Lúkas 12

Ka ik adahan wis ayam uhiyekemni amebyemni

Mt 10.26

1Avim ini hawkri ka aynsima hiyeg pahadguhwa atere git Kiyavwiye Jesus. Igkis hiyeg kabubuk ayge daykekbet. Avit ig kinetihwa gitkis, ig awna ta gitkiskit gikannuhnivwi. Giwn:

— Neras farizewkis ikawnema ke wotbe ignes kibeynevwibe hiyeg bawa mbeyevye hiyakemniki ay gimunkis. Gihiyekemnikis amebyemni kewa bugut abusanbe. Pitatye in ka kahayak heneme kuwewanek in kahayak ku in ayge abet bugut. Pukuhpawnabay adahan yis ka ikaw kema igkisma. 2Ka ik adahan wis ayam uhiyekemni amebyemni. Aysawnemenek in kahayaknek. Madikte ku pariye awastepka aysawnemenek in mawasaptihpikanek. 3Madikte iwit ku pariye yis awna ayamaw, ku pariye yis awna kabayanesa ariku mutkeg, aysawnemenek in ekkepkanek givuwiwkis hiyeg akak madikte nihawna.

Mmahki yis avis gibohrikis hiyeg gibohrime Uhokri yis ka avis?

Mt 10.28

4— Ka yi muwaka avis gibohrikis neras ku pariye wowmeptenwiy, heneme ariwntak ini igkis ka hiya usamanakwiy akiw. Henewatbaki in, nukagmadavu. 5Nah akkite yit ku kabohri yis avis. Avisnay gibohri Uhokri ku pariye kadahan gidatni adahan umehpewiy, hawata ig kadahanata gidatni adahan ig sarayhpewiy ta avit ini iwetrit ku kiney kane aynsima kayahwaki. Avisnay gibohri igi. 6Ig kadahan gidatni adahan ig umehpew, ig hawata kadahanata gidatni adahan avuriwi. Ka ba yis hiyap ku samah ig avuriw madikte kuhivra? Egkis ka ariknawnema, egkis piyukka pohowku gukebikis adahan mmuknamawa karukri. Heneme Uhokri ka miyeh adahan ig avuriwgukis. 7Ku yis hiyap ig avuriw kuhivra, wixwiykata akiw ig ka hiya ukavriwkay hawata akiw? Yuma aynesnima ku pariye ig ka hiyakma ukakwiy. Ku pis hiyap usemniwiy, ig hiyak ku aysaw akebi. Ka yi muwaka avis. Wixwiy pi kavigte git Uhokri mpiy madikte kuhivra. Ig avuriwiy hawata.

Kinetihwanay nudahan

Mt 10.32; 2Tim 1.8

8— Ku pahavwi kinetihwa nudahan ta gitkis hiyeg ay amadga inin, aysawnemenek nah, ku pariye wageswe awayg amadgaya inin, nah hawata kinetihwa gidahanek. Henewatbaki nah kinetihwa gidahan aynte inurik ta gitkis Uhokri giwatnivwi ahj. 9Heneme ku pahavwi wihwe nuwhu ay gimunkis hiyeg amadgaya inin, nah hawata aysawnemenek nah wihwe giwnek aynte inurik gimunkis Uhokri giwatnivwi ahj.

Ku yis ka kiyatha Uhokri Gitip, yis ka bayahminaka

Mt 12.31; Mk 3.28; 1Jo 5.16

10— Ku pahavwi ka kiyathan nah ku pariye wageswe awayg amadgaya inin, ka sam. Nawenetke kuwewanek ig Uhokri Gitip dax avit giyakni adahan ig kiyathan. Ayge nikwe ik adahan Uhokri bayahminig ariw ini gitaraksan ku samah pitatye ig ka kiyathan. Heneme ku pahavwi ka kiyatha Uhokri Gitip, nikwe ka ik adahan ig Gitip dax avit giyakni adahan ig wages gihiyekemni. Ayge nikwe kawnata ik adahan ig Uhokri bayahminig ariw ini gitaraksan.

Uhokri Gitip iki yit iwit adahan yis awna

Mt 10.19; Mk 13.11; Lk 21.13

11— Aysawnemenek yis kamiyevepkanek abet pahadguhka, ariku leglis. Hawata akiw yis kamiyevepkanek ta gitkis hiyaptigi, ta gitkis yikivaravu. Yis waxwevepkanek ta givetunatkis avatra ku samah yis nuhiyegavu. Ku aysaw yis kamiyevepkanek hene, ka yi muwaka ivegmina yihiyekemni adahan ku pariye yis awnanek gitkis avim ini hawkri. 12Mmanawa avimnewa ini ig Uhokri Gitip iki yit iwit adahan yis awnanek gitkis avim ini.

