Luk 23

Ba lawɛ Yeesu ba che Paelet sie

(Mat 27:1-2, 11-14; Mak 15:1-5; Jɔn 18:28-38)

1Nɛra la taɡɛ ba kane ta dɛ ir, dɛ kpɔɔ la harɛ nomoa Paelet be, 2dɛ ka haŋɛ o nyoa ŋɔ, “Ya lawɛ baa nɔ kɛ waa dɛ chɔɡ ya harɛ. O dɛ do nɛra dochɔɡa ŋɔ ba bɛ toɔ bɔ dɛɛ tɛ Rom Koojen Siisa kpa, dɛ berɛ dɛɛ ɛ o te ya Juu tena kooro Kristo la Korowii aa baɡɛ yaa nyoa ŋɔ wɛɛ ɡeloo o ba ba lɛ yaa la.”

3Anee Paelet bɔɔ Yeesu ŋɔ, “Henee Juu tena kooro ɛ?”

O ŋɔ, “Anee he bol la.”

4Asɛ Paelet ŋɔ Sɔfonomonome ne nɛnlaa baa cheme o sie la be ŋɔ, “N ta wechɔɡa baa nɔ aa ɛa nae.”#1Pi 2:22

5Dɛ nɛra la nyoa ta kpeɡri, ba bol ane dɛɛ dawɛ Yeesu ŋɔ, “O kpɔ o webaɡla dɛɛ chɔɡ nɛra liire Juu tena harɛ bwa ta taraken. Galilia harɛ taa o pa mun, dɛ kpɔ ba le bonɔ!”

Ba la Yeesu ne Hɛrɔd sie

6Paelet aa no ɡɛ la, o bɔɔ ba ŋɔ, “Galilia tee yaa?” 7Baa bola ŋɔ Galilia tee la, dɛ Hɛrɔd waa ɛ Galilia kooro ɡɛ saŋ la ba Jerusalam, asɛ o ɡel ba kpɔɔ la o be.

8Waa na Yeesu la, dɛ o sie lɛo taeh. Waa no o waa dɛ fe ɛɛ nyinu o ɛ nyokpowaa ó na biɡro, anomanta, dɛ o dɛ nyinu dɛ́ na.#Luk 9:9 9Kooro Hɛrɔd bɔɔro waa taeh, asɛ o mwaa o ne. 10Belaa Sɔfonomonome ne Tɔnjerema la bol waa takpeɡ ne dɛɛ dawɛ o nɛ. 11Asɛ Kooro Hɛrɔd ne o soojare ɛɛ muɡli o baah dɛɛ mamɔ, dɛ ka kpɔ koowur ba doo dɛ berɛ kpɔɔ ka tɛ Paelet. 12Dɛ Kooro Hɛrɔd ne Paelet fa aa somɛ, kɛ le awola tɔpere la, ba kpɔ darame.

Ba ŋɔ a chɛ kɛ bá kpo Yeesu

(Mat 27:15-26; Mak 15:6-15; Jɔn 18:39—19:16)

13Paelet yerɛ bela tena ne Sɔfonomonome ne bwɛɛ nomonome ba cheme, 14dɛ ŋɔ ba be ŋɔ, “Heyaa lawɛ baa nɔ ba n be dɛ ŋɔ o dɛ do nɛra dochɔɡa ŋɔ bá lɛ ɡaeh harɛ nɔ ta. N bɔɔro a bini he bwa siwi ta bonɔ dɛ na kɛŋɔ o ta wechɔɡa ɛɛ. Kpɔe he kpɔ waa la dɛɛ dawɔ. 15Gɛɛ Kooro Hɛrɔd ɡe aa wola wechɔɡa bɛlbwa o nɛɛ nae dɛ berɛ kpɔɔ ba tɛ yaa. Wobɛlbwa ta baɡlɛ kɛŋɔ yá kpoo. 16Kɛ mɛɛ ɡeloo bá lɔɔro bampɔrɔ ŋwɛɛra ne dɛ́ kpɔɔ ta.” 17Dɛ ɡɛ ba tɔpejen baa dɛ yerɔ Galekaa la we-ɛɛla aa doa la, o telaa, ba yon le wechɔɡ-ɛɛra baa do ba dea la beŋkpoŋ ta ó kaa.

