Matìyò 21
21
Yesò kwen a Jelusalèm a nə̀ fòyn
(Mak 11.1-11; Luk 19.28-40; Jon 12.12-19)
1Ando Yesò wenə̀ ndzɨ̀mtə̀sə bàm wen njèʼè dyʉ̀ boʼsə a Jelusalèm, ə̀ dyʉ̀ a ntə̀ʼ Bephag a ghə̀ ndiʼì a shə wenə pfèn olìf tsenghə. Ghə̀ mù tɨm ndzɨ̀mtə̀sə bàm wen səbò 2gàʼà à vəwenə la, “Ghə̀ŋ kwen dyʉ̀ a tì ntə̀ʼ ghèn a ghə̀ŋ a shɨ. Ghə̀ŋ ne sə nkwenə dyʉ̀ ə yen fəmbyèʼè fo a və chuŋə̀ nə̀ wàyn wen à wen a mbyɨ̀. Ghə̀ŋ nè yen ghə̀ŋ zàsə vì nə̀ wen à mò boʼsə nə̀ wàyn wen. 3Ghə̀ŋ sətsèn nzàsə̀ wìʼ bèm kənyʉ̀ à ghə̀ŋ, ghə̀ŋ gàʼa la, Bobo kiʼ kənyʉ̀ ənè nə̀ səwensə diʼ be a bwènsə̀ tɨm tò luwèn.”
4Kənyʉ̀ a kènkə nlyɨ kəshi ndi ne la kənyʉ̀ a Nyìngòŋ nlù gàʼ chòsə̀ fà nshə̀ʼtə̀ wen ghoʼo ndiʼ nəmwèʼè la, 5“Gaʼa viʼi ntə̀ʼ Zayòn la, ghə̀ŋ yen a, fòyn ghə̀ŋ vì à ghə̀ŋ, ghə̀ bwaʼmə, vì a kwi wàyn fəmbyèʼè fo.”
6Ndzɨ̀mtə̀sə bàm wen ashì mù lù dyʉ̀ nè ando ghə̀ yì gàʼ, 7bwènə̀ vì nə̀ fəmbyèʼè fo a fì bènə̀ wàyn wen ə̀ làfsə vəwenə nə̀ vədàlə və vəwenə, Yesò kuʼ ŋwʉʼʉ à yì a kətʉ. 8Viʼi no ghoʼo tsuʼtə vədàlə və vəwenə mòʼ a ji ghə̀ chò fà yì a kətʉ. Vətsenvə kwàʼtə̀ təntam tə nkòʼ mòʼ a ji. 9Nòyn viʼi vi a ghə̀ ndyʉ̀ fa shɨ Yesò nə̀ yi a ghə̀ mvì fà wen a bàm zìtə̀ sə̀ zɨmə gàʼà la, “Ghoʼsə dìʼ à wàyn fòyn Devìt! Nyìngòŋ bwaʼsə wìʼ yì a ghə̀ vi a zhiʼ nə̀ Bobo! Ghoʼsə diʼ à Nyìngòŋ a ghə̀ diʼ a kàŋ.”
10Yesò nè kwen mwètə̀ a Jelusalèm, ntə̀ʼ a yì nə̀ʼkə̀ no tsèm. Viʼi mù sə̀ bèmə̀ la, “Ghèn dìʼ ndo?”
11Viʼi vi bwènsə̀ la, “A dìʼ Yesò nshə̀ʼtə̀ ghoʼo yì a ghə̀ lù fa ntə̀ʼ Nazalèt a loʼ Galìlì.”
Yesò dzɨ̀m viʼi mbaʼlə̀ wòŋ fa tì ngə̀ŋ Nyìngòŋ
(Mak 11.15-19; Luk 19.45-48; Jon 2.13-22)
12Yesò dyʉ̀ kwen a tì ngə̀ŋ Nyìngòŋ ghoʼo sə̀ dzɨ̀mə̀ viʼi vyi a və mbaʼlə̀ be zenə tsu no vətsèm. Ghə̀ tenlə chiʼ vi a viʼi nkwitə ko à yì a yi kətʉ be tenlə kɨ a viʼi mbaʼlə̀ làto tsu mòʼlə̀ a nse, 13gàʼà à viʼi a vyi la, “Və nyòʼò li a ŋwàʼlə̀ Nyìngòŋ la, viʼi lu dzàŋ ngə̀ŋ ghom la à dìʼ ngə̀ŋ jɨ̀m, alì ghə̀ŋ nkaʼsə luwèn à sə diʼ kəshi a vətsoŋ lyòmtə̀ tsu.”
