ಮತ್ತಾಯ 10
10
ಯೇಸು ಪನ್ನೆರಂಡ್ ಅಪೊಸ್ತಲಂಗಳ ಅಯಿಚದ್
(ಮಾರ್ಕ 3.13–19; ಲೂಕ 6.12–16)
1ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ಕೂಳಿ ಪುಡ್‌ಚಯಿಂಗಕ್ ಕೂಳಿ ಬುಡ್‌ತ್‌ವಕು, ಎಲ್ಲಾ ರೋಗ ಪಿಂಞ ಎಲ್ಲಾ ಕಾಯಿಲೆನ ವಾಸಿ ಮಾಡ್‌ವಕು ಅಯಿಂಗಕ್ ಅದಿಕಾರ ಕೊಡ್‍ತತ್.
2ಆ ಪನ್ನೆರಂಡ್ ಅಪೊಸ್ತಲಂಗಡ ಪೆದ ಎಂತ ಎಣ್ಣ್‌ಚೇಂಗಿ, ಆದ್ಯವಾಯಿತ್, ಪೇತ್ರಾಂದ್ ಕಾಕುವ ಸೀಮೋನ ಪಿಂಞ ಅಂವೊಂಡ ತಮ್ಮಣ ಅಂದ್ರೆಯ, ಜೆಬೆದಾಯಂಡ ಮೋನೆಯಂಗಳಾನ ಯಾಕೋಬ ಪಿಂಞ ಅಂವೊಂಡ ತಮ್ಮಣನಾನ ಯೋಹಾನ, 3ಫಿಲಿಪ್ಪ, ಬಾರ್ತೊಲೊಮಾಯ, ತೋಮ, ಕಂದಾಯ ಎಡ್‌ಪಂವೊನಾನ ಮತ್ತಾಯ, ಅಲ್ಫಾಯಂಡ ಮೋಂವೊ ಯಾಕೋಬ, ತದ್ದಾಯ, 4ದೇಶ ಪ್ರೇಮಿಯಾನ#10.4 ಯೇಸುರ ಕಾಲತ್‍ಲ್ ಪಲಸ್ತೀನ ದೇಶತ್‍ನ ಆಳಿಯಂಡಿಂಜ ರೋಮ್ ರಾಜ್ಯಕ್ ವಿರೋದವಾಯಿತ್ ದಂಗೆ ಮಾಡಿಯಂಡಿಂಜ ರಾಜಕೀಯ ಪಕ್ಷ. ಸೀಮೋನ ಪಿಂಞ ಯೇಸುನ ವಿರೋದಿಯಂಗಡ ಪಕ್ಕ ಪುಡ್‌ಚಿತ್ ಕೊಡ್‍ಪ ಇಸ್ಕರಿಯೋತ ಯೂದ ಎಣ್ಣ್‌ವಯಿಂಗಳೇ.
