Yɔhana 11
11
Naa ɓɔɔ Liyazaru vɔ ɓɛɛ
1Yɔɔ ɓɔɔ kagn roo gãa ka Bɛtani, zang ɓaa wu nɛɛ Liyazaru. Vuu pálɛ́ wu katɔ. Bɛtani ɓi gari rɛɛ Marayamu nɛɛ jaa niiɓɛ zang soro ɓɔɔ zang ɓaa wu nɛɛ Mata ɓɛɛ. 2Marayamu keɓe, kɔ tũuru Yeesɔ nung ɓɔɔ pũ̀ngkù tɔ̃ɔ tɔ̃ɔ ka doo, a àlɛ̀ nɛɛ suuyuu ɓiɓɛ. Liyazaru ɓɔɔ vuu palɛ keɓe, jaa niiɓɛ kɔ. 3Rɛɛ ɓeenaa soro ziti keɓe, ri shòng Yeesɔ nyaa tɔɔ, “Kpanti, vuu palɛ zang ɓɔɔ mɔɔ kasɛ wu dɔɔli ɓɛɛ katɔ.”
4Ɓɔɔ Yeesɔ tãa ruu keɓe, kɔɔyi tɔɔ, “Kɔnang keɓe nyɔ wu vɔrɔ kpang. Vuu keɓe pálɛ̀ nɔngkɔ, tɔ̀ɔ, wu tusu zang bannang Laa, wu ti tusu zang bannang Jaa Laa kaa jong.”
5Yeesɔ kasɛ ruu Mata katɔ nɛɛ jaa niiɓɛ ɓɔɔ soro, a ɓɔɔ Liyazaru. 6Ɓɔɔ wu tãa nyaa nɛɛ vuu palɛ Liyazaru katɔ, nwang doo nɛɛ mani ka nɔng ɓɔɔ bɛ̀ɛ́ wu kagn ɓɛɛ, diki ziti tɔkn. 7A kɔɔ zang ɓɔɔ ri mantɛ vuu ka bii ɓiɓɛ nɛɛ, “Ruu daa nɔɔ tipi Yahudi tɔkn.”
8A ri kasɛ wu nyaa tɔɔ, “Maalang wee dòó naa ɓee, zang Yahudi nɛɛ ri luku mɔɔ nɛɛ tari mɔɔ vɔrɛ, mɔɔ nɛɛ mɔɔ gbãayu ka nɔngkɔ tɔkn ya?”
9Yeesɔ kɔɔ ri tɔɔ, “Laa nɛɛ nwáng tɔ, palɛ saka kopi tu ziti tɔɔ wu hãa nyaa kpang ya? Zang ɓɔɔ rakɛ nɛɛ laagɛ̃, kpaa doo ɓi kpang, ka ruu ɓɔɔ, vuu ɓɔɔ yakɛ koo, yakɛ nɔng katɔ ɓɛɛ. 10Naa rakɛ nɛɛ nɔng zĩi, kpaa doo katɔ, ka ruu ɓɔɔ, vuu ɓɔɔ yakɛ wu nɔng kpang ɓɛɛ.” 11Yeesɔ kɔɔ ruu keɓe tɔ, a gisi ɓɔɔ kagn tɔɔ, “Hingro yi wusang ɓuru Liyazaru tɔ. N daa ditɔ, n daa hingsi wu.”
12Zang ɓɔɔ ri mantɛ vuu ka bii ɓiɓɛ, ri kasɛ wu nyaa tɔɔ, “Kpanti, hingro nɛɛ yi wu katɔ, hingsi jĩng ditɔ.”
13A ɓeekpang Yeesɔ gãsɛ ɓi ɓɔɔ Liyazaru vɔ katɔ ɓɛɛ, ri tɔɔ ɓarɛ naa Liyazaru roo ɓi hingro siri. 14A Yeesɔ kɔɔ ri kaa faarik, tɔɔ, “Liyazaru vɔ tɔ. 15Wee bɛ̀ɛ́ n nɛɛ wu kpang ɓee, wukɔ tɔ̃ɔ, ka ruu manɛ, tɔ̀ɔ, nɔɔ shing danggn kati. Ruu dita bii ɓiɓɛ.”
