Lúkas 16
16
Amawka wixwiy kawih wewkanbetwiy amadgaya inin gidahan Uhokri
1Pisenwa gawnan inakni iwit hene, ig Kiyavwiye Jesus awna ta gitkis gikannuhnivwi nawenyewa iwit patuwesbuhka akiw. Ig awna:
— Minikwak pahavwi awayg igisye kadahan pahavwi gihiyega, gewkanbet akavriwten. Pahay hawkri hiyeg danuh atere git igkis awna git: “Ner pihiyega pewkanbet akavriwten ig he padekbetevi pewkanbet akak pikakura.”
2Ig gikivara timapni hene, ig watihe ner gihiyega. Igme gihiyega danuh atere, igme gikivara awna git: “Mmahki nah timap mbeyevye pak hene? Asa tamak amadga kagta madikte ku pariye piwiwhni, nah muwka madikte ayvekuye amadga kagta. Ayteke pis tivik. Ka hiya pisma avuriw newkanbet akiw.”
3Igme ner awayg timapni hene, ig awna ginaktin: “Mmah nah keh kuri? Nukivara ka muwakavun akiw adahan nah kannivwi gidahan. Kitak nah uti naxninek? Nah yuma nudatni adahan nah kannivwiye awiyka. Nah marenpi makahpaw awptihan. 4Aah, nah hiyak ku samah nah keh. Nah kawihte nukivara gewkanbet ku pariye ay nuwakuh kahadbe ku aysaw nah ivukepkanek nah kakagmada ku pariye amavan givinekutkis.”
5Ayteke nikwe ig wasavanew giminkis neras ku pariye matiwnihnevwi gikivara adahan igkis ayta git. Igkisme danuh atere, igme awna ta git pahavwi ku pariyekit danuh. Giwn: “Aysamuk pis matiwnih git nukivara?”
6Igme kaytwa giwn: “Nah matiwnih madikawku madikwa (100) bom diluy.” Igme awna git: “Nobaki pikagtan adahan pimatiwnihni. Batnaba atan. Hiyawa pis tamak nawenyewa kagta akiw kibehtenwa adahan pimatiwnihni ininewa abusku madikawku madikwa (50) bom.”
7Ayteke ig awna ta git pahavwi akiw. Giwn: “Ya pis? Aysamuk pis matiwnih?” Igme kaytwa giwn: “Nah matiwnih madikawkuvut madikawku madikwa (1.000) sak fahhin.” Igme awna git: “Nobaki pikagtan adahan pimatiwnihni. Hiyawa pis tamak nawenyewa kagta akiw adahan pimatiwnihni ininewa ntewnehkervut madikwa akak madikawku madikwa (800) sak.”
8Ig ner awayg awna inakni hene, ig ka keh wadit. Heneme ig kannuh avuriw givit adahan ku pariye nehmnikuhpiye gimkat. Hiyeg amadgayavu inin igkis pi kannuhte avuriw givitkis adahan ku pariye nehmnikuhpiye gimkatkis mpiya nuhiyegavu kabutennevwi. Igkis kannuh avuriw givitkis adahan ku pariye nehmnikuhpiye gimkatkis amadga inin. Igkisme nuhiyegavu kabutennevwi igkis ka kannuh kabayntiwatma adahan ku samah igkis avuriw givitkis adahan ku pariye nehmnikuhpiye gimkatkis aynte inurik.
9Nah aya yit nukannuhnivwi, kawihnabay yewkanbet amadgaya inin gidahankis yikagmadavu inurikyenevwi kahadbe ku aysawnemenek in yewkanbet mpiye, igkis amavay ta givinekutkis inurikut.
10Ku pahavwi kannuh kawih aynesa arikna kabayntiwa gidahan Uhokri, nikwe ig hawata kannuh kawih ka aynsima arikna kabayntiwa gidahan Uhokri. Ku pahavwi ka kawih aynesa arikna wadit gidahan, ig kawnata hiyak akawhak arikna kiyestenene.
11Yis hawata. Ku yis ka kannuh kawih yewkanbet amadgaya inin wadit gidahan Uhokri, nikwe aysawnemenek yuma arikna inurikyene ikaka ta yiwakurit.
12Henewatbaki in. Ku yis ka kannuh kawih Ukivarawiy gewkanbet waditnema gidahan, nikwe aysawnemenek ig ka kawihkis yit ariknawnema ku pariye yidahan.
13Pahavwi ibukti ka hiya igma kakivarahaw gitkis piyana gikivaravu hehpekuyema, mmanawa ig pi batektenek gikak pahavwi mpiya pahavwi. Ig miniwkam giw pahavwi adahan ig kannivwiye gidahan pahavwiwa. Wixwiy hawata akiw. Ka hiya wixwiyma mpiksaw keh Uhokri gibetki hehpekuyema ku samah wixwiy mpiksewne aharit igiska amadgaya inin udahanwiy. Amawka ku wixwiy kaniy pahavwiwa adahan wixwiy kakivarahaw git.
Ay ku pariye hiyeg iki ku in kibeyne bawa in aseneweke git Uhokri
14Neras farizewkis timapni madikte inakni giwn hene, igkis mahivwihpig. Mmanawa igkis batek akak gewkanbetkis, igkis ka biyuksakere gikakurakis gidahan Uhokri.
