Matìyò 26
26
Və Baʼtə Əzhwi Yesò
(Mak 14.1-2; Luk 22.1-2; Jon 11.45-53)
1Andìʼ a zhʉ a Yesò nziʼi li nyʉ̀ venə no tsèm, ghə̀ gàʼ à ndzɨ̀mtə̀sə bàm wen la, 2“Ghə̀ŋ kɨ la à fàŋ tò mətsì mbò luwèn və zìtə̀ əzhɨ kətsi kə məzaʼsə̀. A dìʼ zhʉ a və ne ghaʼ Wàyn Wìʼ ku və bantə wen a kəntò.”
3Tò a zhʉ ayì tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ ghaʼ ntsèntə̀ vəwenə a kəbəŋ ə̀ kətʉ kə tʉtʉ vəpfèm və ngə̀ŋ Nyìngòŋ a və ndzàŋə̀ wen nə̀ Kayifàs, 4ndi shɨ̀tə ji nyoʼtə ghaʼ Yesò əzhwi. 5Vəwenə gàʼ à vəwenə a ntìntìn la,“Kə vəghəŋ à ghaʼ wen a məzaʼsə̀ ghèn byìʼì ko viʼi à lùsə soyn.”
Wùwì tsen shʉ̀ʼtə̀ mənzhiʼ a kətʉ Yesò a Betanì
(Mak 14.3-9; Jon 12.1-8)
6Yesò dyʉ̀ a Betanì sə diʼ a ngə̀ŋ wìʼ tsen a ghə̀ nkwaʼa nə̀ kənsòtə̀ kə a zhiʼ wen ə̀ ndìʼ Simon. 7Wùwì tsen vì kwen tsu nə̀ fəshoʼ fə a və nshɨ̀tə̀ nə̀ ngùʼ tsen a və ndzàŋə̀ nə̀ alàbàstà. Mənzhiʼ mə lèmtə mə̀ diʼ tsu a ko yi nto no nànto. Ghə̀ lyɨ̀ fəshoʼ a fì ə̀ shʉ̀ʼtə̀ a kətʉ Yesò ghə̀ ŋwʉʼ zhɨ zhɨ. 8Ndzɨ̀mtə̀sə bàm Yesò sə yen a lì kənyʉ̀ ki kə zafə vəwenə, vəwenə mù bèm la, byìʼì ghò a ghə̀ byɨsə mənzhiʼ mèn mə alə a? 9Və yì zì və baʼlə mənzhiʼ menmə no a ko ghoʼ ghə̀ ə̀ ku ko yi à viʼi kənfem.
10Yesò kɨ kənyʉ̀ a vəwenə nkwòʼtə̀ mù gàʼ à vəwenə la, “Ghə̀ŋ ku ngəʼ ghò à wùwì ghèn a?” A dìʼ no kənyʉ̀ kə jùŋkə a ghə̀ ne à mò. 11Viʼi kənfem lu ndiʼ tò diʼi à ghə̀ŋ a ntìntìn alì mà ko diʼ ne faŋ vəghəŋ. 12Ghə̀ shʉ̀ʼtə̀ mənzhiʼ mèn à mò wèn ndi shɨ̀tə mo a məbvɨ̀mə̀. 13Mà gàʼà à ghə̀ŋ nəmwèʼè la no fe a və lu nshə̀ʼtə̀ ntɨm jùŋ a ti mbi, və lu be nshə̀ʼtə̀ kənyʉ̀ kèn a wùwì ghèn ne lə̀ ndi viʼi nkwòʼtə̀ wen.
Judàs byɨmə əbaʼlə Yesò
(Mak 14.10-11; Luk 22.3-6)
14Wìʼ muʼ fa ntìntìn ndzɨ̀mtə̀sə bàm Yesò shì njʉ̀sə̀ bò a və ndzàŋə̀ nə̀ Judàs Iskalìyòt lù dyʉ̀ yèn tʉtʉ vəpfèm və ngə̀ŋ Nyìngòŋ, 15ə̀ bèm à vəwenə la, “Mà lè sətsèn gyàmtə̀ ghə̀ŋ əkù Yesò à ghə̀ŋ, ghə̀ŋ à kù gho à mò a?” Vəwenə taŋtə ko kəkas məwum ntaʼ ə̀ kù à wen. 16Judàs mù zìtə̀ tò a zhʉ ayì sə kəŋə jisə əbaʼlə Yesò.