Wewkanbet ka keh wis uti dehetniki

13Ayteke pahavwi awayg ayge ig awna git Kiyavwiye Jesus gibetitakkis neras hiyeg kabubuknene ayge. Ig awna git:

— Kiyavwiye, niguh kuwis miyap. Negni darihe madikte gewkanbet. Uya amnihun awna ta git adahan usuh ibekhekbet amin wiguh gewkanbet.

14Igme Kiyavwiye Jesus kaytwa giwn:

— Awayg, nah ka ayta adahanma nah kehnema yis ibekhekbet amin yewkanbet. Ka ininema nannivwi.

15Ayteke ig awna ta gitkis neras hiyeg:

— Hiyapnabay, pukuhpawnabay abohri mpihpaka amin ewkaki, mmanawa ku wis kadahan ka aynsima wewkanbet, ka innema keh wis uti dehetniki.

16Ayteke ig awna pahat iwit patuwesbuhka ta gitkis. Giwn:

— Minikwak pahavwi awayg igisye gamutravwi ka aynsima kewvi. 17Ig hiyapni hene, ig ivegminene gihiyekemni ig awna: “Mmahpa nah keh kuri? Nah yuma iwetrit adahan bayehne nahakavu ariw.” 18Ig awna: “Nah hiyak ku samahpa nah keh. Nah hakuhkise abeyhekri nahakavu ariw. Nah kehkis pi kiyeste akiw. Atere nah bayahkis madikte nahakavu ariw, madikte newkanbet. 19Pisenwa nah awna nnaktin: ‘Awayg, pis kadahan igiska ka aynsima kuri. Ik adahan ka aynsima kamukri. Hiyawa pis mayaksa pivit, hiyawa pis axne, hiyawa pis higepne, hiyawa pis batekye adahan kibite kamukri kuri.’” 20Heneme Uhokri awna git: “Pis mahayakempiye awayg. Ka ba pis hiyap ku avim inin mitipka pis umehpikanek? Madikte ini pewkanbet ku pariye pis darihe in misekwe gidahankis nawenyevwi hiyeg.” 21Heneki madikte hiyeg ku pariye kiye givitkisnen igkis aharitne igiska amadgaya inin, heneme igkis ka igisyema akak Uhokri gihiyekemni. Heneki igkis biyuknek akak madikte igiska.

Ka yi muwaka wakaymni aharit ariknawnema amadgaya inin

Mt 6.25

22Pisenwa gawnan inakni iwit, ig Kiyavwiye Jesus awna ta gitkis gikannuhnivwi. Giwn:

— Inneki keh nah awna yit, ka yi muwaka kiyimwihwa amin ariknawnema ku pariye muwekne yit amadga inin, ine amin yaxni adahan yih adehetni, ine amin yikawihni adahan yivit. 23Ku yis hiyap ig Uhokri kuwis ike udehetniwiy, umanawiykata akiw ig ka iki wotwiy akiw? Ku yis hiyap ig kuwis keh uvitwiy, ukawihniwiykata akiw ig ka iki wotwiy? 24Ivegnay gumkatkis noras yu. Egkis ka mutuh ariknawnema, egkis kawnata taris ariknawnema. Ine egkis kawnata bayah ariknawnema ariku kat ine ariku payt. Heneme Uhokri iki gumanakis takunipti. Yis ka aynsima pi kavigte git Uhokri mpiy kuhivra. Ig iki yit hawata. 25Ka ik adahan wis kiyabwih udehetni akak ku samah wis kiyimwihwa nikak. Wis kiyimwihwa nikak waditnevyenen. 26Ku wis kiyimwihwa aharit arikna nopsesniyenen, ka innema keh wis uti arikna. Hawata madikte arikna hawata akiw. Wis kiyimwihwa nikak waditnevyenen. 27Ivegnay ku samah ivuriti gubereswankis. Egnes ivuriti ka kannivwi adahan guvitkis. Egkis kawnata paduk gukawihnikis. Heneme egkis ka gubewisima. He amekene Salomão gibereswan ka mataka gubereswankis. Henewatbaki in. 28Egkis ivuriti he ewaktinen. Egkis waditnevyenen. Ku avim inin egkis ay amadga inin. Takuwanekme egkis yuma akiw egkis bukahevpka. Yis ka aynsima pi kavigte git Uhokri mpiy ivuriti. Ku yis hiyap ig Uhokri iki gubereswankis, yiskata akiw ig ka iki yit yikawihni akiw? Mmahki yis ka kamaxwa givitit Uhokri? 29Ka yi muwaka wakaymni aharit ariknawnema ku pariye muwekne yit amadga inin, ine aharit yaxni, ine aharit yihigvan, ine aharit yikawihni. Ka yi muwaka kiyimwihwa nimin. 30Ku yis kiyimwihwa nimin hene, nikwe yis humaw kewa hiyegbe ku pariye kane Uhokriyanvuma. Ignes avanenekwa wakaymni aharit ini. Yisme ka yi muwaka wakaymni hene. Wigwiy hiyak ku pariye yimawkanitnene. 31Pi kabayte yis wakaymnihwa aharitkit Uhokri gikumadukan. Ayge nikwe ig iki yitnek madikte ku pariye yimawkanitnene.