18Belaa nɛnlaa la bwa kpɔ takpeɡ ŋɔ, “Kpoo! Le Barabas ta ó kaa!” 19Gɛ Barabas nɔ ɛ nomɛl waa ja waane ba fa aa ir a ne bwɛjen la ta, dɛ vuuɡi Rom Koojen nomonome ba fa aa dɛ nyiŋi ba harɛ la ta, asɛ dɛ kpoo nɛra ɡe ja, asɛ ba lawɔ ka do dea.

20Paelet bambile bini la, dɛ o dɛ nyin kɛ o ɡel Yeesu o kaa, asɛ o berɛ bol waa baɡle nɛnlaa la ja. 21Ane a bwa, ba ta noɛ, dɛ kpɔ takpeɡ ŋɔ, “Kpaaro pɛl daɡaɡre ta! Kpaaro pɛl daɡaɡre ta!”

22O bɔɔ ba toorotena ŋɔ, “Wechɔɡa besoo o ɛɔ? N ta wechɔɡa waa ɛa a chɛ kɛ ba kpoo nae! Mɛɛ ɡeloo bá lɔɔro chweema ne dɛ́ kpɔɔ ta.”

23Dɛ ɡɛ baa dɛ bol la taa ba ta do, dɛ kpɔ takpeɡ dɛɛ ŋɔ o chɛ kpaara pɛl daɡaɡre ta. Ba nyoa baa ɡwaa Paelet nɛ, 24asɛ o sɛh ɡɛ baa dɛ nyin tɛɛ ba, dɛ kpɔ waa la dawɛ Yeesu nɛ. 25Paelet le baa la waa ja waane ba fa aa ir a ne dɛ vuuɡi Rom Koojen nomonome, dɛ kpoo nɛra ba doo dea la ta o kaa, asɛ dɛ kpɔ Yeesu tɛɛ ba ŋɔ bá ka ɛo ɡɛ bwa baa dɛ nyin.

Ba kpaa Yeesu pɛl daɡaɡre ta

(Mat 27:32-44; Mak 15:21-32; Jɔn 19:17-27)

26Soojare la aa kpɔɔ dɛɛ kaa dɛ́ ka kpoo la, ba kaa cheme Seemɔn. Sairini tee. Dɛ o le koo dɛɛ ba, asɛ soojare la lawɔ dɛ lɛ daɡaɡre Yeesu aa cheɡɔɔ la, dɛ ɡel Seemɔn cheo teŋɛ Yeesu nɛ. 27Dɛ nɛnlaa tenten teŋɛ o nɛ, ba bini bane ɛ haahna dɛ kpɔ nɔɔra dawɛ nyu dɛɛ dooɡe lɔŋɔre dɛ wi dɛɛ tɛo. 28Asɛ Yeesu berɛ o te dɛ ŋɔ, “Jerusalam haahna, he bɛ wi tɛ mɛ. He wi tɛ he te ne he bii, 29dɛkalkɛŋɔ tɔpere bɛl dɛ ba bala ásɛ he ŋɔ, nɛra baa wola lolɛ bwa ne banɔ la baa wola bii ɔrɛ bwa la na som. 30A ɡɛ saŋ nɛra ɛɛ ŋɔ

bwejena ne deŋɡarere bee ŋɔ,

‘Hé choɡli tɔ ya nɛ.’#Hos 10:8

31Da-lwɛɛ dɛ fuh aa, dahole te ta pɔeh yaa?”

32Soojare la kpɔ wechɔɡ-ɛɛra banɛ bane ja Yeesu nɛɛ dɛɛ la ka kpoo ba. 33Ba kaa tel bobɛl baa dɛ yerɛ bela Nyuhoɡ Bɔr. Belaa ba kpaa Yeesu pɛl daɡaɡre ta, dɛ kpaa wechɔɡ-ɛɛra la ɡe pɛl daɡaɡra ta, dɛ kpɔ bɛl pa Yeesu diɡ ta, bɛl ɡe pa o ɡal. 34Yeesu ŋɔ, “N Mɛɛ, kpɔ ba wechɔɡa kɛ ba. Baa waa baa dɛ ɛ nɔ jemɛ.” Soojare la kpɔ o laala bil dɛɛ ta chacha ŋɔ naate waa di la, ó kpɔ onɔ la waa dɛ nyin.

35Nɛnlaa cheɡɛ bela dɛɛ nyiŋu. Juu tena nomonome muɡli o baah ŋɔ, “Kɛ he wono lɛ bane oo? Dɛ he ŋɔ henee Kristo la Korowii aa leo la aa, lɛ he te yá na!”

