aMatiyu 13

Kumaas natoon aner akak a tá se nas naya

(aMar 4.1-9; aLuk 8.4-8)

1Katuk kayong, aYeso tá fa wuruk kaye̱e̱r kasa'me nong a tá be nukim agbang kudung aGalili. 2Rigwo̱m ánerawe whe̱re̱ tú ku gorok ma aYeso'me se no̱ kaye̱e̱r kukpara ashi nong a ta sonong kaye̱e̱r'e. Ánerawe'me nyeseng nukim agbang kudung'e. 3Ayong a tú ku taas ba ike̱re̱ whe̱re̱ be ku ninye kumaas. A fe̱ ye, “Aner ikap akak tseng a ta se nas naya riko̱. 4Nizen iya a ta se be i nas'e, íca'me ikak kpas niren ne nanon be̱s ne na kok. 5Ica'me ikak kpas nifang agudong naro̱ ka ta be iben dide̱ng baꞌ. I tang zizirik kamok iben'e se tsik baꞌ. 6Amma kunom tá fa tar ne ato'me wor a koor kamok atsip'e se̱ iben baꞌ. 7Íca'me íkak kpas kaye̱e̱r ikiritsan ne ikiritsan'e ku te̱ne̱ng ba kurasak. 8Ica'me ikak kpas naro̱ katek ne i te kusu saase, ikak kuso̱k inyak ne ikak te ace iso̱k igataar ne ikak te iso̱k itaar ne i nar ike̱ng iya a ta nas. 9Aya a ta be ato kufok a ra fok.”

Ike̱ng i tá sak aYeso tá bo̱so̱p ánerawe'me be kumaas

(aMar 4.10-12; aLuk 8.9-10)

10Iyong álimazhiri wu be̱ nufu nong á tu ku rip ye, “Akye̱ sak wan fe̱ ne i ninye kumaas e̱?” 11aYeso fe̱ be ba ye, “Yin a ta no̱o̱k yin kukyem kuren ike̱re̱ rigwo̱m kaza, ike̱re̱ i ta se nune̱re̱ng. Amma ba a tu shim ba'me baꞌ. 12Aner afe a ta be ike̱ng, a tú ku barang mo, nong i ta se̱ whe̱re̱. Aner afe a ta be baꞌ, cie̱k wu ta be'me gip, a tin shan ni wu. 13Ike̱ng i ta sak mi ta fe̱ be ba ne i ninye kumaas se ye:

“Kamok ko ba ye̱re̱k, á ta di baꞌ.

Ko á foos á ta ren ike̱ng iya a tin fe̱ baꞌ.”

14Aser, kuzarap Ishaya te shining natoon ba, ku ta fe̱ ye,

“ ‘Yin tà foos yin gye̱r, yin tà ra ren yin ike̱ng iya a tin fe̱ baꞌ, ko cie̱k;

Yin tà ye̱re̱k yin gye̱r, yin tà ra di yin baꞌ, ko cie̱k.

15Kamok aye̱ ánerawe'me n te kyo̱ndi kuta;

á fok kuto baꞌ.

Á whe̱se̱ng anyisi ba fan á bu di be anyisi ba,

Ke anong baꞌ, ke á ye̱re̱k be anyisi ba ne á foos be ato ba,

ne á ren ike̱ng iya a tin fe̱,

ne ba kirik nunaan ne mi ku sak ba á tà te atser.’

16“Amma aner riye̱ rikan nye yin kamok anyisi yin ta di ne ato yin foos. 17Katsak'e ne mi ta ka tak yin, áner kuzarap whe̱re̱ ne áya a ta se gye̱r nasho̱o̱n Adakunom shim ke á di ike̱re̱ yin ta ye̱re̱k yin, á ra di baꞌ, ne á foos ike̱re̱ yin ta foos yin, á ra fok baꞌ.