Yesò zhɨ fozhɨvə məzaʼsə̀ wenə̀ ndzɨ̀mtə̀sə bàm wen
(Mak 14.12-21; Luk 22.7-13, 21-23; Jon 13.21-30)
17A sə ndiʼ a mbì kətsi a mətsi yì a və ndiʼ zhɨ kəbayn kə məka kè nə̀ fəshɨŋfə tsu ndzɨ̀mtə̀sə bàm Yesò sə vì bèm à wen la, “Wù kəŋ la yès dyʉ̀ shɨ̀tə̀ fozhɨvə kəzhɨ kə məzaʼsə̀ fe à wù a?”
18Ghə̀ bwènsə̀ à vəwenə la, “Ghə̀ŋ kwen dyʉ̀ a tì ntə̀ʼ à wutsen ə̀ gàʼ à wen la, ‘Ndìʼsə̀ gàʼ la zhʉ yi kwʉʼʉ li, ə wenə ndzɨ̀mtə̀sə bàm yì sə a zhɨ kətsi kə məzaʼsə̀ kèn à wù a ngə̀ŋ.’”
19Ndzɨ̀mtə̀sə bàm Yesò shìsə nè ando ghə̀ ngàʼà, kwen dyʉ̀ a tì ntə̀ʼ ə̀ shɨ̀tə̀ fozhɨvə məzaʼsə̀ vi tsu.
20A sə ndiʼ a kəlyɨŋ kə mpfwomə, Yesò wenə̀ ndzɨ̀mtə̀sə bàm wen shì njʉ̀sə̀ bò ŋwʉʼʉ əzhɨ, 21Və sə nzhɨ ghə̀ gàʼ à vəwenə la, “Mà gàʼà à ghə̀ŋ nəmwèʼè la wìʼ muʼ fà ghə̀ŋ a ntìntìn diʼi ne baʼlə mo.”
22Kənyʉ̀ akì sə ku ngəʼ à ndzɨ̀mtə̀sə bàm wen no nànto vəwenə mù zìtə̀ sə bèmə̀ à wen tò mùʼ mùʼ la, “Bobo, à bè diʼ mo?”
23Ghə̀ gàʼ la, “A dìʼ wìʼ yì a kəvu kə yo wen kə bumtə li a kəkaŋ a ghə̀ a baʼlə mo. 24Wàyn wìʼ ne pfʉ ando və ə̀ nyòʼò li a ŋwàʼlə̀ Nyìngòŋ. Alì ngəʼ ghoʼo ne ndiʼ à wìʼ yì a ghə̀ baʼlə wen! kə mbòŋsə̀ ə̀ nzì kə mbòŋtə̀ a zhʉ a və nko bwì wìʼ ayì no nə̀ mpfen.” 25Tè Judàs yì a ghə̀ ndiʼi ne baʼlə wen bè gàʼ la, “Ndìʼsə̀, à dìʼ mo mu?” Yesò bwènsə̀ la, “Kə diʼ ando wu gaʼà.”
Yesò zhɨ kənsèsə̀ kə kəzhɨ wen wenə̀ ndzɨ̀mtə̀sə bàm wen
(Mak 14.22-26; Luk 22.14-20; 1Ko 11.23-25)
26Vəwenə sə mbu zhɨ Yesò lyɨ̀ kəbayn kə məka ə̀ kù kəzòŋ à Nyìngòŋ mù bwəʼ ə̀ kù à ndzɨ̀mtə̀sə bàm wen gàʼà la, “Ghə̀ŋ ghaʼ ə̀ zhɨ. Ghenə diʼ wen ə ghomə.”
27Ghə̀ bè lyɨ̀ ndoŋ məlyʉ̀ʼ ə̀ kù kəzòŋ a Nyìngòŋ mù gàʼ la, “Ghə̀ŋ ghaʼ ə̀ nyʉ̀ no ghə̀ŋ vətsèm. 28A dìʼ mənlyuŋ mwomə̀ a mə chiʼtə̀ məkàyn mə Nyìngòŋ a ma shʉ̀ʼ ndi Nyìngòŋ maʼa mbyɨsə viʼi. 29Mà gàʼà à ghə̀ŋ la mà ko lu be nyʉ məlyʉ̀ʼ mèn əzaʼa fa tʉʼ a mà lu nyʉ məlyʉ̀ʼ məmfimə̀ vəghəŋ a kəshi kə fòyn Tìʼ ghom.”
30Vəwenə zhɨ mwètə̀ zhɨmə ndzàŋ mù fʉ̀ kùʼ a kwi pfèn Olìf.
Yesò shə̀ʼtə̀ la Bità ne mo yi
(Mak 14.27-31; Luk 22.31-34; Jon 13.36-38)
31Yesò mù gàʼ à ndzɨ̀mtə̀sə bàm wen la, “A ne ndiʼ nəntʉʼʉ lan no ghə̀ŋ vətsèm nyɨŋkə ə̀ kyè mo ando və diʼ mu və ə̀ nyòʼò li a tì ŋwàʼlə̀ Nyìngòŋ la, ‘Mà ne zhwi ntsɨ̀ŋ byisə ə byisə saykə.’ 32A ne ndiʼ a zhʉ a və lusə̀ mo fa pfʉ mà dyʉ̀ a Galìlì à ghə̀ŋ a mbì.”
33Bità gàʼ la, “Və ne sə nyɨŋ wù no vətsèm kò ma lə̀ nyɨŋə fa tsu.”
34Yesò bwènsə̀ gàʼ à wen la “nkə̀ʼ ne sə toŋ nəntʉʼʉ lan mu wù tyen li mò aghayn à taʼ.”
35Bità bè gàʼ à wen la, “A dìʼ tè pfʉ mà à pfʉ yowù. Ma ko lə mo wù.” Ndzɨ̀mtə̀sə bàm wen no sətsèm sə bè gàʼ tò ndə̀ŋndəŋ.
Yesò jɨ̀m a sɨm Gethsèmane
(Mak 14.32-42; Luk 22.39-46)
36Yesò mù lù wenə̀ ndzɨ̀mtə̀sə bàm wen ə̀ dyʉ̀ zaʼa a kəshi kətsenkə a və ndzàŋə̀ nə̀ Gethsèmane a wenə pfen olìf ə̀ gàʼ à vəwenə tsu la, “Ghə̀ŋ ŋwʉʼʉ a shèn mà dyʉ̀ jɨ̀m a fàʼà.” 37Ghə̀ gàʼ a lì sə ndyʉ̀ lyɨ̀ Bità wenə̀ vunə Zebedì vəbò; nyʉ zìtə̀ sə ku ngəʼ à wen, ghə̀ be zìtə̀ sə kwòʼtə̀ no nànto. 38Ghə̀ mù gàʼà vəwenə la, “Nyʉ̀ tsenəvə ku ngəʼ à mò à kwòʼtə̀ no nànto mu və zì və zhwi mo. Ghə̀ŋ ŋwʉʼʉ to a shèn mbvʉ̀tə̀ mà vi.”
39Ghə̀ kwentə dyʉ̀tə̀ a mbì nyòŋmə̀ dyʉ̀ a nse apfʉ̀ʼapfʉʼ mù sə̀ jɨ̀mə̀ gàʼà la, “Tìʼ ghom, jì sətsèn ndiʼ wu shi ndoŋ ngəʼ ghèn fà mò alì ne tò kənyʉ̀ a kə kwʉʼʉ̀ à wù kə a nè kənyʉ̀ a kòŋə̀ mò.”
