Matthew 6

NAKATA 6

Aituktun tautugnaitkaluakhutik

1Ilaa ilumuktumik pitailuhi inuin takuangni tapkua tautuktinakuvluhi akiliuhiagunainakhavuhi Angutipfingnin kilangmiitumin.

2“Imaatun, aitugaiguvin huvluktagaliktuktailutin ilumukhektutun atugvingni, apkutainilu, kuyagiyaumata inungnin. Ilumun ukautigipfi, tapkua akiliuhiakpaktun. 3Ilvin aitugaiguvin algakkin haumit nalulit talipikpit aitutikhaanik 4aitutin tautaugnaitkuvlugit, Angutivillu tautuktum tautugnaitumik akilekhunguyaatin.

5“Kengagaiguvinlu ilumukhektutun-itukhaungitgaluaktutin tapkua nangekumainangmata kengakhutik katimavingni, apkutinilu, tautuktauyumavlutik inungnin. Ilumuktumik ukautigipfi, tapkua akiliuhiakpaktun. 6Ilvilli kengagaiguvin iglungnun itegin ukuakaalugulu Angutin tautugnaitumiituk kengagvigiguk, Angutivillu tautuktum tautugnaitumik akilekhunguyaatin. 7Kengaktilluhilu ukainagialikaktailuhi naluyutun tapkua ukauhimigun amigaitutigun tuhaayaunahuginmata. 8Tapkuanaatun-itailuhi ilipfi Angutikhi piyakhapfingnik ilihimangman apegitinakhi.

“Atangum Kengautaa”

(Lk. 11:2-4)

9Imaatun kengakpagluhi.

Angutikput kilangmiitutin.

Atkin nagugiyauli.

10Atanguvin kaili,

Ihumatin taimaliullit nunami kilangmi-iliyutun.

11Uvlumi nekikhaptingnik aituktigut

12Huinekutiptingniglu ihumagiyunaeglutin,

Huinekiyigiyavut ihumalutigihuigaptigit,

13Uktuktaunegmun hivulliuktailuta tupilagminlu annautitigut.

14Ilipfi huinekutain inuit ihumagiyunaegupfigik Angutipfi kilangmiitum ihumagiyunaegviginiaktaahitauk. 15Ilipfili inuit ihumagiyunaegvigingitkupfigik Angutipfi huinekutihi ihumagiyunaegunaitaintauk.

Negitailiyun

16“Negitailigaigupfilu akuliapfi tautugningit allanguktitailugit ilumukhektutun, tapkua akuliatik pingiyakpagmatigik negitailiyututun-itkuvlugit inungnun. Ilumun ukautigipfi, tapkua akiliuhiaktun. 17Ilvinli negitailigaiguvin niakuan ukhukteglugu akulianlu uallugulu 18tautugnakunatin inungnin negitailigaluaktillutin, Angutingnin tautugnaitumin kihimi, Angutivillu tautuktum tautugnaitumik akilekhunguyaatin.

Pikutitigun ilumuktutigun

(Lk. 12:33-34)

19“Pikutinik akituyunik tutkugiaktuktailugit nunami kupilgut kattiniumlunin nungutihungumatigik kukinagialgitlunin. 20Pikutinigli akituyunik ilipfingnun tutkugiaktuglugit kilangmi, kupilgut kattiniumlunin nungutilimaimatigik, kukiyuktunlu kukilimaitpiangmata tapkuninga. 21Ilipfi piyutikagvipfingni-itpata pikutihi umatihitauk talvaniiniaktun ilaa.

Kaumenektigun taagnektigunlu

(Lk. 11:34-36)

22“Timim iyi kaumanegiyaa. Iyin nagutpan timin kaumangniaktuk. 23Iyin nagutngitpanli timin taakhiniaktugaluak. Ilungni kaumanit taakhigumi taakpiaktuk akhun taima.

Ihumalugnektigun, Godmun ukpeglunilunin

(Lk. 16:13, 12:22-31)

24“Atanengnun malgunun inuk kivgaktulimaituk, aipa nagugiyunainamiuk aipanga nagugikuvlugu, imaalunin, inum aipa tuhaaniagamiuk aipanga nagugiyunaitkaluaktillugu. Ilipfitauk Godmun, Nunaum pikutainunlu atautikun kivgaktulimaitkaluaktuhi.

25“Aahin ukautigipfi, inuhihi ihumalutigitailugit, nekihapfingniglunin imikhapfingniglunin, timipfilunin annugakhainik. Inum inuhiga nagutkiyaungilak nekimin, timimi annugaininlunin? 26Tautugiakhigit kupanuat. Tapkua nautiyekhiyuitun katihingitkivlutik tutkukhivingnun, Angutipfili kilangmiitum negipkakpaktagaluangit tapkua. Ilipfi tapkunanga nagutkiyaungilahi? 27Nallipfingnin kina ihumalukumi tukuningata tikiniagutaanik nutkangniakka? 28Aahin annugaktigun hug ihumalukpihi? Nauttiat nunamiitun ihumagihigik naulengmata; tapkua havagiaktugyuitun atigiliungitkivlutik, 29ukautiyagaluapfi Solomon pikutiminik akitukpiaktunik pikakaluaktillugu tamna annugakhimaitugaluak ukuanatun nauttiaktun. 30Ivgit nunamiitun uvlumi naulektun, akagugunmanli igitauyukhat ingnengvingmun. Godim ivgit annugaktigumigit, tapfuma annugaktitunaitpahi, ukpegnekukituhi? 31Talva ihumaluktailivagluhi ukagluhi 'Humik neginiakkita? 'Humiglu imengniakkita?' imaalunin, 'Kanuk annugakhakangniakita? 32Tapkua tamaita Jewmiungitun piyumangmatigik; Angutikhili kilangmiituk piyakhapfingnik tapkuninga ilihimayugaluak. 33Godim atanguvia, ilumugnigalu pinahualegupfigik tapkua tamangmik tuniyauhunguyun ilipfingnun. 34“Talva akagu ihumalutigitailuhiuk, akagu inminik ihumalugnagialik. Uvlum ihumalugningit naamalit inminun.

Currently Selected:

Matthew 6: Sperry

Highlight

Copy