Joawh 12

Mahi imiha Jesus

Mt 26.6; Mk 14.3

1Puguhkuna hawkri avit ini fet danuh, ig Kiyavwiye Jesus danuh avitit paytwempu Betaniya. Ayge guvinkis Mahi gukak Marta gikak Lazaru, ku pariye ig Kiyavwiye Jesus kannikase ariw gimiremni.

2Ayge hiyeg kehe axka adahan kiyathene Kiyavwiye Jesus. Eg Marta kuwegwano gidahankis madikte hiyeg ayge. Igme kiyavwiye Lazaru ayge gikakkis neras ku pariye ahumwenevwi axtet gikak Kiyavwiye Jesus.

3Egme Mahi avim ini eg awna:

— Kiyavwiye Jesus kennesa gimiremni. Nah imihevgite.

Eg iwe abusku lit imihgi kehka akak “nardu” inyekata. Ini imihgi ka nitiwnisima. Ayteke eg dimukwin gikugkavrikut Kiyavwiye Jesus. Ayteke eg manpuse gikugku akak gusemnu. Ini imihgi amihyi kivunse payt.

4 Pahavwi awayg ayge ig hiyapni hene, ig ka batek. Igwata Kiyavwiye Jesus gikannuhni ke usuhbe. Ig amekene Simawh gikamkayh Judas Iskariyotismin. Igi ku pariye gikamaykiswitmet Kiyavwiye Jesus gitkis givetunyavu. Ig awna:

5— Inin imihgi ka nitiwnisima. Ikkam adahan in piyukwika adahan ka aynsima karukri, mpanamku madikawku madikwa (300) karukri. Mmahki eg sarayhpin waditnevyenen hene? Mmahki eg ka ikepni wotwiy? Ikkam adahan in piyukwika adahan akakuravig ibekhepka givuwiwkis madiptavye.

6Ig awna inakni hene ke wotbe ig batek gikakkis madiptavyebe. Bawa kawa. Ig awna hene awaku ig amepye. Ig avuriwkevutne ukakura hawata ku kariwntak ig gibetki wiwh.

7Igme Kiyavwiye Jesus hiyapni hene, ig awna git:

— Maytwangu. Eg darihe inin imihgi adahan nahegbetepten adahan nah avuhpiki.

8Hiyawa avanenekwa yis avuriw madiptavye. Heneme nahme ka misekwevyema ay yibet avanenekwatma adahan yis navuriwten.

Muwveg kiyatyevwi giwmasepten Lazaru

9Ayteke ariwnteke ini ka aynsima hiyeg kinetni Kiyavwiye Jesus gak ku ig ayge avit Betaniya. Igkis kinetni hene nikwe igkis atere giyawaswetni. Igkis hawata giyawaswetni Lazaru, ner ku pariye Kiyavwiye Jesus kannikase ariw gimiremni.

10Mmanawa neras muwveg kiyatyevwi kuwis ahegbete ginetnikis adahan igkis giwmasepten Lazaru hawata.

11Mmanawa ka aynsima judeyenevwi giwewkistenkis miniw giwkis adahan kamaxwevye givitit Kiyavwiye Jesus awaku ku samah ig kannikase Lazaru ariw gimiremni.

Jesus parak avitit Jerusalém

Mt 21.1; Mk 11.1; Lk 19.28

12Hewke akiw ka aynsima hiyeg fetyavu ayge Jerusalém igkis kinetni Kiyavwiye Jesus gak ku ig nehmnik atere.

13Igkis timapni hene, igkis awna:

— Uyay amavig kabayntiwa. Uyay barewha ahin gavit pitati akak ahamna.

Igkis iwe ahamna ahivak ke kariktimnabe, igkis pes patiptakig. Igkis kabiman akak gibetkikis. Igkis awna:

— Kibeyne gidahan Kiyavwiye Uhokri. Kiyavwiye Uhokri gabay gikaknek ner ukivarawiy ku pariye ayta giwavrik Kiyavwiye Uhokri.

14Igme Kiyavwiye Jesus ute pahavwi kawayan “jumentu”. Ig sarayhwe giduhyamadgat. Mmanawa Uhokri gannasan kinetihwa hene gimin.

15Inakni gannasan awna:

“Yis hiyeg siyawhyenevwi, ka ba yi barukinama. Sarayhnay yivegyi. Yikivara nehmnik ig. Ig bete giduhyamadga pahavwi kawayan “jumentu”.

16Avim ini hawkri gikannuhnivwi ka pukuha ku inakni iwit kinetiwha gimin ignewa Kiyavwiye Jesus. Heneme ku aysaw ig wagehe inurikut ku kiney ig kiyathaka, avim ini usuh kiye inakni iwit amadga Uhokri gannasan. Ayge usuh pukuha ku usuh keh gikak Kiyavwiye Jesus avigkutavrik ku samah Uhokri gannasan.

17Neras hiyeg ku pariye ayge ku kiney Kiyavwiye Jesus kannikase Lazaru ariw gimiremni ig humakgi arikutak gimew, igkis kinetihwe amin ini gidahan Kiyavwiye Jesus.

