Joawh 7

Jesus mpiksaptihka gavitkis gisamwivwi

1Ariwnteke ini ig Kiyavwiye Jesus muwaptise Galileyamnaw. Ig ka atekere avitit judeyamnaw mmanawa neras judeyenevwi giwewkistenkis ivegvenene adahan giwmasepten. Awaku ini ig misekwe ayge Galileyamnaw.

2Kaba danuh ahawkanavrik adahan hiyeg judeyenevwi gifetrakis adahan pahadguhwene misekwene ariku paytbet.

3Ayge nikwe Kiyavwiye Jesus gisamwivwi awna git:

— Uyay atak tahan avitit judeyamnaw ku kiney hiyeg pahadguvu. Ayge kibeyne iwetrit adahan pis keh annut kahadbe ku pariye timepnevwi piwn, igkis hiyap pannu.

4Ku pis muwaka madikte hiyeg hiyakpi, amawka pis akkaw gitkis. Amawka pis ka misakwa ayamawnema ay. Ku pis inyewa keh annut akak Kiyavwiye Uhokri gidatni, amawka pis akkaw gitkis madikte hiyeg.

5 Henewatbaki igkis awna mmanawa igkiswa gisamwivwi ka ihpa giwn avim ini hawkri.

6Igme Kiyavwiye Jesus kaytwa giwnkis:

— Kote danuhte nuhawkanavrik adahan nah akkaw gitkis madikte hiyeg. Heneme ku aysaw yis atekere, hiyawa yis atak.

7Hiyeg amedgenevwi inin ka amiyhay. Nahme ignes amiyhanan. Igkis amiyhanan awaku ku samah nah ekkene gitkis gikehnikis mbeyevye.

8Su yi atak fetya. Nahme kote atakte. Kote danuhte nuhawkanavrik adahan nah akkaw.

9Ig Kiyavwiye Jesus awna inakni, gisamwivwi tivik fetya. Igme misekwe ayge Galileyamnaw adahan aynesa hawkri akiw.

10Ayteke ariwntak gisamwivwi gitepkemnikis ig hawata ig tivik atere. Heneme ig ka tivik giwtrikkisma hiyeg. Ig tivik mownye. Igkisme gikannuhnivwi tivik gihapti.

Hiyeg gihiyekemnikis gimin Jesus ibekhewbet

Jo 7.40, 10.19

11Avimwata ini ayge abet fet neras judeyenevwi giwewkistenkis ayap Kiyavwiye Jesus gak. Igkis awna:

— Kineykig?

12Ayge ka aynsima hiyeg minimnihekbet pawtak gimin Kiyavwiye Jesus. Gaytakis awna:

— Ig kibeyne awayg.

Gaytakisme awna:

— Kawa. Ig kinisne hiyeg.

13Heneme igkis minimni giharavrikkis neras giwewkistenkis. Mmanawa igkis avise gibohrikis mmanawa ignes ka batek gikak Kiyavwiye Jesus.

Jesus kannuhekne ariku leglis

14Pabuskak fet ig Kiyavwiye Jesus danuh atere. Ig pareke arikut ini leglis kewye Uhokri Givin. Ayge ig kannuhekne.

15Neras judeyenevwi giwewkistenkis hiyapni hene, igkis wakaymnibdi adahan gikannuhakni. Igkis awna:

— Kitak ner kanuhwa? Ig ka lekkolya amin Kiyavwiye Uhokri giwn kema wixwiyma.

16Ig Kiyavwiye Jesus timapni hene, ig awna gitkis:

— Nukannuhwan kawki nuwnteknewatma. In giwntak nawahkisten.

17Ku pahavwi inyewa kehkere Uhokri gibetki, igi hiyaknek ku kitak nah uti nukannuhwan. Ig hiyak ku nah awna giwntakwa Kiyavwiye Uhokri.

18Pahavwi ku pariye awna he giwnteknewatnen, igi aharitne hiyeg kiyathig. Nahme awna adahan hiyeg kiyatha nawahkisten. Nikwe nah awna iwit ku pariye inyewatnene, nah awna wadit.

19amekene Moís ike wotwiy Uhokri gikumadukan, heneme yuma pahavwinema yaytak ihpene inakni gikumadukan. Yisme aharit nuwmepten. Mmahki?

20Igkisme kaytwa giwn:

— Pis ku puwvup. Pariyekama aharit piwmepten?

21Igme kaytwa giwnkis:

— Yis madikte wakaymnibdi awaku nah makniwe pahavwi awayg abet samdi. Yit nah taraksevye awaku nah kehe ini annut. Yit nah ka kiyatha samdi.

