ಮತ್ತಾಯ 3
3
ಯೋಹಾನಂಡ ಬೋದನೆ
(ಮಾರ್ಕ 1.1–8; ಲೂಕ 3.1–18; ಯೋಹಾನ 1.19–28)
1ದುಂಬ ಕಾಲ ಆನ ಪಿಂಞ ದೀಕ್ಷಾಸ್ನಾನ ತಪ್ಪ ಯೋಹಾನ ಯೂದಾಯತ್‍ರ ಮಣಬೂಮಿಲ್ ಬಂತ್: 2ನಿಂಗ ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ಬಾರಿ, ಎನ್ನಂಗೆಣ್ಣ್‌ಚೇಂಗಿ ಪರಲೋಕ ರಾಜ್ಯ ಬೆರಿಯ ಬಪ್ಪಾಂದ್ ಬೋದನೆ ಮಾಡ್‌ವಕ್ ಸುರ್ ಮಾಡ್‍ಚಿ.
3ಒಡೆಯ ಬಂದಂಡ್ ಉಂಡ್,
ಅದ್ಂಗಾಯಿತ್ ದೇವ ಬಪ್ಪಕ್ ಉಳ್ಳ ಬಟ್ಟೇನ ತಯಾರ್ ಮಾಡಿತ್,
ಚಾಯಿ ಮಾಡೀಂದ್ ಮಣಬೂಮಿಲ್ ಕಾಕ್‍ವಂವೊಂಡ ಸದ್ದ್ ಉಂಡ್‍ೕಂದ್,
ಯೆಶಾಯ ಎಣ್ಣುವ ಪ್ರವಾದಿ ಪ್ರವಾದನೆ ಎಣ್ಣ್‌ನಂವೊ ಇಂವೊನೇ.#3.3 ಯೆಶಾಯ 40.3
4ಯೋಹಾನ ಒಂಟೆರ ರೋಮತ್‍ಲ್ ಮಾಡ್‍ನ ಬಟ್ಟೆ ಇಟ್ಟಂಡಿಂಜತ್. ಅಂವೊಂಡ ಸೊಂಟಕ್ ಚರ್ಮತ್‌ರ ಪಟ್ಟಿ ಕೆಟ್ಟಿಯಂಡಿಂಜತ್. ಅಂವೊಂಡ ಆಹಾರ ಪಚ್ಚೆ ಪುಕ್ಕ ಪಿಂಞ ಕಾಡ್‍ಲ್ ಕ್‍ಟ್ಟುವ ತೇನ್ ಆಯಿತಿಂಜತ್.
5ಜನ ಯೂದಾಯ ಎಣ್ಣುವ ನಾಡಿಂಜಲು ಯೆರೂಸಲೇಮ್ಂಜಲು ಅಂವೊಂಡ ಪಕ್ಕ ಬಾತ್. 6ಅಯಿಂಗ ಅಯಿಂಗಡ ಪಾಪತ್‍ನ ಎಣ್ಣ್‌ಚಿ. ದೀಕ್ಷಾಸ್ನಾನ ತಪ್ಪ ಯೋಹಾನ ಅಯಿಂಗಕ್ ಯೊರ್ದನ್ ಎಣ್ಣುವ ಪೊಳೆಲ್ ದೀಕ್ಷಾಸ್ನಾನ#3.6 ಪಾಪತ್‍ರ ಬದ್‍ಕ್‍ನ ಬುಟ್ಟಿತ್ ದೇವಡ ಪಕ್ಕ ಬಂತ್ ದೇವಡ ಚಿತ್ತತ್‍ರ ಪ್ರಕಾರ ಬದ್‍ಕ್‍ವಕ್ ತೀರ್ಮಾನ ಮಾಡ್‌ನಾಂಗ್ ಗುರ್‌ತಾಯಿತ್ ನೀರ್‌ಲ್ ಮುಳ್‍ಗಿತ್ ಬಪ್ಪದೇ ದೀಕ್ಷಾಸ್ನಾನ. ಕೊಡ್‍ತತ್.