18Ka aynsima hiyeg timapni hene ku samah ig kehe ini annut, igkis hawata atere patiptakig.

19Neras farizewkis hiyapni hene, igkis kinetihwa pawtak. Igkis awna:

— Ka ba yis hiyap ku samah igkis hiyeg ka ihpa wownwiy? Madikte hiyeg atere gimkat adahan igkis kamaxwevyes givitit.

Amawka wixwiy miyehe uhiyekemniwiy amadgaya inin

Mt 10.37, 16.24; Mk 8.34; Lk 9.57, 14.26, 17.33; Ro 15.1; 1Ko 10.23; Gal 5.24; Fil 2.4; 1Ped 4.1

20Gaytakis neras fetyavu ku pariye ayta kiyathenes Kiyavwiye Uhokri atere, gaytakis avititak waxri Gresiyamnaw. Igkis ka judeyenevwima.

21Igkis danuh git Filip ku pariye ariwntak paytwempu Betsayda avititak Galileyamnaw. Igkis awna git:

— Kiyavwiye, usuh ayta kinetihwekerevye gikak Kiyavwiye Jesus.

22Ig Filip timapni hene, ig tivik ewk ginetnikis git Andre. Ayteke igkis piyamate tivik akkin git Kiyavwiye Jesus.

23Igme Kiyavwiye Jesus hiyapni hene ku hiyeg kane judeyenevwima mpiksewne giharit, ig kaytwa giwnkis:

— Kuwis nuhawkanavrik danuh adahan Nah, ku pariye wageswe awayg amadgaya inin, adahan nah kawih nukiytani.

24 Amawka nah miya nah kannikaw akiw kahadbe ka aynsima hiyegviyene aymuhwa gimun Uhokri adahan avanenekwa. Ihanabay inakni nuwnuh. Henewatbaki in. Nah kewa pohow amutri ayakbe. Ku amutri ayak ka mutuhka, eg ka hiya egma keb. Amawka ku eg mutuhka waykekut eg batekwe eg hiyan. Ayge nikwe eg tarakwa nukuno eg sarayh guw ka aynsima. Amawka nuhiyegavu wew akak akebi ini nuhiyekemni. Amawka igkis umahkise gihiyekemnikis amadgaya inin adahan nukunewa tarakwa akiw. Ayge nikwe ka aynsima hiyeg aymuhwanek gimun Uhokri.

25Ku pahavwi ka miniwkere ariw gihiyekemni amadgaya inin, igi biyuk akak gaymahwanek giwntak Uhokri. Heneme ku pahavwi miniw ariw gihiyekemni amadgaya inin nudahan, igi darih gaymahwan giwntak Uhokri adahan avanenekwa.

26Ku ig wew akak akebi ini nuhiyekemni, ig misakwanek ku kiney nah misakwa. Mmanawa ku pahavwi keh nubetki, igi Niguh kiyathasig.

Uhokri awna git Jesus ayta inuriktak

Mt 3.17, 17.5

27Ayteke ig Kiyavwiye Jesus awna akiw. Giwn:

— Kuri nah kayah avititak nuyakni avatra ini mbeyne nehmnikuhpiye numkanit. Heneme nah ka ayap git Niguh adahan ig avuriw nuvituh ariw ini mbeyne. Nah ayta atan adahanikwa nah hiyepne ini mbeyne.

28Pa, Niguh, nah he muwaka pis kiyathasa piw.

Ku samah ig awna inakni iwit, nikwenewa pahat ikuvimnat awna git ayta inuriktak. In awna:

— Kuwis nah kiyathasa nuwhu. Aysawnemenek nah kiyathasin akiw.

29Neras hiyeg tabirbetnenevwi ayge, igkis timapni ini ikuvimnat hene, igkis awna:

— Digidgiye.

Igkisme gaytakis awna:

— Pahavwi ahj awnane gikak.

30Igme Kiyavwiye Jesus awna:

— Inakni ku pariye yis timap, inakni areketni yit ku Uhokri kuwis timap nuviryepkawni. Ig ka awna hene adahanma nah hiyakni heneme adahan yis hiyakni.

31Kaba ahawkanavrik danuh adahan neras ku pariye kane Uhokriyanvuma gihiyekemnikis hiyekepka ku in ka waditnema. Kuri gikivarakis gihawkan me wanekbetepkamet.

32Ku samah nah ikepka inut aminat ah nah kah madikte hiyeg ayta numkat adahan igkis kamaxwevye nuvitit.

33Ig Kiyavwiye Jesus awna inakni hene, ig ekkene ku samah ig umahkiswa amin giyakninek.