16A Tooma, ɓɔɔ zang ɓaa wu nɛɛ jaa bãnang ɓɛɛ, kɔɔ rɛɛ zang ɓɔɔ wu mantɛ vuu nɛɛ ri ka bii Yeesɔ ɓɛɛ tɔɔ, “Ruu dita, ruu daa vɔ nɔɔ nɛɛ wu.”
Yeesɔ kɔ wisi zang paa nɛɛ sàa, wukɔ ti a zang suru bii
17Yeesɔ naa shɛ̃ɛ nɔng, bɛ̀ɛ́ Liyazaru roo sàá tɔ, daa diki dɛ̃ɛti. 18Gari Bɛtani nɛɛ Urushalima daa mɛli ziti kpang, 19zang tipi Yahudi dɔɔli ri a tɔ, nɛɛ ri jee Marayamu nɛɛ Mata nyavɔ jaa nàá ɓarɛ. 20Mata tãa nyaa nɛɛ Yeesɔ a kana, a nwangnɛ, nɛɛ wu daa kpisi wu yuu. Marayamu nwang ɓi kaa yeti gãa. 21Mata kɔɔ wu nɛɛ, “Kpanti, naa mɔɔ nɛɛ ka nihn, jaa nàá mɛɛ nɛɛ vɔ kpang. 22N ti zi tɔ, naa mɔɔ gàa dòo viya ka naa Laa kãntang, a mɔɔ katɔ.”
23Yeesɔ kɔɔ wu tɔɔ, “Jaa nàá ɓaaɓɛ yupaa ditɔ.”
24Mata kasɛ wu nyaa tɔɔ, “N zi tɔ, naa yupaa ditɔ ka diki ɓɔɔ Laa naa wisi zang paa nɛɛ sàa, ka diki ɓɔɔ koo waa nyaa ɓɛɛ.”
25Yeesɔ kɔɔ wu tɔɔ, “Nkɔ wisi zang paa nɛɛ sàa, nkɔ ti a zang suru bii. Zang ɓɔɔ nɛɛ shing danggn ka bii mɛɛ, náa vɔ doori, nwáng ningkãari ditɔ tɔkn. 26Zang ɓɔɔ doo ningkãari, nɛɛ shing danggn ka bii mɛɛ, vɔ kpang dòndòng, mɔɔ shing danggn tɔ kagn nɔngkɔ ya?”
27Mata kasɛ wu nyaa tɔɔ, “Nn, Kpanti, N shing danggn tɔ nɛɛ, mɔkɔ Kirisi Jaa Laa, ɓɔɔ naa a ka koo ɓɛɛ.”
Yeesɔ kaayi
28Mata kɔɔ ruu keɓe tɔ, a gbãayu daa yeti gãa, daa ɓaa jaa niiɓɛ Marayamu nyaa dang gbete, a kɔɔ wu nɛɛ, “Maalang a tɔ, hɛ̃ɛ nɔng ɓaaɓɛ.” 29Ɓɔɔ Marayamu tãa naa weɓe, yupaa pati nwang ka biling, daa ka bii Yeesɔ. 30Bɛ̀ɛ́ Yeesɔ shɛ̃ɛ yeti gari gn kpang. Bɛ̀ɛ́ dòo ka nɔng ɓɔɔ Mata kpisi wu yuu ɓɛɛ. 31Ɓɔɔ rɛɛ zang Yahudi ɓɔɔ bɛ̀ɛ́ ri nɛɛ Marayamu ka yeti gãa, ri mã wu danggn, ri zi naa ɓɔɔ wu seepaa pati nwáng ka biling, ri dũng wu ka knti. Ri kɔɔ ɓarɛ nɛɛ naa dàa kaa ɓi nyavɔ ka yuu saa.
32Marayamu naa shɛ̃ɛ nɔng ɓɔɔ Yeesɔ kagn tɔ. Ɓu doo ɓɔɔ zi wu hn, daa tang ka tĩng ɓiɓɛ kɔɔ wu tɔɔ, “Kpanti, naa mɔɔ nɛɛ ka nihn, jaa nàá mɛɛ nɛɛ vɔ kpang.”
