Matìyò 20
20
Yesò mò ngàyn byìʼì viʼi shwèʼ a sɨm
1Yesò dyʉ̀ a mbì nə̀ ziʼi wen gàʼà la, “Soʼo Fòyn Nyìngòŋ diʼ tò nə̀ fətitì fə tì sɨ̀m tsen a ghə̀ nlu a boʼòngə̀ŋ tsen fʉ̀ ədyʉ̀ kəŋ viʼi la və dyʉ̀ shwèʼ a wen ə sɨm. 2Ghə̀ kəŋ a lì yen, mù tisə wenə̀ vəwenə la ghə̀ ne lòʼ vəwenə tò nə̀ ko yi a və lu nlòʼò wù shwèʼ tsu a kətsi mù tɨ̀m vəwenə la vəwenə fʉ shwèʼ.” 3A sə ndiʼ a təzhʉ abʉ̀muʼ ghə̀ sə fʉ dyʉ̀ a chʉ fənsàm bè yèn viʼi vətsenvə və ti tsu tò kədyàŋ 4Ghə̀ gàʼ à vəwenə la, Ghə̀ŋ fʉ dyʉ̀ nshwèʼè à mò a sɨm ndi ne sə mpfwo mà lòʼ ghə̀ŋ no nə̀ ghò yì a ghə̀ kwʉʼʉ̀. 5Ghə̀ gàʼ a lì vəwenə fʉ̀. A nè sə ndiʼ a nə̀nchwì bènə̀ a təzhʉ tə taʼ a mbwaʼ kəbə̀ŋ ghə̀ bè nè tò ndə̀ŋndəŋ. 6A nè sə ndiʼ a təzhʉ tə tàyn a chʉ mpfwomə, ghə̀ bè fʉ̀ dyʉ̀ a chʉ fənsàm ayì ə̀ yèn viʼi vətsenvə və ti tsu tò kədyàŋ. Ghə̀ bèm à vəwenə la, Byìʼì ghò a ghə̀ŋ zhʉsə a shèn kətsi kə mpfen kò a ndiʼ la ghə̀ŋ shwèʼè kəfo a? 7Vəwenə gàʼ la,“A dìʼ byìʼàndo wìʼ ko yì lyɨ̀ yès a shwèʼ. Ghə̀ gàʼ à vəwenə la vəwenə fʉ shwèʼ a wen ə sɨm yì.”
8“A nè sə ndiʼ a zhʉ mpfwomə, tì sɨm ayì gàʼ à kətʉ kə viʼi shwèʼ kì la, ‘Dzàŋtə viʼi shwèʼ ə̀ lòʼ vəwenə, wù nè sə nlòʼò wù zìtə̀ fà vi a mà yì lyɨ̀ a bàm lì dyʉ̀ mèsə̀ nə̀ vi a mà yì lyɨ̀ a mbì lì.’ 9Ghə̀ lòʼ viʼi vi a vəwenə nzìtə̀ shwèʼ a chʉ mpfwomə lì nə̀ ko a və lòʼò shwèʼ tsu a kətsi. 10Viʼi vi a və nlyɨ̀ vəwenə a mbì lì sə kwòʼtə̀ la vəwenə a kiʼi ko ghə̀ ghoʼo chò ko shwèʼè kətsi. 11Və lòʼ vəwenə tò nə̀ ko kətsi, vəwenə mù sə dèmkə̀ ghàmə̀ tì sɨm ayì, 12‘gàʼà la, Viʼi venə a və yì vì fa bàm lə̀ shwèʼ tò a fəshinə fə zhʉ, wù nloʼ vəwenə ndə̀ŋndəŋ ando wu loʼo yes mu yès zhʉsə kətsi kə mpfen a tì chwìchwì ghèn tʉʼ njɨ.’”
13“Tì sɨm ayì gàʼ à wìʼ muʼ fà vəwenə a ntìntìn la, ‘zhʉtə a awèn! mà ko tsòŋ wù. Gàʼa kò yowù yì tisə la ma lòʼ wù tò nə̀ ko kətsi? 14Lyɨ ko wu ə̀ mpfwo. A kòŋ mò əlòʼ wìʼ yì a ma yì lyɨ̀ a bàm ndə̀ŋndəŋ ando mà lòʼ wù. 15Adìʼ la, mà ko kiʼ adyòʼ ənè kənyʉ̀ a ma kòŋə̀ ne nə̀ ko ghomə mu? Ma kɨ li la wù fwisə tin tò byìʼàndo kəvu komkə bòʼtə̀ à viʼi vətsèm.’”
16Yesò mù sə mwètə̀ ə̀ gàʼ la, “Nghoʼo viʼi a və diʼì a mbì luwèn lu ndiʼi bàm, ə̀ viʼi a və diʼì a bàm luwèn lu ndiʼ mbì.”
