Lúkas 1

Jesus gihawkan tamaka ay

1Kiyavwiye Teófilu, kuwis ka aynsima hiyeg mpiksaw adahan igkis tameknes amadga kagta adahan igkis ekkenes inakni inetit ku pariye danuh ta wotwiy avim inin hawkri.

2Inakni inetit ekkepka wotwiy gavitkis neras ku pariye hiyapni akakwa giwtyakkis ku samah akavuska, ayteke igkis ekkepni muwapuw.

3Nah kuwis kinetihwa kabayntiwa gikakkis neras ku pariye atiwkeknevwi inakni inetit. Inneki keh nah nuvewkan kabay adahan nah tamakni pehetempi amadga kagta pidahan, kiyavwiye.

4Nah tamaknite kahadbe pis hiyakni kabayntiwa ku inakni inetit ku pariye pikannuhwan in inyewatbaki.

Ahj akka Joawh Batista giwayvuka ta git Zakariyas

5Minikwak ku samah ner hiyaptigi Erodis kumadukenete ay Judeyamnaw, pahavwi awayg ig judeyenevwi gimuwvegakis giw Zakariyas. Ig pahavwi gaytakkis amekene Abiyas gihiyegavu ku pariye kannivwiyes ariku ini leglis kewye Uhokri Givin. Gihayo eg amekene Arawh gihiwhi. Guw Isabel.

6Egkis piyamate wadityekuyokis giwtrik Kiyavwiye Uhokri. Egkis ka taraksa Uhokri gikumadukan aynesnima.

7Egkis yuma gukamkayhkis mmanawa amakano Isabel eg ka keh bakimni. Egkis piyamate kuwis kiyavwibdip.

8Avim ini hawkri ig amekene Zakariyas gihawkanavrik danuh adahan ig kehne gannivwi ariku ini leglis kewye Uhokri Givin awaku ku samah ig muwveg.

9Ayteke nikwe neras muwvegviyene ibekhe gannivwikis ku samah igkis inpawa igkis keh. Avim ini ig amekene Zakariyas kaniyka adahan ig parak arikut Uhokri giwskeki adahan ig bukehne imihgi givetunat Uhokri. Nikwe ig pareke atere.

10Madikte hiyeg misekwe kabubuk aynte kabaywak. Ayge igkis piriyepkewnekuyes ku samah ig aynete ariku payt bukehne ini imihgi.

11Pahaye adahan pahavwi ahj Uhokri giwatni hiyapkiswe ta git amekene Zakariyas. Ig tabir kihehavriktak ini piriyepkewket adahan bukehne imihgi.

12Ig amekene Zakariyas hiyapni hene, pahaye adahan ig kawadsan ig avisasew ka aynsima.

13Igme ahj awna git:

— Kiyavwiye Zakariyas, ka muwaka avis. Kiyavwiye Uhokri kuwis timap piviryepkawni. Kuwewanek pihayo kiyavuno Isabel kakamkayhnek. Pis sarayh giw Joawh.

14Ayge pis ka aynsima batek pinaktinek. Hawata ka aynsima hiyeg batek ginaktinkisnek ku samah ig amadga wayk.

15Ig humaw kiyatye hiyegnek giwtrik Kiyavwiye Uhokri. Ig ka higapti win. Ig kawnata higapti higapka ku pariye katiwye. Ig gitiphaw Kiyavwiye Uhokrinek ku samah ig gutunriktak ginagnek.

16Aysawnemenek ig keh ka aynsima izhaewyenevwi wages gihiyekemnikisnek gidahan Uwohkigawiy.

17Ig ayta gavitkiya Ukivarawiynek. Avim ini ig gitiphewne Kiyavwiye Uhokri ke amekene Eliyasbe. Gannu hawata ke gidahanbe. Avim ini ig keh igti kabeywotviye gikakkis gikamkayuvwi akiw. Ig keh hiyeg kane ihpenevwima wages gihiyekemnikis adahan kibeyne hiyakemniki. Ayge nikwe ig keh igkis waditha gihiyekemnikis marihwa igkis ahegbet adahan Ukivarawiy gaytni.