40Ghə̀ nè jɨ̀m mwètə̀ sə bwènə̀ vì ə̀ yèn mu ndzɨ̀mtə̀sə bàm wen shì sətaʼ sə beynkə li. Ghə̀ bèm à Bità la,“Ghə̀ŋ yì zì kò ghə̀ŋ lù bvʉ̀tə̀ vəghəŋ tò a fəshitə̀ fə zhʉ? 41Ghə̀ŋ ntsi kə̀ʼə̀ be jɨ̀mə̀ ndi la kə mwòmsə̀ à vì à ghə̀ŋ. Mà kɨ la tətyɨm təŋtə kòŋə̀ ənè kənyʉ̀ a mà gàʼà alì təwen təŋtə bwaʼa.”
42Yesò bè bwènə̀ dyʉ̀ sə̀ jɨ̀mə̀ gàʼà la,“Tìʼ ghom a zhʉ a wù ko a shi ndoŋ ngəʼ ghèn fà mò chò la mà nyʉ, wu ə ne ando wù kòŋə̀.” 43Ghə̀ jɨ̀m mè bè sə bwènə̀ vì bè yèn vəwenə və bu bʉnə̀ tò bʉ̀nə byìʼàndo mbəynsə nsù dìʼ à vəwenə a ashɨ.
44Yesò bè bwènə̀ dyʉ̀ əjɨ̀m à ndiʼ aghayn à taʼ gàʼà tò nyʉ̀ vyi a ghə̀ yi ngàʼà a mbì. 45Ghə̀ nè jɨ̀m mwètə̀ bwènə̀ dyʉ̀ bèm à vəwenə la, “Ghə̀ŋ bù bʉnə̀ tò bʉnə zhʉ̀tə̀. Ghə̀ŋ yen a, zhʉ kwʉʼʉ̀ li və sə kəŋə ku Wàyn Wìʼ à viʼi və byɨvə. 46Ghə̀ŋ lu vəghəŋ ndyʉ̀. Ghə̀ŋ yen a, wìʼ yì a ghə̀ baʼlə̀ mò sə vì.”
Və ghaʼ Yesò
(Mak 14.43-50; Luk 22.47-53; Jon 18.3-12)
47Yesò mbu gàʼà, Judàs a ndiʼì wìʼ muʼ fa ntìntìn ndzɨ̀mtə̀sə bàm wen shì njʉ̀sə̀ səbò kuʼu vì wenə̀ nòyn ə viʼi no ghoʼo. Vəwenə nkiʼ nyisə nə̀ mbàŋsə. A ntɨ̀m tʉtʉ vəpfèm və ngə̀ŋ Nyìngòŋ bènə̀ vəchəʼ və loʼ tɨ̀m vəwenə. 48Vəwenə nsə mvì a lì mu wìʼ a ghə̀ mbaʼlə̀ Yesò ku li nchwi à vəwenə gàʼà la, “Mà nè bwamtə no ndò ghə̀ŋ kɨ̀ la àdìʼ wìʼ yì a ghə̀ŋ kəŋə, ghə̀ŋ ghaʼ wen.”
49Judàs ne vì no a zhʉ kò ə̀ dyʉ̀ tò fəchìʼ à Yesò gàʼà la, “Mà toŋtə̀ a ndìʼsə̀.” No a zhʉ kò ə̀ bwamtə wen tò bwamtə.
50Yesò bwènsə̀ gàʼ à wen la, “Ne tò kənyʉ̀ kì a wù yì vì ənè a awèn ndòŋ.” No a zhʉ kò viʼi a vyi mù vì ghaʼa wen tò ghaʼa. 51Ndzɨ̀mtə̀ bàm ə Yesò tsen tsuʼ nyì wen ə̀ koʼ tin kətiʼitiʼi kə wù shwèʼ kətʉ kə Tʉtʉ vəpfèm və ngə̀ŋ Nyìngòŋ. 52Yesò gàʼ à wen la, “Bwènsə̀ wè nyi wù à yì a kwʉ. No ndò a ghə̀ soynə nə̀ nyi lu pfʉ tò nə̀ nyì. 53Ghə̀ŋ ko kɨ̀ la à tu yi ndiʼ soyn mu mà zì mà sensə Tìʼ ghom ghə̀ ku ntsɨ̀ŋsə ngə̀ŋ wen nkamsə no sə ghoʼo la sə soyn à mò. 54Mà sətsèn mù nè a lì mu kənyʉ̀ kì a və ə̀ nyòʼò li a ŋwàʼlə̀ Nyìngòŋ byìʼì mò ko a lyɨ kəshi.”