ಯೇಸು ಪನ್ನೆರಂಡ್ ಶಿಷ್ಯಂಗಳ ಅಯಿಚದ್
(ಮಾರ್ಕ 6.7–13; ಲೂಕ 9.1–6)
5ಈ ಪನ್ನೆರಂಡ್ ಶಿಷ್ಯಂಗಳ ಯೇಸು ಅಯಿಪಕ, ಇನ್ನನೆ ಎಚ್ಚರಿಕೆ ಮಾಡಿತ್ ಅಯಿಚತ್: ಯೆಹೂದ್ಯಂಗ ಇಲ್ಲತ ಜಾಗಕ್ ಪೋಕತಿ ಪಿಂಞ ಸಮಾರ್ಯ#10.5 ಯೆಹೂದ್ಯಂಗ ಪಿಂಞ ಯೆಹೂದ್ಯಂಗಲ್ಲತಯಿಂಗಕ್ ಪುಟ್ಟ್‌ನ ಸಂತಾನಕಾರಂಗ. ಅದ್ಂಗಾಯಿತ್ ಯೆಹೂದ್ಯಂಗ ಈಂಗಳ ಪರಜಾತಿಯರನೆಕೆ ನಡ್‍ತ್‍ಚಿ. ಈಂಗಳು ಯೆಹೂದ್ಯಂಗಡ ದೇವನ ಆರಾದನೆ ಮಾಡಿಯಂಡಿಂಜತ್. ಪಟ್ಟಣತ್‍ಲ್ ಕಾಲಿಡತಿ. 6ಅದ್ಂಡ ಬದ್‍ಲ್ ಇಸ್ರಾಯೇಲ್‍ಕ್ ಮಾತ್ರ ಪೋಯಿ. ಅಯಿಂಗ ಬಟ್ಟೆ ತಪ್ಪಿ ಪೋನ ಕೊರಿರನೆಕೆ ಉಂಡ್. 7ಅಲ್ಲಿಕ್ ಪೋಯಿತ್, ಪರಲೋಕ ರಾಜ್ಯ ಬೆರಿಯ ಬಪ್ಪಾಂದ್ ಎಣ್ಣಿ. 8ಕಾಯಿಲಸ್ತಂಗಳ ವಾಸಿ ಮಾಡಿ, ಚತ್ತಯಿಂಗಳ ಬದ್‍ಕ್‍ಚಿಡಿ. ಕುಷ್ಟರೋಗಿಯಳ ವಾಸಿ ಮಾಡಿ ಪಿಂಞ ಕೂಳಿ ಪುಡ್‌ಚಯಿಂಗಕ್, ಕೂಳಿನ ಬುಡ್‍ತಿ. ನಿಂಗಕ್ ಪುಕ್ಕಟೆಯಾಯಿತ್ ಕ್‍ಟ್ಟ್‌ನದ್‍ನ ಪುಕ್ಕಟೆಯಾಯಿತ್ ಕೊಡಿ.
9ನಿಂಗಡ ಕೂಡೆ ಪೊನ್ನ್, ಬೊಳ್ಳಿ, ತಾಂಬ್ರ ಏದು ಎಡ್‍ತಂಡ್ ಪೋಕತಿ. 10ಪ್ರಯಾಣಕಾಯಿತ್ ಒರ್ ಚೀಲ ಆಡ್, ದಂಡ್ ಕೋಟ್ ಆಡ್, ಎಕ್ಕಡ ಆಡ್, ಕೋಲ್ ಆಡ್, ಒಂದನೂ ಎಡ್‍ಕತಿ. ಒರ್ ಕೆಲಸಕಾರಂಗ್ ಎಂತ ಬೋಂಡ್‌ವೋ ಅದ್‍ನ ಜನ ಕೊಡ್‍ಕಂಡು. 11ನಿಂಗ ಒರ್ ಊರ್‌ಕ್ ಅಥವ ಪಟ್ಟಣಕ್ ಪೋಪಕ, ಯೋಗ್ಯನಾಯಿತುಳ್ಳ ಒರ್ ಮನುಷ್ಯನ ಕಂಡ್‍ಪುಡ್‌ಚಿತ್, ಇಂಞೊರ್ ಊರ್‌ಕ್ ಪೋಪಕತ್ತನೆ ಅಂವೊಂಡ ಮನೆಲ್ಲೇ ಇರಿ. 12ನಿಂಗ ಅಯಿಂಗಡ ಮನೆರೊಳ್‌ಕ್ ಪೋಪಕ ಅಯಿಂಗಕ್ ಸಮಾದಾನಾಂದ್ ಆಶೀರ್ವಾದ ಮಾಡಿ. 13ಆ ಸಮಾದಾನಕ್ ಅಯಿಂಗ ಯೋಗ್ಯವಾಯಿತುಂಡೇಂಗಿ ಆ ಸಮಾದಾನ ಅಲ್ಲಿ ಇರಡ್ ಇಲ್ಲತೆಪೋಚೇಂಗಿ, ಆ ಸಮಾದಾನ ನಿಂಗಡ ಪಕ್ಕ ಪುನಃ ಬರಡ್. 