18Ig amekene Zakariyas timapni hene, ig awna git ahj:

— Mmah ahiyaka nutuh ku inakni piwn inyewa kahayak? Mahiko adahan nah ihpin mmanawa nah kuwis kiyaparivye. Nuhaya hawata eg kiyaparuvyo.

19Igme ahj awna git:

— Nah Gabriyew, nah avanenekwa nah misakwa gimun Kiyavwiye Uhokri. Nah awahkiska atan pimin adahan nah kinetihwene pikak adahan nah ekkene inakni inetit ta pit.

20Pisme ka iha inakni nnetni. Avatra ini pis mataybinek pis mownpinek. Pis ka awna pahatnema iwitnek he inakni nuwnuh kahayak pitnek. Mmanawa inyewa in kahayak avim ini ku aysaw ahawkanavrik danuh.

21Igkis kinetihwenes ayge, neras hiyeg aynte kabaywak igkis wahepnes amekene Zakariyas adahan ig pes. Igkis wakaymnibdi awaku ku samah ig ayivwihwe mpiynevevye aynte ariku Uhokri giwskeki.

22Ayteke metakwa ig pes arikutak ini payt. Ig mpiksaw adahan ig awna gitkis neras hiyeg, heneme ig ka ik adahan ig awna. Igkis hiyapni hene, igkis awna:

— Ba ig kamapti ayge ariku Kiyavwiye Uhokri giwskeki?

Igme misekwe ahehwavwi akak giwaknenwa. Ig ka ik adahan ig awna.

23Ariwnteke ini gannivwi pisenwa. Nikwe ig tivik ig danuh ta givinekut.

24Awenketeke ini gihayo amakano Isabel biwhkise. Eg kavigse gukamkayh, eg ka pes paytrikutak adahan pohowku kayg. Eg awna:

25— Kiyavwiye Uhokri ka gabayisima nukakuh. Kibeyne, ig amnihpen. Ig keh nah ka maraka nuvituh akiw giwtrikkis hiyeg.

Ahj akka Jesus giwayvuka ta gut Mahi

26Eg amakano Isabel biwhkisno adahan puguhkuna kayg gaw, nikwe ner ahj Gabriyew awahkiska gavit Uhokri ta avitit paha paytwempu kewye Nazaré ku pariye aynene avit waxri Galileyamnaw.

27Ig awahkiska gumin pahavu himano guw Mahi ku pariye kuwis ahegbet gunetni gikak pahavwi awayg. Ig awayg giw José. Ig amekene Davi gihiwhi.

28Ig ahj danuh atere ta guvinekut kiyavuno Mahi. Ig awna gut:

— Ba pi ay? Kiyavwiye Uhokri kabayhap. Ig ay pikak.

29Eg timapni hene, eg wakaymni. Eg awna:

— Mmahki ner awna nutuh inakni hene?

30Igme ahj awna gut:

— Ka muwaka avis, kiyavuno Mahi. Pis kabunuga gikak Kiyavwiye Uhokri.

31Pis biwhkisnek. Pis sarayhnek pikamkayh awayg. Pis sarayh giw Jesus.

32Ig humawnek kiyatye hiyeg. Ig kanumkanek Kiyavwiye Uhokri inurikyene gikamkayh. Kiyavwiye Uhokri keh ig kumaduka hiyeg hawata ke gihawkribe amekene Davi.

33Ig kumadukanek amekene Jakó gihiwhivwi akiwka akiwkanek. Gikumadukan yuma amaksemninek.

34Eg kiyavuno Mahi timapni hene, eg kaytwa giwn:

— Mmahki ini danuh nutuh? Nah kote wewte gikak pahavwinema awayg.

35Igme ahj kaytwa guwn:

— Ig Kiyavwiye Uhokri Gitip ig muhuksa ta pivititnek. Ig gidatni parakpinek. Ayge nikwe pis sarayh pikamkayh, ig barewvityenek. Ig Kiyavwiye Uhokriwa gikamkayh.

36Ku pis hiyap pikebyi kiyavuno Isabel kuwis biwhkisno, pis hawatanek. Eg kiyaparuvyo, eg kanumka manpigviyo, heneme gubiwhkisni puguhkuna kayg gaw kuwis. 37Ig Kiyavwiye Uhokri detye adahan ig keh madikte. Madikte arikna ka mahikonema gidahan.

38Eg kiyavuno Mahi timapni hene, eg awna git:

— Nop nah ay. Nah Uhokri gibuk. Hiyawa ig keh ku samah piwn ta nuvitit.

Ig ahj timapni hene, ig tivik.

Mahi gukak isabel

39Ariwnteke ini eg kiyavuno Mahi ahegbetewvi, eg tivik kibehtenwa ta avitit paha paytwempu ku pariye aynene avit waxribdi ay Judeyamnaw.

40Eg danuh atere, eg pareke givinekut amekene Zakariyas. Ayge eg ute amakano Isabel. Eg aytnihgu:

— Ba pi ay?

41Ku aysaw eg amakano Isabel time inakni guwn hene, gukamkayh mukuse ay gunaktiniku. Ayge amun ini eg kawihpika gavit Uhokri Gitip.

42Nikwe eg awna gut kiyavuno Mahi akak madikte guwegewni. Guwn:

— Pis pi kabunugate gikak Kiyavwiye Uhokri ariw madikte tinogben. Pikamkayh hawata ka gibunugasima.

43Pis kiyathan ku samah pis ayta danuhpano nutuh mmanawa pis Ukivarawiy ginag.

44Ku aysaw nah time piwn, nukamkayh mukuse ay nunaktiniku akak batekka.

45Pis uti kabaykanek ka aynsima awaku ku samah pis ihe Kiyavwiye Uhokri giwn. Mmanawa ig inyewa kehnek madikte ku pariye ig wasavanaw pimin.

Mahi kabayha Uhokri

46Egme kiyavuno Mahi awna:

— Nah kabayha Kiyavwiye Uhokri avititakwa nuyakni.

47Nah ka aynsima batek ku samah ig amnihpen.

48Mmanawa ig kiyenuh nah gibuk yumanano nukiytani. Akiwka akiwkanek madikte hiyeg kinetihwa numinuhnek ku samah nah kabunuga gikak Kiyavwiye Uhokri.

49Ig detyewa. Ig keh kibeyne annut nudahan. Ig barewvitye.

50Akiwka akiwkanek ig ka gamnihrasima gikakkis madikte hiyeg ku pariye avisnevwi gibohri.

51Ig ka gannusima. Akak giwannen ig pasuhave neras ku pariye kane kumadukasewkere git.

52Ig wiwh gikiytanikis givititakis neras ku pariye detyevwi. Ignesme ku pariye yumanene gikiytanikis ig iki gikiytanikis givititkis.

53Ig iki ka aynsima kabayka gitkis hiyeg ku pariye kayehnevwi ku pariye gimawkanitnenes giwntak Kiyavwiye Uhokri. Heneme ig ka iki ariknawnema gitkis hiyeg ku pariye ikewnevwi ku yuma arikna muwekne gitkis.

54 Kibeyne. Ig parak abet uhawkanwiy wixwiy gihiyegavu izhaewyenevwi. Ig ka miyeh giwn ku samah ig awna minikwak: “Nah amnihgikisnek.”

55Ku samah ig awna inakni ta git amekene Abraawh gikakkis gihiwhivwi, ignes uhawkrivwiy, henewa ig amnihwiy adahan avanenekwa.

Henewatbaki eg kiyavuno Mahi awna.

56Pisenwa nikwe ariwnteke ini eg kiyavuno Mahi misekwe gumun amakano Isabel. Eg mpiyase mpana kayg ayge. Ayteke eg diyuhe ta guvinwat.

Joawh Batista giwayvuka

57Ariwnteke ini eg amakano Isabel guhawkanavrik danuh. Eg pamakuteke. Eg sarayh gukamkayh ig awayg.

58Guhumwayevwi gukakkis gukebyuvwi egkis time arak inakni ku samah Uhokri amnihpig egkis iwasavgu atere. Egkis batekyokis payak gukak.

59Ariwnteke ini pahay paka akiw hiyeg danuh atere adahan hiwhpiye gukamkayh givit ku samah judeyenevwi gihiyekemnikis. Igkis sarayhpiye ig bakimni giw giwavrik gig amekene Zakariyas.