15Ig Kiyavwiye Jesus hiyapni hene, ig awna gitkis:
— Yis ikawnamah ke wotbe yis kibeynevwibe giwtrikkis hiyeg, heneme Uhokri hiyak ku pariye ay abet yihiyekemni. Ay ku pariye hiyeg iki ku in kibeyne bawa in aseneweke ta git Uhokri.
Amekene Moís gikumadukan ka mpiya
Mt 5.18; Ro 7.7; 1Ko 15.56; Gal 3.19
16— Ig amekene Moís gikumadukan in yikannuhten gimin Uhokri. Ignes Uhokri gawnevevu pitatyevwi igkis hawata yikannuhtenwata he danuhe git Joawh Batistamni. Kurime usuhnewa ekkene ini kibeyne inetit ku Uhokri gikumadukan ahawkanavrik kuwis danuh. Kuri hiyeg mpiksewnekuye kawih ini gikumadukan.
17Heneme ig amekene Moís gikumadukan in ka mpiya. En akak waxri in mahiko adahan in mpiya. Heneme in pi mahikote akiw adahan pahat iwit atiksak ay amadga amekene Moís gikumadukan adahan in mpiya.
Maytwawka
De 24.1; Mt 5.31, 19.1; Mk 10.1; 1Ko 7.10
18— Ku pahavwi awayg maytwe gihayo, ku ig maripkaw gukak pahavuwa tino akiw, amun ini nikwe giwtrik Uhokri ig kuwis powkemnihwe gukak. Hawata akiw ku pahavwi awayg kamaxe pahavu tino ku pariye maytwevyo gugihgi, ay amun ini nikwe giwtrik Uhokri ig kuwis powkemnihwe gukak.
Awayg igisye ay amun miyaravye giwetrikis
19Ayteke ig Kiyavwiye Jesus kinetihwa gitkis akak pahat iwit patuwesbuhka akiw. Ig awna:
— Minikwak pahavwi awayg igisye. Ig bereswene akak gibereswan kane atiwnisima. Ig fetya ig kehne batekka takunipti.
20Hawata akiw pahavwi awayg ayge madiptivye. Giw Lazaru. Ig busukvitwiye. Mpuse hawkri ig haritasaka avinumavrik ner igisye gilapota.
21Ig aharit ner igisye gimana arebdi tuguhavye adahan gaxni. Ig hiyap ka aynsima mbeyne ayge he pewru ayta ewhata gibuskana.
22Ayteke ariwnteke ini ig madiptivye miyap. Ahj ayta iwevgi waxwevgi ta giwanmakut kiyavwiye Abraawh. Ayteke ner igisye ig hawata ig miyap ig avuhpika.
23Ig igisye aynte amun miyaravye giwetrikis, ig hiyepne ka aynsima kayahwaki ayge. Ig sarayh givegi, ig hiyap kiyavwiye Abraawh piyawakte, hawata ig hiyap Lazaru ay giwanmaku.
24Ig hiyapni hene, ig kabiman ta gimkanit. Ig awna: “Niguh Abraawh, uya amnihun. Uya awahkis Lazaru ayta nutuh. Wani ig idis giwak akisunen ta ahakwat un adahan ig ayta tikis ta nunenmadgat adahan kisevine nunen. Mmanawa nah kayah ka aynsima abet nor tiket.”
25Igme kiyavwiye Abraawh kaytwa giwn: “Nukebyi, kiyeminahnaba ku samah pis amadgate hawkri pis hiyap ka aynsima kabayka. Igme Lazaru hiyap ka aynsima mbeyne ayge. Kurime ig aydhaka ka aynsima ay numunuh, pisme ay hiyepne mbeyne abet kayahwaki avatra pitaraksan. 26Hawata akiw uwetriwiy kuwis ibekhepka udahanwiy. Yuma manuket adahan hiyeg danuhne atere pit ine adahan hiyeg ayge danuhne atan wotuh.”
27Ig igisye hiyapni hene, ig awna git: “Niguh, ku hene nikwe, nah aya pit, awahkisnig ta givinekut niguh. 28Nah kadahan pohowku gikebikis nukebyuvwi ayge. Wani ig iki nudahan gihiyekemnikis kahadbekama igkis ka keh kema nahma marihwa igkis ka hiyap mbeyne ay abet inin kayahwaki hawata ke nahbe.”
29Igme kiyavwiye Abraawh kaytwa giwn: “Igkis kuwis ikaka gitkis gihiyekemnikis. Igkis kuwis kadahan Moís gikumadukan. Igkis kuwis kadahan Uhokri gawnevevu giwnkis. Hiyawa igkis timap inakni giwnkis.”
30Igme igisye awna: “Kawa, niguh Abraawh, igkis ka timepkere inakni giwnkis. Heneme ku pahavwi miyaviye danuh atere gitkis, igkis iha giwnek, igkis wages gihiyekemnikisnek.”
31Igme kiyavwiye Abraawh awna git: “Ku igkis ka timepkere Moís giwn ine Uhokri gawnevevu giwnkis, nikwe hiyawa pahavwi kannikaw ariw gimiremni igkis kawnata iha giwnnek.”
Currently Selected:
Lúkas 16: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