14Viʼi kənshɨ̀f wenə̀ viʼi kənkwàʼkə̀ vì yèn wen tsu ghə̀ chʉʼ vəwenə. 15Tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ sə̀ fwisə̀ tin ando vəwenə nyèn nyʉ̀ kanəvə vi a ghə̀ nè bè zhʉ̀ ando vunə nzɨmə gàʼà tsu la, “Ghoʼsə diʼ à wàyn fòyn Devìt.” 16Vəwenə mù bèm à Yesò la, “Wu lə̀ zhʉ kənyʉ̀ kèn a vunə venə gàʼà lə a?” Yesò byɨmə ə̀ bwènsə̀ gàʼ à vəwenə la və nyoʼ li a ŋwàʼlə̀ Nyìngòŋ la, “Nyìngòŋ shɨ̀tə̀ li təchʉ̀ tə vunə vəbwaʼvə a və bu nyoŋə la və nghoʼsə wen. Ghə̀ŋ be ko təmə dzàŋ kəshi akì.”
17Yesò gàʼ a lì lù fa tsu fʉ̀ fa Jelusalèm dyʉ̀ tsì a ntə̀ʼ Betanì.
Yesò ghʉ kòyn à fəkòʼ fə figs
(Mak 11.12-14, 20-24)
18Tʉʼ nè layn, Yesò lù tò boʼòngə̀ŋ sə mbwènə̀ dyʉ̀ a Jelusalèm jɨ̀ŋ sə̀ zafə wen. 19Ghə̀ yen fəkòʼ fə figs a wenə ji, kwen dyʉ̀ à yì a ti alì kò ghə̀ lù yèn kəfo à yì a kətʉ əchò tò təfʉ ti. Ghə̀ mù gàʼ à fəkòʼ a fìfə la, “Wù ko lu be kumə ashɨ!” No a zhʉ kò fəkòʼ a fìfə zɨm.
20Ndzɨ̀mtə̀sə bàm wen nè yèn kənyʉ̀ a kènkə sə̀ diʼ nə̀ kaynə, mù bèm à Yesò la,“Fəkòʼ fènfə nè ale nzɨm tò fa zhʉ alə̀ a?”
21Yesò bwènsə̀ gàʼ à vəwenə la, “Mà gàʼà à ghə̀ŋ nəmwèʼè la, ghə̀ŋ sətsèn nkiʼ byɨmə, kye momə̀ mwòmsə mu ghə̀ŋ zì ghə̀ŋ ne kənyʉ̀ kèn a ma ə ne à fəkòʼ fènfə lə̀, bè gàʼ no tè à pfèn ghoʼo ghèn la, Tsuʼmə dyʉ̀ tsòʼ à mù mə nghoʼomə̀, ghə̀ be à nè tò a lì. 22Ghə̀ŋ sətsèn njɨ̀mə̀ bèmə̀ no ghò à Nyìngòŋ ghə̀ à kù à ghə̀ŋ a zhʉ a ghə̀ŋ kiʼi byɨmə.”
Tʉtʉ ntsèntə̀ Vəjew sə kəŋə əkɨ la kədyòʼ kə Yesò kə lù fa fe lo
(Mak 11.27-33; Luk 20.1-8)
23Yesò bwènə̀ dyʉ̀ kwen a ngə̀ŋ Nyìngòŋ mù sə nziʼi viʼi tsu, tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ vì bèm à wen la, “Wù nè nyʉ̀ venə nə̀ kədyòʼ kə mu kə lù fa fe? A ku ndò ku kədyòʼ a kènkə à wù a?”
