ngwaʼa tsen yì a ghə̀ mfəŋkə a nse jùŋ dìʼ to nə̀ viʼi vyi a və zhʉ kənyʉ̀ kə Nyìngòŋ ə nkɨ kənyʉ̀ kì a kə gàʼà. Kə kumə ashɨ ghoʼoghə a ntsìnə̀sə viʼi vətsenvə ə̀ kumə ashɨ tyetəghə a ntsìnə̀sə vətsenvə.”
Yesò mò ngàyn kùmə̀ kəfʉ̀ʼ
24Yesò bè mò ngàyn tsen a vəwenə la, “Soʼo foynə Nyìngòŋ diʼ to nə̀ wìʼ a ghə̀ nlù mòʼ ngwàʼa jùŋ a wen a sɨm. 25Tʉʼ lə jɨ kətsi kətsenkə viʼi beynkə no vətsèm, wù kəbàyn ə wen tsen nyoʼtə dyʉ̀ wè kəfʉ̀ʼ tsu, mù lù. 26No tʉʼ kò asaŋ ayi mfʉ kwi sə mfosə̀ kəfʉ̀ʼ akì bè kuʼ. 27Viʼi shyèʼ ti sɨ̀m ayì bèm à wen la, Tìʼ, gàʼa kò wù tə̀ mòʼ tò ngwàʼ asaŋ jùŋə à wu a sɨm ghèn, nki kəfʉ̀ʼ ghenə tsu lè dìʼ mu kə lù fa fe? 28Wìʼ ayì gàʼ la, ‘kənyʉ̀ a kènkə nè tò wù kəbàyn mò tsen. Viʼi shyèʼ wen a vyi bèm à wen la, Yès dyʉ̀ ə̀ sulə kəfʉ̀ʼ akì?’ 29Wìʼ ayì bwènsə̀ gàʼ à vəwenə la, Jòʼ, kə ghə̀ŋ a su luwèn byìʼàndo ghə̀ŋ zì ghə̀ŋ dyʉ̀ sə nsulə, ə̀ ntsuʼtə boʼsə wenə asaŋə. 30Ghə̀ŋ ghʉsə asaŋ ayi nkwi tò a tì kəfʉ̀ʼ əzaʼa fa kətsi a və a fʉ əpfì. A lu ndiʼ a kətsi ayì mà gàʼ à viʼi və pfi və la vəwenə tsuʼ kəfʉ̀ʼ akì a mbì ə̀ kwìʼ a gə̀sə̀ və nè nyùʼ ə mù pfì asaŋ ayi pfwo ghʉ̀ à mò a kàŋ.”
Yesò mò ngàyn kùmə̀ shɨ fəkòʼ fə mostàd
(Mak 4.30-32; Luk 13.18-19)
31Yesò bè mò ngàyn tsen à vəwenə la, “Soʼo Fòyn Nyìngòŋ diʼ tò nə̀ shɨ fəkòʼ fə mostàd, a wìʼ nwe à wen a sɨm fə sə kwi. 32A nə̀ ndiʼ a zhʉ a və we fəkòʼ a fènfə, shɨ yi tyetə chò no ghò ayì alì ghə̀ nè kwi kuʼ fəkòʼ fi sə ghoʼo chò no nkòʼ ntsèm. Mənyin mù sə vì bwomə təlòʼ tə vəwenə ayi a tətam.”
Yesò mò ngàyn kùmə̀ fəshɨ̀ŋ
(Luk 13.20-21)
33Yesò be mò ngàyn tsen à vəwenə la, “Soʼo Fòyn Nyìngòŋ diʼ tò nə̀ fəshɨ̀ŋ a wùwì nè ghə̀ lyɨ̀ wè a tì kəbayn no kə ghoʼo la kə kuʼ ə sə fɨ̀ŋə̀ əzaʼa fa zhʉ a kə a kuʼ no kətsèm.”
34Yesò nziʼi nyʉ̀ avenə no tsèm a viʼi tò a ngàynsə, ghə̀ ko nshə̀ʼtə̀ kənyʉ̀ à vəwenə no kə mùʼ kènla ghə̀ mò a ngàyn. 35Ghə̀ ə̀ nè alə̀ ndi nè la nyʉ̀ vyi a Nyìngòŋ ngaʼà chò fà nshə̀ʼtə̀ ghoʼo ndiʼ nəmwèʼè la, “Mà lu ngàʼà à vəwenə a ngàynsə. Mà lu nshə̀ʼtə̀ nyʉ̀ à vəwenə a wìʼ nko ntɨmə̀ kɨ no fa tʉʼ a və nshɨtə mbi.”
Yesò shə̀ʼtə̀ kənyʉ̀ a ngàyn kəfʉ̀ʼ yì ngàʼà
36Andìʼ a zhʉ a Yesò wenə̀ ndzɨ̀mtə̀sə bàm wen ə̀ moʼtə li nòyn viʼi ə̀ bwènə̀ kwen a ngə̀ŋ, vəwenə gàʼ à wen la ghə̀ shə̀ʼtə̀ kənyʉ̀ a ngàyn ə̀ kəfʉ̀ʼ yì ziʼi.
