Luke 12

NAKATA 12

Jesusim ihuakhaaktain maligutini ilumukhektukunagit

1Tapfumanilu talvani inuit amigaitpiaktun katimalengmata, nimniukhutik ingmingnik, ukagahualektuk maligutiminun hivullengmik, “Kamahutigilugit Pharisekut mukpauyaita puvluangit, tapkua ilumukhektukpangmata. 2Tamangmik iyekhimayun takupkaktauhunguyun, naunaktunlunin hullika naunaekhunguyun, 3Tapkua ukautigihimayahi taaktillugu, tuhaanangniaktun kaumayumi, tapkualu unipkautigiyahi nipikukitumik avaliitilluhi iglut iluangni ukaktauniaktun iglut kangini.

Ekhinaktun naunaektun

(Mt. 10:28-33, 19-20)

4“Ukautigipfi ilaanatka, ekhigitailugit tapkua tukuttiyun timimik kinguganili allamik pilimaektugaluit. 5Ukautiyumagapfili ekhinakiyanik, ekhigivagluhiuk tamna tukuttikaatillugu igitniaktuk ikualakttivingmun, ilaa ukautigipfi, tamna ekhigihiuk.

6“Kupanuat talimat niuvgutigiyaungilat maniuyangnun malgunun? Tapkua ilangallunin puiguktaulimaitugaluak Godmun. 7Ilaa ilipfilu niakupfi nuyain kititauhimayullu. Ekhitailuhi kupanuanin amigaitunin akitukiyaugapfi.

8“Ukautigipfilu inum kuviahutigipanga uvanga inungni, Inum engningata kuviahutiginiaktaa tamna Godim ihalgulingata takuangni, 9kialunin kanguhutigipanga inungni, tamna kanguhutigiyauniaktuk Godim ihalgulingata takuangni.

10“Kinalika Inum engninganun ukanilukumi ihumagiyauyunaektuk, inugli Anengnimun Naguyumun ukanilukumi tamna ihumagiyauyunailimaituk.

11“Inuit agitipahi atugvingnun, atanitpainunlu ihumaluktailuhi ukautikhapfingnik ukautikangniaktilaapfingniklunin. 12Anengnim Naguyum ukaktiniagmahi ukaktakhapfingnik tapfumani.”

Aaguhukunata, hivuniunek inukun maniektukun ihumaitukunlu

13Inuit ilangata ukallautiyaa Jesus, “Ilihauyyi, angayuga ukautiuk kinguvakhaktakhavut avitkuvlugit uvaptingnun”. 14Kiuyagaluanga, “Inuk, kia pitkuvanga uktukuvlunga iliptingnun? 15Upingakhitailuhi tuhukunahi, inuk inuyyutikhaminik pikagunaituk pikutimigun kihiagun.” 16Tapfuma ukautiyain hivuniunengmik ukakhuni, “Inuk manigiekpiaktuk nautiviminin ahianikpaktuk amigaitpiaktumik. 17Aahin inminik ihumayuk imaatun, 'Huliniakkik tutkukhivikhaegama ahiamnun?' 18Ukallangmiyuk, 'Tutkukhivitka angiviniagitka angikiyanik hanakuvlunga, tapkunanilu tutkuktaginiaktatka tamaiyatka ahiatkalu tamaita. 19Aahin uvamnun ukallangniakkunga imaatun, 'Inuk, pikutitin ilingnun naamangniaktun ukiunun amigaitunun, takki unanguekhekpaglutin, negingnakpaglutin, imeklutinlu aliahuinakuvlutin taima.' 20Godimli ukautiyagaluanga, 'Ihumaitpiaktutin unukpan tukuniagavin tapkua ilingnun upalungayakhimayatin kia piyutiginiaktain?' 21Taimatun-iliyuk inuk tutkukhigumi humillika inminun tutkukhiyumangngitillugu Godim piyutainik.”

Ihumalugnektigun, Godmun ukpeglunilunin

(Mt. 6:25-34)

22Jesuslu maligutiminun ukaktuk, “Talva ukautigipfi, inuhihi ihumalutigitailugit nekihapfingnik imikhapfingniglunin, timipfi annugakhainiglunin. 23Inum inuhia nekimin nagutkiyauyuk, timalunin annugainin. 24Tulukat ihumagilugit, tapkua nautiyyekhiyuitun katihingitkivlutiglunin, aahin tutkukhivikangngitpiaktun, Godimli negipkainaktagaluangit. Ilipfili tapkunanga nagutkiyaugaluaktuhi. 25Nallipfingninlu kina ihumalukumi tukuningata tikiniagutaanik nutkangniakka? 26Ilipfi taimaliuglimaitkupfi aiyunangngitumik hug ihumalutigivigit allat? 27Nauttiat ihumagihigik nautillugit, tapkua havagiaktuyuitun atigiliugngitkivlutiglu ukautigipfili Solomon pikutiminik akitukpiaktumik pikakaluaktillugu tamna annugakhimaitugaluak ukuanaatun nauttiaktun. 28Ivgit nunamiitun uvlumi naulektun akagugunmanli igitauyukhat ingnengvingmun, Godim tapkua ivgit annugaktigumigit tapfuma annugaktitunaitpahi, ukpegnekukituhi? 29Ihumaluktailivagluhi kenigiaktukunahi. nekikhapfingnik imikhapfingniglu.