7ದುಂಬ ಫರಿಸಾಯಂಗ ಪಿಂಞ ಸದ್ದುಕಾಯಂಗ, ಯೋಹಾನಂಡ ಪಕ್ಕ ದೀಕ್ಷಾಸ್ನಾನ ಎಡ್‌ಪಕಾಯಿತ್ ಬಂದಂಡುಳ್ಳದ್‌ನ ಕಂಡಿತ್: ಕ್ಯಾರೆಬಳೆ ಮುರಿಪಾಂಬ್ ಜಾತಿಯಳೇ! ದೇವಡ ಚೆಡಿಯಿಂಜ ಬಚಾವಾಪಕ್ ಕಯ್ಯೂಂದ್ ನಿಂಗಕ್ ದಾರ್ ಎಣ್ಣಿ ಕೊಡ್‍ತತ್? 8ನಿಂಗ ನೇರಾಯಿತ್ ಪಶ್ಚಾತಾಪ ಪಟ್ಟಿತ್ ಬದ್‍ಲಾಯಿತ್ ಉಳ್ಳಿರಾಂದ್, ನಿಂಗಡ ಬದ್‍ಕ್‍ಲ್ ಪಿಂಞ ಕ್ರಿಯೇಲ್ ಕಾಟಿ.
9 ಅಬ್ರಹಾಮ ನಂಗಡ ಅಪ್ಪಾಂದ್ ಎಣ್ಣುವಕ್ ಗೇನ ಮಾಡತಿ. ದೇವಕ್ ಇಲ್ಲಿ ಉಳ್ಳ ಕಲ್ಲಿಂಜ ಸಹ ಅಬ್ರಹಾಮಂಗ್ ಮಕ್ಕಳ ಪುಟ್ಟ್‌ಚಿಡ್‌ವಕ್ ಕಯ್ಯೂಂದ್ ನಾನ್ ನಿಂಗಕ್ ಎಣ್ಣ್‌ವಿ.
10ಇಕ್ಕಲೆ ಮರತ್‍ರ ಬೇರ್‌ರ ಪಕ್ಕ ಕೊಡಲಿನ ಬೆಚ್ಚಿತುಂಡ್. ಆನಗುಂಡ್ ನಲ್ಲ ಪಣ್ಣ್ ತರತ ಮರತ್‌ನೆಲ್ಲಾ ಕೆತ್ತಿತ್ ತಿತ್ತ್‌ಕ್ ಇಡ್‌ವ.
11ನಿಂಗಡ ಮನಸ್ಸ್ ದೇವಡಲ್ಲಿಕ್ ತಿರ್‍ಗ್‍ಚೀಂದ್ ನಾನ್ ನಿಂಗಕ್ ನೀರ್‌ಲ್ ದೀಕ್ಷಾಸ್ನಾನ ತಪ್ಪಿ. ಆಚೇಂಗಿ ನಾಕ್ ಬಯ್ಯ ಒಬ್ಬ ಬಪ್ಪ, ಅಂವೊ ನಾಕಿಂಜ ಶಕ್ತಿವಂತಂವೊ. ಅಂವೊಂಡ ಕಾಲ್‍ರ ಎಕ್ಕಡತ್‌ನ ಉತ್ತ್‌ವಕ್ ಸಹ ನಾಕ್ ಯೋಗ್ಯತೆ ಇಲ್ಲೆ. ಅಂವೊ ನಿಂಗಳ ಪವಿತ್ರಾತ್ಮತ್‍ಲ್ ಪಿಂಞ ತಿತ್ತ್‌ಲ್ ದೀಕ್ಷಾಸ್ನಾನ ಮಾಡ್‌ವ.
