aYohana 14

aYeso tsesek álimazhiri wu

1“Sang tu daam yin baꞌ. Ni no̱o̱k yin katsak na Adakunom ne i ni no̱o̱k yin katsak ni mi. 2Kaye̱e̱r kasa Ada mi, naro̱ kusor kuse whe̱re̱. Ke a fa nye ye anong baꞌ, ke mi ma ka tak yin. Mi be azong nong ta se ka nye yin karo̱. 3Ke mi tseng i ta se ka nye yin karo̱'me, mi tà bun i be̱ ta ba ka sok yin nong tà se yin mak be mi. Yin ta se yin naro̱ mi tana ku se gip. 4Karo̱ kaya mi tù ku be, yin ren yin iren'e.”

aYeso ne a nye iren ku be nu Ada'me

5Ayong aToma fe̱ be aYeso ye, “Atekasa, yir ren yir karo̱ kaya wan tù ku be baꞌ. To̱, yir tà nye yir ane̱ tà ren yir iren e̱?”

6aYeso fe̱ be wu ye, “Mi ne i nye iren, ne i nye katsak ne i nye kutser. Akak ta kyem tseng nufe Ada'me baꞌ, ma a gor nunaan. 7Ke yin fan ni ren yin ke yin ren yin Ada mi. Amma kyo̱o̱rna, yin tu ren yin, yin mu ku di yin.”

8Ayong aFilibus fe̱ be wu ye, “Atekasa, ke wan ti tonong yir Ada'me, iyong ti kyem yir.”

9Ne aYeso fe̱ be wu ye, “aFilibus, wan ti ren aꞌa? Mi ta kun sor mak be yin izen dide̱ng na. Koangan a tin di, a di Ada'me. Akye̱ sak wan tá fe̱ ye, ‘Ni tonong yir Ada'me e̱?’ 10Wan ti no̱o̱k katsak ye mi se kaye̱e̱r Ada'me, ne Ada'me se kaye̱e̱r'i aꞌa? Rife̱ mi tá fe̱ be yin nye rife̱ rice mi baꞌ, Ada'me afe a ta se kaye̱e̱r'i ne a sen nye itomong wu. 11Ni no̱o̱k yin katsak rife̱ mi, mi tá fe̱ ye, mi se kaye̱e̱r Ada'me ne Ada'me se kaye̱e̱r'i. Ni no̱o̱k yin katsak ni itomong azhing mi tá nye. 12Mi ta tak yin katsak'e, koangan afe a tin no̱o̱k katsak ni mi, a tà nye ike̱re̱ iya mi tá nye. Ma i tà nar iya mi tá nye, kamok mi be nufe Ada'me. 13Koakye ne yin rip yin kaye̱e̱r riyerek'i, mi ta ka nye yin'e nong Ada'me ta se̱ kuyiik kamok igon'e. 14Koakye ike̱ng iya ne yin rip yin kaye̱e̱r riyerek'i, mi tà nye.

aYeso no̱o̱k kuto̱ ye wu tá tom be Kabik Kazhe̱l'e

15“Ke yin ti shim yin, yin tà kuus yin Itsi iya mi tá fe̱ be yin. 16Mi tà nye Ada'me izong nong a tà ka no̱o̱k yin Aner Kutobok ne a sor tà mak be yin ma izen izen. 17Wu ne a nye Kabik kafe katsak. Kazatse ta kyem ka ku shan baꞌ, kamok ka kun ku di ka ka kun ku ren baꞌ. Amma yin tú ren yin, kamok a se be yin ne a tà sor kaye̱e̱r yin. 18Mi tà ka won yin kyo̱ndi nakpiin'e baꞌ; Mi tà be̱ nufe yin. 19A tú ku won izen cie̱k, kazatse tà bin di baꞌ, amma yin tin di yin. Kamok mi be kutser, yin gip yin tà sor yin be kutser. 20Katuk'ong ne yin tà ren yin ye mi be Ada mi yir se yir azining, ne mi ma te azining be yin. 21Koangan afe a tá fok rife̱ mi ne a kuus, wu ne a tin shim. Aner aya a tin shim, Ada mi tu ku shim, mi gip mi tù ku shim ne i tonong rice mi nufu.”

22Ayong aYahuda (sang Iskariyot baꞌ) fe̱ ye, “Atekasa, akye̱ sak wan shim ta tonong rice wan nufe yir sang nufe kazatse baꞌ e̱?”

23aYeso fe̱ be wu ye, “Koangan afe a tin shim a tà kuus ike̱ng iya mi tá bo̱so̱p. Ada mi tù ku shim, ne yir be yir nufu ne i sor yir mak be wu. 24Aner aya a tin shim baꞌ, a tà kuus ike̱ng iya mi tá bo̱so̱p baꞌ. Rife̱ yin ta fok yin na nye rinaan baꞌ, rinye rife̱ Ada aya a tin tom.

25“Mi ta tas yin ike̱re̱ na cice̱r kum ne mi rusek be yin. 26Amma Aner Kutobok, a ta nye Kabik Kazhe̱l'e aya Ada tana tom'e kaye̱e̱r riyerek'i, wu ne a tà ka bo̱so̱p yin koakye, ne a ka yiring yin koakye ike̱ng mi tá fe̱ be yin. 27Mi ta won yin caang. Kusor caang'i ne ta ka no̱o̱k yin. Sang kyo̱ndi kazatse ta nyesek ne mi ta ka no̱o̱k yin baꞌ. Sang tu daam yin, sang tu fok yin inyim baꞌ.

28“Yin fok yin mi tá fe̱ ye, ‘Mi sen tseng, i tá bun i be̱ nufe yin.’ Yin fa ni shim yin, ke yin nye yin riye̱ rikan ye mi be nufe Ada, kamok Ada'me ti nar. 29To̱, kyo̱o̱rna, mi ta tak yin nizham izen'e tà ra nye, nong ke izen'e nye, yin tin no̱o̱k yin katsak. 30Mi tà ba fe̱ rife̱ be yin dide̱ng baꞌ, kamok aner aya a tin nye rigwo̱m nazatse na saase, amma a tin be kubo̱k ni baꞌ. 31Mi nye ike̱re̱ Ada tá fe̱ be mi ye i ra nye dim, nong kazatse tà ren ye mi shim Ada'me.

“Dorok yin, ta tseng yir.

Currently Selected:

aYohana 14: izrNT

Highlight

Copy