Wewnabay abet Jesus gibutni

Jo 1.4, 3.19, 8.12; Ef 5.8; 1Tes 5.4; 1Jo 1.5

34Neras hiyeg timapni hene, igkis awna git:

— Mmah pimiremninek? Ekkepka wotuh amadgatak Uhokri gannasan ku Uhokri gikanyan adahan ukumaduketni ig misakwa adahan avanenekwa. Pis ikewne ku pis wageswe awayg amadgaya inin. Nikwe wotuh pis ner Uhokri gikanyan. Mmah nikwe pis awna ku amawka ku pis ikepka inut aminat ah? Pariyekap pis ku pariyene wageswe awayg amadgaya inin? Ba pis ka Uhokri gikanyanwatma adahan ukumaduketni?

35Igme kaytwa giwnkis:

— Yis kote pukuhpate inakni nuwnuh heneme aysawnemenek yis pukuhpinek. Ku samah kamuw gibutni uguh hawkri puwivwak in keh hiyeg hiyap, nahme uguh yihiyekemni adahan yis hiyak ku pariye hiyakemniki inyewatnene. Nah ka ayivwi ay yikak akiw. Ku samah nah aynete, amavanabay nuwnuh, wewnabay abet ini nubutni kahadbe amisnavye ka misanpi yihiyekemni. Ku pahavwi wew abet amisnavye, ig ka hiyak ku kit ig wew.

36Ku samah nubutni aynete yibet, kamaxwanabay nivitit kahadbe yihiyekemni ke wotbe in kabutennebe.

Pisenwa gawnan inakni ig ayguhwe giwkis.

Hiyeg ka kamaxwa givitit Jesus

Iz 53.1; Mt 13.33; Mk 6.1; Lk 4.16; Ro 10.16

37Hiyawa ig Kiyavwiye Jesus keh annut ka aynsima ay giwtrikkis hiyeg, heneme ka madiktema hiyeg kamaxwa givitit.

38Hene in danuh ku samah Uhokri gawneve amekene Izaíyas giwn. Ig awna:

“Kiyavwiye, yuma hiyeg iha unetni pimin. Igkis mahikohe pannu.”

Henewatbaki ig amekene Izaíyas awna.

39Ayge nikwe ku samah igkis mahikohkere gannu igkis ka hiya igkisma iha wownuh. Ig amekene Izaíyas hawata kinetihwa amin ini gihiyekemnikis. Giwn:

40“Kiyavwiye Uhokri sabukkise giwtyakkis marihwa igkis ka hiyap ku pariye hiyakemniki inyewatnene. Ig dahkise gihiyekemnikis marihwa igkis ka pukuha ku pariye hiyakemniki inyewatnene. Wake ka henema, igkis wageskam gihiyekemnikiskam igme makniwigkiskam.”

41Ig amekene Izaíyas awna inakni hene awaku ig kuwis hiyap ku samah Kiyavwiye Jesus igyewa ka gikiytanisima. Inneki keh ig awna inakni hene gimin.

42Gaytakisme hiyeg ihe Kiyavwiye Jesus giwn he igkiswa gaytakis uwewkisten. Heneme igkis ka ekkewkere ku igkis kamaxwa givitit awaku igkis avisemun gibohrikis neras farizewkis. Igkis avise ku nawenetke igkis ka isaksaka parak arikut leglis akiw.

43Nikwe igkis ka ekkewkere. Gitkis pi kabayte hiyeg amadgaya inin kiyatigkis mpinekata igwa Kiyavwiye Uhokri kiyatigkis.

Jesus ekkene ku pariye Gig gakkan git

De 18.18

44Ig Kiyavwiye Jesus awna gitkis hiyeg akiw. Giwn:

— Ku pahavwi kamaxwa nuvitit, amun ini nikwe ig hawata kamaxwa givitit ku pariye nawahkisten atan amadgat inin. Usuh pahavwiwa pawtak.

45Ku pahavwi hiyavun, amun ini ig kuwis hiyap nawahkisten hawata. Uwewni pahatwowa.

46Nah kewa paha abukribe. Nah ayta amadgat inin uguhne hiyeg gihiyekemnikis kahadbe neras ku pariye kamaxwevyes nuvitit ignes ka misakwa ke wotbe abet amisnavyebe.

47Yaytak timap nuwnuh heneme yis ka iha inakni nuwnuh. Kawki nahnema katiwnise ini yitaraksan yitnek. Nah ka ayta atan adahanma katiwnisene hiyeg gitaraksankis gitkis. Nah ayta gamnihtenkis.

48Ku pahavwi nutukepten, ku ig ka amava nuwnuh, ay pahat arikna ku pariye katiwnise gitaraksan gitnek. Inakni nuwnuh ku pariye kuwis nah ekke yit, ini katiwnise gitaraksan git aysawnemenek amaksemni hawkri.

49Mmanawa nuwnuh ka nuwnteknewatma. Niguh nawahkisten igi akki nutuh iwit ku pariye adahan nah awna. Ig akki nutuh ku kamin adahan nah kinetihwa.

50Nah hiyakni ku pariye hiyeg iha giwn ignes aymuhwa gimun Uhokri adahan avanenekwa. Nikwe ku pariye nah kinetihwa yit, nah awna ku pariye ig Niguh gakkan nutuh.

Currently Selected:

Joawh 12: pluPB

Highlight

Copy