36Gɛɛ soojare la ɡe mamɔ dɛ muɡli o baah, dɛ tuuh tel o jwɛh, dɛ kpɔ sennyɛɡa tɛo ŋɔ ó nyɔ, 37dɛ ŋɔ, “Dɛ he ŋɔ henee Juu tena kooro la aa, lɛ he te!”

38O nyunduabɔr daɡaɡre la ta la, ba chwerɔ ka pɛl bela ŋɔ, juu tena kooro laanee la.#Jɔn 19:19-22

39Wechɔɡ-ɛɛra baa ja o nɛɛ la bɛl bol waa yaɡɔ ŋɔ, “He laa Kristo la kɛɛ? Lɛ he te dɛ́ lɛ ya ɡeo.”

40Asɛ nɛɛte la aa jaa la kaoh ŋɔ, “Jamɔ haa Korowii ɔmɛ kɛɛ? Gɛ baa ɛ yaa nɔ, ɡɛɛ ba ɛ o ɡe. 41O te kwara wechɔɡa bɛlbwa toole o nɛ. Kɛ ya te, waa yaa ɛa la, kenii a chɛ kɛ ya na.”

42Dɛ ŋɔ Yeesu be ŋɔ, “Yeesu, he baa di he kora aa, ásɛ he lii n wa.”

43Anee Yeesu chaŋo ŋɔ, “Kasinteŋ, hale fini, hɛɛ ja n nɛɛ nɛndɛɛɡa silɛɛ bwɛɛ nyundua belaa.”

Yeesu seo wa

(Mat 27:45-56; Mak 15:33-41; Jɔn 19:28-30)

44Wee aa baa che nyubaah la, bɔr biro jumaa ken dɛ ka tel wekee saŋ, 45asɛ yal baa kpɔa teŋe Korowii Dea bini la baah pere anɛ. 46Yeesu kpɔ takpeɡ do lɔŋɔ dɛ ŋɔ, “N Mɛɛ, he nɔn taa n lileo do!”#Yel 31:5 Waa bol ɡɛ tonɛ la, o doma le, o sewɛ.

47Sooja nomoa waa lɔ bela dɛ na waa aa chiɡa la, o ŋɔ, “Kpelaa, wechɔɡa toole baa nɔ nɛ,” dɛ kpɛɛ Korowii. 48Nɛra baa bala dɛ ba nyiŋi la loo kuu, ba kpɔ nɔɔra dawɛ nyu dɛ kaa dem. 49Kɛ nɛra baa jemɔ kɛrɛdɛ la ne haahna baa teŋɛ o nɛɛ dɛ le Galilia harɛ la te ta cheɡɛ bojaŋ dɛɛ nyiŋu.

Yeesu huɡa wa

(Mat 27:57-61; Mak 15:42-47; Jɔn 19:38-42)

50Dɛ baa bɛl sɔne Josef, o ɛ Juu te dɛ le Arimatea. Dɛ o ja nomonome baa bol Yeesu waa la nɛ, dɛ o dɛ ɔmɛ Korowii dɛ ɛ nɛndɛɛɡe, 51dɛɛ kpa saŋ la Korowii aa di Kora dɛ́ lɛɛ ba la. O te fe ta sɛɛh teŋɛ ba nɛɛ kɛ bá kpo Yeesu. 52Gɛ baa la la Paelet be dɛ ka soŋe Yeesu lale, 53dɛ lao kpɔ le daɡaɡre la ta, dɛ kpɔ yapoŋ baaɡo dɛ kpɔɔ ka bil bwebɔɔ baa komɔ kɛŋɔ dea bini. Dɛ ba ta lale kpɔe do o bini bwa. 54Dɛ awola ɛ Fiara, asɛ baa kpɔ ba te dɛ́ di Ona Tɔpere la.

55Haahna baa teŋɛ Yeesu nɛɛ le Galilia harɛ la, la bwebɔɔ la ta, dɛ ka na bela ne ɡɛ baa kpɔ lale la bil bɔɔ la bini. 56Asɛ ba berɛ kaa dem, dɛ ka ɛ kwaane a sɔɔh aa soma dɛɛ ba kpɔe ka ɛ lale la. Ona Tɔpere la, ba onɔ ɡɛ Mmara la aa baɡla la.

Currently Selected:

Luk 23: mzw

Highlight

Copy