aMatiyu 14

Riku aYohana aner abatisma

(aMar 6.14-29; aLuk 9.7-9)

1Nizen iyong, aHiridus tá fok itak aYeso. 2Ayong a fe̱ be áfe itomong wu ye, “Aner'e nye aYohana aner abatisma, wu ne ku dorok nure̱k. Iyong ne i sak a ta nye ike̱re̱ azhing anong.”

3Kamok aHiridus tsang a yiir aYohana nong a tá rosom ne a ku te nitso̱m kamok aHirudiya, abining aronyining wu, aFilibus. 4Kamok aYohana ta yiir ife̱ be wu ye, “I se gye̱r a tá sok aHirudiya nong a tin nye abining baꞌ.” 5aHiridus tsang a shim ke a fe̱r aYohana, amma a ra fok inyim kamok ánerawe sok ye aYohana nye aner kuzarap Adakunom.

6Katuk kukak izen kunye riye̱ rikan kuyiring be kutes aHiridus tá fa nye, angas aHiridus tá to nato nasho̱o̱n ánerawe a ta tseng sak ma aHiridus nye riye̱ rikan dide̱ng. 7Ayong aHiridus no̱o̱k kuto̱ ye, wu tu ku no̱o̱k ike̱ng iya wu tá shim. 8Ango̱ wu tú ku tak ike̱ng iya a tana fe̱, yong a fe̱ ye, a ra ku no̱o̱k rice aYohana aner abatisma kaye̱e̱r kures. 9aHiridus'e daam dide̱ng, amma kamok wu tá tsang a no̱o̱k kuto̱ nasho̱o̱n ánerawe, yong a sak a tu ku no̱o̱k ike̱ng iya wu tá rip. 10A tom á ta se te̱n rice aYohana'me nitso̱m. 11Iyong á be̱ be rice'me kaye̱e̱r kures. Á ta no̱o̱k kanamang ame. Ne kanamang ame sok a tá se no̱o̱k ango̱ wu. 12Álimazhiri aYohana be̱ á tá sok kubir kuro̱m'me nong a ta se ne̱r'e. Ne á se tak aYeso ike̱ng iya i tá nye.

aYeso no̱o̱k ánerawe izungu itoon naya

(aMar 6.30-34; aLuk 9.10-17; aYoh 6.1-14)

13Nizen aYeso tá fok itak'e, iyong a dorok azong a tá no̱ nukpara ashi a tá be naro̱ kakak wu ze̱r. Ánerawe tá fok anong ye, á won kuwo̱p'e ayong á tú ku kuus be atak. 14Nizen aYeso tá wuruk kaye̱e̱r kukpara ashi'me, a di rigwo̱m ánerawe ame, ne a fok kuro̱ riye̱ ba iyong a sak áya a ta nye atser kaye̱e̱r ba baꞌ, tá te atser.

15Kawheshirim tá fa nye, álimazhiri wu be̱ nufu á tá fe̱ ye, “Aze nye katse, izen m bo̱ karo̱. Won ánerawe nong á ta tseng ni iwo̱p i ta se bubarak nong á ta se shan naya.”

16aYeso fe̱ be ba ye, “Sang ma ba tseng baꞌ. Yin ku no̱o̱k yin ba ike̱ng ikak nong á ta ya.”

17Iyong alimazhiri'me fe̱ be wu ye, “Yir be yir agbang abiredi atoon be izos ifa aze tsek.”

18aYeso fe̱ be ba ye, “Ni no̱o̱k yin aze.” 19Ne aYeso fe̱ be ánerawe'me ye á ra sosok kaben natoon agam. A sok ágbang abiredi atoon ame be izos ifa'me, a tá sok rice naza a tá tonong riye̱ rikan wu be Adakunom ne a te̱se̱ng. Ne a no̱o̱k álimazhiri wu nong álimazhiri wu'me ta kasap ánerawe'me. 20Ánerawe'me cice̱r ya ma á whas, ne álimazhiri'me bun á tusung ribir'e ife i tú ku tuk ma ishining iderse kuso̱ be afa. 21Áner afe a tá ya nye átek izungu itoon ze̱e̱r be ányining ne inoon.

aYeso tseng natoon ashi

(aMar 6.45-52; aYoh 6.16-21)

22Nama anong, aYeso sak álimazhiri wu tá no̱ kaye̱e̱r kukpara ashi nong á ta tar nunyi kudung'e nasho̱o̱n wu nong wu ta te ánerawe'me niren. 23Nizen aYeso tú ku te ba niren. A se ngarak natoon kawhanang wu ze̱r nong a tá nye aduwa. Nizen kawheshirim tá fa nye, aYeso se azong wu ze̱r. 24Amma kukpara ashi'me se natite ashi, agung ashi tú ku daam ba dide̱ng kamok kuwun tu se dide̱ng.

25Nabas itso̱m inaas ife kadiding, aYeso ti wuruk niba. A tá tseng natoon ashi. 26Nizen álimazhiri'me tú ku di a tá sen tseng natoon ashi, inyim tu ro̱ ba, ma á korok ikun, ne á fe̱ ye, “Ike̱ng'e nye itseng.”

27aYeso wor a fe̱ be ba ye, “Na ka tsesek yin, mi'ong. Sang yin tu fok yin inyim baꞌ.”

28Ayong aBitrus fe̱ be wu ye, “Atekasa, ke aner'e nye wan ne i fe̱ be nong mi tá be̱ nufuan natoon ashi'me.”

29aYeso fe̱ be wu ye, “Be̱.”

Ayong aBitrus wuruk kaye̱e̱r kukpara ashi'me a ta san kutseng natoon ashi ame a be nufe aYeso. 30Amma nizen a tá fok kuwun'e tá fe̱se̱m a fok inyim, ne a san ku wei kaye̱e̱r ashi'me yong a tá kukun ye, “Atekasa, ni shesh!”

31aYeso wor a nabak kubo̱k zizirik a tú ku ko̱ro̱k. Ne a fe̱ be wu ye, “Wan afe kuno̱o̱k katsak wan ta gop baꞌ. Akye̱ sak riye̱ wan se gak e̱?”

32Nizen iya á tá fa no̱ ba kaye̱e̱r kukpara ashi'me ne kuwun'e nyeseng. 33Áya a ta se kaye̱e̱r kukpara ashi'me tú ya iben ne á fe̱ be wu ye, “Katsak'e, wan nye Igon Adakunom.”

aYeso sak aner kuro̱k akak tá te atser na aGenesaret

(aMar 7.1-3)

34Nizen á ta tar á be niben aGenesaret. 35Áner kuwo̱p'e tá di aYeso á ren. Iyong á tsang á taas itak'e cei ni iwo̱p ibubarak'e. Ánerawe'me be̱s be áfe iro̱k nufu. 36Ne á ku nye izong ye, a ra shim nong á ta ras kanu kukpiin wu tsek. Áya a tá ras cice̱r te atser.

Currently Selected:

aMatiyu 14: izrNT

Highlight

Copy