Luke 19

NAKATA 19

Zacchaeuskun

1Jesus Jerichomun tikinami apkuhaaktaa. 2Taikanilu inuk Zacchaeusmik atikaktuk ituk, tamna manigiekpiaktuk ataniunami manilekhiyikuni. 3Tapfuma Jesus takuyumainakpiaktaa kinaumangan inugiekpallaaman mikigamilu hapekpiaktuk. 4Talva hivulliuvluni napaaktumun ahiakaktumun maiyugaktuk kungniagumavlugu apkuhangnialengman talvunga. 5Jesuslu talvunga tikinami aagluktuk ukallautivlugu, “Zacchaeus atkagiagin uvlumi iglungnun pulaagniagama.” 6Kilamiuvlunilu atkauyuk kuviahutigivlugu Jesus. 7Inuillu tamna takugamitku ihumaluinaktun ukakhutik, “Hunauva tamna pulaagahualektuk huinekiyumun.” 8Zacchaeuslu nangekhuni Atanengmun ukallaktuk, “Ilaa, Atanek, pikutima napain aitutiginiaktatka ilingayunun, inungninlunin kukithimaguma hitamaektuglunga utektiniagitka hullika.” 9Jesusim ukallautiyaa, “Uvlumi iglumun umunga annauyyutikhak tikitainaktuk, una angut Abraham kitungagimagutauk. 10Inum engniga kaivaktuk kenigiaktugumavluni annauyyikuvlugulu ulamnauhimayunik.”

Hivuniunek manitigun

11Inuillu tapfuminga tuhaamata, Jesusim ukautiyain tapkua allamik hivuniunengmik, Jerusalemun tikilegami, tapkualu negiugimayyuk Godim atanguviata tikiyyutaa tayyainak. 12Talva ukallaktuk, “Inuk atanekhak nunamun ungahiktumun aullaktuk ataninguktitaukuvlugu, utekuvlugulu nunaminun. 13Aullaktinani kivgani kulini kaitkugamigit inminun tuniyain maniuyangnik goldnik kulinik atuni ukautivlugit, 'Kaitkiktinanga ukua niuvgutigilugit.' 14Tapfuma nunakataita nagugiyuitpiaktagaluangat tamna, aullakaaktillugu kinguagun tiliyain tapfumunga ukautikuvlugu imaatun, 'Tamna inuk atanigiyumangngitakkut'.

15“Tamnali utegami ataninguktitauhimavluni kivgani tunihimayain maninik, kaitkuyain tuhaayumavluni manitigun amigaekmangatalunin. 16Hivullik kaigami ukallaktuk, 'Atanek, manitin atauhek maniuyak goldmik niuvgutigigapku kulinguktuk.' 17Ukallautiyaa, 'Kuanakutin kivgaktuyyagikpiaktutin, ilumukpiagavin havakhutin ikitunik, attanektugniaktatin iglukagvit kulit.' 18Tugliatauk kaigami ukallaktuk, 'Atanek manitin atauhek niuvgutigigapku talimagukpiaktuk.' 19Tapfuma ukallautiyaa, 'Ilvillu atannektugniaktatin iglukagvit taliman.' 20Allatauk kaigami ukallaktuk, 'Atanek manitin hamaniituk tutkukhimagapku ulikhugu, 21kamahutigigapkin aneguhukpiagavin, tiguvlutin humik ilingitgaluaktatin, katihivagavillu humillika nauttiyekhiyuitkaluaktillutinlunin.' 22Ukallautiyaa, 'Kivgaktuyyaglukpiaktutin ukauhingnin ihuigiyagin. Ilihimagavin aneguhukpiagama tiguvlunga humik ilingitgaluaktatka, katihivagamalu humillika nauttiyekhiyuitkaluaktillungalunin? 23Hug maniga tuningitpiuk manikagvigmiunun kaitkiguma pifaakuvlugu tapikhakakuvlungalu tapfumanga?' 24Inungnun nangekatauyununlu ukallaktuk, 'Umanga maniuyak tiguhiuk tunikuvlugu tamna maniuyakaktuk kulinik.' 25(Tapkua ukallautiyaa, 'Atanek, maniuyakaktugaluak kulinik') 26Ukautigipfi, inukli pikaktuk tunihiviuniaktuk allamik, pikangngituminlu tapfuma piyutain mikigaluakhuni piektitauniaktun. 27Tapkuali akigatka atanektuitailimangnga tapkununga, kagitihigit tukulugillu hivunimni.

