Luk 10

Yeesu tomɛ o habɔteŋra fifraanuanɛ dɛ banɛ

1Anɔ habɔɔ la Yeesu yerɛ o habɔteŋra fifraanuanɛ dɛ banɛ bane, dɛ pɛ ba banɛnɛ, dɛ tom ba ŋɔ bá tɔ sie bwɛɛre ne bela waa dɛ ba a ta laŋa la ta.#Mak 6:7-11 2O kpɔ nɛwɛnyini maɡɛ konduula, dɛ ŋɔ ba be ŋɔ, “Koo kondikwaa la kan, kɛ tom-ɛɛra la lɔ tamaa ken dɛɛ ba a koma. Anomanta, hé soŋe Koo Te la ásɛ o kpɔ tom-ɛɛra la bane ba ja bá ka ɛ a toma. 3Hé kaa. N dɛ tomɛ heyaa hé ka koo he dɔma baah ta. 4He bɛ suuɡa pure kpɔ, he bɛ pure haa kpɔ laala dɛɛ do a bini ɡba kpɔ, he bɛ naŋɡawa bele anɛnɛ kpɔ. He bɛ ka jaɡɛ che ŋwɛnɛ ta dɛɛ jam nɛra wobohweeh ne.#Luk 9:3-5

5Dem haa ka choɡ o ta la, hé tɔ sie ŋɔ, ‘Kórowii tɛ dem nɔ tena bosɔɔhna!’ 6Dɛ nɛn Korowii aa ŋɔa o dɔ bosɔɔhna lɔ bela aa, Korowii ɛɛ tɛo wedɛɛɡa haa soŋa laanee. Dɛ ɡɛ nɛn toole ɡe aa, he wedɛɛɡa haa soŋa la ɛɛ berɔɔ ba he ɡbaɡba be. 7Hé so a ɡɛ dem la ta, dɛɛ di ba kondikwaa baa dɛ di dɛ tɛ heyaa la ane, dɛkalkɛŋɔ tom-ɛɛ kembɔr chɛo. A ɡɛ dem la te habɔɔ, he bɛ le ka so dem bɛlbwa ta kpa.#1Ti 5:18

8Bwɛɛ bɛlbwa haa la o ta ásɛ bela tena lɛ heyaa la, kwaa baa tɛ heyaa ŋɔ hé di la, hé lɛ dɛ́ di. 9Hé chah bela tena ba bwara aa dɛ wee ba la weela, ásɛ dɛ ŋɔ ba be ŋɔ, ‘Korowii Kora la pu heya.’ 10Dɛ he la bwɛɛ bɛl ta, ba ta heyaa lɛɛ yaa, he bɛ o ta so. Haa dɛɛ le la, hé ŋɔ, 11‘Hale ya pee he bwɛɛ nɔ teera aa ɛ ya napaala la ta, dɛ baɡle kɛŋɔ ya kpɔ Korowii Waa ba he be he vɛah. Kɛ a chɛ kɛ hé jemɛ kɛŋɔ Korowii Kora la pu heya.’ 12Kasinteŋ, Sodom tena baa ɛ wechɔɡa asɛ Korowii fuuh ba la, baa bɔ ɡɛ bwɛɛ la tenaa awola Korowii aa ba dɛ́ ba pa bole la.

Bwɛɛre a tena aa wola Korowii yaradae

(Mat 11:20-24)

13Korasen tena, hé bwɛɛlɛ! Bɛtsaeda tena ɡe, hé bwɛɛlɛ! Dɛ nomɛl fe ɛ ɡɛ nyokpowaa nɔ maa ɛa he siwi ta nɔ bwɛjena Taaya ne Sidon aa, ba fe charɛ ba liire le ba wechɔɡa ta biɡri. Ba fe ta lweyale tɔe dɛ so sibeɡra ta naa? 14Awola Korowii aa ba pa bole la, wɛɛ na bwɛjena Taaya ne Sidon tena sumii ɡwaa heya. 15Asɛ he Kapeeneɔm tena ɡe, ɛrɛɛ chɛ kɛŋɔ ń bol he waɔ? He dɛ nyin kɛ he ir kaa Korowii be nyundua kɛɛ? Hɛɛ ba harɛɛ Bɔnsam nii taa.”