30Nunaniitun inuit hapkuninga kenigiaktuktun, Angutikhilu ilipfi piyakhapfingnik ilihimayugaluak. 31Atanguvianigli tapfuma kenigiaktugupfi hapkuninga allanik tamainik pikakhunguyuhi.

32“Ekhitailuhi amigaitpallaangitkaluaktilluhi Angutima inminik piyumagami tuniniaktaahi atanguvingmik. 33Pikutihi niuvgutigilugit, aitukpagluhilu piyyavuhi manikagvikhapfingnik nungulaitunik, pikutiniglu akituyunik kilangmi tamaglaimata tatpikani kukiyun kupilgullu piektilimaimatigit. 34Umatihi pikutikagvipfingniniangmata.

Amekhikuvluta hivuniuneglu kivaktigun naguyun nagungitukunlu

35“Upalungayakpagluhi annugakhimaluhilu tapfihimayunik, kullihi ikumainaktukhatlu. 36Kivgaktun-ilivagluhi utakingnalengmata ataneminun ainiangman katuhekhektunin ukuegutikuvlugu tikitpan tigluklunilu. 37Kuviahuktun tapkua kivgait ataningata tikitpatik pigaktillugit. Ilumun ukautigipfi, tapfuma negiaktuktiniaktain kivgaktukuvlugillu inmigun. 38Tikitpan unuk kitkaniitillugu kinguagunlunin kuviahuktun tapkua kivgait hiningngitkumik. 39Umingali itkaumaluhi, inuk iglukaktuk ilihimagumi kukinahualektum tikiyyutaanik hinigunaektuk igluni amegikuvlugu. 40Ilipfitauk upalungayaktukhauyuhi Inum engniga tikiniangman negiugngitilluhi tapfuminga.”

41Peter ukallaktuk, “Atanek tamna hivuniunek unipkautigiviuk kihiptingnun tamainunlunin?” 42Atanek talva ukaktuk, “Kinauva tamna inuk ilumuktuk kivgaktuyyagikpiakhuni atannektukuyauyuk ataneminin negipkakuvlugit kivgait allat naamaktumik? 43Kuviahukpiaktuk tamna kivgak taimaligumi atania tikitpan. 44Ilumun ukautigipfi, atangum atanguyanguktiniaktaa pikutiminun tamainun. 45Kivgaklunin inminik ukakkan 'Ataniga tikinahangman' tayyainak kektugahualekkata kivgainik allanik negiyumavluni imiinakuvlugulu, 46tapfuma ataninga tikiniaktuk tikiyyutaa negiugiyaungitillugu, kivganga ilihimangngitillugulu, atangumlu naglikhaktiniakta igitugu kivgaktuyyagluktunun.

47“Kivgamli atanimi ihumangit ilihimagamigit tuhaahimaitumik upalungayakhimaitumiglu kektuktauhunguyuk akhun. 48Kivgaglu ihuitumik pigumi ilihimaluangitillugu kektuktauniaktuk akhukhimaitumik. Inuklunin amihumik tunihiviupan amihumiglu kaitauyukhat tapfumanga, inukli amigaitkiyanik tunihiviupan inungnin amigaitkiyaniglu inuit piyumaaktun tapfumanga.

Naunaikutaitigun

(Mt. 10:34-36, 16:1-4; Mk. 8:11-13; Mt. 5:25-26)

49“Kaivaktunga ingnengnik igitkuvlunga nunamun, ikitukhauyugaluak tayya tamna. 50Baptaiektauyukhauyungali kuvianaitumik kapiahukpiaktunga tamna innektinagu. 51Ihumatailuhi naamaktumik tikihimayunga havakuvlunga nunami. Imanak, kaithimakaluaktunga avitkuvlugit inuit. 52Talvangaanin iglum atauhengmi talimat avitniaktun pingahun malgunun akikektugniaktun, malguglu pingahunun. 53Avitniaktunlu, engnigik angut anguminin, panigiglu angnak angnaminin, angnam hakkia ukuaminin.”

54Inungnunlu Jesus ukallaktuk, “Uataani nuvuyak niupan tayyainak ukaktuhi 'Nipalungnialektuk', taimalivaktuktauk. 55Tatpangalu anukhilekkan ukaktuhi, 'Unnangniaktuk hila', taimalivaktuglu. 56Ilumukhektuktuhi, nunam kilaumlu naunaikutain ilitagingnaktahi, inuit pivikhait ilitagiyuitagaluahi hug?

57“Ilipfingni itkumayumik hug uktugngitpihi? 58Ilvit apekhuiyimun pihukatigigungni imakaagiyin, ukagvigilugu naguyumik tapfuma kahuyyutikuvlutin uktuktimun agitinakhavaatin, uktuktim ilingnik tuninakhavaa palihiman, tapfumunalu ilvit itektauvingmungaktitaukunatinlunin. 59Ukautiyagit tamainik akilektinatin anilimaekpiaktutin.”

Currently Selected:

Luke 12: Sperry

Highlight

Copy