14ದಾರೇಂಗಿ, ನಿಂಗಳ ಸ್ವಾಗತ ಮಾಡತ ಪೋಚೇಂಗಿ ಅಥವ ನಿಂಗ ಎಣ್ಣ್‌ವಾನ ಕ್‍ೕಕತೆ ಪೋಚೇಂಗಿ, ಅಯಿಂಗಡ ಊರ್‌ನ ಬುಟ್ಟಿತ್ ಬಪ್ಪಕ, ನಿಂಗಡ ಕಾಲ್‌ಲ್ ಉಳ್ಳ ದೂಳ್‍ನ ಕೊಡ್‍ಕಿತ್ ಬಾರಿ#10.14 ನಿಂಗ ದೇವಡ ನಲ್ಲ ಸುದ್ದಿನ ತ್‍ಕ್ಕಾರ ಮಾಡ್‍ನಗುಂಡ್, ನಂಗಳು ನಿಂಗಳ ತ್‍ಕ್ಕಾರ ಮಾಡ್‌ವ. ನಿಂಗಡ ಮೇಲೆ ಬಪ್ಪ ನ್ಯಾಯತೀರ್ಪ್‌ಕ್ ನಂಗ ನಿಂಗಡ ಆತ್ಮಕ್ ಜವಾಬ್ದಾರಂಗ ಅಲ್ಲಾಂದ್ ಎಣ್ಣ್‌ವಕುಳ್ಳ ಗುರ್‌ತ್. . 15ದೇವ ತೀರ್ಪ್ ತಪ್ಪ ದಿವಸತ್‍ಲ್, ಈ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆಕಿಂಜ, ಸೊದೋಮ್#10.15 ಆದ್ಯ ಪುಸ್ತಕ 19.1–38 ಈ ಪಟ್ಟಣತ್‍ಲ್ ಇಂಜ ಜನ ದುಂಬ ಪಾಪ ಮಾಡ್‍ನಗುಂಡ್ ದೇವ ಅಯಿಂಗಳ ನಾಶ ಮಾಡ್‍ಚಿ ಗೊಮೋರ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆ ಕಮ್ಮಿಯಾಯಿತಿಪ್ಪಾಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ.
ಬಪ್ಪಕುಳ್ಳ ಹಿಂಸೆ
(ಮಾರ್ಕ 13.9–13; ಲೂಕ 21.12–17)
16ನೋಟಿ, ನಿಂಗಳ ತೋಳಯಡ ಮದ್ಯತ್ ಕೊರಿಯಳ ಅಯಿಪನೆಕೆ ನಾನ್ ನಿಂಗಳ ಅಯಿಚಂಡುಳ್ಳ. ಅದ್ಂಗಾಯಿತ್ ನಿಂಗ ಪಾಂಬ್‍ರನೆಕೆ ಜಾಣವಾಯಿತು, ಪಾರಿವಾಳರನೆಕೆ ಸಾದುವಾಯಿತು ಇರಿ. 17ಇದ್‍ಲ್ಲತೆ ಜನಡ ಕೂಡೆ ಎಚ್ಚರತ್‍ಲ್ ಇರಿ. ಅಯಿಂಗ ನಿಂಗಳ ನ್ಯಾಯಾಲಯಕ್ ಬಲ್‍ಚಂಡ್ ಪೋಯಿತ್, ಅಯಿಂಗಡ ಆಲೋಚನೆ ಸಬೇಲ್ ಒಪ್ಪ್‌ಚಿಟ್ಟಿತ್ ಅಯಿಂಗಡ ಸಬಾಮಂದಿರತ್‍ಲ್ ನಿಂಗಳ ಚಾಟಿಲ್ ಪೊಯ್ಯುವ. 18ನಾಡಗುಂಡ್ ಬಲ್ಯ ಅದಿಪತಿಯಂಗಡ ಪಿಂಞ ರಾಜಂಗಡ ಎದಿಕೆ ನಾಡ ನಲ್ಲ ಸುದ್ದಿ ಎಣ್ಣ್‌ವಕಾಯಿತ್ ನಿಪ್ಪ್‌ಚಿಡ್‌ವ. ಇನ್ನನೆ ಅಯಿಂಗಕು ಪಿಂಞ ಅನ್ಯ ಜನಾಂಗಕು ನಾಡ ವಿಷಯತ್‍ನ ಎಣ್ಣ್‌ವಿರ. 19ಆಚೇಂಗಿ ನಿಂಗಳ ಬಂದಿಚಿಡ್‌ವಕ, ನಿಂಗ ಎಂತ ಎಣ್ಣಂಡೂಂದ್, ಎನ್ನನೆ ಎಣ್ಣಂಡೂಂದ್ ಬೇಜಾರ್ ಮಾಡಂಡ. ಏದ್ ಸಮಯತ್‍ಲ್ ಎಂತ ತಕ್ಕ್ ಪರಿಯಂಡೂಂದ್ ನಿಂಗಕ್ ಗೊತ್ತ್ ಮಾಡ್‌ವ. 20ಎನ್ನಂಗೆಣ್ಣ್‌ಚೇಂಗಿ ಅಕ್ಕ ತಕ್ಕ್ ಪರಿವದ್ ನಿಂಗ ಅಲ್ಲ, ನಿಂಗಡ ಅಪ್ಪಂಡ ಆತ್ಮವೇ ನಿಂಗಡ ಒಳ್‌ಳಿಂಜ ತಕ್ಕ್ ಪರಿವ.
21ಅಣ್ಣತಮ್ಮಣಂಗ ತಾಂಡ ಸ್ವಂತ ಅಣ್ಣತಮ್ಮಣಂಗಳ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡ್‌ವ, ಅಪ್ಪಂಗ ಸಹ ತಾಂಡ ಸ್ವಂತ ಮಕ್ಕಳ ಅದೇ ಪ್ರಕಾರ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡ್‌ವ. ಮಕ್ಕ ಅಪ್ಪವ್ವಂಗಕ್ ವಿರೋದವಾಯಿತ್ ಮಕ್ಕಳೇ ಅಯಿಂಗಳ ಕೊಲ್ಲ್‌ಚಿಡ್‌ವ. 22ನಾಡಗುಂಡ್ ಎಲ್ಲಾ ಜನಳು ನಿಂಗಳ ದ್ವೇಶಿಚುಡುವ, ಆಚೇಂಗಿ ಕಡೇಕತ್ತನೆ ದೃಡವಾಯಿತ್ ನಂಬಿಕೇಲ್ ನಿಪ್ಪಂವೊಂಗ್ ರಕ್ಷಣೆ ಕ್‍ಟ್ಟ್‌ವ. 23ಒರ್ ಊರ್‌ಲ್ ನಿಂಗಕ್ ಹಿಂಸೆ ತಂದಕ ಬೋರೆ ಊರ್‌ಕ್ ಓಡಿ ಪೋಯಿ. ಎನ್ನಂಗೆಣ್ಣ್‌ಚೇಂಗಿ ಮನುಷ್ಯಕುಮಾರ ಬಪ್ಪಕ್ ಮಿಂಞ ಇಸ್ರಾಯೇಲ್‌ಲ್ ಉಳ್ಳ ಪಟ್ಟಣಕೆಲ್ಲ ನಿಂಗಕ್ ಪೋಪಕ್ ಕಯ್ಯುಲೇಂದ್ ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ. 24ಉಪಾದ್ಯಕಿಂಜ ಶಿಷ್ಯ ಬಲ್ಯಂವೊನು ಅಲ್ಲ, ಎಜಮಾನಕಿಂಜ ಆಳ್ ಬಲ್ಯಂವೊನು ಅಲ್ಲ. 25ಒರ್ ಶಿಷ್ಯ ಉಪಾದ್ಯಂಡನೆಕೆ ಇಂಜತೇಂಗಿ ಮದಿ, ಅನ್ನನೆ ಒರ್ ಆಳ್ ಅಂವೊಂಡ ಎಜಮಾನಂಡನೆಕೆ ಇಂಜತೇಂಗಿ ಮದಿ. ಮನೆರ ಎಜಮಾನನೇ ಬೆಲ್ಜೆಬೂಲ್#10.25 ಸೈತಾನಂಗ್ ಬೆಲ್ಜೆಬೂಲ್ ಎಣ್ಣುವ ಪೆದ ಸಹ ಉಂಡ್. ಅಂವೊ ಕೂಳಿಯಡ ಪೆರಿಯಂವೊ. ಎಂದ್ ಕಾಕ್‍ಚೇಂಗಿ, ಅಂವೊಂಡ ಮನೆಕಾರಳ ಇಂಞು ಎಚ್ಚಕ್ ಎಣ್ಣುವ?
