aLuka 18

Kumaas natoon akumung akak a yiir kunye aduwa

1aYeso tak álimazhiri wu kumaas na nong a tú ku bo̱so̱p ba ku yiir nye aduwa, sang á tu ro̱n baꞌ. 2Ayong a tú tak ba kumaas na ye, “Aner i to̱ amok akak tuse nuwo̱p kukak afe sang a tá fok inyim Adakunom baꞌ, a daam be ákak baꞌ. 3Akumung akak tuse nuwo̱p'e, a yiir be̱s nufe aner i to̱ amok'e ne a ku nye izong ye, ‘Ni se̱ mo na amok'i be amudo̱n'i.’

4“Ni ime̱se̱ng'e a rawu, nigang'e a bun a fe̱ ye, ‘Mi fok inyim Adakunom baꞌ, ne i ti daam be ánerawe baꞌ, gye̱rtatan, 5amma kamok akumung na ta yiir ni daam, ma mi di a se̱ katsak wu ta shim, fan a bin daam be kube̱s.’ ”

6Ne Agwo̱m Ágwo̱m fe̱ ye, “Fok yin ike̱ng iya amaan aner i to̱ amok'ong tá fe̱. 7Aser, Adakunom tà tonong katsak wu natoon aya wu tan kasa, áfe a ta tos nufu katuk be kunom aꞌa? A tà yiir kufe̱ be ba ye, ‘Ma whe̱ nizham’ a? 8Won ta ka tak yin, a tà di ma ba se̱ katsak ba ta shim zizirik. Ke Igon Anerawe be̱, a tà se̱ áfe kuno̱o̱k katsak nazatse a?”

Kumaas natoon aner aFarisi ne afe kushashang itso̱m iben akak

9aYeso tú tak ba kumaas na kamok áner aya a ta ca kafok ye, ba se zhe̱l ne a zhe̱e̱sh koangan. Ayong a tú tak ba kumaas na ye, 10“Áner ákak ba afa tseng na agbang kutu kuya Adakunom iben nong á tà se nye aduwa, azining nye aner aFarisi ne áfe afa'me nye áfe kushashang itso̱m iben. 11Aner aFarisi ame dorok nong a tá nye aduwa ye, ‘Adakunom, mi shim tá ka tonong riye̱ rikan'i, kamok sang mi se kyo̱ndi ribir ánerawe, á ta nye ákpatang, ka áfe amaan kunye baꞌ. Mi nye rikuna ne i se kyo̱ndi afe kushashang itso̱m iben na baꞌ. 12Mi nye azumi kutak kufa na asate ne i nyesek izining kaye̱e̱r kuso̱k koakye mi ta se̱.’

13“Amma afe ku shashang itso̱m iben ame nyeseng gugo̱k, a kyem a sok anyisi naza baꞌ, a korok ibo̱k nafok a tá fe̱ ye, ‘Adakunom, ro̱ riye̱ mi, mi nye afe rine̱n.’

14“Ne aYeso fe̱ be ba ye, mi tà ka tak yin afe ku shashang itso̱m iben'ong tú bun kari an te zhe̱l nasho̱o̱n Adakunom, Sang aner aFarisi ame baꞌ. Koangan ne a tiyiik rice wu a ta te be wu fe̱re̱, aner aya a tá mees rice wu a tu ku tiyiik.”

aYeso nye inoon nazhizhe̱k'e aduwa

(aMat 19.13-15; aMar 10.13-16)

15Ánerawe be̱s be inoon ba gip nufe aYeso nong a tin nye aduwa. Nizen álimazhiri wu tá di anong, yong á tu ro ánerawe'me. 16Ayong aYeso yis inoon'e nong a tá fe̱ ye, “Won yin inoon nazhizhe̱k'e tu be̱s nunaan, tu ku roon yin ba kube̱ baꞌ, kamok rigwo̱m Adakunom nye rife áner kyo̱ndi áyuna. 17Katsak ne mi ta ka tak yin, koangan ne a shan rigwo̱m Adakunom kyo̱ndi igon kahiir'e baꞌ, a tà kyem a no̱ kaye̱e̱r rigwo̱m Adakunom baꞌ.”

Ako̱k kasho̱o̱n akak a tá nye arum'e

(aMat 19.16-30; aMar 10.17-31)

18Ako̱k kasho̱o̱n akak rip aYeso ye, “Aner Kubo̱so̱p atek, akye̱ ne mi tà nye nong tà se̱ kutser kufe izen izen e̱?”