55Yesò mù gàʼ à nòyn yi la, “Ghə̀ŋ fʉ sə vì nə̀ nyisə bènə̀ mbàŋsə əvì ghaʼ mo sə mà dìʼ tsoŋ ale? Gaʼa kò mà tə nzhʉsə̀ tò vəghəŋ à tì ngə̀ŋ Nyìngòŋ ghoʼo dìʼsə̀ kò ghə̀ŋ lu nghaʼa mò byìʼì ghò? 56Nyʉ̀ venə diʼi fʉ̀ alə̀ ndi nè la nyʉ̀ vyi a Nyìngòŋ ngaʼà chòsə̀ fà nshə̀ʼtə̀sə wen la və lyɨ kəshi.” No a zhʉ̀ kò ndzɨ̀mtə̀sə bàm wen sə nyɨŋkə no sə tsèm mòʼtə̀ wen.
Yesò tɨmə a kəbòʼ kə nsoʼ
(Mak 14.53-65; Luk 22.54-55, 63-71; Jon 18.13-14, 19-24)
57Viʼi vi a və nghaʼa Yesò lì lyɨ̀ wen ə̀ dyʉ̀ nə̀ wen a kəbəŋ ə̀ Kayifàs a ndiʼì kətʉ kə Tʉtʉ vəpfèm və ngə̀ŋ Nyìngòŋ. Andìʼ a lì mu ndìʼsə̀sə təsoʼ bènə̀ vəchəʼ və loʼ tsentə̀ li tsu. 58Və sə ndyʉ̀ Bità sə dzɨ̀mtə̀ dyʉ̀ nə̀ vəwenə fa kəghaf, dyʉ̀ kwèn a kəbəŋ ayì ə̀ ŋwʉʼʉ wenə ntsɨ̀ŋsə shì a sə nshwèʼè a kəbəŋ a yì ndi əyen kənyʉ̀ a kə a chò nə̀ Yesò. 59Tʉtʉ vəpfèm və ngə̀ŋ Nyìngòŋ bènə̀ ntsèntə̀ viʼi nsoʼsə ayì no tsèm mù sə kəŋə viʼi la və vi gàʼ nyʉ ndzɨ̀ŋsə byìʼì Yesò ndi və zhwi wen, 60alì kò vəwenə lù yèn no kənyʉ̀ kə mùʼ. Viʼi mfʉ̀ no və ghoʼo və mù sə zhò ndzɨ̀ŋsə alì kò sə lə̀ nghaʼa mu. Viʼi vətsenvə vəbò nè kaʼà fʉ̀ 61mù gàʼ la, “Wìʼ ghèn tə̀ gàʼ la yì zì yì bətə ngə̀ŋ Nyìngòŋ ə̀ bwènsə̀ bwòm tò a mətsi ntaʼ.”
62Kətʉ kə Tʉtʉ vəpfèm və ngə̀ŋ Nyìngòŋ lù bèm à Yesò la, “Wù bè ko gàʼà? Wù ko kiʼ kənyʉ̀ əgàʼ kùmə̀ nyʉ̀ venə a və ghàmə̀ wù tsu lə̀?” 63Yesò chiʼ tò la a kùʼ, kətʉ akì mù gàʼ à wen la, “Mà gaʼà à wù la wù gàʼ tò nəmwèʼè a zhiʼ Nyìngòŋ a ghə̀ faŋə̀ tò ghàyn mùʼ. Shə̀ʼtə à yès la wù dìʼ Wìʼ yì a Nyìngòŋ ntsuʼ li ə̀ ghʉ ə wàyn Nyìngòŋ yì mu lo?”