Yesò bè gàʼ byìʼì pfʉ wen
(Mak 10.32-34; Luk 18.31-34)
17Yesò nè sə nkuʼu a Jelusalèm lyɨ̀ ndzɨ̀mtə̀sə bàm wen shì njʉ̀sə̀ bò nyòʼtə gàʼ à vəwenə la, 18“Ghə̀ŋ zhʉtə a! vəghəŋ kuʼu dyʉ̀ a Jelusalèm luwèn. Adìʼ zhʉ a və a dyʉ̀ ku Wàyn Wìʼ à tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ la vəwenə chòsə̀ soʼ la və zhwi wen. 19Vəwenə ne gàʼ a lì lyɨ̀ wen ə ku tɨmə, vəwenə chəʼ wen, ghòm wen nə̀ ngwàynsə bè bàyntə wen a kəntò ə ghə̀ pfʉ. A nè sə ndiʼ a mətsi ntaʼ Nyìngòŋ lusə wen fa pfʉ.”
Lì Jems nə̀ Joyn bèm kənyʉ̀ à Yesò
(Mak 10.35-45)
20Wì Zebedì vì à Yesò nə̀ vunə wen vəbò, shìʼi à wen a nchiʼsə alwi ə̀ gàʼ à wen la ghə̀ ne kənyʉ̀ a yì.
21Yesò bèm à wen la, “Wù kəŋ la mà ne ghò à wù a?” Ghə̀ gàʼ la, “Mà sensə̀ wù la wù byɨmə la à lu ndiʼ a tʉʼ a wù sə̀ soʼo Fòyn wu, vunə vwomə venə vəbò lə̀ ŋwʉʼʉ a wù a mbyɨ̀, ghə̀ muʼ à wù a kwoŋ toghə nə̀ ghətsen à wù a kwoŋ nànkwè.”
22Yesò mù bwènsə̀ à vəwenə la, “Ghə̀ŋ ko kɨ̀ kənyʉ̀ a ghə̀ŋ gàʼà.” Bè mù bèm à vəwenə la, “Ghə̀ŋ lè zì ghə̀ŋ yen ngəʼ ghèn a mà diʼi ne yen lə a? Vəwenə byɨmə.”
23Yesò gàʼ à vəwenə la, “Nəmwèʼè, ghə̀ŋ a yen ngəʼ yì a mà diʼi ne yen alì à ko diʼ kəshi kom ə mà gàʼ la wìʼ ŋwʉʼʉ à mò a kwoŋ toghə kò à mò a kwoŋ nànkwè. Shi avenə diʼ à kiʼ viʼi vi a Tìʼ ghom tə shɨ̀tə̀ ə̀ nghʉ à vəwenə.”
24Ndzɨ̀mtə̀sə bàm wen sətsensə shì wum nè zhʉ̀ kənyʉ̀ akì ə̀ fwisə tin à vəlèmə̀ vi vəbò. 25Yesò mù tsèntə̀ vəwenə gàʼ à vəwenə la, “Ghə̀ŋ kɨ li la təfòyn tə mbi tèntə kiʼ kədyòʼ soʼo zhiʼtə viʼi vəwenə, tʉtʉ vəwenə be soʼo dìʼì adyòʼ à viʼi. 26Kə ko diʼ ne ndiʼ a lì à ghə̀ŋ. No məndò a ghə̀ kəŋə ndiʼ wu ghoʼo à ghə̀ŋ a ntìntìn, diʼì ndiʼ wù shyèʼ à ghə̀ŋ 27bènə̀ la no ndò yì a ghə̀ kəŋ əndiʼ kətʉ fà ghə̀ŋ a ntìntìn diʼ ndiʼ anə̀ kəkòs à ghə̀ŋ. 28Kə diʼ tò ndə̀ŋndəŋ ando Wàyn Wìʼ ko tə vì la və shwèʼ à wen. Ghə̀ tə bòŋsə̀ vì nshwèʼè à viʼi, ə ku sò kətʉ wen əzen tʉ viʼi no vəghoʼo.”
Yesò chʉʼ viʼi kənshɨ̀f vəbò
(Mak 10.46-52; Luk 18.35-43)
29Yesò wenə̀ ndzɨ̀mtə̀sə bàm wen nè lù sə mfʉ̀ fa Jèlikò viʼi no və ghoʼo lù sə̀ dyʉ̀ fà vəwenə a bàm. 30Vəwenə sə ndyʉ̀ yèn viʼi kənshɨ̀f vətsenvə vəbò ŋwʉʼ a wenə ji. Vəwenə nè zhʉ̀ la Yesò sə̀ chò, ə̀ zɨ̀mə gàʼ la, “Kusə nshinsə à yès a wàyn fòyn Devìt.”
31Viʼi vi sə̀ chìʼì vəwenə gàʼà la kə vəwenə be à zɨ̀mə, alì vəwenə bòŋsə̀ zɨ̀mə ghòʼtə la, “Bobo Wàyn fòyn Devìt, kusə nshinsə à yès.”
32Yesò tɨmə dzàŋtə̀ vəwenə ə̀ bèm à vəwenə la, “Ghə̀ŋ kəŋ la mà ne ghò à ghə̀ŋ a?”
33Vəwenə gàʼ la, “Bobo,ne yès nyenə shi.”
34Yesò kusə nshinsə à vəwenə kùmsə̀ ashɨ vəwenə, vəwenə mù sə̀ yenə shi, ə̀ lù sə̀ dzɨ̀mtə̀ dyʉ̀ nə̀ wen.
Currently Selected:
Matìyò 20: bbkDBLnt
Highlight
Share
Copy
Want to have your highlights saved across all your devices? Sign up or sign in
