aYohana 11

Riku aLazarus

1Aner akak a tú se na aBetani, riyerek wu nye aLazarus, a nye atser baꞌ. aBetani nye kuwo̱p aMarya ne angasnyining wu aMarta. 2aMarya na nye angasnyining aLazarus aya a tá se nameneng be kuro̱k. Wu ne a ku kon Agwo̱m Ágwo̱m name, ne a re̱ng atak wu be nakuyo̱ng rice wu. 3Ayong ángasnyining'e tom nufe aYeso ye, “Atekasa, di aner aya wan tá shim ame nye atser baꞌ.”

4Nizen iya aYeso tá fok anong, a fe̱ ye, “Kuro̱k na tù ku fe̱r baꞌ, amma ku tà be̱e̱n Adakunom ne Igon wu kuyiik.”

5aYeso shim aMarta be angasnyining wu aMarya ne aLazarus. 6Gip be anong, izen iya a tá fok ye aLazarus nye atser baꞌ, a sor naro̱ wu tú ku se ma inom ifa nizham. 7Ayong a fe̱ be álimazhiri wu ye, “I ku bun yir ni iben aYahudiya.”

8Amma álimazhiri wu'me fe̱ be wu ye, “Aner kubo̱so̱p, nuko̱s kama áner aYahuda shim á tá ka barak be ata, ne wan bun i fe̱ ye i ra be yir azong a?”

9aYeso fe̱ be ba ye, “Kuwoso se awa kuso̱k be afa aꞌa? Aner aya afe a ta tseng nunom turuk kutak baꞌ, kamok a di akanang kazatse. 10Amma aner aya afe a ta tsang a tseng natuk, a tà turuk kutak, kamok akanang kuse baꞌ.” 11Nama aYeso tá fe̱ anong, a bun a fe̱ ye, “Afaram yir aLazarus an men ida, mi be azong ta se ku shiming.”

12Ayong álimazhiri wu fe̱ be wu ye, “Atekasa ke an men ida a tà dorok.”

13aYeso sen nife̱ natoon riku aLazarus'e, amma álimazhiri wu sor ye a sen fe̱ itak ida tsek. 14Ayong aYeso tú ku tak ba kanang ye, “aLazarus n ku. 15Mi be riye̱ rikan kamok sang mi tin se azong baꞌ. Yin ti no̱o̱k yin katsak makong. Amma i tseng yir nufu.”

16Ayong aToma, a tú ku yis ye, kafe̱e̱s, fe̱ be ribir álimazhiri'me ye, “I tseng yir gip nong ta se kus yir be wu.”

aYeso ne a nye kutser ne a nye kudorok ikom

17Nizen iya aYeso tá tseng azong, a fok ye aLazarus n te kuko̱s kunaas nure̱k. 18aBetani ta se kyo̱ndi akilomita ataar be aUshalima. 19Ánerawe aYahuda dide̱ng be̱s nufe aMarta ne aMarya nong á tú ku nye ba ako̱o̱k be riku aronyining ba.

20Nizen iya aMarta tá fok ye aYeso saase, a wuruk nong a tá su ku shan niren, amma aMarya sor kari. 21Ayong aMarta fe̱ be aYeso ye, “Atekasa, wan fa se aze ko ke aronyining'i ku baꞌ. 22Amma mi ren ye ko kyo̱o̱rna'me Adakunom tà ka no̱o̱k koakye wan tù ku rip.”

23aYeso fe̱ be wu ye, “Aronyining wan tà bun a dorok.”

24aMarta fe̱ be wu ye, “Mi ren a tà bun a dorok nizen iya kudorok ikom katuk igang'e.”

25Ayong aYeso fe̱ be wu ye, “Mi ne i nye kudorok ikom ne i nye kutser. Aya a tin no̱o̱k katsak ni mi ko ke a ku gip a tà se̱ kutser, 26ne koangan afe a ta se be kutser gip ke a ti no̱o̱k katsak ni mi a tà ku baꞌ ma izen izen. Wan ti no̱o̱k katsak rife̱ na a?”

27Ayong aMarta fe̱ be aYeso ye, “Ei, wan nye Agwo̱m Ágwo̱m, mi ti no̱o̱k katsak ye wan ne i nye aKiristi'me, Igon Adakunom, aya a tá fe̱ ye a tà be̱ nazatse.”

aYeso tos

28Nama a tá fe̱ anong, a tseng a tá se yis angasnyining wu aMarya nukim, a tá fe̱ be wu ye, “Aner kubo̱so̱p na aze, a rip itak wan.” 29Nizen iya aMarya tá fok anong, a dorok zirik, a tá be nufe aYeso. 30aYeso tsang a no̱ kaye̱e̱r kuwo̱p'e nizham baꞌ, amma a ruresek naro̱ aMarta tú ku shan ni iren ame. 31Áner aYahuda aya a tá tsang á be̱ ni inye aMarya ako̱o̱k kari di a tá dorok nong a ta wuruk zizirik. Á tú kuus ba sor ye a be ni inye riyo̱m nure̱k'e̱. 32Nizen iya aMarya tá tseng naro̱ aYeso tú ku se, a di aYeso'me, ayong a kpa natak wu nong a tá fe̱ be wu ye, “Agwo̱m Ágwo̱m, wan fa se aze, ke aronyining'i ku baꞌ.”