ದಾರ್‌ಕ್ ಬೊತ್ತಂಡು?
(ಲೂಕ 12.2–7)
26ಆನಗುಂಡ್ ನಿಂಗಳ ದಬಾಯಿಚಿಡ್‍ವಯಿಂಗಕ್ ಬೊತ್ತತಿ. ಎನ್ನಂಗೆಣ್ಣ್‌ಚೇಂಗಿ, ಒಳ್‌ಪ್‌ಚ್ಚಿಟಂಡ್ ಉಳ್ಳದೆಲ್ಲ ಪೊರಮೆ ಬಪ್ಪ, ಮುಚ್ಚಿತುಳ್ಳದೆಲ್ಲಾ ಬೊಳಿಕ್ ಬಪ್ಪ. 27ನಾನ್ ನಿಂಗಕ್ ಇರ್‌ಟ್‌ಲ್ ಪಡಿಪ್‍ಚಿಡ್‍ವಾನ, ನಿಂಗ ಬೊಳಿಲ್ ಎಣ್ಣಿ ಕೊಡಿ. ನಿಂಗಕ್ ಗುಟ್ಟಾಯಿತ್ ಕೆಮಿಲ್ ಎಣ್ಣ್‌ವಾನ ಮನೆರ ಕೊಡಿಲ್ ಪೋಯಿತ್ ಕೂತ್ ಕೊಡ್‌ತಿತ್ ಎಣ್ಣಿ ಕೊಡಿ. 28ತಡೀನ ಮಾತ್ರ ಕೊಂದಿತ್ ಆತ್ಮತ್‌ನ ಕೊಲ್ಲ್‌ವಕ್ ಕಯ್ಯತಯಿಂಗಕ್ ಬೊತ್ತತಿ. ಆಚೇಂಗಿ ಆತ್ಮತ್‍ನು ತಡೀನು ನರಕತ್‍ಲ್ ನಾಶ ಮಾಡ್‌ವಕ್ ಶಕ್ತಿವಂತನಾಯಿತುಳ್ಳಂವೊಂಗ್ ಬೊತ್ತಿಚಿಡಿ. 29ಗುಬ್ಬಚ್ಚಿನ ಚೆನ್ನ ಗೇನ ಮಾಡಿಯೊಳಿ, ಅದ್ಂಡ ಕ್ರಯ ದುಂಬ ಕಮ್ಮಿ. ಒರ್ ನಾಣ್ಯಕ್ ದಂಡ್ ಗುಬ್ಬಚ್ಚಿನ ಎಡ್‍ಪಕಯ್ಯು. ಆಚೇಂಗಿಯು ದೇವಡ ಚಿತ್ತ ಇಲ್ಲತೆ ಒರ್ ಗುಬ್ಬಚಿ ಸಹ ಅಡಿಕ್ ಬೂವ್‌ಲೆ. 30ನಿಂಗಡ ಮಂಡೆಲುಳ್ಳ ತಲ್‍ಮಿ ಸಹ ಎಚ್ಚಕ್ ಉಂಡ್‍ೕಂದ್ ಅಂವೊಂಗ್ ಲೆಕ್ಕ ಗೊತ್ತುಂಡ್. 31ಆನಗುಂಡ್, ನಿಂಗ ಬೊತ್ತತಿ. ದುಂಬ ಮನೆ ಪಕ್ಷಿಯಕಿಂಜ ನಿಂಗ ಎಚ್ಚಕೋ ಬೆಲೆ ಉಳ್ಳಯಿಂಗಳಾಯಿತ್ತುಳ್ಳಿರ.
