aLuka 4

Ishetan bo̱mo̱ng aYeso

(aMat 4.1-11; aMar 1.12-13)

1aYeso dorok ni isho̱ng aUrdun. An shining be Kabik Kazhe̱l'e, ne Kabik Kazhe̱l'e tseng be wu kaye̱e̱r katse, 2azong ne Ishetan su ku bo̱mo̱ng, inom iso̱k inaas, ko a yas baꞌ. Ni igang'e izong tu ro̱, kamok sang a tá ya naya baꞌ.

3Ishetan fe̱ be wu ye, “Ke wan ne i nye Igon Adakunom, to̱, fe̱ be kuta na nong ku ta te abiredi.”

4Ne aYeso fe̱ be wu ye, “I se ni izibir ye, ‘Sang be naya ne anerawe tin sor tsek baꞌ.’ ”

5Iyong Ishetan bun a tseng be wu naro̱ kakak ring ring, nong a tá su ku tonong rigwo̱m kazatse cei kaye̱e̱r izen cie̱k. 6Ne a bun a fe̱ be aYeso'me ye, “Mi tà ka no̱o̱k iren nong tin nye rigwo̱m natoon ike̱re̱ na cei ne kuyiik ike̱re̱'me sor i kufuan, kamok a min no̱o̱k ike̱re̱ na cei. Kamok anong mi ta kyem i no̱o̱k aner aya mi ta shim. 7Kamok anong, ke wan ti ya iben, ike̱re̱ na tà te ifuan cei.”

8aYeso fe̱ be wu ye, “I se ni izibir ye, ‘Agwo̱m Ágwo̱m wan Adakunom ne wan tù ku ya iben ne i ku nye itomong tsek.’ ”

9Iyong Ishetan tseng be wu na aUshalima, ne a ku sak a tá nyeseng naro̱ ka ta se ring ring natoon agbang kutu kuya Adakunom iben. Ne a fe̱ be aYeso'me ye, “Ke wan ne i nye Igon Adakunom, ne i furuk ma kaben. 10Kamok i se ni izibir ye,

“ ‘Adakunom tà fe̱ be ámaleka wu be agbang kuto̱

nong á ta ka te̱ne̱ng,

11ne á ka tor be ibo̱k,

fan wan bu rus kutak nuta.’ ”

12Ayong aYeso fe̱ be wu ye, “I se ni izibir ye, ‘Sang wu tu bo̱mo̱ng Agwo̱m Ágwo̱m wan Adakunom baꞌ.’ ”

13Nizen iyong Ishetan tá fa gang kubo̱mo̱ng aYeso'me cei, ne a dorok a tú ku won ma a bun a se̱ izen.

A raba aYeso na aNazaret

(aMat 13.53-58; aMar 6.1-6)

14Ayong aYeso tú bun na aGalili be kukyem Kabik Kazhe̱l'e ne itak natoon wu tseng koake̱. 15A yiir ku kubo̱so̱p ba'me kaye̱e̱r atu aduwa, #4.15: Kutu aduwa: fa: Akanang Ike̱re̱ Ikak, kaye̱e̱r nafarap'e nakak. ne koangan ku kerek.

16A be na aNazaret naro̱ a tú ku ta, a se no̱ kaye̱e̱r kutu aduwa katuk Asabar kyo̱ndi a tan me̱ ne a nye. A dorok a nyeseng nong a tà fa kufumung. 17Iyong á tú nabak kukpa Ishaya, a tá fa bisik, ne a se̱ karo̱ a tá zibir ye,

18“Kabik Adakunom se mak be mi,

kamok anong a mi n kasa

nong tá taas áfe rizor Rife̱ Ritek.

A min tom nong ta taas áfe a ta se nitso̱m ye

á ra sor washak ne i karak akpato̱o̱n anyisi,

ne i sak áfe a tá ka mo̱o̱r ba ta sor ne̱k.

19Ne i tak izen iya Adakunom tana tonong ánerawe ritek wu.”

20Ne a kunung kukpa ame nong a tá no̱o̱k aner aya a tin sak riye̱, ne a sonong. Koangan afe a ta se kaye̱e̱r kutu aduwa ame ti sak anyisi ni wu. 21Ne aYeso fe̱ be ba ye, “Katuur rife̱ na shining nato yin.”

22Koangan fe̱ itek natoon wu, ne á te zhing be Rife̱ Ritek ri tá wuruk nanu wu. Ne á na risim ye, “Igon aYusufu na aꞌa?”

