Luke 23

NAKATA 23

Jesus Pilatem, Romanmiun ataningata tungani

(Mt. 27:1-2, 11-14; Mk. 15:1-5; Jn. 18:28-38)

1Talva inuit tamangmik katimavlutik makittun agitivlugu Jesus Pilatemun. 2Aahin ihuiginahualektaat ukakhutik, “Katkaktakkut una inuk pitkuivangman nunakatiptingnik ihuitumik tunihitailivluta maninik Caesarmun ukautigivlugulu inmi Christiugamiguk ataniuyuk.” 3Pilatem apegiyaa, “Jewmiunun ataniuvin?” Kiuyaa, “Ukakkutin ilvit”. 4Talva Pilatem ukallaktuk angayyuvikpagyuakut ataningingnun inungnunlu, “Inuk una ihuigingitagaluaga”. 5Tapkuali akhukhutik ukainaktun, “Uma ihuektitain inuit ilihauyyivluni Judeami tamaini, Galileeminlu hamanilu.”

Jesus Herodim tungani

6Pilatem tamna tuhaagamiuk apekhiyuk Jesus Galileemiutaumangan. 7Tuhaagamilu naiyukpangman Herodim nunaani Herodmungaktitaa, Herod akuihimangman Jerusalemi tapfumani. 8Herodim Jesus takugamiuk kuviahuktuk kangagaaluk takuyumainakpagamiuk tuhaavagami umuna inungnin, aahin kungniagumainaktuk naunaikutamik Jesusmin. 9Talva Herodim Jesus apekhukpiaktaa akhun, Jesusli kiungitugaluak. 10Aahin angayyuvikpagyuakut ataningillu tiitigaktillu nangekhutik ukautigiyaat Jesus akhun ihuigivlugu. 11Herodim anguyaktingitalu mitautigiyaat anangaiyaakhutik, aahin annugakhugu pinektumik atanekpaktun-itumik utektitaa Pilatemun. 12Tapfumani Herod Pilatelu tamangmik kahuyyutiyuk ingmingnun hivungani umihutigamik.

Pilatekun, Barabbaskunlu, Jesuskunlu

(Mt. 27:15-26; Mk. 15:6-15; Jn. 18:19-24)

13Talva Pilatem angayyuvikpagyuakut ataningit, atanekpaillu, inuillu kaitkuyain, 14ukautivlugit “Kagitivaktakhi una inuk uvamnun ihuektitpagmagit inuit, uvangali apekhukpiagupku hapfingni, ilaa, ihuigingitpiaktagaluaga ihuigiyaugaluaktillugu ilipfingnin, 15Herodlu uvaptun pigami utektitaa uvaptingnun. Ilaa una tukutauyakhaminik piyuituk. 16Talva ungulakaalugu aullakuniagiga.” 17Aullakuiyukhauyuk inugmik atauhengmik Kangiutivik tikinman. 18Tamangmigli tukhulayun atautikun, “Una piguk tunitigut Barabbasmik”– 19tamna inuk itektauvingmiitpaktugaluak iglukagvingmi ihuektitpagamigit inuit, inuakpagamilu. 20Pilatem ukagvigimiyainlu aahin aullakuyumagamiuk Jesus, 21inuilli tukhulaukhutik ukaktun, “Kikiaktuguk, kikiaktuguk.” 22Pingahuangniglu ukallautiyain, “Hug kanugmik ihuitumik pivakka? Uma tukuttakhaanik naluyunga. Ilaa ungulakaalugu aullakuniagiga.” 23Tapkuali akhukpiakhutk nipikuktuyumik atanguhekpiaktun kikiaktuktaukuvlugu. Nipingillu takhiyun. 24Talva Pilate pitkuiyuk inuit piyumayangat taimaliukuvlugu. 25Anipkaktaa tamna inuk itektauvingmiitpaktuk ihuektihivangman, inuakpangmanlu inuit piyumamayyuk, Jesusli tuniyagaluangat tapkununga pikuvlugu ihumamingnik.

Jesus kikiaktuktauyuk

(Mt. 27:32-44; Mk. 15:21-32; Jn. 19:17-27)

26Talva agitilektillugu, inungmik akuilektumik aahinin pigamitku nangmaktitaat haniagutaanik, nangmakuvlugu Jesusim tunuani malikhugu, tamna atikaktuk Simonmik Cyrenemiutauyuk.

