Attus 6
6
Ntewnehker gikebikis kaniyka adahan igkis hiyekne gikakkis Jesus gihiyegavu
1Avimnewa ini ku samah igkis Jesus gihiyegavu kibihwenes igkis kavusa awnptawbet. Neras ku pariye awna gresiyenevwi giwnavrikkis igkis awnptebdihe neras ku pariye awna judeyenevwi giwnavrikkis. Neras ku pariye awna gresiyenevwi giwnavrikkis igkis awna:
— Mpuse hawkri axka ibakhaka guvuwiwkis tinogben madankunovwi. Norasme ku pariye awna judeyenevwi giwnavrikkis mmahki egkis kiyekante? Ke wothube egkis ku pariye awna wownavrik egkis ikaka aritnahyuvwi gutkis.
2Ig Kiyavwiye Jesus giwatnivwi igkis timep gakkis hene, igkis pahadguhe madikte Jesus gihiyegavu. Igkis awna gitkis:
— Ka kis adahan usuh miniw ariw wakkan Kiyavwiye Uhokri giwn adahan usuh he ibekhenen axka givuriwkis hiyeg.
3Nikwe nukebyuvwi, hiyawa yis kaniy awaykemni ntewnehker gikebikis yibetitak ku pariye yis kiyatha. Kaniynabay awaykemni ku pariye gitiphewnene Kiyavwiye Uhokri. Kaniynabay awaykemni ku pariye hiyakemniye akak Uhokri gihiyekemni. Ayteke nikwe usuh iki giwakuritkis adahan igkisme hiyeknes gikakkis Jesus gihiyegavu ku pariye kamawkanyevwi.
4Usuhme avanenekwa usuh piriyepkewnene. Avanenekwa usuh ekkenene Kiyavwiye Uhokri giwn.
5Madikte igkis Jesus gihiyegavu igkis timapni hene, igkis ameve inakni giwnkis. Igkis bateke nikak. Igkis awna:
— Uyay kaniy awaykemni ntewnehker gikebikis.
Ayteke nikwe igkis kaniye amekene Estevawh. Ig amekene Estevawh gitiphewnene Kiyavwiye Uhokri. Ig ka aynsima gikamaxwan givitit Kiyavwiye Jesus. Ayteke igkis kaniye Filip gikak Prókoru, Nikanor, Timoh, Parmenas. Hawata igkis kaniye Nikolaw. Ig Nikolaw ariwntak paytwempu Antiyokiya. Ig hiyeg ku pariye kane judeyenema heneme ig ihpa judeyenevwi gihiyekemnikis.
6Pisenwa gikanyankis, igkis waxwe neras awaykemni ntewnehkernene gikebikis givetunatkis Kiyavwiye Jesus giwatnivwi. Igkisme Kiyavwiye Jesus giwatnivwi piriyepkew gidahankis. Ayteke igkis sarayhe giwakkis givititkis adahan igkis ikenes ini gannivwikis gitkis adahan igkisme hiyeknes gikakkis Jesus gihiyegavu ku pariye kamawkanyevwi.
7Ariwnteke ini Kiyavwiye Uhokri giwn ibekhewvi muwapuw givuwiwkis hiyeg. Igkis Jesus gihiyegavu ayge Jerusalém igkis ka aynsima kibihwe akiw. He ka aynsima muwveg igkis hawata kamaxwe givitit Kiyavwiye Jesus avim ini.
Estevawh kamaxwika
8Ig amekene Estevawh ig ka aynsima gikamaxwan givitit Kiyavwiye Jesus. Kiyavwiye Uhokri gannu ay givit. Ayge nikwe ig keh ka aynsima annut ku pariye hiyeg amadgaya inin ka hiya nikehka. Ig keh madikte hiyeg wakaymni.
9 Gaytakisme hiyeg hiyapni hene, igkis kavetunsevgi. Gaytakis ariwntak judeyenevwi gileglisakis ini ku pariye kewye “Bukitwiyevwi Isahkiska”. Gaytakisme sireneyenevwi, gaytakisme alixandriyenevwi, gaytakisme ariwntak Silisiyamnaw, gaytakisme ariwntak Asiyamnaw. Igkis danuh atere git amekene Estevawh, igkis iniyeke gikak.
10Igme kaytwa giwnkis akak Kiyavwiye Uhokri Gitip gannu. Ig awna akak kibeyne hiyakemniki. Igkisme ka hiya adiyasak ginetni.
11Igkis hiyapni hene, igkis katiwnihe aynesa awaykemni adahan ignesme mbeyhenes giw amekene Estevawh muwapuw. Igkisme awaykemni hiyapni hene, igkis wasaymeptihpig. Igkis awna:
— Usuh timap ig Estevawh ig mbeyhene amekene Moís giw. Hawata ig mbeyhene Kiyavwiye Uhokri giw.
12Henneki igkis awaykemni gamiyasepten amekene Estevawh gitkis hiyeg, gitkis neras judeyenevwi giwewkistenkis, gitkis neras kannuhekevutnevwi amin amekene Moís gikumadukan. Igkisme hiyapni hene, igkis kamaykiswig. Igkis waxwasevgi givetunatkis gikivarakis ku samah ignes kehne givahdukawnikis.
13Ig danuh atere, ayge igkis waxwase nawenyevwi hiyeg atere akiw adahan ignesme wasaymaptihne ig. Igkis hiyeg awna wasaymkanen. Igkis awna:
— Ner awayg Estevawh ig avanenekwa suguhnenekwa uleglisawiy Kiyavwiye Uhokri Givin. Ig avanenekwa suguhnenekwa amekene Moís gikumadukan.
14Usuh timap ig awna ku Jesusmin Nazaréyene mehbetenek inin payt Kiyavwiye Uhokri Givin. Hawata ig wagesnek uhiyekemniwiy ariw amekene Moís gihiyekemni.
15Madikte neras hiyeg batebdebdihpiye ayge igkis timapni hene, igkis ivegbet gimkat amekene Estevawh. Igkis hiyap gihepka kewa pahavwi ahjbe gihepka ay gibetkis.
Currently Selected:
Attus 6: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