22 Henneme yis hawata, yis kannivwiye abet samdi. Nah akkite yit ku samah. amekene Moís ike wotwiy pahat gikumadukan ku pariye ikaka git gavitkis gihawkrivwi. Inakni gikumadukan awna adahan wixwiy hiwh bakimnayh awayg givitkis adahan arakak ku igkis Uhokri gihiyegavu. Nikwe adahan pahay paka akiw ariwntak giwayvukakkis yis hiwh givitkis. Ku pahavwi amadga wayk abet samdi nikwe yis hiwh givit abet samdi aytwenempiye akiw.

23Hiyawa samdi abet, heneme yisnewa hiwh givit kahadbe yis ihpene ariwn amekene Moís gikumadukan. Mmah nikwe yis dagawnaw nutuh avatra ku samah nah makniwe pahavwi awayg pahavwite abet samdi?

24 Mmahki yis ikanuh ku nah taraksevye? Ka yi muwaka iki pahavwi ku ig taraksevye kibehtenwatma. Hiyapnigte ba ig wadityewatma.

Henewatbaki ig Kiyavwiye Jesus awna.

25Gaytakis jerusalémyenevwi ayge igkis timapni hene, igkis kinetihwa pawtak. Igkis awna:

— Mmah ka ba nernema ku pariye uwewkistenwiy aharit giwmasepten?

26Ivegnay ku samah ig wewvari ay ubetwiy. Igkisme ka aritnema giw adahan kamaxgi. Nawenetke igkis pukuhpaw. Nawenetke igkis ikiy ku igyewa Cristo, ig Uhokri gikanyan adahan ukumaduketniwiy.

27Gaytakisme kaytwa giwnkis:

— Kawa. Ka ignema. Mmanawa wixwiy hiyakgi ku pariyene ig. Igme Cristo, yuma hiyeg gihiyekten ku pariyene ig.

28Igme Kiyavwiye Jesus kannuhekne ayge ariku leglis. Ig timapni inakni iwit hene, ig awna gitkis hiyeg:

— Yis yivewkan ku yis hiyakun ku pariyene nah. Yivewkan yis hiyak ku kitekne nah. Heneme nah ka ayta nuwnteknewatma. Yis ka hiyak ku pariye igyewa nawahkisten atan. 29Nahme hiyaknig. Mmanawa nah ayta giwntak. Ignewa ku pariye nawahkisten atan.

30Igkis timapni hene, igkis atere gikamaxwitni. Heneme igkis ka hiyak ku samahpa gikamaxka gitkis mmanawa kote danuhte gihawkanavrik adahan ig kamaxka.

31Avim ini ka aynsima gaytakis neras hiyeg iha ku ig Kiyavwiye Jesus ignewa Uhokri gikanyan adahan ukumaduketniwiy. Igkis awna:

— Wixwiy hiyakni ku aysaw Uhokri gikanyan adahan ukumaduketniwiy danuh atan, ig keh ka aynsima annutnek. Hiyaksa kuri ig ner awayg kehne ka aynsima annut ay. Ka ik adahan pahavwinema hiyeg keh annut pi kiyeste ariw inin akiw.

Sandagma gikamaxwitni Jesus

32Neras farizewkis timep gakkis ku igkis hiyeg kinetihwa hene gimin Kiyavwiye Jesus. Nikwe igkis gikakkis neras muwveg kiyatyevwi igkis awahkise gisandagmakis atere git adahan gikamaxwitni.

33Igkisme gisandagmakis tivik, igkis danuh atere git Kiyavwiye Jesus. Igkis timap ig kinetihwa gitkis hiyeg. Giwn:

— Nah ay yikak adahan aynesa hawkri. Ayteke aysawnemenek nah diyuhe gimkat nawahkisten.

34Avim ini yis ivegvanek heneme yis ka utivunek. Ka ik adahan yis danuh atere ku kiney nah.

35 Gaytakis judeyenevwi giwewkistenkis ayge. Igkis timapni inakni giwn hene, igkis kinetihwa pawtak. Giwnkis:

— Kit ig ataknek adahan wixwiy ka utivginek? Mmah ig ataknek tahan gitkis neras judeyenevwi ku pariye misakwa aynte gibetkis gresiyenevwi adahan gikannuhtenkis atere? 36Mmahki ig awna inakni ku wixwiy ivegvig aysawnemenek heneme wixwiy ka utivginek? Mmahki ig awna inakni ku ka ik adahan wixwiy danuh atere ku kiney ig?

Hene igkis wakaymnibdi ayge.