33aYeso tú ku di a tá tos ne áner aYahuda'me áfe a tá se mak be wu tos gip, yong aYeso daam kaye̱e̱r riye̱ wu dide̱ng. 34Ayong aYeso tú ku rip ba ye, “Yin tú ku ne̱r yin ake̱ e̱?” Ne ba fe̱ be wu ye,

“Agwo̱m Ágwo̱m be̱ ta di karo̱'me.”

35aYeso tos. 36Kamok anong áner aYahuda ame fe̱ ye, “Di yin, a tú ku shim!” 37Amma ákak ba fe̱ ye, “A karak akpato̱o̱n anyisi, ne a ra won dar a te̱ne̱ng aner na riku a?”

aYeso dorok aLazarus nure̱k

38aYeso tá bun a no̱ nudaam kaye̱e̱r riye̱ wu dide̱ng, a be nure̱k'e. Kure̱k'e nye kutas a ta whe̱e̱n kanu be agbang kuta. 39Ayong aYeso fe̱ be ba ye, “Sok yin kuta'ong.”

Amma aMarta angasnyining aku'me fe̱ ye, “Agwo̱m Ágwo̱m, a tan n kpaan iko̱o̱n kyo̱o̱rna, kamok an te kuko̱s kunaas be riku.”

40Ayong aYeso fe̱ be wu ye, “Mi di ye, mi tsang i ka tak ye, ke wan ti no̱o̱k katsak, wan tà di kuyiik Adakunom a?”

41Ayong á tomong kuta ame. aYeso sok anyisi naza ne a fe̱ ye, “Ada, mi be riye̱ rikan be wan kamok mi ren wan ti fok. 42Mi ren ko gbugbang gip wan ti fok, amma mi fe̱ anong, nong ánerawe na aze, tin no̱o̱k katsak ye wan ne i ti tom.”

43Nama a tá fe̱ anong, ne a ta kuto̱ ba agap ye, “aLazarus, wuruk!” 44Aner a tá tsang a ku'me wuruk nufang, ibo̱k be atak nurosom be idun, kanyisi be itan kures kukan.

aYeso fe̱ be ba ye, “Ku bisik yin, a ta tseng.”

Kanye̱k kufe̱r aYeso

(aMat 26.1-5; aMar 14.1-2; aLuk 22.1-2)

45Kamok anong, áner aYahuda whe̱re̱ aya a tá tsang a be̱ nufe aMarya, di ike̱ng iya aYeso tá nye á ti no̱o̱k katsak na aYeso. 46Amma ákak ba be nufe áner aFarisi nong á tú su ku tak ba ike̱ng aYeso tá nye. 47Kamok anong ágbang átsi ne áner aFarisi'me yis kanyim áko̱k kasho̱o̱n. Ne á fe̱ ye, “Akye̱ ne yir ta nye yir e̱? Aner na ta nye itomong azhing dide̱ng an e̱? 48Ke yir tu ku won yir a ta ya kasho̱o̱n ana, koangan tin no̱o̱k katsak ni wu, ne áner aRom be̱ a tin shan kaben yir ne karo̱ kuya iben yir.”

49Akak kaye̱e̱r ba, riyerek wu tá nye aKayafas, aya a tá nye agbang atsi riye̱ riyong fe̱ ye, “Yin ren yin ike̱ng ikak baꞌ. 50I nar aner azining tana ku be ánerawe cice̱r tana wei.” 51Rife̱ aKayafas tá fe̱ nye rife̱ riye̱ wu tsek baꞌ, amma wu ne a ta nye agbang atsi riye̱ riyong, a nye kuzarap ye aYeso tà ku kamok áner aYahuda. 52Sang kamok áner aYahuda tsek baꞌ, amma nong a tà tusung áner Adakunom aya a tá te shaam tà te azining.

53Kum be katuk'ong á nye kanye̱k kufe̱r aYeso.

54Kamok anong, aYeso ba tseng de̱s kaye̱e̱r ánerawe aYahuda baꞌ. A tú ku bun nuwo̱p kukak a tá yis ye, aEfirem bubarak be katse, naro̱ wu tú ku sor be álimazhiri wu.

55Izen kunye riye̱ rikan kuyiring be aPasova tá nye, ánerawe whe̱re̱ tseng na aUshalima nong a ta se na ka kusu nong a ta te zhe̱l, kyo̱ndi a tan me̱ ne á nye. 56Á yiir iye̱re̱k'e ka a tá di aYeso e̱. Nizen iya ba tá nyim naro̱ kuya Adakunom iben'e, á naka risim ye, “Yin di yin ane̱ e̱? A ta be̱ riye̱ rikan'e gak?”

57Amma ágbang átsi ne áner aFarisi tsang á fe̱ ye, ke akak fok karo̱ aYeso'me tú ku se, ne a ku tak ba nong á tù ku yiir.

Currently Selected:

aYohana 11: izrNT

Highlight

Copy