aMatiyu 15

Igo̱o̱n átukop yir áfe agbugbang'e

(aMar 7.1-3)

1Iyong áner aFarisi ne áner kubo̱so̱p Itsi dorok na aUshalima nong á tá be nufe aYeso á tá su ku rip ye, 2“Akye̱ sak álimazhiri wan gaar ku kuus igo̱o̱n átukop yir ba ta ya naya dar ku kusu ibo̱k e̱?”

3aYeso fe̱ be ba ye, “Akye̱ sak yin ta won yin Itsi Adakunom nong i ta kuus yin igo̱o̱n yin e̱? 4Adakunom fe̱ ye, ‘Te yiik Ada wan be ango̱ wan, aya ne a kas ada wu ka ango̱ wu ayi, a tù ku fe̱r dim.’ 5Amma yin fe̱ yin ye, ke aner be ike̱ng iya a tanin tobok ada ka ango̱ wu ayi, amma a ra fe̱ ye, ‘Ike̱ng i ta se ye mi tà ka no̱o̱k yin iyong ne mi no̱o̱k Adakunom.’ 6Sang i se ye ma aner'e ra te yiik atek wu baꞌ. Yin won yin rife̱ Adakunom kamok igo̱o̱n yin. 7Yin ákardak áner, Ishaya fe̱ gye̱r nizen a tá nye kuzarap natoon yin ye,

8“ ‘Ánerawe na tiyiik be nanu ba tsek,

amma aye̱ ba se gugo̱k be mi.

9Ba ti ya iben nawarak tsek,

kamok ike̱ng ba ta bo̱so̱p ánerawe'me nong nye igo̱o̱n anerawe.’ ”

Ike̱re̱ i ta sak ánerawe ta won dar a se zhe̱l

(aMar 7.14-23)

10aYeso yis rigwo̱m ánerawe na tá fe̱ be ba ye, “Wesek yin ato ta fok yin. 11Sang ike̱ng i ta no̱ nanu ánerawe ne i ku sak a ta won dar a se zhe̱l baꞌ, ma ike̱ng i ta wuruk nanu wu.”

12Iyong álimazhiri wu be̱ nufu á ta fe̱ ye, “Wan ren ye aner aFarisi aye̱ beseng be ike̱ng iya wan tá fe̱'ong aꞌa?”

13A fe̱ be ba ye, “Koakye ike̱ng ife sang Ada mi afe a ta se naza ne a tuus baꞌ, a tà inga cei ma na atsip'e. 14Yin ku won yin ba, á nye ákpato̱o̱n á sen naka ko̱k ishe̱n. Ke akpato̱o̱n ko̱k afudang ishe̱n, cice̱r ba á ta kpas kaye̱e̱r ribong.”

15Amma aBitrus fe̱ be wu ye, “Ni tak yir ike̱ng iya kumaas'e tá sor.”

16Ayong aYeso fe̱ be ba ye, “Aser, yin rusek yin na awhi gip a? 17Yin ren yin ye ike̱ng ife i ta no̱ nanu ne i tseng kaye̱e̱r kafa nizham i ta ra se wuruk aꞌa? 18Amma ike̱re̱ i ta wuruk nanu anerawe nes kaye̱e̱r riye̱ wu, iyong ne i sak anerawe ta won dar a se zhe̱l. 19Kamok kaye̱e̱r riye̱ ne amaan kuto̱ro̱ng nes, ike̱re̱ kyo̱ndi kufe̱r akak, be rikuna, ne kunyiis kuro̱m kpe̱de̱ng, be itsang, ne abo̱o̱s, be kukas Adakunom. 20Ike̱re̱ iyong ne i sak anerawe ta won dar a se zhe̱l, kuya naya dar ku kusu ibo̱k ta kyem sak anerawe ta wor dar a se zhe̱l baꞌ.”