Igiska aynte inurik

Mt 6.19; 2Tim 4.8; 1Ped 1.4; Eb 10.34; Ap 7.15, 21.1, 22.1

32— Ka yi muwaka avis, nukamkayuvwi. Wigwiy kawihkis gikumadukan ta yivititnek. Henewa gimawkan. 33Hiyawa yis piyuk yewkanbet, yis amnih hiyeg madiptavye akak akakuravig. Ayge nikwe yis utinek yewkanbet ku pariye kane madikti yiw. Yis kadahanek igiska aynte inurik ku pariye dahwa adahan avanenekwa. Ayge yuma amevwavye danuh atere adahan ignes kidisnes yewkanbet. Ine masumsu ka kagehbeta kamis. 34Ku pis avanenekwa ivegminenekwa pihiyekemni amin arikna amadgaya inin, amun ini pidahan igiska ay amadga inin. Heneme ku pis avanenekwa ivegminenekwa pihiyekemni amin arikna inurikyene, amun ini pis kadahan igiska aynte inurik.

Misakwanabay ahegbet avit nudawnhan

Mt 24.42; Mk 13.35; Lk 21.34; 1Tes 5.4

35— Ahekbetawnabay, kasimsahawnay adahan yis ahegbet avit nudawnhan akak yabukria kabutennene. 36Ikawnay ke hiyegbe ku pariye wahepnene gikivarakis gidawnhan ariwntak fet maripkawka. Igkis wahepnenes marihwa ku aysaw ig tes lapot igkis ahegbet adahan igkis wokenes lapot gidahan. 37Ka aynsima batekka ay gidahankisnek ibuktiviyene ku pariye gikivarakis utivgikis ivegnenes kane himaknema. Avim ini igwa hiyak gikakkisnek. Ig kasimsahaw akak ibukti gisimsa. Ig awna gitkis adahan igkis axnes, igwa ikavgikis. Henewatbaki nah keh yikaknek. 38Nawenetke nah ayivwite. Nawenetke pabuskak mitipka nah danuhnek, nawenetke kabeyweke nah danuhnek. Ku aysaw nah danuh atere, ku nah utivyi ivegbet, ayge nikwe yis uti ka aynsima batekkanek. 39Misakwanabay ahegbet takunipti. Wake pahavwi payt akivara hiyaknibe ku kabet amepye danuhbe givinekut, ig pukuhpawnakam adahan ig mpithig marihwa ig ka parak amevwiye atere givinekut. 40Yisme kawnata hiyaknima ku kabet nah danuhnek, nah ku pariye wageswe awayg amadgaya inin. Nah danuhnek pahaye adahan. Amawka ku yis ahegbetnenekwa takunipti.

Ikawnabay ke kibeynevwibe ibukti gidahan Uhokri

Mt 24.45

41Igme Pedru ayavgi:

— Kiyavwiye, mmah pis awna inakni iwit udahannenwa, ba kawk, ba gidahankis madikte hiyeg?

42Igme Kiyavwiye Jesus kaytwa giwn:

— Nah awna gidahankis madikte hiyeg ku pariye ikewnevwi ke kibeynevwibe ibukti. Ku pahavwi ibukti hiyakemniye, ku ig kis adahan gikivara iveg givitit, nikwe ku gikivara tivikwiye, avit gitepkemni igme avuriwkis gibukvig nawenyevwi ta git. Pisenwa nikwe ig tivik. Igme gibuk misekwe. Ig ikene gimanakis mpuse hawkri. 43Ku aysaw ner gikivara diyuh atere akiw, ku ig uti ig gibuk avuriwnene gibukvig kabayntiwa, nikwe ig iki git ka aynsima kabayka. 44He ig avuriwkis madikte gewkanbet ta giwakurit ner gibuk. Henewatbaki ig keh. Nah hawata nah keh yikaknek. 45Heneme ku ner gibuk ka avuriw gibukvig kabayntiwatma, ig ner ka uti kabayka. Kawa. Nawenetke ig ivegminene gihiyekemni ig awna: “Nukivara ka ayta kibehtenwatma. Ig ayivwihwe ka aynsima akiw.” Ayge nikwe ig kavusa biwh gibukvig awaykemni akak gibukvig tinogben, ig kayhsaw amin axka, higapka, ig uwkihwene ayge. 46Ayteke ku aysaw ig ka wahapnigma, pahaye adahan ig gikivara danuhnek. Ig danuh ku aysaw gibuk ka iknima adahan ig danuh. Ayge nikwe ig katiwnise gitaraksan ta git gibuknek. Ig sarayhkiswig ta arimkanit ini iwetrit gidahankis hiyeg ku pariye kane ihpenevwima giwn. 47Ku pariye ibukti hiyak ku pariye gikivara gibetki, ku ig ka ahegbetaw avit gaytni, ku ig ka keh ku samah gikivara gimawkan, ayge nikwe ka aynsima mbeyne hiyapkiska gitnek. 48Heneme ku pariye hiyeg kane hiyak ku samah gikivara gibetki, ku ig tarakse ku pariye gimawkan, nikwe ka kiyesadima mbeyne hiyapkiska git. Mmanawa ku wis ikaka ka aynsima hiyakemniki ta wot, ayge nikwe wis muwakapka adahan wis wewne akak ini ka aynsima hiyakemniki. Hawata ku wis ikaka ka aynsima annivwit ta uwakurit, ayge nikwe wis muwakapka adahan wis kehne ini ka aynsima annivwit.