23Ayong aYeso fe̱ be ba ye, “Mi ren yin tin tak yin kare̱e̱r rife̱ na ye, ‘Abok, bok rice wan! Nye ike̱ng iya yir tá fok yir ye wan nye na aKapanum aze nuwo̱p wan.’ ”

24Ne aYeso ya kasho̱o̱n be rife̱ ye, “Katsak'e, mi ta ka tak yin. Aner kuzarap be kuyiik nuwo̱p wu baꞌ. 25won ta tak yin katsak'e, ákumung tuse whe̱r niben Isarela nizen iya Iliya tá nye kuzarap, iza tá gaar kukpa aye̱ ataar be ribir, a nye izong dide̱ng kaye̱e̱r iben'e cei. 26Gip be anong, Adakunom tom Iliya nufe akak ba baꞌ, ma nufe akumung afe a ta se na aZerifat niben aSidon. 27Ánerawe tuse whe̱r á tá nye ákparo̱ng nizen Ilisha aner kuzarap, gip be anong a sak akak ba te atser baꞌ, ma aNaaman #4.27: aNaaman: fa: Akanang Ike̱re̱ Ikak, kaye̱e̱r nafarap'e nakak. aner aSuriya tsek.”

28Ánerawe á ta se kaye̱e̱r kutu aduwa'me cei nye riye̱ kubeseng dide̱ng nizen iya á tá fok anong. 29Á dorok á tú ku ro ma nama kuwo̱p'e nong á tá tseng be wu ring ring natoon kawhanang kaya a tin no̱k kuwo̱p'e, nong ase̱ á ta su ku tomong ma kaben. 30Amma aYeso'me no̱ natite ánerawe a tá tseng ako̱o̱n wu.

aYeso tun amaan kabik kaye̱e̱r aner akak

(aMar 1.21-28)

31Ayong a be na aKapanum nuwo̱p kukak niben aGalili, ne a san kubo̱so̱p ánerawe'me katuk Asabar. 32Ánerawe'me te zhing be kubo̱so̱p wu kamok rife̱ wu be kukyem.

33Aner akak tuse kaye̱e̱r kutu aduwa'me, a tá be amaan kabik, a tar kuto̱ a tá fe̱ ye, 34“Yeye! Akye̱ ne wan tse̱r be yir e̱? Wan m be̱ nong tin fe̱s yir a? Mi ta ren, wan nye azhe̱l'e afe Adakunom!”

35Ayong aYeso tú ku tigba ye, “Tigbik! Wuruk kaye̱e̱r wu.” Ne amaan kabik'e barak aner ame kaben nasho̱o̱n ba cei nong a ta wuruk dar ku kuman.

36Ánerawe'me cei te zhing, ne á naka risim ye, “Akye̱ kuri kubo̱so̱p na e̱? A fe̱ be amaan nabik be kukyem ne agbang kuto̱ ne á wuruk!” 37Ike̱ng aYeso tá nye na tseng koake̱.

aYeso sak ánerawe whe̱re̱ tá te atser

(aMat 8.14-17; aMar 1.29-34)

38aYeso won kutu aduwa'me nong a tá tseng nasa aSiman, anyining abining aSiman'e se be kuro̱m kuzhoosh dide̱ng, ne a fe̱ be aYeso ye a ra be̱ a tin sak kubo̱k ni wu nong a tà te atser. 39Ayong aYeso tiguum bubarak be wu nong a tá tigba kuro̱m kuzhoosh'e, yong a te atser. A wor a dorok a ta kpaan i ku nyes ba.

40Nizen kunom tá sen kpa, ánerawe be̱s be áfe iriri iro̱k cice̱r nufe aYeso, ne a ni saas ibo̱k natoon áfe iro̱k'e, ne á te atser. 41Ítseng gip i wuruk kaye̱e̱r ánerawe whe̱re̱, ne i tasak ye, “Wan nye Igon Adakunom.” Amma a tu tigba ba, ne a ka roon ba kufe̱ kanu, kamok ba ren ye wu ne a nye aKiristi.

42Kadiding tá fa karak ne aYeso dorok nuwo̱p'e nong a tá be naro̱ kakak wu ze̱r. Ánerawe yiir itsang á ku tse̱r. Á tá fa be̱ naro̱ kaya a tú kuse, ne á tse̱r iren fan a bu tseng a ta ka won ba. 43Amma a fe̱ be ba ye, “Ma mi taas Rife̱ Ritek natoon rigwo̱m Adakunom ni iwo̱p ikak gip, kamok ike̱ng i ta sak a tin tom'ong.”

44Ne a yiir inye awazi kaye̱e̱r atu aduwa na aGalili.

Currently Selected:

aLuka 4: izrNT

Highlight

Copy