John 1

NAKATA 1

Hivullia

1Hivullekpa Ukauhek ituk, Ukauheglu tamna Godmiituk, Ukauheglu Godiuyuk. 2Ukauhek Godmiitpaktuk hivullengmi. 3Tapfumunalu hullika tamangmik hanayauhimavaktun, tamangmik ilaa hanayauhimaikivlutik allakun. 4Tamangmiglu Ukauhengmin inunguktun tapfuma inuhiata inuit kaumaktitain. 5Kaumanek tamna kaumainaktuk taaktumun, taaktumli kamiektilimaitagaluanga tamna.

6Inuglu tiliyauyuk Godmin atikaktuk Johnmik. 7Tamna tikitpaktuk ilihimayitun unipkautigikuvlugu kaumanek tapfumuna inuit ukpegluakuvlugit. 8Tiliyauyuk tamna kaumaniungituk kaivaktugaluak unipkautigikuvlugu kaumanek kihimi. 9Tamna kaumanek ilumuktuk, kaumaktitain inuit tamaita, nunamun tikilekpaktuk.

10Tamna nunamiituk, tapfumunalu nuna hanayauhimavaktuk, nunaum inungita ilihimangngitagaluangat. 11Aahin tapfuma inukatini tikitpagain inukatimili piyumangngitagaluangat. 12Inuilli kialikalunin piyumakpayyuk atianun ukpeglualutik pipkakpagain kitungaulekuvlugit Godmun. 13Tapkua kitungaungitun inugamik angayukamingnin, nautauvlutiglunin inuktigun, Godim nutagagimatik kihimi. 14Ukauheglu inugukpaktuk timikakhunilu naiyuktaatigut, aahin tapfuma kaumangniga tautuktakkut Godim engniktuangata kaumangningatun-ilivluni, ilumektauvlunilu ikayuktikhamik ilumuktumiglu.

15Johnim tamna unipkautigigamiuk tukhulayuk, “Tamnauyuk ukautigivaktaga ukakhimagama imaatun, 'Tamna kingunipkun tikilektuk uvamnin ataniukiyauyugaluak inuhimavagami inukaaktinanga.' ”

16Tapfuma piyutainin uvagut ikayuktikhakkakpaktugut aituhiakhuta nutkakhimaitumik. 17Ilaa pitkuyait tuniyauhimavaktun Moseskun, ikayuktikhat, ilumunegli kaitauyugaluit Jesus Christikun. 18Inuit ilaa God tautuyuipiaktaat, tapfuma engniktuangata, Angumi hanianiitum, naunaekhimayagaluanga.

John Baptaiekti uniuyyiyuk Jesuskun

(Mt. 3:1-12; Mk. 1:7-8; Lk. 3:15-17)

19John ilaa apekhuktaugami tiliyauyunin angayyuvikpagyuakunin, Leviteninlu Jerusalemiitunin, ukangmata “Kinauvin?” 20Naunaitumik kiuyain ikuhimaitumik “Christiungitunga.” 21Tapkua apekhuktaat, “Kinauvinlunin? Elijauyutin? Kiuyuk, “Tamnaungitunga”. “Nalautaiyiuyutinlunin?” Kiuyugli, “Imanak.” 22Tapkua ukallautiyaat talva, “Kinauvin? Kiuyakhagigaptigit tiliyivut ilipkun, kanuk ukakkin ilipkun?” 23Ukaktuk,

“Nipainauyunga uvanga tukhulaugama inuilgulmi imaatun,

'Atangum apkutaa nalguktihiuk'”

nalautaiyi Isaiah ukakhimangman.

24Pharisekullu ilait tiliyauhimagamik 25apekhuktaat ukakhutik, “Ilvin Christiungitkuvin, Eliyyaungitkuvinlunin, nalautaiyiungitkuvinlunin hug baptaihivin?” 26Johnim kiuyain, “Ila uvanga baptaihiyunga imengmun. Akunipfingnili inuk nangektuk ilihimangngitagaluakhi. 27Tamnauyuk kingunipkun kaiyauyugaluak, tapfumangalu kamiekhiyukhaungitkaluaktungalunin kanguhutikhakakpallaagama.” 28Taimalivaktun Bethanymi, kukam Jordanmik atikaktum avataani, Johnin baptaiviani.