Kumaas natoon aner a tá nas ica naya'me ta sor

(aMar 4.13-20; aLuk 8.11-15)

18“To̱, fok yin ike̱ng iya kumaas natoon aner ikap'e ta sor. 19Ke anerawe fok rife̱ natoon rigwo̱m kaza, a ra ren ike̱ng iya i ta sor baꞌ. Amaan aner'e be̱ nong a ta turung ike̱ng iya a tan tuus kaye̱e̱r riye̱ aner'e. Ayong ne a nye íca'me iya i ta kpas niren. 20Iya i ta kpas nifang agudong nye aner aya a ta fok rife̱'me gbashak ne a wor a shan be riye̱ rikan. 21Amma sang a ra be atsip baꞌ, a sor nizen cie̱k tsek. Izen iya ne kudaam ka kutabak be̱ kamok rife̱ Adakunom'me ne a wor a kubun kama. 22Íca'me iya i tá kpas kaye̱e̱r ikiritsan nye aner a ta fok rife̱'me, amma ke izen iya ne kudaam kusor kazatse be kushim kurum tu ku daam ne a beseng. 23Ike̱ng á tá tuus niben itek ne i nye aner a ta fok rife̱'me ne a ren ike̱ng iya rife̱'me ta sor. A te ace kuso̱k inyak ne íkak iso̱k igataar ka iso̱k itaar ne i nar ike̱ng iya a tá tuus.”

Kumaas natoon agam a ta tang kaye̱e̱r alikama

24aYeso bun a tu tak ba kumaas kukak gbak ye, “Rigwo̱m kaza se kyo̱ndi aner a tá nas alikama riko̱ wu. 25Nizen iya koangan ta se nida, ne amudo̱n wu be̱ a tin nas agam kaye̱e̱r alikama'me nong a tá tseng akon wu. 26Nizen alikama'me tá turung ace ne agam'me ma wuruk gip.

27“Ásam atek riko̱'me be̱ á ta fe̱ be wu ye, ‘Atekasa, aser wan nas izha itek wu aꞌa? Agam nye ane̱ a ti wuruk anong e̱?’

28“Ayong atekasa'me fe̱ be ba ye, ‘Amudo̱n'i akak ne a se nye ike̱ng iyong.’

“Ásam wu'me fe̱ be wu ye, ‘Wan shim ta se inga yir agam'me a?’

29“Amma atekasa'me fe̱ be ba ye, ‘Wayo, kamok ke yin se inga yin agam'me yin tà inga yin mak be alikama'me gip. 30Ka won yin ba cice̱r nong a ta rasak mak ma nizen ishamang'e. Nizen iyong ne mi tà fe̱ be áfe kutse̱k'e ye, Tusung yin agam'me ta rosom yin na agwo̱m nong tin te yin kuro̱ng; ne i tusung yin alikama'me ta be̱ tin korok yin'e ni ingme̱.’ ”

Kumaas be ica kakon a ta yis ye amusta

(aMar 4.30-32; aLuk 13.18-19)

31aYeso bun a tú ku nye ba kumaas kukak ye, “Rigwo̱m kaza se kyo̱ndi ica amusta anerawe tá sok a ta tuus riko̱ wu. 32I ta nye ica kakon ihiir'e kaye̱e̱r ribir ica nakon yin, izen iya ne i rasak ne i nar nakon i ta tuus cice̱r kagbang'e, i te ritin ma nanon ti no̱k are̱ niwhang'e.”

33A bun a tu nye ba kumaas kukak gbak ye, “Rigwo̱m kaza se kyo̱ndi ayisti #13.33: Ayisti: fa: Akanang Ike̱re̱ Ikak, kaye̱e̱r nafarap'e nakak. aya abining akak tá sok a tin gung be amudu ataar afe ikpe alikama ma alikama'me dorok a ta te cip.”

aYeso ti nye itomong be kumaas

(aLuk 13.33-35)

34aYeso taas rigwo̱m ánerawe ike̱re̱'ong cice̱r be kumaas a fe̱ ike̱ng ikak dar a ninye kumaas baꞌ. 35aYeso nye anong, nong a ta shining ike̱ng aner kuzarap akak ta fe̱ ye,

“Mi tà fe̱ kanu be kumaas nizen iya mi ta sen fe̱ be ba.

Mi tù ku taas ba ike̱re̱ iya a tá tsang a ka ne̱r ba'me gbugbang kum nizen a ta nye kazatse.”

aYeso fe̱ ike̱ng ife kumaas'e natoon agam be alikama tá sor

36Ayong aYeso won rigwo̱m ánerawe ame a ta no̱ kari. Álimazhiri wu su kuse̱ nong á ta fe̱ be wu ye, “Ni tak yir ike̱ng iya kumaas natoon agam, a tá tang kaye̱e̱r riko̱ ame ta sor.”