24Yesò bwènsə̀ gàʼ à vəwenə la, “Nkàyntə̀ mò be a bèm kənyʉ̀ kə mùʼ à ghə̀ŋ, ghə̀ŋ sətsèn bwènsə̀, mà mu à shə̀ʼtə̀ wìʼ yì a ghə̀ŋ a ghə̀ ku kədyòʼ la mà nè nyʉ̀ venə tsu. 25Joyn wù ku à mù nlyɨ̀ kədyòʼ fa fe əku mu a? A nku Nyìngòŋ ku kədyòʼ à wen mu à nku viʼi lo? Vəwenə zìtə̀ sə̀ bèsə̀ à vəwenə a ntìntìn gàʼà la ‘Vəghəŋ sətsèn gàʼ la à nku Nyìngòŋ ku kədyòʼ à wen ghə̀ à bèm la ghə̀ŋ be tə mfaŋ ke byɨmə kənyʉ̀ a ghə̀ ngàʼà byìʼì ghò?’ 26Vəghəŋ sətsèn gàʼ la à nkù viʼi kù kədyòʼ à wen mu viʼi zì və mwom kənyʉ̀ à vəghəŋ a təwen byìʼàndo no vəwenə vətsèm ə̀ nlyɨ̀ la Joyn ndiʼ nshə̀ʼtə̀ ghoʼo.” 27Vəwenə kwòʼtə̀ a lì mù gàʼ à Yesò la, “Yès ko kɨ.” Yesò mù gàʼ à vəwenə la, “No nkàntə̀ mò li ko a shə̀ʼtə̀ kəshi kì a ma lyɨ̀ kədyòʼ fa tsu bu sə nè nyʉ̀ venə.”
Ngàyn kùmə̀ wìʼ wenə̀ vunə wen vəbò
28Yesò bè gàʼ à viʼi a vyi la vəwenə kwoʼtə kənyʉ̀ kùmə̀ ngàyn a ghə̀ nkəŋə mò mù gàʼ la, “Wutsen ndìʼ kiʼ vunə lʉmə wen vəbò. Ghə̀ dyʉ̀ gàʼ à wù mbì la, Fʉ̀ shwèʼ a sɨm lamsə̀ layn a wàyn ghom.” 29Wàyn ayì gàʼ la, “Mà ko a fʉ̀, alì nè bwènsə̀ kwòʼtə̀ to fa wen a ngəŋ la kə bòŋ la yì fʉ ə mù fʉ̀. 30Tìʼ wen bè dyʉ̀ à kənkùmtə̀ kə wàyn wen ə̀ gàʼ tò ndə̀ŋndəŋ kənyʉ̀ a ghə̀ yì gàʼ à wù mbì. Ghə̀ zàŋsə̀ byɨmə alì kènla ghə̀ fʉ li.” 31Yesò mù bèm à vəwenə la, “A lè ne wàyn ko fa ntìntìn vunə vi vəbò nè kənyʉ̀ kì a tìʼ vəwenə nkəŋə a? Vəwenə bwènsə̀ la. ‘A ne wù mbì.’ Yesò mù gàʼ la, ‘Mà gàʼà a ghə̀ŋ’ nəmwèʼè la, viʼi vyi a və tinə kənsè bènə̀ njèʼtə̀sə lu kwen a soʼ Fòyn Nyìngòŋ à ghə̀ŋ a mbì.” 32Mà gàʼà alə̀ byìʼàndo Joyn wù ku à mù mvi li sə̀ dìʼì jì ntsìnə̀ tɨmə a ghə̀ŋ la ghə̀ŋ njèʼè fa tsu a shɨ Nyìngòŋ, alì kò ghə̀ŋ lù byɨmə wen. Viʼi vi a və tinə kənsè bènə̀ njèʼtə̀sə bòŋsə̀ byɨmə wen. Ghə̀ŋ yen nyʉ̀ venə no tsèm bè tyen tò tyenə la ghə̀ŋ ko a kwitə tətyɨm təŋtə byɨmə kənyʉ̀ kì a ghə̀ ngàʼà.