27Talva inuit amigaitpiaktun angnallu maliktun mamiatakpiakhutik kiavlugulu. 28Jesusli kiviakhuni angnangnun ukallaktuk, “Jerusalemiun paningit, pivlunga kiatailuhi ilipfi, pivluhi nutakahilu pivlugit kihimi. 29Ilaa ilaani imaatun ukaktauniaktuk, 'Kuviahuktun angnat nutagaitun, hingayuitullu amaamagviungitullu.' 30Tapkualu tukhiagahualektun imnagnun ukaglutik, 'Iyukagvigiluta', manilgulmun, 'Uliktigut'. 31Uvlumi uminga inuit pivat kanugmik piniakkat panekpata?”

32Angutiglu ihuitumik pivagamik agitiyauyuk tukutaukataukuvlugik tapfumani. 33Tikinamik nunamun, Umannagmik taiyauyumun, kikiaktuktain kukiyuktuglu, aipa talikpiata tungani, aipalu haumiata tungani. 34Jesuslu ukallaktuk, “Angutiga hapkua ihumagiyunaekit huliyatik nalumagit.” Tapkuali piyutigikuvlugit annugait imagiyain. 35Inuillu nangektun kungniakhutik, atanekpailli mitautigiyaat ukakhutik, “Allat annautivaktain, inminik annautili, Christiugumi Godmin, pilluaktaugumilu.” 36Anguyaktillu mitautigiyaat upakhugu waintuktitumavlugu mamaitumik, 37ukaktun, “Ataniuguvin Jewmiunun ilingnik annautigiut.” 38Kulaanilu tiitekhak tiitigakhimayuk, “Una Jewmiun ataningat”.

39Kukiyuktuk aipa kikiaktuktaulegami kaniktaa ukakhuni, “Christiungilatin? Ilingnik annautiguit uvaguklu.” 40Aipata ihuakhakhugu tamna ukallakhuni, “Ilvit God ekhigingitpiuk ikumatun tukutaugaluaktillutin? 41Uvagukli ihuipiaktumik pivagamnuk, tamnali ihuitumik pingitpiaktugaluak.” 42Ukallangmiyuk, “Jesus, itkaginga atanguvingnun tikitkuvin.” 43Jesusim ukallautiyaa, “Ilumun ukautiyagin uvlumi uvamni-itniaktutin Paradisemi.”

Jesus tukuyuk

(Mt. 27:45-56; Mk. 15:33-41; Jn. 19:28-30)

44Talva uvluk kitkaniitillugu talvangaanin 3mungaktinagu nuna taakhivaktuk 45hikenek kaumalimainman, angayyuvikpagyuamlu talukuyaa aliktuk kitimigun. 46Jesuslu nipikuktuyumik ukallaktuk, “Angutiga, aitutigiyaga napatiga ilingnun” Taima ukaguegami anengnigektuk. 47Anguyaktiliglu tamainik tautugami kuyagiyaa God ukakhuni, “Ilaa una inuk naguyunaktuk.” 48Inuillu amigaitun akuivaktun kungniagumavlutik, tapkuninga tautukamik angilgaktun hakiatik patekhugit. 49Jesusim ilanagiyain angnallu maliktagaluangat Galileemin kanitumiitun kungniakhutik tapkuninga.

Jesus iluvektauyuk

(Mt. 27:57-61; Mk. 15:42-47; Jn. 19:38-42)

50Talvalu Jewmiuni Arimatheamiutak atikaktuk Josephmik ituk. Jewmiun katimavianun ilauyuk, nagutpiaktugaluak ilumukhuni. 51Aahin tamna angegngituk allat tukutakhautigimayyuk Jesus, negiukpaktuglu Godim atanguvianun. 52Tapfuma Pilate upaktaa tukhiagvigivlugu Jesusim timaanun. 53Talva atkaktinamiuk nimektaa kalikumik ilivlugulu iluvengmun havakhimayumun kaektumi-itumun. Aahin tamna atukhimaitpiaktuk. 54Upalungayagvium uvlua tikituk talva, Sabbathlu ituk.

55Angallu malikpagaat Jesus Galileemin, kaivlutik iluvganik timaalu iliyaumangan tautuktun 56utiuvlutiglu tipigiktumik nanuniglu havagahuaktun. Sabbathlu tikinman unanguekhektun pitkuyak malikhugu.

Currently Selected:

Luke 23: Sperry

Highlight

Copy