12ಅಂವೊಂಡ ಕೈಯಿಲ್ ಒರ್ ಪಾತ್‍ಮೊರ ಉಂಡ್, ಅದ್‍ನಗುಂಡ್ ಅಂವೊ ತಾಂಡ ಕಳತ್‌ನ ಶುದ್ದ ಮಾಡಿತ್ ಪಿಲ್ಲ್‌ಕಾಳ್‌ನ ಗೋದಿ ಕಾಳ್‌ಯಿಂಜ ಬೋರೆ ಮಾಡಿತ್ ತಾಂಡ ಗೋದಿ ಕಾಳ್‌ನ ಪತ್ತಾಯ ಕೋಂಬರೆಲ್ ದುಂಬ್‌ಚಿಡ್‌ವ; ಪಿಲ್ಲ್‌ಕಾಳ್‌ನ ಕೆಡತ ತಿತ್ತ್‌ಲ್ ಚುಡ್‌ವಾಂದ್ ಎಣ್ಣ್‌ಚಿ.
ಯೇಸು ದೀಕ್ಷಾಸ್ನಾನ ಎಡ್‌ಪದ್
(ಮಾರ್ಕ 1.9–11; ಲೂಕ 3.21,22)
13ಆ ಸಮಯತ್‍ಲ್ ಯೇಸು ಯೋಹಾನನಗುಂಡ್ ದೀಕ್ಷಾಸ್ನಾನ ಎಡ್‌ಪಕಾಯಿತ್ ಗಲಿಲಾಯತ್ಂಜ ಯೊರ್ದನ್ ಪೊಳೆಕ್ ಬಾತ್.
14ಅಕ್ಕ ಯೋಹಾನ: ನಾನೇ ನೀಡ ಪಕ್ಕ ಬಂದಿತ್ ದೀಕ್ಷಾಸ್ನಾನ ಎಡ್‌ಕಂಡು, ಅನ್ನನೆ ಇಪ್ಪಕ ನೀನ್ ನಾಡ ಪಕ್ಕ ಬಂದಿತುಳ್ಳಿಯಲ್ಲಾಂದ್ ಎಣ್ಣಿತ್ ಯೇಸುನ ತಡ್‌ತಂಡಿಂಜತ್.
15ಅದ್ಂಗ್ ಯೇಸು: ಇಕ್ಕ ಇದ್‍ನ ಇನ್ನನೆ ಮಾಡ್‌ವಕ್ ಬುಡ್. ಇನ್ನನೆ ಮಾಡ್‌ವಕ ನಂಗ ದೇವಡ ಎಲ್ಲಾ ನೀತಿ ಕಾರ್ಯತ್‍ನ ಪೂರ್ತಿ ಮಾಡ್‌ವಾಂದ್ ಎಣ್ಣ್‌ನಾಂಗ್ ಯೋಹಾನ ಒತ್ತಂಡತ್. 16ಯೇಸು ದೀಕ್ಷಾಸ್ನಾನ ಎಡ್‍ತಿತ್, ನೀರ್‌ಂಜ ಪೊರಮೆ ಬಪ್ಪಕ, ಪರಲೋಕ ತೊರ್ಂದತ್, ದೇವಡ ಆತ್ಮ ಪಾರಿವಾಳ ರೂಪತ್‌ಲ್ ಬಂತ್, ಅಂವೊಂಡ ಮೇಲ್‌ಕ್ ಇಳ್ಂಜಾನ ಕಂಡತ್.
17ಅಕ್ಕ, ಪರಲೋಕತ್ಂಜ ಒರ್ ವಾಣಿ: ಇಂವೊ ನಾಡ ಕೊದಿರ ಮೋಂವೊ, ಇಂವೊಂಡ ಮೇಲೆ ನಾಕ್ ದುಂಬ ಕುಶಿ ಉಂಡ್‍ೕಂದ್ ಎಣ್ಣ್‌ಚಿ.
Currently Selected:
ಮತ್ತಾಯ 3: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