Hiyeg kavetunsaynek

Mt 10.34

49— Nah ayta atan adahan nah ke wotbe nah hakisnebe tiket ay amadga inin adahan in bukehne ku pariye kane kabay ay abet hiyeg gihiyekemnikis. Wake nah kuwis hakisnibe, nah ka aynsima batekkam. 50Heneme amawka pitatye nah kaywepka akak mbeyne ka aynsima. Aa, ka aynsima nah kayahni kuwis avit in danuh nutuh. 51Yis hawata hiyap mbeynenek. Ka yi muwaka iki ku nah ku samah nah danuh atan nah keh madikte hiyeg amadga inin pasamrak pawtak ku avim inin. Kawa. Ku avim inin hiyeg kavetunsaynek nuvatra. 52Han pitatit igkisweke pakebyekne gihiyekemnikis ibekhewbetnek. Mpana suguhnan, piyaname batekye nukakuh. Ku kawk piyana suguhnan, mpaname batekye nukakuh. 53Avim ini igti kavetunsa gikamkayhkisnek. Ikamkaytime kavetunsa gigkisnek. Inagti kavetunsa gukamkayhkisnek. Ikamkaytime kavetunsa gunagkisnek. Imatrut kavetunsa guhinyokisnek. Ihinyotme kavetunsa gumatrukisnek.

Hiyeg ka pukuha Uhokri gikehni

Mt 16.2

54Hawata akiw ig Kiyavwiye Jesus awna ta gitkis neras hiyeg kabubuknene ayge. Giwn:

— Ku aysaw yis hiyap ukuhne katamnap uvitkitak yis awna: “Muwok nehmnik.” Henewa in danuh. 55Hawata akiw ku aysaw mayg paharavyenenwa kannikaw yis awna: “Kuri awahawka kabayntiwa.” Henewa in danuh. 56Yis ikawnamah ke wotbe yis hiyakemniyebe hiyeg bawa yis yuma yihiyekemnisima. Yis pukuha en kabayntiwa, yis pukuha waxri. Mmahki yis ka pukuha Uhokri ku pariye gikehni ku avim inin hawkri?

Amawka yis wadithebdih yitaraksan gikak Uhokri kibehtenwa

Mt 5.25

57— Ik adahan yis pukuha ku pariye wadit adahan yis keh gikak Uhokri. Ik adahan yiwnteknewa yis pukuhpin. Ku samah yis keh gikakkis hiyeg amadgayavu inin, amawka hawata yis keh gikak Uhokri. 58Nah akkite yit ku samah. Amadga inin ku pahavwi taraksa gikak pahavwi, amawka ku ig ner kataraksanye wadithebdih gitaraksan kibehtenwa gikak pahavwi. Mmanawa ku ig ner pahavwi waxwevginek givetunat hiyaptigi adahan ig kamiyevgi atere, ayge avigku ahin avit igkis danuh atere, igme ner kataraksanye mpiksaw wadithebdih ini gitaraksan gikak. Ku ig ka wadithebdihni, ig ner pahavwi kamiyevginek ta git hiyaptigi, igme hiyaptigi awahkisnek giwatni, igme giwatni paraksenek ner kataraksanye arikut parakseket. 59Ku ig paraksepka atere, ig ka pes ayteke he ku aysaw ig katiwnih madikte gimatiwnihni. Yis hawata. Amawka ku yis wadithebdih yitaraksan gikak Uhokri pisenwate ku akak inin. Henewatbaki in.

Currently Selected:

Lúkas 12: pluPB

Highlight

Copy