64Yesò gàʼ la, “Kə diʼ ando wu gaʼà. Alì mà gàʼà à ghə̀ŋ vətsèm la əlù fa luwèn ghə̀ŋ a yen Wàyn Wìʼ ghə̀ ŋwʉʼ a kwoŋ toghə Nyìngòŋ a ghə̀ kiʼi adyòʼ à tsèm be shiʼì vì a tì mbòʼsə a kàŋ.”
65Kətʉ akì ghaʼ bàs ndisə wen tò fa wen a ngə̀ŋ gàʼà la,“Ghə̀ telə li Nyìngòŋ! Vəghəŋ be kəŋə əzhʉ fa chʉ̀ ndò? Gaʼa kò ghə̀ŋ zhʉ li nyʉ̀ byɨvə kùmə̀ Nyìngòŋ a ghə̀ gaʼà fà wen a chʉ̀. 66Nkàntə̀ ghə̀ŋ kwòʼtə̀ la ghò kùmə̀ wen a? Vəwenə gàʼ tò vətsèm la, Ghə̀ diʼi pfʉ.”
67Ando vəwenə ngàʼà a lì, vəwenə mù sə chʉlə̀ mənte à wen a kə̀ʼ be ghòmə̀ wen vətsenvə pfènlə̀ wen, 68gàʼà la, “Shə̀ʼtə lì à yès a Wìʼ ghèn a Nyìngòŋ ntsuʼ li ə̀ ghʉ la à ghòm ndò wù lo?”
Bità mo Yesò
(Mak 14.66-72; Luk 22.56-62; Jon 18.15-18, 25-27)
69Bità ŋwʉʼʉ a fətin fə kəbəŋ akì wàyn wùwì shwèʼ kətʉ kə tʉtʉ vəpfèm və ngə̀ŋ Nyìngòŋ vì gàʼ à wen la, “Wù tə njèʼè fa bàm Yesò ə, wù Galìlì ghèn.”
70Bità mo tò a shɨ vəwenə no vətsèm gàʼà la, “Mà ko kɨ̀ kənyʉ̀ a wu gàʼà kəwenkə.” 71Ghə̀ gàʼ a lì lù fʉ̀ sə dyʉ̀ a ji a ghə̀ kwenə a kəbəŋ ayì, wàyn wùwì shwèʼ tsen yen wen sə gàʼà a viʼi a və nti boʼsə tsu la, “Wìʼ ghèn tə njèʼè wenə̀ Yesò wu Nazalèt.”
72Bità bè tènsə gàʼà la “Mà gàʼà nəmwèʼè la mà ko kɨ̀ wìʼ ayì.”
73A bè sə laʼtə tò a loʼ viʼi vyi a və nti tsu lì dyʉ̀ gàʼ à Bità la, “Kə diʼ no nəmwèʼè la wù dìʼ wìʼ muʼ fa nòyn Yesò byìʼàndo wù lofə gàʼà tò nə̀ wù Nazalèt.”
74Bità mù kàyn la, “Nyìngòŋ ku ngəʼ à mò a zhʉ a mà wamə wamə. Mà ko kɨ̀ wìʼ a ghèn.” Ando ghə̀ mbu gàʼà nkə̀ʼ toŋ tò a zhʉ a yì. 75Ghə̀ mù bwènsə̀ kwòʼtə̀ ando Yesò ngàʼà à wen la “Nkə̀ʼ ne sə toŋ mu wù mo li mò aghayn la a taʼ.” No a zhʉ kò Bità fʉ̀ dyʉ̀ a kəbəŋ ə dì tsu no mwèʼè mwèʼè.
Currently Selected:
Matìyò 26: bbkDBLnt
Highlight
Share
Copy
Want to have your highlights saved across all your devices? Sign up or sign in