37Yesò gàʼ à vəwenə la, “Wìʼ yì a ghə̀ nwe ngwàʼ jùŋə lì diʼ Wàyn Wìʼ. 38Sɨm yi diʼ mbi, ngwàʼ jùŋə yì diʼ viʼi vyi a və diʼi a ti Soʼo Fòyn Nyìngòŋ, kəfʉ̀ kì diʼ viʼi vyi a və diʼì a ti soʼ Deblə̀. 39Wù kəbàyn yì a ghə̀ nwe kəfʉ̀ʼ kì diʼ Deblə̀, zhʉ məpfì diʼ kənsèsə̀ kə mbi, viʼi a və pfì dìʼ ntsɨ̀ŋsə ngə̀ŋ Nyìngòŋ. 40Ando və ne zhùŋtə̀ kəfʉ̀ʼ a sɨm və nyùʼù àdìʼ tò a lì a və lu nè a viʼi avenə a kənsèsə̀ kə mbi. 41Wàyn Wìʼ lu tɨm ntsɨ̀ŋsə wen ə sə fʉ vì ə tsèntə̀ shìsə̀ viʼi vyi a və nè la viʼi ne mbyɨ bènə̀ viʼi vì a və nè mbyɨ fà wen Soʼ fòyn, 42ə̀ mòʼ vəwenə a kəshi kə zhìʼ ə vəwenə nlyuŋlyuŋ dì be pfiʼi asoŋ. 43Viʼi kənyʉ̀ kə tɨməkə lu mbaynə a tʉʼ ayì tò nə̀ chʉzhʉ a kəshi kə fòyn Tìʼ vəwenə. No ndò a ghə̀ kiʼi tiʼitiʼi ghə̀ tuʼù zhʉtə.”
Yesò mò ngàyn kùmə̀ ghoʼ
44Yesò gàʼ la, “Soʼ Fòyn Nyìngòŋ diʼ tò nə̀ ghoʼ tsenghə a wìʼ ndyʉ̀ kwʉ̀ʼ a sɨm a və nwè ə̀ lyòmtə̀ tsu, ə bwènə̀ pfwo, kənyʉ̀ ki sə fwomə à wen a wèn no nànto, ghə̀ dyʉ̀ ə̀ baʼlə no ghò ayì a ghə̀ nkiʼi ə̀ vì zen sɨm ayi.”
45Soʼ Fòyn Nyìngòŋ be diʼ to nə̀ wù mbàʼànkùm a ghə̀ njèʼè kəŋə təfo tə jùŋtə. 46Zhʉ a ghə̀ yenə ashɨ fo tsenghə a ghə̀ bòŋə̀ no a nkàyn, ghə̀ bwènə̀ pfwo ə̀ baʼlə no ghò a ghə̀ nkiʼi ə̀ dyʉ̀ zen.
Yesò mò ngàyn kùmə̀ fəlàm
47Soʼ fòn Nyìngòŋ bè dìʼ tò nə̀ fəlàm a wìʼ mòʼò à mù ə tənkì tə shʉsə tə kwen tsu tò tətsèm, 48fə nè lwin, viʼi vyi a və ku shʉsə gùfə̀ shìsə̀ a bàm sə tetə̀ shʉsə jùŋəsə we a vəwenə nkyèsə, màʼà sə byɨsə. 49Kə lu ndiʼ tò a lì a kənsèsə̀ kə mbi. Ntsɨ̀ŋsə ngə̀ŋ Nyìngòŋ sə lu vì ə tetə̀ shìsə̀ viʼi və byɨvə fa ntìntìn viʼi kənyʉ̀ kə tɨməkə, 50ə mòʼ vəwenə a kəshi kə zhìʼ, vəwenə nlyuŋlyuŋ dì be pfiʼi asoŋ tsu.
Viʼi mo Yesò a Nazalèt
51Yesò gàʼ a lì ə̀ bèm à ndzɨ̀mtə̀sə bàm wen la, vəwenə zhʉ li kɨ nyʉ̀ avenə lo? Vəwenə byɨmə.
52Ghə̀ mù gàʼ à vəwenə la, “Ndìʼsə̀sə təsoʼ shì a sə ziʼì li ə̀ kɨ kənyʉ̀ kì a Sòʼ Fòyn Nyìngòŋ diʼ wenə ghə̀, dìʼ mu və se li tò nə̀ tì ngə̀ŋ yì a ghə̀ kiʼi ghoʼ wen à wen a kəntuʼ sə shìsə fo fivə nə̀ muvə fa tsu shyèʼè nə̀ wenəvə no tsèm.”
53Yesò ne mwètə̀ ngàynsə a sènsə ə̀ lù fa tsu, 54bwènə̀ pfwo a ntə̀ʼ yì a ghə̀ nkwi tsu sə zhʉsə ziʼi viʼi aloʼ ntsèntə̀sə vəwenə, vəwenə sə diʼ nə̀ kaynə ə̀ sə̀ bèmə̀ la, “Wìʼ ghèn lyɨ̀ nki tof ghenə bè nə̀ kədyòʼ kènkə fa fe?. 55Gaʼa kò ghə̀ diʼ tò no wàyn wìʼ yì a ghə̀ komə fo lə̀? Gaʼa kò zhiʼ lì wen diʼ Mèli, vəlèmə̀ və wen və lʉmə diʼ Jems, nə̀ Josèf nə̀ Simon bènə̀ Judàs? 56Gaʼa kò vəlèmə̀ və wen və ki tsi tò no a ntə̀ʼ a shə̀? Ghə̀ lè lyɨ̀ tof ghenə fa fe bènə̀ kədyòʼ sə nè nki nyʉ̀ venə a?” 57Vəwenə gàʼ a lì mù zìtə̀ sə bàynə̀ wen.
Yesò mù gàʼ à vəwenə la, “Və lu ngumlə̀ nshə̀ʼtə̀ Nyìngòŋ no fe əchò tò viʼi kəshi a ghə̀ fʉ fa tsu bènə̀ ngwaʼa ngə̀ŋ wen.” 58Yesò nko ne nyʉ̀ kaynə ghoʼvə a Nazalèt byìʼàndo viʼi vi nko kòŋ əbyɨmə.
Currently Selected:
Matìyò 13: bbkDBLnt
Highlight
Share
Copy
Want to have your highlights saved across all your devices? Sign up or sign in