60Egme ginag awna:

— Kawa. Amawka wis sarayh giw Joawh.

61Igkisme kaytwa guwn:

— Mmahki? Yuma pahavwinema pikebyuvwi giwkis hene.

62Ayteke igkis iveg ta gimkat gig igkis barasevgi adahan igme akki ku samah gimawkan giw.

63Igme aya kagta gitkis. Ayge amadga ini kagta ig tamak: “Giw Joawh”. Neras hiyeg hiyapni hene, igkis wakaymnibdi ka aynsima.

64Aynewa ig amekene Zakariyas gibiy ik adahan ig awna akiw. Ig awna, ig kibeyhene Uhokri.

65Madikte misekwenevwi ayge igkis time inakni gak hene, igkis wakaymnibdi gidahan ka aynsima. Inakni inetit gimin ibekhewvi muwapuw avitiw ini waxribdi ayge Judeyamnaw.

66Madikte hiyeg ku pariye time gak igkis baruwkiswa gimin. Igkis awna:

— Pariye ner bakimni humawnek? Mmanawa in kahayak huwewe wotwiy ku Kiyavwiye Uhokri ay gikak.

Zakariyas awna iwit ku pariye pes giwntak Uhokri

67Igme bakimni gig amekene Zakariyas, Uhokri Gitip kawihpig, ig awna iwit ku pariye pes giwntak Uhokri. Giwn:

68— Kibeyne gidahan Kiyavwiye Uhokri, ku pariye uwohkigawiy wixwiy izhaewyenevwi. Ig kuwis parak abet uhawkanwiy wixwiy gihiyegavu. Kuri ig keh wixwiy isahptaw.

69Ig kuwis awahkise uminwiy pahavwi wamnihtenwiy detye. Igi gihiwhi amekene Davi ku pariye gibuk Kiyavwiye Uhokri.

70Ig Kiyavwiye Uhokri keh gawnevevu pitatyevwi kinetihwa gidahan hene minikwak. 71Ig awna ku ig keh wixwiy isahptaw giwkis uvetunyavuwiy giwkis madikte ku pariye wamiyetnivwiy.

72Ig awna gitkis uhawkrivwiy amekenegben: “Nah amnihyinek. Nah ka miyeh ku samah nah ikaksin yit.”

73Mmanawa ig ikakse minikwak git uhawkriwiy amekene Abraawh 74ku ig wiwhpewiynek giwakutakis uvetunyavuwiy kahadbe wixwiy ka avisnema kawohkigahaw ta git Kiyavwiye Uhokri, 75adahan wixwiy wew waditye, barewvitye giwtrik Kiyavwiye Uhokri madikte ku samah wowskawniwiy amadga hawkri.

76Pis nukamkayh, pis kanumkanek Kiyavwiye Uhokri inurikyene gawneve mmanawa pis danuh gavitkiya Ukivarawiynek adahan pis ahegbeteviye madikte avit gaytni.

77Pis akkanek gitkis gihiyegavu ku igkis isahptawnek awaku ku samah Kiyavwiye Uhokri bayahminigkis ariw givathawnikis.

78Mmanawa ig Kiyavwiye Uhokri ka gamnihrasima ukakwiy. Inneki keh ig paraksa abet uhakanwiy pahavwi kabutennene inutak 79adahan ig uguhne gihiyekemnikis hiyeg ku pariye abetnenevwi amisnavye, abetnenevwi aviska abohri miyaka. Igi keh wixwiy misakwanek abet pasamraka.

Henewatbaki ig amekene Zakariyas awna.

80 Ayteke ariwnteke ini ig bakimni aymuhwe. Ig kawih Uhokri gihiyekemni kabayntiwa. Ayteke barew gikivay kuwis ig tivik misekwe amadgate amatap ku kiney yumanene hiyeg misakwa. Ayge ig misekwe he ku aysaw gihawkanavrik danuh adahan ig ekkene Uhokri gihiyekemni ta gitkis hiyeg izhaewyenevwi.

Currently Selected:

Lúkas 1: pluPB

Highlight

Copy