37aYeso fe̱ be ba ye, “Aya a ta nas izha itek'e nye Igon Anerawe. 38Riko̱'me nye kazatse, ne izha itek'e sor inoon rigwo̱m Adakunom. Agam'me nye inoon amaan aner'e. 39Ne amudo̱n aya a ta nas naya'me nye Ishetan. Ishamang'e nye izen afe kazatse tana gang, ne áfe kutse̱k'e nye ámaleka.

40“Kyo̱ndi a ta tusung agam nong a ta te nuro̱ng, anong ne i ta se nizen kazatse tana gang. 41Igon Anerawe tà tom ámaleka wu, á tù ku tusung cice̱r áfe a ta sak ánerawe tá nye rine̱n ne áya a tà nye amaan kunye cice̱r. 42Ne á ku barak ba kaye̱e̱r kuro̱ng kufe izen izen, á ta tos ne á ya anyi azong. 43Ne áya a ta se gye̱r nasho̱o̱n Adakunom ta sam kyo̱ndi akanang kunom kaye̱e̱r rigwo̱m Ada ba. Aner a ta be ato kufok a ra fok.

Kurum a ta ne̱r

44“Rigwo̱m kaza se kyo̱ndi kurum a ta ne̱r niben kaye̱e̱r riko̱ ke izen iya aner akak se se̱'me ne a bun a ku ne̱r. Be riye̱ rikan a ta se re̱e̱s ike̱re̱ wu cice̱r nong a ta sen shan riko̱'me.” 45A bun a fe̱ gbak ye, “Rigwo̱m kaza se yiik kyo̱ndi iwe̱re̱ng i ta sas afe kushashang'e ta tse̱r. 46Izen iya ne a se̱ iya i ta nye itek'e dide̱ng ne a tseng nong a ta se re̱e̱s ike̱re̱ wu cice̱r nong a tin shan mo.”

Kumaas be aner a ta be agunung

47A bun a fe̱ be ba gbak ye, “Rigwo̱m kaza se kyo̱ndi agunung a tá te kaye̱e̱r kudung nong a tin yising ízos iriri'me. 48Izen iya ne a shining be ízos ne áfe kuyising ízos'e korok nukim, nong á ta sonong á ta kasa itek ne á tusung ni iderse ne á nyosong iya i ta nye itek baꞌ. 49Anong ne i ta se izen kazatse tana gang, ámaleka Adakunom ta be̱ nong á ta kam ámaan aner be átek'e. 50Ne á barak ámaan'e kaye̱e̱r kuro̱ng kufe izen izen á ta tos ne a ya anyi azong.”

Kubo̱so̱p kufas be kuzen

51aYeso tú ku rip ba ye, “Yin ren yin ike̱ng ife ike̱re̱ na tá sor a?” Iyong á fe̱ be wu ye, “Ei.”

52Ayong aYeso fe̱ be ba ye, “Kamok anong, koangan aner kubo̱so̱p Itsi aya a ta mu ku tak itak rigwo̱m kaza se kyo̱ndi atekasa a tana turung ike̱re̱ izen be ifas wu tan tusung nong a tin nye itomong.”

A raba aYeso na aNazaret

(aMar 6.1-6; aLuk 4.16-30)

53Nizen aYeso tá gang ku kataas ba kumaas'e, ne a ya kasho̱o̱n be kutseng. 54A be̱ nuwo̱p wu, yong a san kubo̱so̱p ánerawe'me kaye̱e̱r kutu aduwa ba'me, áya a tu ku foos te zhing. Ne á fe̱ ye, “Áner na se̱ kukyem kuri kuyu ake̱, ne kukyem kunye itomong azhing na ake̱ e̱? 55Igon akapinta na aꞌa? Ango̱ wu ne a nye aMarya aꞌa, áronyining ne a nye aYakub be aYusufu ne aSiman be aZhud aꞌa? 56Ángasnyining wu cice̱r se mak be yir aꞌa? Iyong wu se̱ ike̱re̱ na cice̱r ake̱ e̱?” 57Iyong á nye riye̱ kubeseng be wu.

Ne aYeso fe̱ be ba ye, “Aner kuzarap be kuyiik koake̱ amma a be kuyiik nuwo̱p wu be kari wu baꞌ.”

58A nye itomong azhing dide̱ng azong baꞌ, kamok kuwon dar kuno̱o̱k katsak ba.

Currently Selected:

aMatiyu 13: izrNT

Highlight

Copy