Luke 15
15
NAKATA 15
Hivuniunek imnaikun ulamnauyukun
(Mt. 18:12-14)
1Tapfumani manilekhiyit huinekiyullu kaivaktun tuhaayumavlugu Jesus. 2Pharisekut tiitigaktillu ihumalukamik ukallaktun, “Uma huinekiyun ilagiyain negikatigivlugit.” 3Talva tapkununga una hivuniunek unipkautigiyaa. 4“Ilapfi kia imnaikakumi 100nik tapkua ilangat atauhingnaglunin tamakan 99 kimangngilagit inuilgulmi kengiaktukuvlugu tamakhimayuk katkaktinagu? 5Katkagumiuglu nangmagniaktaa kuviatakpiakhuni. 6Tikigumilu ilannani nuakatinilu kaitkuvlugit ukallautiyain, 'Aliahukatauvagitti uvamni, imnaiga tamakhimayugaluak katkagapku.' 7Taimatauk ukautigipfi, huinekiyuk atauhingnaglunin ihumaliukikpan kuvianakiak kilangmiuni, 99nin inungnin ilumugmatalunin.
Maniuyakun ulamnauyukun
8“Angnaklunin maniuyakakumi kulinik, ilangat tamakan ikingilak kulliminik natia tilagikhugu kenigiaktukuvlugu tamakhimayuk katkaktinagu? 9Tapfuma katkakumiuk ilannani nuakatinilu kaitkugamigit ukallautiyain, 'Aliahukatauvagluhi uvamni, maniuyak tamakhimayugaluak katkagapku.' 10Taimatun ukautigipfi, Godim ihalgulgit kuviahukpiaktun huinekiyuk atauhingnaklunin ihumaliukikpan.”
Inum engnigagun ulamnauyukun
11Jesuslu ukallaktuk, “Inugaluak engnikaktuk malgunik, 12nukakhiumlu anguni ukallautiyaa, 'Angutiga pikutingnin piyakhamnik tunilanga.' Tapfumalu pikutini aviktain tapkununga engniminun. 13Kinguagunlu kakugungugman nukakhek tamna pikutiminik upalungayakhuni ungahiktumun aullaktuk, takananilu pikutini nungutpagait hungitumun ihuitumunlu. 14Maningit nungumata tapfumani nunami inuit nekaekpiaktun, nukakheglu aiyukakpallialektuk. 15Aahin nunaum inungita ilanga upaktaa havagiektugumavluni, tapfumalu havakuyaa nauttivimini negipkaikuvlugu tuktuklugnik. 16Nukakheglu kaalegami tuktukluit nekhautainik negiyumainaktugaluak inuit tuniyuimayyuk. 17Inminigli naguyumik ihumaliugami ukallaktuk, 'Angutima kivgait tamangmik nekihakakpaktun amigaitunik, uvanga nekaitpiakaluaktillunga. 18Makiniaktunga angutimnungaukuvlunga, ukallautiniagiga, “Angutiga, Godmun ilingnunlu huinekivagama 19engningnik taiyauyukhaungitugaluyunga, kivgaktun-itlangali.” 20Tamnalu makinami anguminungaktuk. Tapfumunga kaglilektillugu niulihakhuni angumi tautukamiuk nagligiyaa akpahivlunilu upaktaa kungahiagunlu ikitaa kunikhugu. 21Nukakhiumlu anguni ukallautiyaa, 'Angutiga, Godmun ilingnunlu huinekivagama engningnik taiyauyukhaungitugaluyunga.' 22Tapfuma angutata ukallautiyagaluangit kivgani, 'Annugak pinekiak kaihiuk annugaglugu, mikiligagmiaglugulu, kamiglugulu. 23Aahin kagitihiuk nugak puvalayuk, tukuttiluhilu tapfuminga, negiaktugniagapta aliahuinakuvluta, 24una engniga tukuhimayugaluak inukigman, tamakhimayugaluak pakektaumanlu.' Talva tamangmik aliahugahualektun.
25“Nukakhium angayuali nauttivingmiituk, ailektillugu numektunik atuktuyautinik nalauyuk. 26Aahin tapfuma kivgak kaitkuyaa tuhaayumagami kanuitilakhainik iglumi. 27Kivgam kiuyaa, 'Nukan ilaa tikinman angutivit nugak puvalayuk tukutpagaa pigamiuk engnini naamakpiaktillugu aaniakhimaitumik.' 28Angayuhegli kuviahugunaekami itegngituk. Anguta anigami ukagvigiyaa itekuvlugu. 29Tamnali kiuyugaluak anguminun, 'Ilaa kangagaaluk kivgaktuyyagikpiaktunga ilingnun tuhaavigivlutin puigukhimaitumik, ilvitli tuniyuitpiaktagaluangma nugagmik aliahuinakuvlunga ilannamni. 30Engninlunin nungutpiaktagaluangit manitin angnaktigun, tikinman tukutpagan nugak puvalayuk aitutigikuvlugu tapfumunga.' 31Angutata kiuyaa, 'Engniga uvamnihimavaktutin ilaa, pikutitka tamaita naminigiyatin ilvit. 32Naguyugaluak aliatakpiagapta, nukan tukuhimayugaluak inulengman, tamakhimayugaluak pakektauman.' ”
Currently Selected:
Luke 15: Sperry
Highlight
Share
Copy
Want to have your highlights saved across all your devices? Sign up or sign in
©1972 Canadian Bible Society