Kuno̱o̱k katsak abafe aKana akak

(aMar 7.24-30)

21aYeso dorok azong a tá be niben aTaya be aSidon. 22Abining akak tuse azong a tá nye abafe aKana'me be̱ nufu be kanak ye, “Atekasa, Igon aDauda, ro̱ riye̱ mi, angas'i so̱ risam dide̱ng be amaan kabik.”

23aYeso fe̱ ike̱ng ikak be wu baꞌ. Iyong álimazhiri wu be̱ nufu á tú ku nye izong ye, “Ku te niren, a tsang a ni kuus yir ne a ni daam yir be kanak.”

24A fe̱ be ba ye, “A ti tom nufe itsamang Isarela iya i ta wei tsek.”

25Abining ame be̱, a tá tigbok akuur nasho̱o̱n aYeso a tá fe̱ ye, “Atekasa, ni se̱ mo.”

26aYeso fe̱ be wu ye, “I se gye̱r a ta sok naya inoon nong a ta no̱o̱k ágabu baꞌ.”

27Abining'e fe̱ be wu ye, “I se anong gye̱r, Atekasa, amma ágabu #15.27: Ágabu: Koangan afe sang a ta nye aner aYahuda baꞌ. Áner aYahuda tú sok kyo̱ndi agabu. kyem á ya naya atekasa ba nafe na ta kpas kaben.”

28Ayong aYeso fe̱ be wu ye, “Anyiningkasa, kuno̱o̱k katsak wan se gaan. Ike̱ng wan ta shim a tà ka nye'me.” Nizen iyong angas wu ame wor a te atser.

aYeso sak ánerawe whe̱re̱ tá te atser

29aYeso dorok a tá gor nukim kudung aGalili. A tá ngarak natoon kawhanang a tá se sonong azong. 30Ánerawe whe̱re̱ be̱s nufu. Á be̱s be ákun be ákpato̱o̱n ne ágbanu be áfe iro̱k whe̱re̱. Á be̱s'e nasho̱o̱n wu ne wu ku sak ba á ta te atser. 31Ánerawe te zhing nizen ba tá di ágbanu tá fe̱ kanu ne ákun be áfe a ta yising te atser ne ákpato̱o̱n di karo̱. Iyong á kerek riyerek Adakunom afe Isarela.

aYeso no̱o̱k ánerawe izungu inaas naya

(aMar 8.1-18)

32aYeso yis álimazhiri wu a tá fe̱ be ba ye, “Mi fok kuro̱ riye̱ ánerawe na kamok ba n te inom itaar be mi, á be ike̱ng kuya baꞌ. Mi shim tu ku te ba niren anong be izong baꞌ. Ke anong baꞌ á ta te gbe̱re̱k niren.”

33Iyong álimazhiri wu fe̱ be wu ye, “Ake̱ ne yir ta se̱ yir naya aze katse na nong ta no̱o̱k yir rigwo̱m ánerawe kuri riyu e̱?”

34aYeso tú rip ba ye, “Yin be yin ágbang abiredi ámang e̱?” Iyong á fe̱ ye, “Agbang abiredi kanataar be ízos cie̱k tsek.”

35aYeso fe̱ be ánerawe'me ye á ra sosok kaben. 36Ne a sok ágbang abiredi kanataar ame be ízos'e a tin tonong riye̱ rikan wu be Adakunom, ne a te̱se̱ng a tá no̱o̱k álimazhiri wu nong á ta se nyesek ánerawe'me. 37Koangan ba ya ma á whas. Nizen á tá gang kuya'me álimazhiri wu tusung ribir'e. I tú ku tuk ma i shining iderse kanataar. 38Ánerawe áfe a tá ya nye átek izungu inaas ze̱e̱r be ányining be inoon. 39Nizen iya aYeso tá te ánerawe'me niren, a no̱ kaye̱e̱r kukpara ashi á tá be niben aMagadan.

Currently Selected:

aMatiyu 15: izrNT

Highlight

Copy