Yesò mò ngàyn kùmə̀ viʼi a və nshyèʼè a sɨm wutsen
(Mak 12.1-12; Luk 20.9-19)
33Yesò bè gàʼ à viʼi vi la vəwenə bè zhʉ̀tə ngàyn tsen. “Tì sɨ̀m tsen nlù bòʼ sɨm lamsə̀ lwi wen, kwìʼi mbàyn kaʼsə wen sɨm ayi, tyùŋə nkwòŋ yì a və ne nwìʼì lamsə̀ ayì tsu mu shɨ̀tə məlyʉ̀ʼ bè bwòm kəmbaŋ kə ngə̀ŋ ntsɨ̀ŋ a kəntìntìn kə sɨm ayì mù kù sɨm ayi la viʼi nshwèʼè gə̀tə̀ ku yì nə̀ fo vi a və fʉ̀ fa tsu. Ghə̀ ku a lì lù dyʉ̀ a jèʼ a loʼ tsenghə. 34Zhʉ məkwòŋ nè kwʉ̀ʼ ghə̀ tɨm viʼi shwèʼ wen vətsenvə la və dyʉ̀ gàʼ à viʼi vi a ghə̀ tə ku sɨm ayi à vəwenə la vəwenə ku və wen vəlamsə̀. 35Viʼi a və nshwèʼè sɨm ayi ghaʼ viʼi shwèʼ tì sɨm vi a ghə̀ yì tɨm lì ghòm ghə̀ mùʼ, ə̀ zhwì kənkùmtə̀ kə wen be temlə ghətsen nə̀ ngùʼsə. 36Tì sɨ̀m ayì bè tɨ̀m viʼi shwèʼ vətsenvə və ghoʼo chò vi a ghə̀ yì tɨ̀m a mbì lì. Viʼi sɨm vi bè nè tò ndə̀ŋndəŋ kənyʉ̀ a və yì nè a və mbì vi à vəwenə. 37A kəmwetə ghə̀ tɨm wàyn wen à vəwenə kwòʼtə̀ fà wen ngə̀ŋ la vəwenə ne dyʉ̀ fàyn wàyn ghom. 38Viʼi shwèʼè sɨ̀m a vyi nè dyʉ̀ yen wàyn yì tò yenə, kwòʼtə̀ à vəwenə ngəŋsə la, Ghèn dìʼi ne ndiʼ njɨ̀ngə̀ŋ tì sɨ̀m ghèn. Vəghəŋ ghaʼ wen zhwi ndi lyɨ fo vi a ghə̀ tə ndiʼ ne lyɨ̀ lì. 39Vəwenə gàʼ a lì mù ghaʼ wen fʉ̀ nə̀ wen fa sɨm ayì dyʉ̀ zhwi.”
40Yesò mù bèm à vəwenə la, “kə lè yì chò alə̀ tì sɨ̀m a ghèn à bwènə̀ vì nè ale nə̀ viʼi vi a ghə̀ tə kù sɨm la vəwenə nshwèʼè lì?”
41Vəwenə bwènsə̀ à wen la, “Kə sətsèn chò a lì, tì sɨ̀m ayì a zhwilə viʼi və byɨvə avenə, ə̀ kù sɨm ayi à viʼi kədyàŋ vəwenə nshwèʼè ku və wen fo tò a zhʉ.”
42Yesò bwènsə̀ gàʼ à vəwenə la, Ŋwàʼlə̀ Nyìngòŋ ə gàʼ à la,
Ngùʼ yì a viʼi shwèʼ tə màʼà lì kaʼsə li sə diʼ ngùʼ bʉ ngə̀ŋ. A dìʼ shwèʼè Bobo alə̀, à diʼ kənyʉ̀ kə mesəkə à vəghəŋ?
43Ghə̀ŋ be ko təmə̀ ndzàŋ kəshi akènkə? Byìʼì ntsìnə̀ ghə̀ŋ aghèn, “Mà gàʼà a ghə̀ŋ la və lu shi soʼ Fòyn Nyìngòŋ fa ghə̀ŋ, ə ku a viʼi vyi a və kumə ashɨ. 44[No ndò a ghə̀ kòntə a wèn ngùʼ bʉ ngə̀ŋ aghèn, ghə̀ à fə̀ŋ tìnkə a ntemə a ntemə, mu ngùʼ aghèn bè sətsèn fə̀ŋ a kətʉ no ndò ghə̀ à bvusə̀ wen a kəbyìʼ”]
45Tʉtʉ vəpfèm və ngə̀ŋ Nyìngòŋ vi bènə̀ viʼi Falàsi vi nè zhʉ̀ ngàynsə Yesò a sènsə kɨ̀ tò kɨ la ghə̀ gàʼà byìʼì vəwenə, 46vəwenə mù sə̀ kəŋə jì əghaʼ wen alì sə fàynə̀ nòyn viʼi yì a ghə̀ ndiʼì tsu byìʼàndo nòyn ayi nlyɨ̀ wen anə̀ nshə̀ʼtə̀ ghoʼo.
Currently Selected:
Matìyò 21: bbkDBLnt
Highlight
Share
Copy
Want to have your highlights saved across all your devices? Sign up or sign in