Uhokri Gitip kewa un dehetnikibe

Jo 4.13; Ap 22.1

37Amaksemni fet abet ini hawkri ku pariye avitmin madikte hawkri adahan gifetrakis, ig Kiyavwiye Jesus ayge tabir ariku leglis. Ig hiyap neras muwveg ayge dimukne un giwtrikkis madikte hiyeg adahan kiyekisne gitkis ku samah minikwak Uhokri utipkis un gitkis izhaewyenevwi aynte amadga amatap. Ig hiyapni hene, ig awna gitkis hiyeg akak madikte gawaygi. Giwn:

— Aytninabay numkanit. Yis ku pariye giharitwiye Uhokri kiyesrad ke pahavwi hiyeg arabyuvyebe unbe, aytninabay numkanit. Nah kewa un dehetniki ariwtyakbe yidahan. Higapnabay nuwntak takunipti. Kamaxwanabay nuvitit takunipti.

38 Yis ku pariye kamaxwenevwi nuvitit, yis hawata humawnek kewa un dehetniki ariwtyakbe gidahankis hiyeg. In ke wotbe ka aynsima un dehetniki pes yiwntaknek adahan ikene gidehetnikis ka aynsima hiyeg akiw. Henewatbaki Uhokri gannasan awna.

39Ig Kiyavwiye Jesus awna inakni adahan arakak ku samah kamaxwenevwi givitit ignes gitiphaw Kiyavwiye Uhokrinek. Heneme Gitip kote awahkiskante mmanawa ig Kiyavwiye Jesus kote wagahte ku kiney gikiytani.

Hiyeg gihiyekemnikis gimin Jesus ka patiptak

Jo 7.11,25, 10.19

40Ka aynsima gaytakis neras fetyavu igkis timapni inakni iwit hene, igkis awna:

— Ig Uhokri gawneve.

41Gaytakisme awna:

— Ignewa Cristo, ig Uhokri gikanyan adahan ukumaduketniwiy.

Igkisme gaytakis awna:

— Heneme ig galileyene. Wake ig igyewatbe Uhokri gikanyan adahan ukumaduketniwiy, nikwekam ig ka ariwntakma Galileyamnawkam.

42Uhokri gannasan awna ku Uhokri gikanyan adahan ukumaduketniwiy ig amadga wayknek aynte paytwempu Belem aynte judeyamnaw ku kiney amekene Davi amadga wayk.

43Hene igkis hiyeg ka tuguhkis gihiyekemnikis hehpekuyema gimin Kiyavwiye Jesus.

44Gaytakis neras hiyeg aharitnes gikamaxwitni, heneme yuma hiyeg gikamaxten.

Sandagma ka kamax Jesus

45Ayteke nikwe neras muwveg gisandagmakis diyuhe gitkis neras muwveg kiyatyevwi gikakkis farizewkis akiw. Igkis danuh atere, igkisme gikivarakis awna gitkis:

— Mmahki yis ka waxwa Jesus atan?

46Igkisme kaytwa giwnkis:

— Usuh ka timapti pahavwinema awayg awna ke inaknibe.

47Igkis farizewkis timapni hene, igkis awna gitkis:

— Mmah yiswa hawata kinikiswe git?

48Ka ba yis hiyap usuh ka iha giwn? Ine ukivarawiy kawnata iha giwn.

49Neras hiyegempu ku pariye ihevye giwn igkis ka hiyak hawkri. Igkis ka hiyak ku pariye Uhokri gikumadukan awna. Igkis ikaksaka adahanikwa biyukwiki.

Nikodemus awna gidahan Jesus

50Igme pahavwi awayg ayge ig timapni hene, ig kavusa awna gitkis. Giw Nikodemus. Ig giyakikis farizewkis. Ig ner ku pariye kuhwekwa kinetihwa gikak Kiyavwiye Jesus. Giwn:

51— Wixwiynewa ka ihpenema Uhokri gikumadukan. In Uhokri gikumadukan ka isaksa wixwiy ikiy pahavwi ku ig taraksevye pahayenema adahan. Amawka wixwiy hiyapnigte. Amawka wixwiy timapnate giwn. Wixwiy kote kehte hene gikak Jesus.

52Igkis timapni hene, igkis awna git:

— Mmahki pis awna inakni hene? Mmah pis galileyene hawata ke Jesusbe? Su atak ivegboha Uhokri gannasan. In ka awna ku ig awahkis uminwiy pahavwinema gawneve avititak Galileyamnaw.

53Igkis awna inakni, igkis tivik diyuhe mpuse givinwatkis.

Currently Selected:

Joawh 7: pluPB

Highlight

Copy