16Yeesu ŋɔ ba be ŋɔ, “Nomɛlbwa waa ka no he be la, n bee o no, asɛ nomɛlbwa waa ka vɛh he waa la, n waa o vɛh. Nomɛlbwa waa vɛh n waa la, naate waa tom mɛ la waa o vɛh.”

Yeesu habɔteŋra fifraanuanɛ dɛ banɛ bala wa

17Yeesu habɔteŋra fifraanuanɛ dɛ banɛ la la o toma la dɛ ba silɛɛ ne, asɛ ba ne o cheme. Ba ne waa chema la, ba ŋɔ o be ŋɔ, “Ya Dɔɔ, yaa kaa che he sɔn ta dɛ bol waa la, kwaa aa dɛ ir nɛra nɛɛ kwaraa ɔmɛ yaa.”#Mak 16:17

18Belaa Yeesu chaŋ ba ŋɔ, “He pɔ Bɔnsam nɛ. N nao kɛŋɔ waa le nyundua ba le harɛ kerabeŋkpoŋ kɛŋɔ bwaala aa nyɛɡla ken.#Wep 12:9 19Hɛ́ɛ no! N tɛ heyaa kpeɡri kɛŋɔ hé tiɡri harɛkwaare ne nɔrɔme nɛ, dɛ́ pɔ ya dɔm Bɔnsam ne o toroma bwa nɛ, wobɛlbwa aa wola won ɛ heya. 20He bɛ ɡel a do he som kɛŋɔ kwaa aa dɛ ir nɛra nɛɛ aa no he wobol nɔ. Waa aa chɛ kɛ hé koh a waa dɛ́ ɡel he sie lɛ laanee kɛŋɔ bá chwerɛ he sɔna nyundua ja Korowii bii nɛ.”#Fel 4:3

21Gɛ saŋ dɛ Korowii Domadɛɛɡe la ir Yeesu nɛɛ dɛ ɡel o sie lɛ, asɛ o ŋɔ, “N Mɛɛ, nyundua ne harɛ bwa Dɔɔ! N dɛ jaame kɛŋɔ haa kpɔ waa nɔ sɔh sipila tena ne wejerema, dɛ kpɔ baɡle nɛra baa wola wobɛlbwa jemɛ nɔ. Jam, n Mɛɛ. Gɛɛ wera he be.”#Mat 11:25-27; 13:16-17

22Yeesu berɔ ŋɔ, “N Mɛɛ kpɔ wobɛlbwa do n nɔn ta. Nomɛlbwa aa men Korowii Bie jemɛ nemenɛ n Mɛɛ la ɡbo. Gɛɛ nomɛlbwa ɡe aa wola n Mɛɛ la jemɛ nemenɛ n ne nɛra maa dɛ nyin kɛ ń ɡel ba jemɔ la.”

23Yeesu ne o habɔteŋra la ɡbo aa baa so la, o berɛ sie ta ba be, dɛ ŋɔ ba be ŋɔ, “He nɛra he siwi aa na wejena maa dɛ ɛ nɔ la, he na som. 24Kasinteŋ, Korowii keamere ne koranar kɛrɛdɛ fe dɛ nyin waa haa dɛ na dɛɛ no nɔ, dɛ́ no dɛ́ na, kɛ ba ta dɔe.”

Samaria nɛndɛɛɡe sɛɡla

25Tɔnjereme bɛl balɔ dɛ ba kpɔ wobol kɛ wɛɛ daah Yeesuu dɛ́ jemɛ o liire, dɛ bɔɔro ŋɔ, “Nomoa, ɛrɛɛ mɛɛ ba ɛɛ dɛ́ dɔ Korowii mkpa aa wola jaɡa dɔe bwa nɔ?”

26Anee Yeesu chaŋo ŋɔ, “Ɛrɛɛ Korowii Tɔn la baɡle ɔ? Ɛrɛɛ hɛɛ no a mun ɔ?”

27Asɛ baa la ŋɔ, “Dɛ hé nyin N Naa Korowii he bambile bwa, he hweera, he bokpeɡa ne he liire bwa ne,#Mma 6:5 dɛ́ nyin he dɔŋ kɛ he ɡbaɡba.”#Lew 19:18

28Anee Yeesu ŋɔ o be ŋɔ, “Kpelaa he ŋɔ. Dɛɛ ɛ ɡɛ, hɛɛ dɔ ɡɛ mkpa laanee.”#Lew 18:5

29Dɛ Tɔnjereme la dɛ nyin kɛ ó baɡle kɛ o te dɛ ɛ waa Yeesu aa bɔɔra la bwa, dɛ ŋɔ Yeesu be ŋɔ, “Umee n dɔŋ ɔ?”