ಅರಿಕೆ ಮಾಡ್‌ವದು ತ್‍ಕ್ಕಾರ ಮಾಡ್‌ವದು
(ಲೂಕ 12.8,9)
32ನಾನ್ ನಿಂಗಕ್ ನೇರಾಯಿತ್ ಎಣ್ಣ್‌ವಿ: ದಾರೆಲ್ಲಾ ಮನುಷ್ಯಂಗಡ ಮಿಂಞತ್, ಅಂವೊ ನಾಡ ಬಕ್ತಾಂದ್ ಎಣ್ಣುವ, ನಾನ್ ಸಹ ಅಂವೊನ ಪರಲೋಕತ್‍ಲ್ ಉಳ್ಳ ನಾಡ ಅಪ್ಪಂಡ ಮಿಂಞತ್‍ಲ್ ನಾಡಂವೋಂದ್ ಎಣ್ಣ್‌ವಿ. 33ಆಚೇಂಗಿ ದಾರ್ ಮನುಷ್ಯಂಗಡ ಮಿಂಞತ್ ನನ್ನ ತ್‍ಕ್ಕಾರ ಮಾಡ್‌ವ, ಅಂವೊನ ನಾನು ಸಹ ಪರಲೋಕತ್‍ಲ್ ಉಳ್ಳ ದೇವಡ ಮಿಂಞತ್ ತ್‍ಕ್ಕಾರ ಮಾಡ್‌ವಿ.
ಸಮಾದಾನ ಪಿಂಞ ವಿಂಗಡ
(ಲೂಕ 12.51–53; 14.26,27)
34ನಾನ್, ಬೂಮಿಲ್ ಸಮಾದಾನತ್‍ನ ಕೊಡ್‍ಪಕಾಯಿತ್ ಬಂದಿಯೇಂದ್ ನಿಂಗ ಗೇನ ಮಾಡತಿ. ಸಮಾದಾನ ಮಾಡ್‌ವಕ್ ಅಲ್ಲ, ಆಚೇಂಗಿ ವಿಂಗಡ ಮಾಡ್‌ವಕ್ ಬಂದಿಯೆ. 35ಎನ್ನನೆ ಎಣ್ಣ್‌ಚೇಂಗಿ:
ಮೋಂವೊಂಗು ಅಪ್ಪಂಗು, ಮೋವಕು ಅವ್ವಕು,
ಮೈಮಕು ಮಾಂವಿಕು ಆಕತನೆಕೆ ಮಾಡ್‌ವಕ್ ಬಂದಿಯೆ.