33Yeesɔ zi naa ɓɔɔ wu kaayi, a zang Yahudi ɓɔɔ ri a nɛɛ wu ri kaa jong ɓɛɛ. Vuu bìí kpãa wu ka yeti dɔɔli, a gn ti kɔng wu dɔɔli. 34A Yeesɔ hɛ̃ɛ ri nɛɛ, “Nɔɔ gbãa wu ka niya?” Ri kɔɔ wu nɛɛ, “Arɛ mɔ́ɔ dàa zirɛ, Kpanti.”
35Yeesɔ kaayi nɛɛ miiri ka jĩng.
36Zang Yahudi ri kɔɔyi nɛɛ, “Nɔɔ zi naa ɓɔɔ kasɛ ruu ɓiɓɛ ɓɛɛ.”
37A zang ɓɔɔ ri kɔɔ ɓarɛ nɛɛ, “Zang ɓɔɔ másɛ̀ jĩng zang ɓɔɔ jĩng ringtang, zunung ɓɔɔ wu zãa Liyazaru vɔnang kpang ya?”
Yeesɔ wisi Liyazaru paa nɛɛ saa
38Gn kɔng Yeesɔ tɔkn, a daa ka yuu sàa. Sàa bii ɓi yeng puru ɓɔɔ zang ku nyaa nɛɛ tari ɓɛɛ. 39Yeesɔ kɔɔ ri tɔɔ, “Nɔɔ dɔ̃ tari, nɔɔ yaa nɔng.” A Mata jaa nàá Liyazaru kasɛ wu nyaa tɔɔ, “Kpanti, wee diki ɓiɓɛ daa tɔ dɛ̃ɛti ka saa ɓee, pũng tɔ, pũngku kaa tɔ.”
40Yeesɔ kɔɔ wu tɔɔ, “N kɔɔ mɔɔ kpang nɛɛ, naa mɔɔ shing danggn mɔɔ zi bannang Laa katɔ kpang ya?” 41Ka ruu nɔngkɔ, ri dɔ̃ tari ri yaa nɔng. A Yeesɔ tuu jĩng ka lapa kɔɔyi tɔɔ, “Daa mɛɛ, n zãa mɔɔ tɔ, ka ruu ɓɔɔ, mɔɔ tãa m tɔ ɓɛɛ. 42N zi tɔ, mɔɔ tãarɛ m katɔ diki diki. N kɔɔ vuu keɓe ka ruu zang kɔ ri shiiri ka nihn ɓee, tɔ̀ɔ, ri shing danggn kati nɛɛ mɔkɔ shong m.” 43Kɔɔ tɔ naa weɓe, a ɓaa nyaa kaa nabm nɛɛ, “Liyazaru, nwáng ta, mɔɔ a ka biling.” 44Liyazaru nwangnɛ, doo naa ɓɔɔ zang dang wu nɛɛ fɔ̃ɔrɔ ɓɔɔ zang gbãa vɔrɔ nɛɛ mani ɓɛɛ. Zang ti mã wu jĩng katɔ nɛɛ sɛ̃ɛ fɔ̃ɔrɔ. Yeesɔ kɔɔ zang tɔɔ, “Nɔɔ kãlɛ wu ta, nɔɔ yaa wu, wu daayi.”
Zang Farisi ri kãa gbalang nɛɛ ri nyɔ Yeesɔ vɔrɔ
(Mat 26:1-5; Mar 14:1-2; Luk 22:1-2)
45A zang Yahudi dɔɔli ɓɔɔ ri arɛ nɛɛ ri jee Marayamu nyaa ɓɛɛ. Ri zi vuu ɓɔɔ Yeesɔ palɛ, a ri shing danggn ka bii ɓiɓɛ. 46Zang ɓɔɔ ri daa ɓarɛ ka bii zang Farisi ri daa kɔɔ ri vuu ɓɔɔ Yeesɔ palɛ ɓɛɛ. 47A rɛɛ kpanti zang ɓɔɔ ri dɔɔ vuu ka Gãa Laa nɛɛ rɛɛ zang Farisi, ri ɓaa nyaa ka rɛɛ zang ɓɔɔ ri jɛ̃ɛ zang doo ruu kɔ, ɓɔɔ nimbang, a ri hɛ̃ɛ ri tɔɔ, “Ruu pálɛ̀ nɔɔ ɓu kaa viya? Yɔɔ keɓe pálɛ̀ vuu ɓɔɔ zang zirɛ, zang mã naa ka danggn ka naa dɔɔli. 48Naa ruu yaa yɔɔ keɓe, zang ri shing danggn katɔ bii ɓiɓɛ nandon. Zang tipi Rooma ri a katɔ ri jili Gãa Laa ɓuru, ri ti see zang tipi ɓuru nandon.”