Jesus tikittuk Jerusalemun nagugiyauvluni

(Mt. 21:1-11; Mk. 11:1-11; Jn. 12:12-19)

28Taimatun ukagami Jesus hivulliuvluni Jerusalemun aullaktuk. 29Tikilektillugulu Bethphagemun Bethanykukhuni, manilgulmi Olivesmik taiyauyumi, maligutini malguk tikiyaik, 30ukakhuni, “Iglukagluangitumun hivuniptingni-itumun tavungaugittik tikinahualeguptiglu tautugniaktakhi kenmekpaum hiutekuktuyum nuganga ipikhimayuk atukhimaituk. Ipiekaalugu kagitihiuk. 31Inuillu taikaniitun apegipatik 'Hug nugak ipiektakhi?' Kiulutik imaatun, 'Atangum atugumangmagu'. 32Talva tiliyauyuk tavungaktuk katkakhugu tuhaayamingnik. 33Nugaklu ipiektillugu nugaglik apekhiyuk tapkuninga, 'Hug nugak ipiektakhi?' 34Tapkuak ukaktuk, “Atangum atugumangmagu" 35Talva kagitiyaak Jesusmun, kaanganunlu annugatik ilimatigik Jesusim atuktaa. 36Kenmekpaktuktillugulu inuit apkunmun annugatik ihivilektain. 37Aahin kaglilengman, Manilguk Olivesmik taiyauyum ataagun, maligutait amigaitun kuviatakpiaktun kuyagivlugulu God nipikuktuyumik havaangit alianaktun tautukpagamitigit, ukakhutik,

38“Nagugiyauli Atanek tikinami Atangum atingani, kilangmiut naamaglit kingikiyauyumi alianaktukhak.”

39Inungnin Pharisekut ilaita ukallautiyaat, “Ilihauyyi maligutitin ihuakhakit.” 40Kiuyugaluak, “Ukautigipfi, tapkua nipahuekatta uyagainait tukhulaukhunguyun.”

Jesusim ihumalugiyain Jerusalemiun

41Kagligami tautukhugu iglukagvik kulviugutigiyain inuit, 42ukakhuni, “Uvlumilunin naguyyutikhapfingnik ilitukhiyukhaugaluaktuhi, tayyali tapkua iyekhimayugaluit iyipfingnin. 43Kakugu akigahi hugiyuglutik nunamik avaluliukhunguyun iglukagvipfingnun ilukuvluhi 44ulgutitumavluhi nunamun tamapfi nutakahilu, aahin iglupfingnin uyagait tamaita imikhunguyain, annauyyutikhakhi ilitaginginapfiuk.”

Jesusim inuit angayyuvikpagyuagmiitun ihuakhaktain

(Mt. 21:12-17; Mk. 11:15-19)

45Talva Jesus angayyuvikpagyuagmun itegami niuvayit tamaita anipkagahualektain, 46ukautivlugit, “Tiitigakhimayuk, 'Iglugu taiyauyukhak kengauvingmik', ilipfili kukivinguktitagaluakhi.”

47Uvluk tamanlu ilihauyyingnaktuk angayyuvigpagyuami. Angayyuvikpagyuakut ataningit, tiitigaktillu, inuit atanekpaillu tukutumainaktaat, 48pilimaitugaluit inuit tamangmik tuhaavigimayyuk akhun.

Currently Selected:

Luke 19: Sperry

Highlight

Copy