29Akagunguman Johnim tautukamiuk Jesus upagahualengmani ukaktuk, “Tamayya Godim imnainga, nunaum inungit huinekutaekhunguyain tapfuma. 30Tamnauyuk ukautigivaktaga ukagama, 'Kingunipkun inuk tikilektuk uvamnin ataniukiyauyugaluak inuhimavagami inukaatinanga.' 31Uvanga tamna kinaumangan ilihimangngitkaluaktunga, kaivaktungali baptaiekaahivlunga imengmun tamna naunaekuvlugu Israelmiunun.”

32Johnlu uniuyyiyuk ukakhuni, “Uvanga tautuktaga Anengnek Naguyuk tingmiaktun atkautillugu kilangmin tikittugulu tamna. 33Uvanga ilaa ilitagiyuitagaluaga tiliyimali baptaihikuvagaminga imengmun ukautiyanga, 'Anengnimguk Naguyum inuk atkagvigipani naiyuglugulu, tamnauyuk baptaihiniaktuk Anengnimik Naguyumik.' 34Tautukpaktaga ukautigivlugulu Godim engnigimagu.”

Maligutit hivullit

35Akagungumanlu aahin John maligutini malguk nangekatigitillugik, 36tautuktaa Jesus kangiutivluni, ukaktuglu, “Taku Godim imnainga.” 37Maligutiglu tapkuak tamna tuhaagamitku maligahualektuk Jesusmun. 38Jesusim kiviakhuni tautuktaik maligahuaktuk ukallautivlugik, “Humik kenilekkitik?” Tapkuak kiuyaak, “Rabbi (Imaatun-ituk Ilihauyyi) nani naiyulekkin ilvin?” 39Ukautiyaik, “Kailutik tapfuminga tautugiaktugittik.” Talvungaugamik naiyuktaa tautuktaak ilagivlugulu tapfumani, uvluk nungulengman.

40Tapkuak tuhaahimayaak John maligumavlugulu Jesus, aipa Andrewnguyuk, Simon Peterm nukaa. 41Hivullengmik tapfuma angayuni Simon pakektaa ukautivlugu, “Messiah (Imaatun-ituk Christ) pakektakkut.” 42Talva kagitiyaa Jesusmun. Jesusimlu iigigamiuk ukallaktuk, “Simonmik atikaktutin ai, Johnim engniga, taiyauyumaktutin Cephasmik (Imaatun-ituk, Petermik, uyagagmik).

43Akagunguman Jesus Galileemungaugami Philip pakektaa. Jesusim ukautiyaa, “Malinga”. 44Philiplu Bethsaidamiutauyuk, Andrewm, Petermlu iglukagvianin. 45Philipimlu Nathanael pakekamiuk ukallautiyaa, “Pakektakkut tamna Mosesim pitkuyaini nalautaiyillu tiitigautigihimayaat, Jesus, Josephim engniga Nazarethmin.” 46Nathanaelim Philip ukallautiyaa, “Nazarethmin hullika naguyuk kaitaulekka?” Philip kiuyaa ukakhuni, “Kaigiagin takuyaktuguk.”

47Jesusim Nathanael takugamiuk kaiyyutigimani, ukautiyaa, “Tautuk tainga inuk Israelmiutak ilumukpiaktuk inumini.” 48Nathanaelim ukallautiyaa, “Kanuk ilitagivinga uvanga?” Jesusim kiuyaa, “Ilaa Philipim kaitkukaktinatin, napaaktum ahiakaktum fignik ataannitillutin tautuktagaluapkin.” 49Nathanaelim kiuyaa, “Rabbi, Godim engnigiyaatin, Israelmiununlu ataniuyutin.” 50Jesusim kiuyaa, “Ukautigapkin napaaktum ahiakaktum fignik ataaniitillutin tautuktagin, ukpelekkin? Hapkunanga hapengnakiyanik tautukhunguyutin.” 51Jesusim ukallautimiyaa, “Ilumuktumik ukautiyagin, kilangmik angmakhimayumik, Godim ihalgulingingniglu maiyuaglutik, atkaulutiglu Inum engnigaanun tautukhunguyutin ilaa.”

Currently Selected:

John 1: Sperry

Highlight

Copy