Mark 15

NAKATA 15

Jesus tuniyauyuk atanengmun Pilatemun Romanmiutagmun

(Mt. 27:1-2, 11-26; Lk. 23:1-5, 13-25; Jn. 18:26-19:16)

1Kaulengmanlu angayyuvikpagyuakut ataningit, inuit atanekpaillu tiitigaktillu tamangmik katimavlutik ukakatigiktun. Aahin kilekhugamitku agitiyaat tunikuvlugu Pilatemun atanengmun. 2Pilatem apegiyaa, “Jewmiunun ataniuvin?” Kiuyaa, “Ukakkutin ilvit”. 3Angayyuvikpagyuakullu ataningita ihuigigamitku ukautigiyaat amihumik. 4Aahintauk Pilatem apegimiyaa, “Kiulimaitpin? Amihumik ihuigivagmatin” 5Jesuslu kiungiman Pilatem agligutautigiyaa.

6Tapfumani Kangiutivingukagan atanek inugmik itektauhimayumik atauhengmik anipkaivaktuk inungnun nalliak inuit piyumapayyuk. 7Itektauhimayuni ihuitumik pivaktuni inuakhimayun ilangat atikaktuk Barabbasmik. 8Inuillu kaigamik Pilate apeginahualektaat inungmik tunipkaikuvlugu. 9Tapfuma kiuyain, “Kanuk pitkuvihinga, ilipfingnun anipkakuvlugu Jewmiut ataningat?” 10Ilihimayuk tapkua Jesus kagitiyaat inminun tuhugivallaamayyuk. 11Angayyuvikpagyuakut ataningitali inuit tukhiakuyain Pilatemun tapfuma anipkakuvlugu Barabbas kihimi. 12Aahintauk Pilatem ukallautimiyain “Talva kanuiliungniakkigu tamna taiyakhi Jewmiun ataninganik?” 13Tapkua nipikuktuyumik ukaktun, “Kikiaktuguk tamna”. 14Pilatem apegiyain, “Hug kanuk ihuitumik pivakka?” Tapkuali nipikutuyumik akhun ukaktun “Kikiaktuktauli tamna”. 15Pilatemlu inuit kuviahuktitumagamigit tuniyain Barabbasmik; aahin ungulakamiuk Jesus pipkaiyuk kikiaktuktaukuvlugu.

Anguyaktit mitautigiyaat Jesus

(Mt. 27:27-31; Jn. 19:2-3)

16Talva anguyaktit agitiyaat iglukpangmun kaitkuvlugillu anguyaktit tamaita tapfumunga. 17Aahin annugaktitaat aukpayaktumik, niakuanunlu niakutikhak hanahimayuk kakilautilingnik ilivlugu. 18Talva hallupaktun ukakhutik, “Hallu Jewmiun ataningat”. 19Aahin kektuktaat niakuagun aiyaupiagmun tivguaktukhugulu hitkuvigivlugu. 20Tapkua mitautigigamitku annugangiyaktaat aukpayaktumik annugaktikuvlugu nanminik. Aahin anipkaktaat kikiaktukuvlugu.

Jesus kikiaktuktauyuk

(Mt. 27:32-44; Lk. 23:26-43; Jn. 19:17-27)

21Talva anguyaktit nangmakuyaat inuk haniagutaanik tapfuma, tamna atikaktuk Simonmik, angutauyuk Alexandermun Rufusmunlu, Cyrenemin akuihimayugaluak tapfumani.

22Pihuktitaat Jesus nunamun Golgothamik atilingmun (Imaatun-ituk Umannagmik) 23Aahin waintuktitumainaktaat mamaitumik myrrhmik, piyumangngitagaluanga. 24Talva kikiaktugamitku annugait piyutigiyain imagivlugut ingminun. 25Uvlaami 9mungaktillugu kikiaktuktaat. 26Kulaanituk tiitekhak tiitigakhimayuk imaatun, “Jewmiun ataningat”. 27Tapfumani kukiyuktuk malguk kikiaktuktaukatauyuk, aipa Jesusim talekpiata tungani, aipangalu haumiata tungani. 28Taima Godim ukauhiit tiitigakhimayun ilumukpaktun tiitigaktauvangmata “Ilauvaktuk huinekituyuni.”

29Inuilli apkuhaaktun ukanilutigiyaat niakulekhutik ukaktun, “Aha Ilvit angayyuvikpagyuak imiktiniagangni nappaktikuvlugulu uvluni pingahuni, 30ilingnik annautiguit haniagutingninlu atkagiagin.” 31Taimatauk angayyuvikpagyuakut ataningit, tiitigaktillu ingmingnun ukaktun, “Allat annautivaktain, inminigli annautilimaitugaluak. 32Tamna Christ, Israelmiut ataningat haniagutiminin atkakli tautuinakuvlugu uvagut ukpegikuvlugulu.” Kukiyuktuglu kikiaktuktaukatautillugik mitautigiyaak allatun.

Jesus tukuyuk

(Mt. 27:45-56; Lk. 23:44-49; Jn. 19:28-30)

33Aahin uvluk kitkanin 3mungaktinagu nuna taakhivaktuk. 343mungagmanlu Jesus nipikuktuyumik ukaktuk “Eloi Eloi lama sabachthani?” Imaatun-ituk, “Godiga Godiga hug kimakpakpinga?” 35Nangekatauyun ilait ukaktun, “Tapfuma Elijah kaitkuyaa.” 36Ilangat tayyainak iptekuktuyumik pivaktuk waintuktitaa mamaitumik mihuktitugu kapumun iligamiuk vinegartuktitaa, ukakhuni, “Tayyagu tautugnaktukhak Elijah kainiangmangan atkaktitkuvlugu.” 37Talva Jesus akhun igialaakami anengnigektuk. 38Ilaa angayyuvikpagyuam talukuyanga aliktuk malguktuni. 39Anguyaktiliglu tunganiituk tautukami, Jesus anengnigengman, ukallaktuk, “Ilumun Godim engnigiyaa tamna.” 40Angnallu aahinin kungniaktun tamainik tapkunanilu hapkua itun, Mary Magdalamiutak, Marylu Jamesim nukakhek, Josemlu angnagik, Salomelu, 41tapkua, Jesus Galileemiitillugu malikpagaat kivgaktukhugu. Allatauk angnat amihun malikpagamitku Jerusalemun taikaniitun.

Jesus iluvektauyuk

(Mt. 27:57-61; Lk. 23:50-56; Jn. 19:38-42)

42Unulengmanlu Upalungayakvium uvlua tikinman, Sabbathinguktinagu, 43Joseph Arimatheamiutak, Jewmiun katimaningata ilangat nangaktauvlunin tapkunanga, aahin Godim atanguvianik negiuktuk, ekhinginami pulaaktaa Pilate tukhiagvigivlugu Jesusim timaanik. 44Pilatem Jesus tukunahagnahugigamiuk anguyaktilik kaitkuyaa apegiyumavlugu. 45Anguyaktilgum uniutimagu tukuvangman, pipkaktaa Joseph timaa pikuvlugu. 46Josephlu kalikumik pigami atkaktitaa timaa ulikhugulu iliyaa iluvengmun havakhimayumun kaektumi-itumun. Kinguagun uyagangmik akhaluakhuni ukuagutiyaa. 47Mary Magdalamiutak, Marylu Josem angnaga, tautuktuk namun iliyauniagmangan.

Currently Selected:

Mark 15: Sperry

Highlight

Copy