49Zang gbete ka teteng ɓarɛ, ɓɔɔ zang ɓaa wu nɛɛ Kayifa, ɓɔɔ wukɔ kpanti zang ɓɔɔ ri dɔɔ vuu ka Gãa Laa ka sáa kaɓa, kɔɔ ri tɔɔ, “Nɔɔ zi vuu manɛ kpang. 50Nɔɔ zi kpang nɛɛ ɓɔɔ zang gbete vɔ ka nung zang dɔɔli wukɔ tɔ̃ɔ jong, ka nung ɓɔɔ zang tipi ɓuru nɛɛ vɔ nandon ɓɛɛ kpang ya?” 51Kayifa zɔ̃ng wu nɛɛ yeti ɓiɓɛ, nɛɛ wu kɔɔ vuu keɓe kpang. Kɔɔ nɔngkɔ, ka ruu ɓɔɔ, Laa shing wu nɛɛ wu kɔɔyi. Kayifa kɔ kpanti zang ɓɔɔ ri dɔɔ vuu ka Gãa Laa ka sáa kaɓa, ka ruu nɔngkɔ, kɔɔ zang vuu ɓɔɔ naa a ɓɛɛ. Kɔɔyi nɛɛ Yeesɔ naa vɔ ka ruu zang Yahudi. 52Wu ti ka ruu ɓarɛ kɔ shɛ̃ɛning kpang. Vɔrɛ nɛɛ tɔɔ wu kpalɛ zang Laa ɓɔɔ zang tantɛ ri ka koolaa kaa jong nɔng gbete.
53Rɛɛ zang bang bang zang Yahudi ri gaayu gbalang ɓɔɔ ri nyɔ wu vɔrɔ kãanang nɛɛ diki keɓe kɔ. 54Ka ruu nɔngkɔ, Yeesɔ rakɛ tɔ̀ɔ́ waati ka dalɛ ka tipi Yahudi kpang. Yupaa daa ka gari ɓɔɔ zang ɓaa nɛɛ Ifuremu ɓɔɔ naabm nɛɛ waala ɓɛɛ. Daa nwang ka nɔngkɔ nɛɛ zang ɓɔɔ ri mantɛ vuu ka bii ɓiɓɛ ɓɛɛ.
55Diki nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ a naabm kana. Zang yùkú paa kana nɛɛ jaa gari, zang daarɛ ka gari Urushalima nɛɛ zang daa palɛ vuu ɓɔɔ zang dang nyaa nɛɛ zang palɛ, nɛɛ tɔɔ Laa wu yaa zang gbalang vuu shi kpang ɓɛɛ. Ri pálɛ̀ vuu keɓe ka gbongkarɛ, tɔ̀ɔ, diki nyaalaa wu a kati. 56Ri kãa nɔng Yeesɔ ka ɓɔɔ ri kpalɛ zɔɔ tɔ, ka Gãa Laa ɓɛɛ. Ri hɛ̃ɛlɛ zɔɔ nɛɛ, “Ɓɔɔ nɔɔ zìrɛ naa yɔɔ keɓe a nɔng nyaalaa keɓe ɓu katɔ ya?” 57Rɛɛ zang bang bang zang ɓɔɔ ri dɔɔ vuu ka Gãa Laa nɛɛ rɛɛ zang Farisi, ri kɔɔ zang nɛɛ, zang ɓɔɔ nɛɛ zi nɔng ɓɔɔ Yeesɔ kagn tɔ, wu naa kɔɔ ri, ri daa yi wu.
Currently Selected:
Yɔhana 11: mzmNT
Highlight
Share
Copy
Want to have your highlights saved across all your devices? Sign up or sign in
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust
