Joawh 14
14
Ka aynsima iwetrit aynte gimun Uhokri
2Ko 5.1; 1Tes 4.17; Eb 10.34, 11.10,16, 12.22; 1Ped 1.4; 2Ped 1.11; Ap 7.13, 21.1, 22.1
1Ayteke ig awna gitkis akiw:
— Ka yi muwaka barukiswa nuharit. Ka yi muwaka avis. Kamaxwanabay givitit Uhokri. Kamaxwanabay nuvitit hawata.
2Ka aynsima iwetrit aynte gimun Wigwiy. Wake yuma iwetrit aygebe, nikwekam nah ka awnakam inakni hene. Nah atak ahegbetevye yiwetri yavit.
3Ku yis hiyap nah tivik ahegbetevye yiwetri yavit, atannewa nah diyuh akiw adahan yiwepten aterenek kahadbe ku kiney nah misakwa aygwata yis misakwa.
Nahnewa ahin git Uhokri
At 4.12; Ro 5.2; Ef 2.18, 3.12; Eb 10.20
4Ayteke ig awna:
— Yis kuwis hiyak ahin adahan yis danuhne ku kitwiye nah.
5Ig Tome timapni hene, ig awna git:
— Kiyavwiye, usuh ka hiyak ku kitwiye pis. Mmah ahiyaka ahin wotuh?
6Igme Kiyavwiye Jesus kaytwa giwn:
— Nahnewa ahin keh yis danuh git Uhokri. Nahnewa hiyakkis Uhokri gihiyekemni inyewatnene yit. Nahnewa keh yis aymuhwa gimun Uhokri adahan avanenekwa. Wake ka nahma, yumahkam hiyeg danuhne git Wigwiy. Nahnewa ku pariye ahin atere git. Yuma nawenyewa ahin akiw.
7Ku yis hiyapkun, amun ini yis kuwis hiyak Wigwiy hawata. Kuri aytakihan yis hiyakgi, yis hawkamnihwanek yis kiye ku yis kuwis hiyavgi.
Nah pahavwiwa gikak Uhokri
Jo 1.1, 10.30; Fil 2.6; Kol 2.9; Ap 1.17
8Ig Filip timapni hene, ig awna git:
— Kiyavwiye, uya akki Wigwiy wotuh. Ignewa usuh hiyepkere.
9Igme kaytwa giwn:
— Filip, ka kuryenema nah ay yikak kuwis. Mmah yis kote hiyakunte? Ku pahavwi hiyavun, amun ini ig kuwis hiyap Wigwiy hawata. Mmah nikwe pis awna: “Uya akki Wigwiy wotuh?”
10Nah gikak Wigwiy usuh pahavwiwa pawtak. Mmah pis ka ihpa inakni? Ku pariye nuwnuh yit kawki nuwnteknewatma nah awna yit. Nah awnhin giwntekne Wigwiy ku pariye ay nuvituh. Ignewa ku pariye iki nannuh adahan nah kehne annut.
11Nah gikak Wigwiy usuh pahavwiwa pawtak. Ihpanabay inakni nuwnuh. Ku yis ka iha inakni nuwnuh, kiyeminahnabay nannuh. Nawenetke nannuh keh yis iha ku nah pahavwiwa gikak Wigwiy.
Nah iki ku pariye yayapni nutuh
Mt 18.19; Mk 11.24; Lk 11.9, 18.6; Jo 15.7, 16.6,23; Eb 4.16; Tiy 1.6, 5.16; 1Jo 5.14
12— Ku pahavwi kamaxwevye nuvitit, igi keh annut hawata ke nahbenek. Ig kehte annut nuwhu akiw awaku nah tivik git Wigwiy.
13Avim ini ku pariye yayapni nutuh nuwavrik nah ikini yitnek, kahadbe ig Wigwiy kiyathaka awaku ini ku pariye nukanuh yit.
14Madikte ku pariye yayapni nutuh nuwavrik nah ikini yitnek.
Uhokri awahkis Gitip adahan yawayghetninek
Jo 7.38, 14.25, 16.7; At 2.2; Ro 5.5, 8.1; 1Ko 4.10, 12.7; 2Ko 3.18; Gal 5.16; Ef 3.16
15— Ku yis batek nukakuh, ihpanabay nuwnuh.
16Nahme ayap git Wigwiy adahan ig awahkis pahavwi nuwenyan adahan yawayghetninek. Igme yawayghetni misakwa yikaknek adahan avanenekwa.
17Igi Uhokri Gitip. Ig avanenekwa ekkene ku pariye hiyakemniki inyewatnene. Hiyeg kane Uhokriyanvuma igkis ka hiya igkisma amavig mmanawa igkis ka hiyavgi, igkis ka hiyakgi ku pariyene ig. Yisme hiyaknig ku pariyene ig mmanawa ig misakwa ay yikak. Aysawnemenek ig misakwa ay yivitnek.
Nah ayta misakwa yivitit
Jo 16.5
18— Nah kennesa nah yikiswitnimet, heneme nah ka ikisyi yis pahaponema. Nah diyuh akiwnek nah misakwa yivititnek.
19Aynesa hawkri muwak adahan hiyeg kane Uhokriyanvuma igkis ka hiyavun akiw. Yismeti hiyavun akiwnek. Ayge nikwe yis aymuhwanek gimun Uhokri adahan avanenekwa awaku nahnewa aymuhwene gimun.
20Avim ini hawkri ku aysaw nah ayta misekwevye yivitit, avim ini yis hiyakninek ku nah pahavwiwa gikak Wigwiy, yisme pahavwiwa nukakuh.
21Ku pahavwi timap nuwnuh, ku ig iha nuwnuh, ignewa ku pariye batekye nukakuh. Ku pahavwi batekye nukakuh, nikwe Wigwiy batekye gikak. Nah hawata nah batek gikak, nah hiyakkiswa git.
22Judas timapni hene, ig awna git. Ig nawenyewa giw Judas Iskariyotismin. Giwn:
— Kiyavwiye, mmahpa pis hiyakkiswa wotuhnenwa? Mmah gitkisme neras ku pariye kane pihiyegavuma pis ka hiyakkiswa gitkis?
23Igme kaytwa giwn:
— Nah akkite pit ku samah. Ku pahavwi batekye nukakuh, ignewa ku pariye ihpatrune nuwnuh. Ayge nikwe Wigwiy batek gikak. Usuh ayta misakwa givitit. Ayge usuh misakwa gimun.
24Pahavwime ku pariye kane batek nukakuh igi ka iha nuwnuh. Nikwe ka kis adahan nah hiyakkiswa git. Inakni nuwnuh in ka nuwnteknewatma nah awna yit. Nah awnhin giwntekne Wigwiy nawahkisten.
Uhokri Gitip keh yis pukuhpa Uhokri giwn
Jo 16.13; 1Ko 2.12; 1Jo 2.20,27
25— Nah aynete yikak nah ekkene yit inakni.
26Heneme aysawnemenek Wigwiy awahkis Gitipnek nuwenyan adahan igme yikannuhten amin madikte hiyakemniki. Igi yawayghetninek. Ig kiyekisnek yit madikte inakni ku pariye nuwnuh yit. Ig keh yis pukuhpinek.
Nah kariswehsa yihiyekemni
Gal 5.12; Fil 4.7; Kol 3.15
27— Nah ikisyi akak ini nukanuh yit kariswahwaki. Nah kariswehse yihiyekemni kahadbe yis misakwa hawata ke nahbe, yiyakni karisaw. Nah kariswehse yihiyekemni inyewa, ka kema hiyeg amedgenema inin. Ka yi muwaka barukiswa. Ka yi isaksa aviska parak abetit yihiyekemni.
28 Mmahki yis wakaymnibdi amin inakni nuwnuh adahan ku samah nutepkemni adahan nudiyhemni akiw? Nah tivikwiye gimkanitwiye Wigwiy. In kabaykanen nudahan mmanawa ig Wigwiy kiyate mpiyan. Ku yis batek nukakuh, kiskama yis batek akak ini nutepkemni gimkanit.
29Nah ikene yinetni amin ini nutepkemni. Avit in danuh nah ekkenepni yit kahadbe kuwewanek ku aysaw in danuh, ayge nikwe yis kamaxwa nuvitit.
30Nah ka kahawkan kinetihwa yikak kiyesradima akiw. Mmanawa ner ku pariye kane Uhokriyanvuma gikivarakis ig kennesa gidawnhan adahan kehne mbayka nukakuh. Ka sam. Ig ka kawetri ay nuvituh. Nikwe ig ka hiya igma wanekbeta nuhawkan.
31Heneme nah isaksa ig keh mbayka nukakuh ku samah Wigwiy awna nutuh. Adahan nah ekkene gitkis madikte hiyeg ku nah batek gikak Wigwiy. Inneki keh nah amava madikte mbayka ku pariye ig ikaksa nudahan. Kuri, kannikawnabay. Uyay tivik.
— Uyay.
Ayteke nikwe igkis pese ayteke paytrikutak.
Currently Selected:
Joawh 14: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