36ಅನ್ನನಾಚೇಂಗಿ, ಒರ್ ಮನುಷ್ಯಂಡ ವಿರೋದಿ ಅಂವೊಂಡ ಕುಟುಂಬತ್‍ಲೇ ಇಪ್ಪ.#10.36 ಮೀಕ 7.6
37ಒಬ್ಬ ತಾಂಡ ಅಪ್ಪನ ಆಚೇಂಗಿಯು, ಅವ್ವಳ ಆಚೇಂಗಿಯು ನಾಕಿಂಜ ದುಂಬ ಪ್ರೀತಿ ಮಾಡ್‍ಚೇಂಗಿ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ. ಪಿಂಞ ತಾಂಡ ಮೋಂವೊನಾಚೇಂಗಿಯು, ಮೋವಳಾಚೇಂಗಿಯು ನಾಕಿಂಜ ದುಂಬ ಪ್ರೀತಿ ಮಾಡ್‍ಚೇಂಗಿ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ. 38ದಾರ್ ತಾಂಡ ಶಿಲುಬೇನ#10.38 ತಾಂಡ ಶಿಲುಬೆ ಎಣ್ಣ್‌ಚೇಂಗಿ, ಒಬ್ಬ ಅಂವೊನಾಯಿತ್ ಬಂದಿತ್ ಅಂವೊಂಡ ಬದ್‍ಕ್‍ನ ಯೇಸುರ ಅದಿಕಾರಕ್ ಒಪ್ಪ್‌ಚಿಡುವದ್ ಪಿಂಞ ಅಂವೊಂಡನೆಕೆ ಕಷ್ಟತ್‍ನ ಸಹಿಸುವದ್. ಎಡ್‍ತಂಡ್ ನಾಡ ಬಯ್ಯ ಬಪ್ಪ್‌ಲೆಯೋ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ. 39ದಾರ್ ಅಂವೊಂಡ ಜೀವತ್‍ನ ಕಾಪಾಡ್‌ವಕ್ ಕುಶಿ ಪಡ್‍ವ, ಅಂವೊ ಅಂವೊಂಡ ಜೀವತ್‍ನ ಕಳೆಂದ್‍ರ್‍ವ, ದಾರ್ ತಾಂಡ ಜೀವತ್‍ನ ನಾಕಾಯಿತ್ ಕಳೆಂದ್‍ರ್‍ವ, ಅಂವೊ ಅದ್‍ನ ಕಾಪಾಡ್‌ವ.
ಪ್ರತಿಫಲ
(ಮಾರ್ಕ 9.41)
40ನಿಂಗಳ ಸತ್ಕಾರ ಮಾಡ್‌ವಯಿಂಗ ನನ್ನ ಸಹ ಸತ್ಕಾರ ಮಾಡ್‍ನನೆಕೆ. ನನ್ನ ಸತ್ಕಾರ ಮಾಡ್‌ವಯಿಂಗ ನನ್ನ ಅಯಿಚಂವೊನ ಸತ್ಕಾರ ಮಾಡ್‍ನನೆಕೆ. 41ನಿಂಗ, ಒರ್ ಪ್ರವಾದಿನ, ಅಂವೊ ದೇವಡ ಪ್ರವಾದೀಂದ್ ಗೊತ್ತಾನಗುಂಡ್ ಸತ್ಕಾರ ಮಾಡ್‍ನಕ, ಒರ್ ಪ್ರವಾದಿಕ್ ಕ್‍ಟ್ಟ್‌ವ ಅದೇ ಫಲ ನಿಂಗಕು ಕ್‍ಟ್ಟ್‌ವ. ಅನ್ನನೆ, ಒರ್ ಮನುಷ್ಯ ನೀತಿವಂತಂವೋಂದ್ ಗೊತ್ತಾನಗುಂಡ್ ಅಂವೊನ ಸತ್ಕಾರ ಮಾಡ್‍ಚೇಂಗಿ, ಆ ನೀತಿವಂತ ಮನುಷ್ಯಂಗ್ ಕ್‍ಟ್ಟ್‌ವ ಅದೇ ಫಲ ನಿಂಗಕು ಕ್‍ಟ್ಟ್‌ವ. 42ಎಲ್ಲಾ ಶಿಷ್ಯಂಗಕಿಂಜ ಸಾದುವಾನ ಒರ್ ಶಿಷ್ಯಂಗ್, ನಾಡ ಶಿಷ್ಯಾಂದ್ ಗೊತ್ತಾನಗುಂಡ್, ನಿಂಗ, ಒರ್ ಲೋಟ ನೀರ್ ಕೊಡ್‍ತಕ, ಕಂಡಿತವಾಯಿತ್ ಅದ್ಂಡ ಫಲ ಕ್‍ಟ್ಟತೆ ಪೋಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.
Currently Selected:
ಮತ್ತಾಯ 10: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