30Anee Yeesu chaŋo ŋɔ, “Baa bɛlee le Jerusalam dɛɛ kaa Jeriko, dɛ ka pu ŋwɛɛra ŋwɛnɛ baah ta, ba den ɡuɡru, dɛ lɔɔro, dɛ doo bola, tamaa kaa o sewɛ, dɛ laa o laala bwa lɛ o be, dɛ ɡelo o chɔ ŋwɛnɛ baah ta bela dɛɛ ba sewa. 31Dɛ Sɔfo bɛl ɡe kpɔ ŋwɛnɛ la ta dɛ baa kaa, dɛ na baa la, dɛ fɛrɔ ba kaa. 32Dɛ Lewi dea te bɛl waa dɛ ɛ toma Korowii Dea ɡe kpɔ ŋwɛnɛ la tenten ta dɛ ba pu baa la, dɛ ɡe fɛrɔ kaa. 33Dɛ Samaria tena ba ne Juu tena aa wola somɛ la bɛl kpɔ a ɡɛ ŋwɛnɛ la tenten ta dɛ baa kaa, dɛ ba pu baa la, dɛ o chɔ o buɡ ta bela. Waa nao la, dɛ o waa sum o be. 34O choɡ o bone cheɡ, dɛ nyiŋi a bini, dɛ laa noo ne sen#10:34 Noo ne sen la ɛ ŋwɛr tɛɛɡa. ane soo kpɔ dɛ suuh tel o be, dɛ kpɔ noo la ne sen la do o ŋwɛra la ta. O vɔrɔwa, dɛ ɡɔɔro so o konteehne waa soɡe o ta la ta, dɛ kpɔɔ kaa bela dem bɛl hɔɔhra yon dɛɛ choɡ o ta la ta, dɛ ka nyiŋu. 35Tɔ aa pera la Samaria te la kpɔ suuɡapoŋa anɛ tɛ naate waa dɛ nyiŋi hɔɔhra dem la ta la, dɛ berɛ ŋɔ o be ŋɔ ó nyiŋi weela te la nɛ, dɛ ŋɔ wɛɛ berɔɔ ba ja, ásɛ dɛ ba bɔɔ komɛlbwa waa chɔɡ o nɛɛ la kem.”

36Yeesu aa bol waa nɔ tonɛ la, o bɔɔ Tɔnjereme la ŋɔ, “Nɛra batoro nɔ, ba bini umee nyiŋi baa la ŋwɛɛra aa lɔɔro dɛ doo bola la kɛŋɔ o dɔŋ ɔ?”

37Belaa Tɔnjereme la chaŋe ŋɔ, “Onɔ la waa na o sum dɛ nyiŋu laanee.” Anee Yeesu ŋɔ o be ŋɔ, “Kaa dɛ kaa ɛ ɡɛ tenten.”

Yeesu la Maata ne Mɛɛre dem

38Yeesu ne o habɔteŋra la aa dɛ kaa la, ba kaa tel bwɛɛ bɛl ta, belaa haah bɛl baa dɛ yerɔ Maata lɛo dɛ kaa o ne o dem.#Jɔn 11:1, 5 39Dɛ Maata dɔ o nime bihaah bɛl baa dɛ yerɔ Mɛɛre. Dɛ ɡɛ Mɛɛre nɔ, dɛ o soɡe Yeesu be dɛɛ no o webaɡla la. 40Dɛ Yeesu ne o habɔteŋra la kondikwaa toma ɡwaa Maata nɛ, anee o la Yeesu be dɛ ka ŋɔ, “N Dɔɔ, he ta nae kɛŋɔ n nime aa kpɔ toma la bwa ta n ɡbo nɛ aa? Anomanta, ŋɔ o be ó ba cha mɛ!”

41Anee Yeesu chaŋo ŋɔ, “Ei, Maata! Wedamanta beɡre he sie, a lɛ he liire bwa. Kɛ webeŋkpoŋ ɡee hiaah. 42Waa aa weraa Mɛɛre kpɔ la, anomanta, maa won ŋɔ o be ŋɔ ó ɡel.”

Currently Selected:

Luk 10: mzw

Highlight

Copy