19Ne aYeso fe̱ be wu ye, “Akye̱ sak wan tin yis ye aner atek e̱? Akak kuse a ta nye atek ze̱e̱r be Adakunom baꞌ. 20Wan ren ike̱ng iya Itsi tá fe̱ ye a ra nye, ‘Sang tu nye rikuna baꞌ. Sang tu fe̱r akak baꞌ. Sang tu nye itsang baꞌ. Sang tin bo̱ naborok nakak baꞌ. Tiyiik ada be ango̱ wan.’ ”

21Ne aner ame fe̱ ye, “Ei, mi kuus ike̱re̱ na cei, kum ne mi ru nye igon.”

22aYeso tá fa fok anong, ne a fe̱ be wu ye, “Wan ru raar nike̱ng izining. Re̱e̱s koakye wan ta be, kasap áfe rizor itso̱m'e. Wan tà se̱ kurum naza nong ta be̱ tin kuus.”

23Nizen aner ame tá fok anong, a nye riye̱ riwe dide̱ng, kamok a nye arum'e dide̱ng. 24aYeso tá di riye̱ riwe wu, yong a fe̱ be wu ye, “I tà ro̱ dide̱ng arum ta no̱ kaye̱e̱r rigwo̱m Adakunom! 25I tà se we̱e̱r we̱e̱r arakumi tana gor ni izobok kufer be arum tana no̱ kaye̱e̱r rigwo̱m Adakunom.”

26Ánerawe tá fa fok anong yong á rip aYeso ye, “To̱, yong angan ne a tà se̱ kashesh'e makong e̱?”

27Ne aYeso fe̱ be ba ye, “Ike̱ng iya i ta nar agap ánerawe, i nar agap Adakunom baꞌ.”

28Ayong aBitrus fe̱ be aYeso ye, “Di, yir n wosong yir koakye yir tá be yir nong ta ka kuus yir!”

29aYeso fe̱ be ba ye, “Katsak'e ne mi tà ka tak yin, aner akak n won kasa wu ka abining ka atek be áronyining ka inoon wu kamok rigwo̱m Adakunom, 30nong a tana won dar a se̱ ike̱ng i ta nar whe̱r kyo̱o̱rna ne nizen a tana se̱ kutser kufe izen izen nasho̱o̱n baꞌ.”

aYeso bun a nye kuzarap natoon kuri riku wu

(aMat 20.17-19; aMar 10.32-34)

31aYeso na ka korok be álimazhiri wu kuso̱k be afa nukim nong a tá fe̱ be ba ye, “Yir ngarak yir i be yir na aUshalima nong koakye áner kuzarap tá zibir natoon Igon Anerawe ta shining. 32A tu ku sok a tà no̱o̱k áner aya a ta nye áner aYahuda baꞌ, a tú ku kok ko'me ne a ku kas ne a ku tang ace̱, ne a ku whereng ne a ku fe̱r. 33Katuk afe ataar a tà bun a dorok be kutser.”

34Amma álimazhiri'me ren ike̱ng iya a tin fe̱ natoon'e baꞌ. A tu ne̱r ba ike̱ng iya rife̱'me tá sor, ba ren ike̱ng iya a tin fe̱ natoon'e baꞌ.

aYeso sak akpato̱o̱n akak a tú ku nye izong te atser

(aMat 20.29-34; aMar 10.46-52)

35Nizen aYeso tá be̱ bubarak be aZheriko, akpato̱o̱n akak se nusonong nukim iren a ta sen nye izong. 36A tá fa fok rigwo̱m ánerawe ta sen gor, a rip ike̱ng iya a ta sen nye'me. 37Iyong ánerawe tu tak ye, “aYeso aner aNazaret ne a sen gor.”

38Ayong a tá kuto̱ a ta yis ye, “aYeso, Igon aDauda, ro̱ riye̱ mi!”

39Ánerawe áya a tá se nasho̱o̱n tú tigba ye a ra te gbik. Amma a bun a ti barang kuyis be agap dide̱ng ye, “Igon aDauda, ro̱ riye̱ mi!”

40Ayong aYeso nyeseng a tá fe̱ ye á ru ku be̱e̱n aner'e. A tá fa be̱ bubarak ne aYeso ku rip ye, 41“Akye̱ ne wan shim mi ta ka nye'me e̱?”

Ne aner'e fe̱ ye, “Atekasa, mi shim ta di karo̱.”

42Ayong aYeso fe̱ be wu ye, “Di karo̱, kuno̱o̱k katsak wan sak wan te atser.” 43A wor a kpaan i di karo̱ ne a kuus aYeso, ne a kerek Adakunom. Ánerawe'me tá fa di anong ne á kerek Adakunom gip.

Currently Selected:

aLuka 18: izrNT

Highlight

Copy